ᑲᓃᑎᐊᓐ ᓄᐊᑦ ᑐᓴᖅᑎᑦᑎᔪᑦ ᓄᑖᓂ ᐱᖁᑎᓄᑦ ᐊᑭᓕᐅᑎᐅᕙᒃᑐᑦ ᐊᑐᐊᒐᕆᓂᐊᓕᖅᑕᖏᓐᓂᒃ

For English version, see Canadian North announces new baggage rate policies

ᖃᖓᑦᑕᐅᑎᖃᖅᐲ ᑲᓃᑎᐊᓐ ᓄᐊᒃᑯ? ᑕᐃᒪᓕ ᐱᖁᑎᑎᑦ ᐅᕿᓐᓂᖅᓴᐅᑎᒃᑯᕕᒋᑦ ᐱᐅᓂᕐᓴᖅ ᑭᖑᓪᓕᕐᒥ ᖃᖓᑕᓕᕈᕕ, ᖃᖓᑕᓲᖃᖅᑏᑦ ᖁᕝᕙᕆᐊᖅᑎᑦᑎᓂᐊᕐᒪᑕ ᐊᑭᓕᐅᑎᐅᕙᒃᑐᓂᒃ ᐊᒻᒪ ᐊᑐᖅᑕᐅᔾᔪᑎᐅᔪᓐᓇᖅᑐᓂᒃ ᓇᒃᓴᖅᑕᐅᓂᐊᖅᑐᓂ ᐊᓐᓄᕌᒃᑯᕕᖕᓂ.

ᓄᑖᑦ ᐊᓐᓄᕌᒃᑯᕕᖕᓄᑦ ᐊᑭᓕᐅᑎᐅᕙᒃᑐᑦ ᐊᑐᓕᖅᑎᑕᐅᓂᐊᖅᑐᑦ ᒪᐃ 29-ᒥ, ᖃᖓᑕᓲᖃᖅᑎᐅᔪᑦ ᑐᓴᖅᑎᑦᑎᓚᐅᕐᑐᑦ ᐱᓇᓱᐅᕈᓯᐅᓚᕐᑐᒥᓐ.

“ᒪᑯᐊ ᐊᐅᓪᓚᖃᑦᑕᕈᒪᔪᑦ ᐅᓄᕐᓯᕙᓪᓕᐊᑎᓪᓗᒋᑦ ᐊᒻᒪ ᐊᑐᕈᒪᔪᐃᑦ ᑕᐃᒪᓕ ᖃᖓᑕᓲᒃᑰᖅᑐᑦ ᐱᖁᑎᓂ ᓇᒡᓴᕐᓂᖅᓴᐅᓕᖃᑦᑕᕐᒪᑕ ᐊᒻᒪ ᐅᓄᕐᓂᕐᓴᓂ ᐊᓐᓄᕌᒃᑯᕕᖃᕐᓂᕐᓴᐅᓪᓗᑎᒃ,” ᑖᒃᑯᐊ ᑲᒻᐸᓂᐅᔪᑦ ᐅᖃᓚᐅᕐᑐᑦ ᑎᑎᕋᖅᑕᖏᑦᑎᒍᑦ ᖃᕋᓴᐅᔭᒃᑯᑦ ᐱᔨᑦᑎᕋᖃᑦᑕᖅᑕᖏᓐᓄᑦ.

“ᑕᐃᒪᐃᓐᓂᖓᓄᑦ ᐃᓚᖏᑦ ᐱᖁᑎᒋᔭᐅᔪᑦ ᕿᒪᒃᑕᐅᓕᖃᑦᑕᕐᒪᑕ, ᖃᖓᑕᓲᓪᓗ ᑭᖑᕙᕆᐊᖅᑕᐅᓪᓗᑎᒃ ᐊᒻᒪᓗ ᐃᒃᓯᕙᐅᑕᖃᙱᓐᓂᕐᓴᐅᕙᒃᖢᓂ ᐃᓂᓕᐅᕈᒪᔪᓄᑦ.”

ᓄᓇᑦᓯᐊᕐᒥ ᐱᕙᓪᓕᐊᔪᑦ ᐅᖃᖃᑎᖃᕈᓐᓇᓚᐅᙱᒻᒪᑕ ᐅᖃᖅᑎᒋᔭᐅᔪᒥ ᐆᒥᖓ ᐱᖁᑎᓄᑦ ᐊᑐᐊᒐᐃᑦ ᐊᓯᔾᔨᖅᑕᐅᓂᖏᓐᓂᒃ.

