ᐊᑖᑕ ᔪᐊᓇᔅ ᕆᕗᐊ, ᒫᓐᓇ ᕗᕌᓐᔅᒥ ᓄᓇᖃᕐᑐᖅ, ᐸᓯᔭᒃᓴᐅᔪᖅ ᖁᓄᔪᕐᓂᐊᖃᑦᑕᕐᓂᒃ ᓄᓇᕗᒦᑎᓪᓗᒍ ᐊᓂᒍᕐᓯᒪᓕᕐᑐᓂᒃ ᐊᕐᕌᒍᓂᒃ 40-ᓂ. (ᐊᔾᔨᖁᑎᒋᔭᐅᔪᖅ)

ᑲᓇᑕᒥ ᐃᒃᓯᕋᕐᔪᐊᒃ ‘ᖁᕕᐊᓱᙱᓪᓚᕆᒃᑐᑦ’ ᕗᕌᓐᔅ ᕆᕗᐊᒥ ᑎᑭᑎᑦᑎᔾᔮᙱᓐᓂᖏᓐᓂᒃ

ᐅᐃᕖᒃᑯᑦ ᐱᓕᕆᔨᒻᒪᕆᖏᑦ ᐊᖏᙱᑦᑐᑦ ᑲᓇᑕ ᐃᒃᓯᕋᕐᔪᐊᕐᒥ ᑎᑭᑎᑦᑎᔪᒪᓂᖏᓐᓂᒃ ᐸᓯᔭᒃᓴᐅᑎᑕᐅᔪᒥᒃ ᖁᓄᔪᕐᓂᐊᖅᓯᒪᓂᕐᒥᒃ ᓄᓇᕗᒥᑦ

By ᓄᓇᑦᓯᐊᕐᒥ ᐱᕙᓪᓕᐊᔪᑦ

For English version, see Canadian Oblates ‘deeply saddened’ France won’t extradite Rivoire

ᑲᓇᑕᒥ ᐃᒃᓯᕋᕐᔪᐊᑦ ᐅᖃᕐᑐᑦ ᐊᐃᑦᑖᕈᓱᖕᓂᖏᓐᓂᒃ ᕗᕌᔅ ᑎᑭᑎᑦᑎᔾᔮᙱᓐᓂᖏᓐᓂᒃ ᓄᓇᕗᒥᒃ ᐃᒃᓯᕋᕐᔪᐊᖑᓚᐅᕐᓯᒪᔪᒥᒃ ᐸᓯᔭᒃᓴᐅᑎᑕᐅᔪᒥᒃ ᖃᖓᑲᓪᓛᓗᒃ ᖁᓄᔪᕐᓂᐊᖅᓯᒪᓂᕐᒧᑦ.

ᑭᒃᑯᓕᒫᓂᒃ ᐸᓯᔭᒃᓴᐅᑎᑦᑎᓂᕐᒧᑦ ᐱᔨᑦᑎᕋᐅᑎᓕᕆᔨᒃᑯᑦ ᑲᓇᑕᒥ ᑐᓴᖅᑎᑦᑎᓚᐅᕐᓯᒪᔪᑦ ᑕᖅᑭᐅᓚᐅᕐᑐᒥ ᖃᐅᔨᓚᐅᕐᓂᖏᓐᓂᒃ ᕗᕌᓐᔅᒥ ᐱᓕᕆᔨᒻᒪᕆᐅᔪᑦ ᑕᒪᐅᙵᖅᑎᑦᑎᔾᔮᒋᓐᓂᖏᓐᓂᒃ ᑳᑐᓕᒃᑯᑦ ᐊᔪᕆᖅᓱᐃᔨᖓᓂᒃ ᔫᐊᓇᔅ ᕆᕗᐊᒥᑦ ᐸᓯᔭᒃᓴᐅᔾᔪᑎᖏᓐᓂᒃ ᐱᓕᕆᐊᕆᔭᐅᔭᕐᑐᕐᓗᓂ ᕕᕝᕗᐊᕆᐅᓚᐅᕐᓯᒪᔪᒥᒃ, ᒪᑯᓄᖓ ᖃᓄᐃᓕᐅᕈᑎᕕᓂᕐᓂᒃ 47 ᐊᕐᕌᒍᐃᑦ ᐊᓂᒍᖅᑐᓂᒃ. ᕗᕌᓐᔅᒥᐅᑕᑦ ᐅᖃᓚᐅᕐᒪᑕ ᐊᑯᓂᓗᐊᕌᓘᓕᕐᓂᖓᓂᒃ ᑕᒪᓐᓇ ᖃᓄᐃᓕᐅᕈᑎᐅᓚᕐᓯᒪᓂᖓᓂᒃ ᐊᒻᒪᓗ ᕗᕌᓐᔅ ᐊᐅᓪᓚᖅᑎᑦᑎᕙᙱᖢᑎᒃ.

