ᐱᓪᓚᕆᙳᖅᐳᖅ: ᑲᓇᐃᑎᐊᓐ ᓄᐊᑦ ᓂᐅᕕᐊᒃᓴᐅᓂᖓᓂ ᐅᐃᓂᐱᐊᒡᒥ ᓇᖕᒥᓂᕆᔭᐅᔪᒧᑦ ᐊᖏᖅᑕᐅᕗᖅ

For English version, see It’s official: Canadian North sale to Winnipeg firm approved

ᖃᖓᑕᓲᓕᕆᓂᕐᒧᑦ ᐱᓕᕆᓂᐅᔪᒥ ᖃᐅᔨᒪᕐᔪᐊᖅᑎᐅᔪᒥ ᐅᖃᖅᐳᖅ ᓂᐅᕕᕐᓂᐅᔪᒥ ᑲᓇᐃᑎᐊᓐ ᓄᐊᑦᒥ ᐅᐃᓂᐱᐊᒡᒥ-ᑐᙵᕕᓕᖕᒥ ᓴᖕᒥᓂᖃᖅᑎᐅᔪᓂ ᐱᐅᓂᐊᖅᐳᖅ ᓂᐅᕕᐊᒃᓴᖃᕐᓂᕐᒥ ᖃᖓᑕᓲᖃᖅᑎᑦᑎᓂᕐᒥ ᐅᑭᐅᖅᑕᖅᑐᒥ.

Exchange Income Corp. ᐅᖃᓚᐅᖅᐳᖅ ᑐᓴᒐᒃᓴᓕᐊᖑᔪᒥ ᔪᓚᐃ 2−ᒥ ᒪᑐᓯᕗᖅ ᓂᐅᕕᕐᓂᖓᓂ ᐳᕌᑦᓕ ᖃᖓᑕᓲᓄᑦ ᐱᔨᑦᑎᕋᕐᓂᐅᔪᒥ, ᐊᐅᓚᑦᑎᔪᒥ ᑲᓇᐃᑎᐊᓐ ᓄᐊᑦᒥ, ᓂᐅᕕᖅᖢᓂᔾᔪᒃ ᖃᖓᑕᓲᑦ $205 ᒥᓕᐊᓐᓄᑦ.

“ᐱᐅᓇᓱᒋᕙᕋ ᒪᕐᕉᖕᓂ ᓴᙱᔪᐊᓗᖕᓂ ᖃᖓᑕᓲᖁᑎᖃᕋᔅᓯ,” ᐅᖃᓚᐅᖅᐳᖅ ᔮᓐ ᒍᕋᐃᑎᒃ, ᒥᒋᐅᓪᒥ ᓯᓚᑦᑐᖅᓴᕐᕕᒡᔪᐊᖓᓂ ᐃᓕᓴᐃᔨᐅᔪᒥ ᐱᓕᕆᐊᖃᖅᑐᒥ ᖃᖓᑕᓲᓄᑦ ᐊᐅᓚᑦᑎᓂᕐᒥ.

“ᐃᓱᒪᕗᖓ ᑮᓇᐅᔭᓕᕆᓂᕐᒧᑦ ᐃᓱᒪᒋᓪᓗᒍ ᐱᐅᓂᖓᓂ ᐱᓕᕆᓂᐅᓂᖓᓂ [ᑲᒻᐸᓂᐅᔪᓄᑦ] ᐊᒻᒪ ᐱᓕᕆᓂᑦᑎᐊᕙᐅᕗᖅ ᑲᓇᑕᒥᐅᑕᓄᑦ.”