ᓂᐅᕕᐊᒃᓴᐃᑦ ᐅᑭᐅᕐᑕᖅᑐᕐᒥ ᐊᑭᑐᔪᐊᓘᓂᖏᓐᓄᑦ ᖃᖓᑕᓲᒃᑰᖅᑐᑦ ᐱᖁᑎᓂ ᓇᒃᓴᓕᖃᑦᑕᕐᒪᑕ. ᑕᐃᒪᓐᓇᓕ “ᐃᓚᖏᑦ ᐊᕐᓄᕌᒃᑯᕕᒋᔭᐅᔪᑦ ᓇᒃᓴᖅᑕᐅᓇᓱᒃᑐᑦ ᑎᑭᒃᑐᓐᓃᔭᒻᒪᑕ ᐱᖁᑎᖃᖅᑏ ᑎᑭᒃᑲᓗᐊᖅᑎᓪᓗᒋᑦ” ᓲᖃᐃᒻᒪ “ᐱᖁᑎᑕᖃᐅᓗᐊᓕᖃᑦᑕᕐᒪᑦ ᐊᒻᒪᓗ ᐅᖁᒪᐃᓐᓂᖏᓐᓄᑦ ᐱᖁᔭᖃᖅᖢᑎᒃ,” ᖃᕋᓴᐅᔭᒃᑯᑦ ᑎᑎᕋᖅᑕᐅᓯᒪᔪᖅ ᐅᖃᕐᓯᒪᔪᖅ.

ᓄᑖᑦ ᐊᑭᓕᐅᑎᒃᓴᐅᓂᐊᕐᑐᑦ ᐊᒃᑐᐃᓂᐊᖅᑐᑦ ᓴᐃᕗᑦ, ᕙᓚᒃᔅ, ᓲᐳ ᕙᓚᒃᔅᑯᑦ ᖃᖓᑦᑕᐅᑎᒃᑰᕈᑎᓂᒃ.

ᑲᓃᑎᐊᓐ ᓄᐊᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᒍᑦ, ᐅᑯᐊ ᓴᐃᕗ ᐊᒻᒪ ᕙᓚᒃᔅᑯᑦ ᐊᑭᓖᔾᔪᑎᖃᖅᐸᒃᑐᑦ ᓯᕗᓪᓕᖅᐹ ᐊᓐᓄᕌᒃᑯᕕᒃ ᐊᑭᖃᕋᔭᙱᑦᑐᖅ ᑭᓯᐊᓂᓕ ᐊᐃᑉᐸᖓ ᐊᑭᖃᕋᔭᖅᖢᓂ $86.25-ᐊᒻᒪᓗ ᐃᓂᖃᓕᕈᑎ ᑭᓯᐊᓂ ᐅᓯᔭᐅᓇᔭᖅᖢᑎᒃ. ᐊᑭᓕᐅᑎ ᐃᒪᓐᓇᐅᓚᐅᖅᑑᒐᓗᐊᖅ $57.50

ᐱᖓᔪᒋᔭᐅᔪᖅ ᐱᖁᑎᒃᑯᕕᑦ ᐊᑭᖃᕐᓂᐊᓕᖅᑐᖅ $138 ᐅᖓᑖᓂ ᐅᕙᙵᑦ $114.98 ᐊᒻᒪᓗ ᑎᓴᒪᒋᔭᐅᔪᑦ ᑕᓪᓕᒪᒋᔭᐅᔪᕐᓗ ᐱᖁᑎᓄᑦ ᖃᖓᑕᓲᒃᑰᖅᑎᑕᐅᓇᔭᖅᑐᑦ ᐊᑭᖃᖅᑎᑕᐅᙱᖔᕐᓗᑎᒃ $114.98-ᓂ ᒫᓐᓇ ᐊᑭᒋᓕᖅᑕᖏᑦᑎᒍᑦ.

ᐊᑭᓕᐅᑎᐅᕙᒃᑐᑦ ᕿᒻᒥᓄ ᑎᒍᐊᕆᔭᐅᔪᓄᑦ ᐱᖁᑎᒃᑯᕕᒃᒥ ᐅᕝᕙᓘᓐᓃᑦ ᐃᓄᖃᕐᕕᖕᒥ ᓱᖁᓯᔾᔮᙱᑦᑐᖅ, ᐃᒪᓐᓇ $230 ᐊᒻᒪ $86.25, ᐱᖁᑎᒃᑯᕕᒃᒥ ᐊᒻᒪ ᐃᓄᖃᕐᕕᖕᒥ..