ᐃᒃᓯᕋᕐᔪᐊᖅ ᑭᐊᓐ ᑐᐊᓴᓐ, ᐊᖓᔪᖅᑳᖅ ᐅᑯᓄᖓ Missionary of Mary Immaculate Lacombe, ᑖᓐᓇ ᐋᑐᕚᒦᑦᑐᖅ, ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᖢᓂ ᐱᓕᕆᖃᑎᒌᒃᑐᑦ “ᖁᕕᐊᓱᙱᒻᒪᕆᖕᓂᖏ” ᕗᕌᓐᔅ ᑲᓇᑕᒥ ᐊᖏᓚᐅᙱᓐᓂᖏᓐᓂᒃ. ᐃᒃᓯᕋᕐᔪᐊ ᑳᑐᓕᒃᑯᑦ ᑐᒃᓯᐊᕕᖓᓃᑦᑐᑦ ᑐᓴᐅᒪᓇᖅᖢᓂ ᖃᖔᓗᖕᓂ ᐃᓕᓐᓂᐊᖅᑐᓕᕆᓂᕐᒥᒃ ᐱᓕᕆᐊᖃᕐᓂᖏᓐᓂᒃ.

“ᐃᒃᓯᕋᕐᔪᐊᑦ ᔪᐊᓇᔅ ᕆᕗᐊᒥ ᑎᑭᖁᔨᑲᑕᒃᓯᒪᔪᑦ ᐸᓯᔭᒃᓴᐅᑎᑦᑎᔪᓂ ᐅᐸᒍᑎᖁᔭᐅᓪᓗᓂ ᐊᒻᒪᓗ ᐃᑲᔪᕐᓯᒪᓪᓗᑎᒃ ᑭᒃᑯᓕᒫᓂᒃ ᐸᓯᔭᒃᓴᐅᑎᑦᑎᓂᕐᒧᑦ ᐱᔨᑦᑎᕋᐅᑎᓕᕆᔨᒃᑯᓐᓂᒃ ᑲᓇᑕᒥ ᑕᒪᐅᖓ ᑎᑭᑎᑦᑎᔪᒪᓂᖏᓐᓂᒃ,” ᑐᐊᓴᓐ ᑎᑎᕋᓚᐅᕐᑐᖅ.

ᕆᕗᐊ ᐃᒃᓯᕋᕐᔪᐊᖑᓚᐅᕐᓯᒪᔪᖅ ᓄᓇᕗᒥᑦ 1960-ᖏᓐᓂᒃ 1993-ᒧᑦ. 1998-ᒥ ᐸᓯᔭᒃᓴᙳᖅᑎᑕᐅᓚᐅᕐᓯᒪᔪᑦ ᑎᓴᒪᓂᒃ ᖁᓄᔪᕐᓂᐊᕐᓂᕐᒧ ᐃᓄᐃᑦ ᓱᕈᓯᖏᓐᓂᒃ ᑭᓯᐊᓂᓕ ᓄᒃᑎᓚᐅᕐᓯᒪᖕᒪᓐ ᕗᕌᓐᔅᒧ ᐸᓯᔭᒃᓴᐅᔾᔪᑎᖏᑦ ᐃᖅᑲᖅᑐᐃᕕᒃᑰᓚᐅᖅᑎᓐᓇᒋᑦ. 2017-ᒥ ᐸᓯᔭᒃᓴᐅᔾᔪᑏᑦ ᓄᖅᑲᖅᑎᑕᐅᓚᐅᕐᓯᒪᔪᑦ.

ᑭᓯᐊᓂᓕ ᕕᕝᕗᐊᕆᒥ, ᐸᓖᓯᒃᑯᑦ ᓄᑖᒥ ᐸᓯᔭᒃᓴᐅᔾᔪᑎᒥ ᐃᓚᓯᓕᓚᐅᕐᓯᔪᑦ ᐊᕐᓇᒥ ᑎᑭᕋᕐᔪᐊᕐᒥ ᖁᓄᔪᕐᓂᐊᕐᓯᓚᐅᕐᓯᒪᓂᖓᓂᒃ ᐊᒻᒪ ᐊᕐᕕᐊᓂᒃ 1974-ᓗ ᐊᒻᒪ 1979-ᓗ ᐊᑯᓐᓂᖓᓂᒃ.