ᒍᕋᑎᒃ ᐅᖃᓚᐅᖅᐳᖅ ᓂᐅᕕᐊᒃᓴᐅᓂᖓ ᓈᒻᒪᑦᑎᐊᖅᐳᖅ ᒐᕙᒪᑐᖃᒃᑯᑦ ᐊᔭᐅᕆᓂᖓᓂ ᓱᒃᑲᒃᑎᒋᐊᖅᓯᓂᕐᒥ ᐊᖏᖅᑕᐅᓂᐅᔪᓂ ᐊᖏᔪᓄᑦ ᐱᓕᕆᐊᒃᓴᐅᔪᓄᑦ ᐃᓄᓕᒫᓂ ᐃᓱᒪᒋᔭᖃᖅᑐᓂ.

“ᐱᔭᕆᐊᖃᕐᓂᖃᕐᓂᐊᖅᐳᖅ ᓴᓇᓂᕐᒥ ᐆᒻᒪᕆᖕᓂᖓᓂ ᖃᖓᑕᓲᓄᑦ ᐱᔨᑦᑎᕋᕐᓂᐅᔪᒥ ᐅᑭᐅᖅᑕᖅᑐᒥ. ᐃᓱᒪᕗᖓ [Exchange Income Corp.] ᐆᒥᖓ ᑕᑯᓂᐊᖅᐳᖅ ᐱᕕᒃᓴᖃᕐᓂᐅᔪᒥ ᑲᑎᓪᓗᒋᑦ ᖃᖓᑕᓲᓂ ᐱᔨᑦᑎᕋᕐᓂᐅᔪᒥ ᐊᒻᒪ ᕿᒥᕐᕈᑐᐃᓐᓇᕆᐊᖃᕐᓂᕐᒥ ᖃᑭᓂᐅᔪᒥ ᑲᑎᙵᓂᐅᔪᒧᑦ.”

Exchange Income Corp. ᐊᐅᓚᑦᑎᔨᒻᒪᕆᖓ ᒪᐃᒃ ᐸᐃᔪᓪ ᐅᖃᓚᐅᖅᐳᖅ ᔪᓚᐃ 3−ᒥ ᑲᒻᐸᓂᖓ “ᓂᕆᐅᖕᓂᖃᖅᐳᖅ” ᐅᑭᐅᖅᑕᖅᑐᒥ.

“ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐅᑭᐅᖅᑕᖅᑐᒥ ᖃᔅᓯᒐᓚᖕᓄᑦ ᑭᓱᑐᐃᓐᓇᓄᑦ ᐱᐅᓂᐊᖅᑐᐊᓘᕗᖅ ᓇᖕᒥᓂᖃᖅᑎᐅᔪᓄᑦ,” ᐅᖃᓚᐅᖅᐳᖅ, ᐅᔾᔨᕆᓪᓗᓂ ᐊᖏᒡᓕᒋᐊᖅᑐᒥ ᐱᔪᒪᓂᐅᔪᒥ ᐱᓪᓚᕆᐅᔪᓄᑦ ᐅᔭᕋᐅᔭᓂ ᐊᖏᒡᓕᒋᐊᖅᓯᔪᓐᓇᕐᓂᖓᓂ ᐱᔪᒪᓂᐅᔪᒥ ᐅᑭᐅᖅᑕᖅᑐᒥ ᖃᖓᑕᓲᒃᑯᑦ ᐊᐅᓪᓛᕐᓂᐅᔪᒥ.

“ᐅᓇᐅᒐᓗᐊᖅᐸᑦ ᒐᕙᒪᒃᑯᑦ ᐊᖏᖅᓯᒪᓂᖓᓂ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐅᓇᑕᖅᑐᒃᓴᓄᑦ ᐅᑭᐅᖅᑕᖅᑐᒥ ᐊᒻᒪ ᓴᓇᓂᕐᒥ ᑐᙵᕕᐅᔪᓂ, ᑕᒪᒃᑭᑦ ᐅᑯᓇᓂ ᐊᖏᒡᓕᒋᐊᖅᑎᑦᑎᓂᐊᖅᐳᖅ ᐊᐅᓪᓛᕐᓂᐅᔪᒥ ᐃᓄᐃᑦ ᐅᑭᐅᖅᑕᖅᑐᒧᐊᖅᑎᓪᓗᒋᑦ.”

