ᕿᑭᖅᑖᓗᒃᒥ ᑐᒃᑐᒐᓱᖕᓂᖅ ᒫᓐᓇ ᒪᑐᔪᖅ

For English version, see Baffin caribou harvest now closed, says Environment Department

ᕿᑭᖅᑖᓗᒃᒥ ᑐᒃᑐᒐᓱᖕᓇᖅ 2022-23ᒧ ᒪᑐᔪᖅ ᒫᓐᓇ ᐱᒋᐊᖅᖢᓂ, ᐅᖃᓚᐅᕐᑐᑦ ᓄᓇᕗᒥᑦ ᒐᕙᒪᒃᑯᑦ ᐊᐃᕆᓕ 28ᒥ.

ᑐᒃᑐᒐᓱᖕᓇᕈᓐᓃᖅᑐᖅ ᓲᖃᐃᒻᒪ 350ᓂᒃ ᑐᒃᑐᒐᓱᒍᓐᓇᕐᓂᖅ ᐃᓱᓕᓚᐅᕐᒪᑦ, ᐅᖃᓚᐅᕐᑐᖅ ᐊᕙᑎᓕᕆᔨᒃᑯᑦ ᐅᖃᖅᑎᖓ ᓖᑲᓐ ᑖᒪᔅ ᑐᓴᒐᒃᓴᑎᒍᑦ.

ᑲᑎᖢᑎᒃ ᑐᒃᑐᑕᐅᔪᓐᓇᕐᓂᐅᔪᖅ ᐋᖅᑭᒃᑕᐅᓚᐅᕐᓯᒪᔪᖅ ᓄᓇᕗᑦᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᐃᑲᔪᕈᑎᐅᓪᓗᓂ ᕿᑭᖅᑖᓗᒃᒥ ᑐᒃᑐᓂᒃ ᐅᓄᕐᓯᕚᓪᓕᖅᑎᑦᑎᓇᓱᖕᓂᖕᒥᒃ.

“ᐅᓇ ᐃᓚᒋᔭᐅᒻᒪᕆᒃᑐᖅ ᐊᐅᓚᑦᑎᓂᒃᑯᑦ ᐱᓕᕆᐊᕆᔭᐅᓇᓱᒃᑐᓂᒃ ᑖᒃᑯᐊ ᑐᒃᑐᐃᑦ ᐅᓄᕐᓯᕚᓪᓕᖅᑎᑕᐅᓇᓱᒃᖢᑎᒃ ᐊᒻᒪᓗ ᐊᖑᓇᓱᒃᑕᐅᔪᓐᓇᓛᕐᒪᑕ ᓯᕗᕚᒃᓴᑦᑎᓐᓄᑦ,” ᑖᒪᔅ ᐅᖃᓚᐅᕐᑐᖅ.

ᓂᕕᙵᑕᕆᔭᐅᕙᒃᑐᑦ ᐊᒥᐊᒃᑯᒋᔭᐅᔪᑦ ᐊᑐᕈᓐᓃᖅᑎᑕᐅᔪᑦ ᐊᒻᒪᓗ ᐅᑎᖅᑎᑕᐅᔭᕆᐊᖃᖅᖢᑎᒃ ᓄᓇᓕᖕᓂ ᐆᒪᔪᓕᕆᔨᒃᑯᑦ ᑎᑎᕋᕐᕕᖓᓄᑦ ᐊᖑᓇᓱᒃᑐᓕᕆᔨᓄᓪᓘᓐᓃᑦ, ᑖᒪᔅ ᐅᖃᕐᑐᖅ.

ᑕᐃᒪᓕ ᑐᒃᑐᒐᓱᖕᓇᖅ ᕿᑭᖅᑕᓗᒃᒥ ᑐᒃᑐᓂᒃ 2022-23 ᐊᕐᕌᒍᒧ ᓄᖃᖅᑎᑕᐅᒻᒪᕆᒃᑐᖅ ᐅᕘᓇ ᓄᓇᕗᒥᑦ ᐆᒪᔪᓄᑦ ᒪᓕᒐᖅᑎᒍᑦ. ᑖᔅᓱᒥᖓ ᓱᕋᐃᔪᑦ ᖃᐅᔨᓴᖅᑕᐅᓂᐊᕐᑐᑦ ᐊᒻᒪᓗ ᐸᓯᔭᒃᓴᙳᕈᑎᐅᑐᐃᓐᓇᕆᐊᖃᖅᖢᓂ, ᐅᖃᕐᑐᖅ.