ᐅᓇ ᐸᓯᔭᒃᓴᐅᔾᔪᑎ ᐃᖅᑲᖅᑐᐃᕕᒃᑰᕐᓯᒪᙱᑦᑐᖅ. ᕆᕗᐊ ᓗᐊᐃᔭᖓ, ᑎᐅᕆ ᑐᒧᓕᓐ, ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᒃᑯᓐᓄᑦ ᐅᒃᑑᐱᕆ ᓄᙳᐊᓂᒃ ᕆᕗᐊ ᐱᙱᓐᓂᕋᐃᓯᒪᓂᖓᓂᒃ ᐸᓯᔭᒃᓴᐅᔾᔪᑎᒋᔭᖏᓐᓂᒃ.

“ᐅᑯᐊ ᐸᓯᔭᒃᓴᐅᔾᔪᑎᑦ ᓱᓕᙱᑦᑎᐊᕐᑐᑦ. ᑕᐃᒪᐃᙱᓐᓂᕋᕈᓐᓇᖅᑕᖏᑦ,” ᑐᒧᓕ ᐅᖃᓚᐅᕐᑐᖅ ᐅᐃᕖᑐᑦ ᐊᐱᕐᓱᖅᑕᐅᑎᓪᓗᒍ ᑕᖅᑭᐅᓚᐅᕐᑐᒥᓐ.

ᑐᐊᓴᓐ ᐅᖃᓚᐅᕐᒥᔪᖅ ᑲᓇᑕᒥ ᐃᒃᓯᕋᕐᔪᐊᑦ ᐃᑲᔪᖅᑐᐃᓯᒪᓂᖏᓐᓂᒃ ᖃᓄᐃᓕᔭᐅᔭᕆᐊᖃᕐᓂᖏᓐᓂᒃ ᐅᑯᓇᙵᑦ ᕗᕌᓐᔅ ᐃᒃᓯᕋᕐᔪᐊᓂᒃ ᕆᕗᐊᒥ.

“ᐱᓕᕆᑎᑦᑐᓐᓇᙱᒃᑲᓗᐊᖅᖢᑎᒍ ᑲᓇᑕᒥ ᒪᓕᒐᓕᕆᓂᒃᑯᑦ, ᐅᑯᐊ ᕗᕌᓐᔅᒥ ᐃᒃᓯᕋᕐᔪᐊᑦ ᐱᒋᐊᖅᑎᑦᑎᓯᒪᓕᕐᓂᖏᓐᓂᒃ ᑐᓵᒋᔭᕈᑎᓂᒃ ᐊᑐᖁᔭᐅᓯᒪᔪᓂᒃ, ᐱᓗᐊᕐᑐᒥᒃ ᒪᓕᒐᓕᕆᔨᓂᒃ ᓵᙵᑦᑕᐃᓕᒪᓂᕐᒥᒃ ᑲᓇᑕᒥ,ᔅ” ᑐᐊᓴᓐ ᐅᖃᕐᑐᖅ.

ᕆᕗᐊ ᐃᓚᒋᔭᐅᔪᖅ ᐃᒃᓯᕋᕐᔪᐊᓄᑦ. ᓯᑎᐱᕆᒥ ᐅᑯᐊ ᕗᕌᓐᔅᒥ ᐃᒃᓯᕋᕐᔪᐊᑦ ᐊᓂᑎᑦᑎᓇᓱᓕᓚᐅᕐᓯᒪᔪᑦ ᕆᕗᐊᒥ.

“ᑕᒪᑐᒧᖓ ᖃᓄᐃᓕᐅᕈᑎᐅᕙᓪᓕᐊᔪᓂᒃ ᑐᓴᐅᒪᑎᑦᑎᓂᐊᖅᐳᒍᑦ,” ᑐᐊᓴᓐ ᐅᖃᕐᑐᖅ.

ᓄᓇᕗᒥᑦ ᐸᓖᓯ ᑯᐊᐳᕈᓪ ᑖᒥ ᑭᐊᓗ ᐅᖃᓚᐅᕐᑐᖅ ᐊᓯᒃᑲᓐᓂᕐᓂᖏᓐᓂᒃ ᐸᓯᔭᒃᓴᐅᔾᔪᑎᓂᒃ ᕆᕗᐊᒧᑦ.

 

Share This Story

(0) Comments

Join the Conversation

Your email address will not be published. Required fields are marked *

*