ᐱᓂᕐᒥ ᑲᓇᐃᑎᐊᓐ ᓄᐊᑦᒥ, Exchange Income Corp. ᐱᕗᖅ ᐅᑭᐅᖅᑕᖅᑐᒥ ᖃᖓᑕᓲᒥ ᐊᐅᓚᑦᑎᔪᒥ ᐊᕕᒃᑐᖅᓯᒪᓂᐅᔪᓂ ᓴᓂᓕᐊᓂ ᓇᖕᒥᓂᖓᓂ ᐊᒻᒪ ᐃᑲᔪᖃᑦᑕᐅᑎᔪᓂ ᐊᖅᑯᑎᐅᔪᓂ.

ᑲᓇᐃᑎᐊᓐ ᓄᐊᑦ ᐊᑐᐃᓐᓇᖃᖅᑎᑦᑎᕗᖅ ᐃᑭᒪᔪᓂ ᐊᒻᒪ ᐅᓯᓂᐅᔪᓂ ᐱᔨᑦᑎᕋᕐᓂᕐᒥ 24−ᓄᑦ ᓄᓇᓕᖕᓄᑦ ᓄᓇᕗᒻᒥ ᐊᒻᒪ ᓄᓇᑦᓯᐊᕐᒥ, ᖃᖓᑕᕙᒃᖢᑎᒃ ᐅᑭᐅᖅᑕᖅᑐᒥ ᖃᓪᓗᓈᓄᑦ ᓄᓇᖓᓐᓄᑦ ᐃᓂᐅᔪᓄᑦ ᐃᐊᑦᒪᓐᑕᓐᒥ ᐊᒻᒪ ᐋᑐᕚᒧᑦ.

“ᑐᕌᖓᔪᒥ ᐊᑭᑦᑐᕋᐅᑎᓂᖃᙱᓚᒍᑦ ᖃᖓᑕᓲᖁᑎᑦᑎᓐᓂ ᐊᒻᒪ ᑲᓇᐃᑎᐊᓐ ᓄᐊᑦᒥ, ᐊᔾᔨᒌᙱᑦᑐᓂ ᓄᓇᖁᑎᓃᒃᑲᑦᑕ,” ᐸᐃᔪᓪ ᐅᖃᓚᐅᖅᐳᖅ.

Exchange Income Corp. ᓇᖕᒥᓂᖄᓂᒃᐳᖅ ᖃᔅᓯᒐᓚᖕᓂ ᒥᑭᓐᓂᖅᓴᐅᔪᓂ ᖃᖓᑕᓲᓂᒃ ᐃᓚᖃᖅᑐᒥ ᑳᓪᒻᐃᐊᕐ ᐱᔨᑦᑎᕋᖅᑐᒥ ᐅᐊᖕᓇᒥ ᒫᓂᑑᐸᒥ ᐊᒻᒪ ᐃᓚᖏᓐᓂ ᑭᕙᓪᓕᕐᒥ ᐊᕕᒃᑐᖅᓯᒪᓂᐅᔪᒥ, ᑭᕙᓪᓕᖅ ᖃᖓᑕᓲᖓᑦ ᑐᓂᓯᓲᖑᕗᖅ ᑐᐊᕕᕐᓇᖅᑐᒥ ᖃᖓᑕᓲᖑᔪᓂ ᐊᒻᒪ ᓵᑕᖅᑕᐅᓯᒪᔪᓂ ᐱᔨᑦᑎᕋᕐᓂᕐᒥ, ᐊᒻᒪ ᒥᑭᓐᓂᖅᓴᐅᔪᓂ ᐊᕕᒃᑐᖅᓯᒪᓂᐅᔪᓂ ᐊᒡᔭᖅᑎᐅᔪᓂ ᐳᕆᑎᔅ ᑲᓚᒻᐱᐊᒥ ᐊᒻᒪ ᐋᓐᑎᐊᕆᐅᒥ.