ᓲᐳ ᕙᓚᒃᔅᑯᑦ ᐊᑭᓕᕈᑎᑦ ᐃᓚᖃᕐᓂᐊᓕᕐᑐᑦ ᐊᑭᖃᙱᓪᓗᑎ ᐱᖁᑎᖏᑦ ᓯᕗᓪᓖᒃ ᒪᕐᕉᒃ, ᐱᖓᔪᖓᓪᓕ ᐊᑭᖃᕐᓂᐊᕐᓗᓂ $138 ᐊᒻᒪᓗ ᑎᓴᒪᒋᔭᐅᔪᖅ ᑕᓪᓕᒪᒋᔭᐅᔪᕐᓗ ᐱᖁᑎᓄᑦ ᖃᖓᑕᓲᒃᑰᖅᑎᑕᐅᓇᔭᖅᖢᑎᒃ.

ᐅᕿᙱᓗᐊᖅᑐᓄᑦ ᐊᒻᒪ ᐊᖏᓗᐊᖅᑐᓄ ᐱᖁᑎᒃᑯᕕᖕᓄᑦ ᐊᑭᓕᐅᑎᐅᕙᒃᑐᑦ ᖁᕝᕙᕆᐊᕐᓂᐊᕐᒥᔪᑦ ᐅᖁᒪᐃᓐᓂᖃᖅᑐᑦ 50 ᐸᐅᓐᔅ ᐅᖓᑖᓂ ᐊᒻᒪ ᐊᖏᓂᕐᓴᓄᑦ 158 ᓴᓐᑎᒦᑕᓂ ᐱᖁᑎᒃᑯᕕᖕᓄᑦ.

ᐱᒋᐊᕐᓗᓂ ᒪᐃ 29, ᖃᖓᑕᓲᒃᑰᖅᑐᑦ ᐊᑭᓖᑎᑕᐅᖃᑦᑕᕐᓂᐊᖅᑐᑦ $172.50 ᐅᖁᒪᐃᓐᓂᐅᔭᕆᐊᓕᐅᑉ ᐅᖓᑖᓅᖓᒃᐸᑦ ᒪᐅᖓ 50 ᐸᐅᓐᔅᓂ 100 ᐸᐅᓐᓄ, ᐊᒻᒪᓗ $230 ᐱᖁᑎᓄ ᐊᖏᓂᕐᓴᓂ 158 ᓴᓐᑎᒦᑕᓂ, ᐅᕝᕙᓘᓐᓃᑦ 62 ᐃᓐᓯᖦ, ᑖᒃᑯᐊᓗ ᐆᒃᑐᕋᖅᑕᐅᕙᒃᖢᑎᒃ ᑕᑭᓂᖓᒍᑦ ᐊᒻᒪ ᖁᑦᑎᖕᓂᖓᒍᑦ.

ᐱᖁᑎᒋᔭᐅᔪᖅ ᓇᒃᓴᖅᑕᐅᓂᐊᕐᓗᓂ ᐅᖁᒪᐃᓗᐊᖅᐸᑦ ᐊᒻᒪ ᐊᖏᓗᐊᖅᐸᑦ ᑕᐃᒪᓕ ᐊᑭᓕᐅᑎᒃᓴᐅᑎᑕᐅᔪᑦ ᐊᑐᕋᔭᕐᑐᖅ ᓇᓕᐊᓐᓂ ᐊᑭᑭᓐᓂᕐᓴᐅᔪᒥᒃ.

ᐱᖁᑎᒃᑯᕖᑦ ᐅᖁᒪᐃᓐᓂᖃᕐᑐᑦ 100 ᐸᐅᓐᔅ ᐅᖓᑖᓂ ᐱᖁᑎᒃᑯᕕᒃᒧᑦ ᖃᖓᑕᓲᒃᑰᖅᑎᑕᐅᓇᔭᕐᑐᖅ ᐊᒻᒪᓗ ᖃᖓᑕᓲᒃᑯᕕᒃᑯ ᖃᖓᑦᑕᐅᑎᓕᕆᔨᒃᑯᑎᒍᑦ ᐊᔪᕐᑎᑕᐅᓇᔭᖅᖢᑎᒃ.