ᑲᓇᑕᒥ ᑎᑎᖅᑲᕐᓂᐊᕐᕕᖓ ᑭᐅᕗᖅ ᒪᑐᓯᒪᔪᒥ ᐋᒪᓵᓐᑯᓐᓂ ᓈᒻᒪᙱᓐᓂᐅᔪᒥ ᒪᓕᒐᖏᓐᓂ

For the English version of this story, please see ‘Canada Post does not provide free shipping:’ corporation says of closed Amazon loophole.

ᒪᓕᒃᑐᒥ ᒫᓐᓇᓕᓴᐅᔪᒥ ᐊᑭᕋᖅᑐᕐᓂᐅᔪᓂ ᒪᓕᒐᓕᐅᖅᑎᓂ, ᑲᓇᑕᒥ ᑎᑎᖅᑲᕐᓂᐊᕐᕕᖓ ᐃᖅᑲᐃᑎᑦᑎᕗᑦ ᓄᓇᕗᒻᒥᐅᓂ ᓇᓗᓇᐃᖅᓯᓂᕐᒥ ᑕᒻᒪᖅᓯᒪᙱᑦᑐᓂ ᑎᑎᖅᑲᓄᑦ ᑐᕌᕈᑎᖏᓐᓂ ᓇᒃᓯᐅᔾᔨᑎᓪᓗᒋᑦ ᑐᔫᑕᐅᔪᓂ ᐅᑭᐅᖅᑕᖅᑐᒧᑦ.

ᐃᓚᖏᓐᓂ ᓄᓇᕗᒻᒥ ᓯᕗᓕᐅᖅᑎᐅᔪᓂ ᐅᖃᓪᓚᓚᐅᖅᐳᑦ ᒪᓕᒐᓕᐅᕐᕕᖕᒥ ᒪᐃ ᓄᙳᐊᓂ ᖃᓄᖅ ᑲᓇᑕᒥ ᑎᑎᖅᑲᕐᓂᐊᕐᕕᖓᑕ ᒫᓐᓇᓕᓴᐅᔪᒥ ᒪᑐᔭᐅᓂᖓᓂ ᓈᒻᒪᙱᓐᓂᐅᔪᒥ ᒪᓕᒐᖏᓐᓂ — ᓄᓇᖃᖅᑎᐅᔪᑦ ᐊᑭᖃᙱᑦᑐᒥ ᐅᕝᕙᓘᓐᓃᑦ ᐊᑭᑭᓂᖅᓴᐅᔪᒥ ᐅᓯᔭᐅᓂᖓᓂ ᓂᐅᕕᖅᑎᐅᔪᓂ ᓲᕐᓗ ᐋᒪᓵᓐᑯᓐᓂ ᐃᓕᓯᓪᓗᑎᒃ ᑕᒻᒪᖅᓯᒪᔪᒥ ᑎᑎᖅᑲᕐᓂᐊᕐᕕᐅᑉ ᓇᓗᓇᐃᒃᑯᑕᖓᓐᓂ ᑎᑭᓴᖅᑕᖏᓐᓂ — ᐊᒃᑐᐃᓯᒪᓂᖓᓂ ᓂᕈᐊᖅᑕᐅᑎᓯᒪᕝᕕᖓᓐᓂ

ᐃᓚᒋᔭᐅᔪᓄᑦ ᐅᖃᐅᓯᒃᓴᓕᐊᖑᔪᒥ, ᖁᑦᑎᒃᑐᒥ ᒪᓕᒐᓕᐅᖅᑎ ᑕᐃᕕᑦ ᐊᕿᐊᕈᖅ ᐅᖃᓚᐅᖅᐳᖅ ᓅᓐᓂᐅᔪᖅ “ᐱᐅᙱᑦᑐᒥ ᐊᕐᑐᐃᓂᖃᖅᓯᒪᓂᖓᓂ” ᓂᕈᐊᖅᑕᐅᑎᓯᒪᕝᕕᖓᓐᓂ ᐊᐅᓱᐃᑦᑐᕐᒥ, ᖃᐅᓱᐃᑦᑐᖅ ᐊᒻᒪ ᐃᒃᐱᐊᕐᔪᖕᒥ.

ᐊᔭᐅᕆᒪᐅᖅᐳᖅ ᖃᐅᔨᒋᐊᕋᓱᐊᕐᓂᖏᓐᓂ ᑲᓇᑕᒥ ᑎᑎᖅᑲᕐᓂᐊᕐᕕᖓᓐᓂ ᐊᒻᒪ ᒐᕙᒪᑐᖃᒃᑯᓐᓂ ᖃᐃᖁᔨᓂᐅᔪᒥ ᐊᑭᑭᓐᓂᖅᓴᓂ ᐅᓯᑲᑦᑕᖅᑕᐅᓂᖏᓐᓄᑦ.

“ᐱᓕᕆᖃᑕᐅᓂᐊᖅᐳᖓᑦᑕᐅᖅ ᑎᑎᕋᕐᒥᓗᓂ ᑎᑎᖅᑲᓂ,” ᐊᕿᐊᕈᖅ ᐅᖃᓚᐅᖅᐳᖅ ᒪᐃ 27−ᒥ.