ᓂᐅᕕᕐᓂᖓᓂ ᑐᑭᖃᖅᐳᖅ ᑲᓇᐃᑎᐊᓐ ᓄᐊᑦ ᐱᕚᓪᓕᕈᑎᖃᕐᓂᐊᖅᐳᖅ ᐊᖏᒡᓕᒋᐊᖅᑐᒥ ᐃᑲᔪᕈᑎᒃᓴᓂ ᐱᔪᓐᓇᖅᑎᑦᑎᓂᐊᖅᑐᒥ ᑲᒻᐸᓂᐅᔪᒥ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᑲᓇᐃᑎᐊᓐ ᓄᐊᑦᒥ “ᐱᐅᓂᖅᓴᒻᒪᕆᐅᓕᕐᓗᓂ ᐊᒡᔭᖅᑎᐅᓗᓂ ᓄᓇᖃᖅᑎᐅᔪᓄᑦ ᓄᓇᕗᒻᒥ ᐊᒻᒪ ᓄᓇᑦᓯᐊᕐᒥ.”

ᐸᐃᔪᓪ ᐅᖃᓚᐅᖅᐳᖅ ᓂᐅᕕᕐᓂᐅᔪᖅ ᐱᐅᓯᒋᐊᖅᑎᑦᑎᓂᐊᖅᐳᖅ ᐱᔨᑦᑎᕋᕐᓂᐅᔪᒥ, ᒥᒃᖠᒋᐊᖅᑎᑦᑎᙱᓪᓗᓂ ᐃᓚᖏᑦ ᐃᓄᐃᑦ ᑲᑉᐱᐊᓱᖕᓂᖏᓐᓂ.

ᕕᕗᐊᕆᒥ, Exchange Income Corp. ᐅᖃᐅᓯᖃᓚᐅᖅᐳᖅ ᓂᐅᕕᕐᓂᐊᕐᓂᖓᓂ ᑲᓇᐃᑎᐊᓐ ᓄᐊᑦᒥ ᓇᖕᒥᓂᖃᖃᑕᐅᔪᓂ ᓄᓇᕕᖕᒥ−ᑐᙵᕕᓕᖕᒥ ᒪᑭᕝᕕᒃ ᑎᒥᖁᑕᐅᔪᓂ ᐊᒻᒪ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᐅᔪᒥ ᑎᒥᖁᑕᐅᔪᒥ ᐃᓅᕕᖕᒥ.

ᓂᐅᕕᖅᑕᐅᓂᖓ ᐱᔭᕆᐊᖃᓚᐅᖅᐳᖅ ᒪᓕᒐᓕᕆᓂᕐᒥ ᐊᖏᖅᑕᐅᓂᐅᔪᒥ Competition Bureau of Canada−ᑯᓐᓂ ᐊᒻᒪ ᑲᓇᑕᒥ ᐅᓯᑲᑦᑕᖅᑎᐅᔪᓂ.

ᐅᑯᐊ ᐱᔭᕆᐊᖃᕐᓂᐅᔪᑦ ᐱᔭᕇᖅᑕᐅᓯᒪᓕᖅᐳᑦ, ᑲᓇᐃᑎᐊᓐ ᓄᐊᑦ ᐅᖃᓚᐅᖅᐳᖅ ᐅᖃᐅᓯᒃᓴᓕᐅᕐᓂᕐᒥ ᓴᖅᑭᑎᑕᐅᔪᒥ ᐃᑭᐊᖅᕿᕕᖓᓂ ᐅᖃᐅᓯᖃᖅᑐᒥ ᓂᐅᕕᖅᑕᐅᓂᖓᓂ ᔪᓚᐃ 2−ᒥ.