ᑮᓇᐅᔭᓕᕆᔨᒃᑯᓐᓂ ᒥᓂᔅᑕᖓ ᓗᐊᓐ ᑯᓱᒐᖅ, ᑭᒡᒐᖅᑐᐃᔪᒥ ᑲᖏᖅᖠᓂᕐᒥ ᓂᒋᕐᒥ, ᐅᖃᐱᓘᑎᖃᓚᐅᕆᕗᖅ ᑎᑎᖅᑲᓕᕆᔨᐅᔪᓂ ᒪᐃ 30−ᒥ ᐃᓚᒋᔭᐅᔪᓄᑦ ᐅᖃᐅᓯᒃᓴᓕᐊᖓᓐᓂ ᐅᖃᖅᖢᓂ “ᓄᓇᓯᐅᑎᓂ ᐅᓯᕐᔪᐊᖅᑐᓂ” ᑐᔫᓯᐊᓂ ᑲᖏᖅᖠᓂᕐᒥ, ᓲᕐᓗ ᓄᑕᕋᓛᓄᑦ ᓂᕿᒃᓴᓂ ᐊᒻᒪ ᖁᐃᖏᓕᓴᕐᓂ, ᐅᑎᖅᑎᑕᐅᓂᖏᓐᓂ ᖃᓪᓗᓈᑦ ᓄᓇᖓᓐᓄᑦ.

“ᓈᒻᒪᒃᓯᕗᖅ ᑲᓇᑕᒥ ᑎᑎᖅᑲᕐᓂᐊᕐᕕᖓ ᕿᒥᕐᕈᓂᖏᓐᓂ ᖃᓄᐃᓕᐅᕐᓂᖏᓐᓂ; ᐋᓐᓂᖅᓯᕆᕗᑦ ᐃᓄᖁᑎᑦᑎᓐᓂ ᓄᓇᕗᒻᒥ,” ᑯᓱᒐᖅ ᐅᖃᓚᐅᖅᐳᖅ.

“ᐊᔭᐅᕆᕗᖓ ᓄᓇᕗᒻᒥᐅᓂ ᑎᑎᕋᕐᓂᖏᓐᓄᑦ ᑲᓇᑕᐅᑉ ᒪᓕᒐᓕᐅᖅᑎᖏᑦᑕ ᐃᓚᒋᔭᐅᔪᒧᑦ, ᑎᑎᕋᕐᓗᓯ ᒐᕙᒪᑐᖃᒃᑯᑦ ᒥᓂᔅᑕᖓᓄᑦ ᑲᒪᒋᔭᖃᖅᑐᒥ, ᐃᓄᐃᑦ ᐊᒃᓱᓪᓘᓐᓃᑦ ᐊᑭᓖᔪᓐᓇᕋᔭᕐᓂᖏᓐᓂ ᐃᓚᖏᓐᓂ ᑭᓱᑐᐃᓐᓇᓂ ᓂᐅᕕᕈᓐᓇᙱᑕᑦᑎᓐᓂ ᐅᑭᐅᖅᑕᖅᑐᒥ.”

ᑯᓱᒐᖅ ᐊᐱᕆᓚᐅᕆᕗᖅ ᓄᓇᖃᖅᑎᐅᔪᓂ ᐊᑲᖅᓴᙱᓐᓂᖏᓐᓂ ᑐᕌᖅᑎᑦᑎᙱᓐᓂᖏᓐᓂ ᓄᓇᓕᖕᓂ ᑲᓇᑕᒥ ᑎᑎᖅᑲᕐᓂᐊᕐᕕᖓᓂ ᐃᖅᑲᓇᐃᔭᖅᑎᐅᔪᓄᑦ.

“ᐱᑎᑦᑎᓂᖃᙱᓚᑦ, ᐊᐅᓚᑦᑎᔨᐅᔪᓂ ᑲᓇᑕᒥ ᑎᑎᖅᑲᕐᓂᐊᕐᕕᖓᓂ ᖃᓪᓗᓈᑦ ᓄᓇᖓᓐᓂ ᐱᑎᑦᑎᕗᑦ,” ᐅᖃᓚᐅᖅᐳᖅ.

ᑲᓇᑕᒥ ᑎᑎᖅᑲᕐᓂᐊᕐᕕᖓ ᐃᖏᕐᕋᑎᑦᑎᓲᖑᕗᑦ ᖃᓂᒋᔭᖓᓂ 280−ᓂ ᖃᖓᑕᓂᐅᔪᓂ ᐱᓇᓱᐊᕈᓯᑕᒫᒥ ᐅᑭᐅᖅᑕᖅᑐᒥ ᐊᒻᒪ ᐅᖓᑎᒃᑐᓂ ᓄᓇᓕᐅᔪᓄᑦ, ᐅᖃᓚᐅᖅᐳᖅ ᐅᖃᖅᑎᐅᔪᖅ ᕚᓗᕆ ᓵᑐᕌᓐᑦ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

ᐅᖃᓚᐅᖅᐳᖅ ᑎᑎᖅᑲᐃᑦ ᑐᕌᕈᑎᖓ ᐋᖅᑭᑦᑎᐊᖅᓯᒪᙱᒃᑯᓂ, ᐃᖅᑲᓇᐃᔭᖅᑎᐅᔪᑦ ᓇᖕᒥᓂᖅ ᐋᖅᑭᒃᓯᑦᑎᐊᕆᐊᖃᖅᐳᑦ ᐅᓯᑲᑦᑕᕐᓂᐅᔪᒥ ᑐᕌᕈᑎᖓᓂ, ᓱᒃᑲᐃᒃᑎᒋᐊᖅᓯᕙᒃᑐᒥ ᐱᓕᕆᓂᐅᔪᒥ ᑭᒃᑯᓕᒫᓄᑦ.

“ᐱᐅᔪᒥ ᑐᓂᓯᓂᐅᔪᒥ ᐊᑐᕐᓂᑯᒥ ᐱᒋᐊᓲᖑᕗᖅ ᐊᒻᒪ ᐃᓱᓕᓲᖑᕗᖅ ᑕᒻᒪᖅᓯᒪᙱᑦᑐᒥ ᑐᕌᕈᑕᐅᔪᒥ,” ᓵᑐᕌᓐᑦ ᐅᖃᓚᐅᖅᐳᖅ.

“ᐊᐱᕆᓯᒪᕗᒍᑦ ᓂᐅᕕᖅᐸᒃᑐᓂ ᓄᓇᕗᒻᒥ ᓇᓗᓇᐃᖅᓯᓂᖏᓐᓂ ᐊᑐᕐᓂᖏᓐᓂ ᑕᒻᒪᖅᓯᒪᙱᑦᑐᒥ ᑐᕌᕈᑕᐅᔪᒥ ᓯᕗᒻᒧᐊᕆᓂᕐᒥ ᐅᕝᕙᓘᓐᓃᑦ ᐱᖁᑎᑦ ᐅᑎᖅᑎᑕᐅᓂᐊᖅᐳᑦ ᓇᒃᓯᐅᔾᔨᔨᐅᔪᒧᑦ.”

ᐅᖃᓚᐅᖅᐳᖅ “ᐊᑯᓂᐅᔪᒥ” ᑲᓇᑕᒥ ᑎᑎᖅᑲᕐᓂᐊᕐᕕᖓᑕ ᐊᑐᐊᒐᐅᓂᖓᓂ ᐅᑎᖅᑎᑦᑎᓂᕐᒥ ᑐᔫᓯᐊᓂ ᑕᒻᒪᖅᓯᒪᔪᒥ ᑐᕌᕈᑎᖃᖅᑐᒧᑦ.

ᐅᓯᑲᑦᑕᕐᓂᕐᒧᑦ ᐊᑭᖏᓐᓄᑦ, ᓵᑐᕌᓐᑦ ᐅᖃᓚᐅᖅᐳᖅ ᑭᒃᑯᓕᒫᑦ ᓇᒃᓯᐅᔾᔨᔪᓂ ᑭᓱᑐᐃᓐᓇᒥᒃ ᐅᕘᓇ ᑲᓇᑕᒥ ᑎᑎᖅᑲᕐᓂᐊᕐᕕᖓᑎᒍᑦ ᐊᑭᓖᔭᕆᐊᖃᖅᐳᑦ, ᐊᒻᒪ ᖃᕋᓴᐅᔭᑎᒍᑦ ᓂᐅᕕᕐᕕᐅᔪᑦ ᐃᓱᒪᓕᐅᕆᔪᓐᓇᖅᐳᑦ ᑭᓱᓂ ᐊᑭᓂᑦ ᐃᓕᓯᓂᐊᕐᓂᖏᓐᓂ ᓂᐅᕕᖅᐸᒃᑐᓄᑦ.

“ᑭᖕᒧᑦ ᑎᒥᖁᑕᐅᓪᓗᑎᒃ ᐆᒪᓇᓱᐊᕆᐊᖃᕆᕗᑦ ᑐᙵᕕᖃᖅᑐᒥ ᑮᓇᐅᔭᖅᑖᕆᔭᐅᕙᓪᓕᐊᔪᓄᑦ ᐱᕙᒃᑕᑦᑎᓐᓂ, ᑲᓇᑕᒥ ᑎᑎᖅᑲᕐᓂᐊᕐᕕᖓ ᑐᓂᓯᕙᙱᓚᑦ ᐊᑭᖃᙱᑦᑐᒥ ᐅᓯᑲᑦᑕᖅᑕᐅᓂᐅᔪᒥ ᓇᓕᐊᑐᐃᓐᓇᓄᑦ ᓂᐅᕕᖅᐸᒃᑐᓄᑦ,” ᓵᑐᕌᓐᑦ ᐅᖃᓚᐅᖅᐳᖅ.