ᕗᔨᓂᐊ ᒥᐅᓐᔅ ᑲᓇᑕᐅᑉ ᐅᑭᐅᕐᑕᖅᑐᖓᓄᑦ ᐋᒻᐹᓯᑕᐅᓕᕐᑐᖅ

For English version, see Carney names Virginia Mearns as Canada’s new Arctic ambassador

ᕗᔨᓂᐊ ᒥᐅᓐᔅ ᐃᖃᓗᐃᑦᒥᐅᑕᖅ ᑲᓇᑕᐅᑉ ᐅᑭᐅᕐᑕᖅᑐᖓᓄᑦ ᐋᒻᐹᓯᑕᙳᕐᑎᑕᐅᔪ.

ᑲᓇᑕᒧᑦ ᐊᖓᔪᖅᑳᖅ ᐳᕋᐃᒻ ᒥᓂᔅᑕ ᒫᒃ ᑳᓂ ᑐᓴᖅᑎᑦᑎᓚᐅᕐᑐᖅ ᑎᒃᑯᐊᖅᑕᐅᔪᒥ ᔪᓚᐃ 24-ᒥ ᐃᓅᕕᒃ, ᓄᓇᑦᓯᐊᕐᒥ, ᑕᕝᕙᓂ ᑲᑎᒪᔪᓂᒃ ᐃᓄᐃᑦ-ᒐᕙᒪᒃᑯᓪᓗ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᕋᓛᕆᔭᐅᔪᑦ ᐃᒃᓯᕙᐅᑕᐅᓪᓗᓂ ᐱᒃᓯᕙᐅᑕᐅᖃᑎᖃᖅᖢᓂ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓᓂ ᓇᐃᑕᓐ ᐆᐱᐊᑦᒥ.

ᒥᐅᓐᔅ ᑐᑭᒧᐊᖅᑎᐅᓚᐅᕐᑐᖅ ᐃᓄᐃᑦ ᐱᓕᕆᖃᑎᒌᖕᓂᖏᓐᓂ ᐅᑯᓄᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᑎᒃᑯᐊᖅᑕᐅᓚᐅᙱᑎᓪᓗᒍ.

ᐅᓇ “ᐱᒃᑯᓇᑦᑎᐊᓚᐅᕐᑐᖅ ᐊᒻᒪ ᓄᒫᓱᖕᓂᐅᓪᓗᓂ” ᐅᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓴᖅᑎᑕᐅᑎᓪᓗᒋᑦ ᑖᔅᓱᒥᖓ, ᐅᖃᕐᑐᖅ ᑭᐅᕋᓐ ᕕᓕᐅᕋᑎ, ᑐᑭᒧᐊᖅᑎᑦᑎᔨ ᑐᓴᐅᒪᔾᔪᑎᓕᕆᓂᕐᒥᒃ ᑲᑐᔾᔨᖃᑎᒌᓄᑦ, ᐅᖃᓚᐅᕐᑐᖅ ᑐᓴᒐᒃᓴᑎᒍᑦ ᔪᓚᐃ 24-ᒥ.

“ᕗᔨᓂᐊᑉ ᑎᒃᑯᐊᖅᑕᐅᓂᖓ ᐊᑐᕐᑕᐅᙱᓐᓇᖅᐸᙱᑦᑐᖅ,” ᐅᖃᕐᑐᖅ. “ᕗᔨᓂᐊ ᐃᖅᑲᓇᐃᔮᖓᓂ ᓄᖃᕐᓂᖓ ᖁᕕᐊᓇᓗᐊᙱᑦᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ, ᑭᓯᐊᓂᓕ ᐱᓇᓱᒍᓐᓇᑦᑎᐊᖅᑐᒥ ᐊᒻᒪ ᐱᓇᓱᒻᒪᕆᒃᐸᒃᑐᒥ ᑭᒡᒐᖅᑐᐃᔨᖃᕐᓂᐊᓕᕐᑐᖅ ᑲᓇᑕᒥ ᓄᓇᕐᔪᐊᑎᒎᖓᓂᕐᓴᒃᑯᑦ.”

ᐅᖃᓚᐅᕐᑐᖅ ᒥᐅᓐᔅ ᓯᕗᓕᐅᕐᑎᐅᓂᖓ ᐋᖅᑭᓯᒍᑎᐅᓚᐅᕐᓂᖓᓂ ᐊᑐᐊᒐᕐᓂ ᐊᒻᒪ ᑐᑭᒧᐊᕈᑎᒃᓴᐅᓂᐊᕐᑐᓂᒃ ᓲᕐᓗ ᒪᑯᓂᖓ ᐊᑐᓕᕐᑎᑦᑎᓂᕐᒥᒃ ᑮᓇᐅᔭᓕᐊᕆᔭᐅᔪᓂᒃ ᐃᓂᓕᐅᕐᓂᕐᒧᑦ ᐊᑐᐊᒐᕐᒥ.

ᐅᓇ ᐊᒻᐹᓯᑕᐅᑉ ᐃᓂᖓ ᐱᒋᐊᖅᑕᐅᓚᐅᕐᓯᒪᔪᖅ ᒐᕙᒪᑐᖃᒃᑯᓐᓂ $34.7 ᒥᓕᐊᓐ ᐅᑭᐅᕐᑕᖅᑐᕐᒧᑦ ᐊᑐᐊᒐᓕᕆᓂᕐᒥ ᐊᕐᕌᓂ ᐅᖃᐅᓯᐅᑲᑕᓕᓚᐅᕐᑐᒥᓐ.

ᐅᓇ ᐱᒋᐊᖅᑕᐅᓚᐅᕐᓯᒪᓂᑰᒐᓗᐊᖅ ᔮᓐ ᑯᕆᑦᑎᐊᓐ ᓕᐳᕈᓪ ᒐᕙᒪᖏᓐᑦ 1994-ᒥ. ᓯᕗᓪᓕᖅᐹᖑᓚᐅᕐᓯᒪᔪᖅ ᐊᒻᐹᓯᑕ ᐅᓇᐅᓚᐅᕐᓯᒪᔪᖅ ᒫᓐᓇ ᒐᕙᓇ ᔭᓄᕈᓪ ᒥᐊᓕ ᓴᐃᒪᓐ, ᐊᕐᕌᒍᓂᒡᓗ ᖁᓕᓂ ᑕᕝᕙᓃᖢᓂ. ᐊᒻᐹᓯᑕᒧᑦ ᐃᓂᒋᔭᐅᔪᖅ ᓄᖅᑲᖅᑎᑕᐅᓚᐅᕐᓯᒪᔪᖅ 2006-ᒥ ᐅᓇ ᐳᕋᐃᒻ ᒥᓂᔅᑕᐅᑎᓪᓗᒍ ᓯᑏᕙᓐ ᕼᐋᐳ ᑮᓇᐅᔭᓂ ᐊᑐᓗᐊᖅᑕᐃᓕᒪᓂᕐᒧᑦ ᑭᓯᐊᓂ ᑖᓐᓇ ᐃᓱᒪᒋᔭᐅᓯᒪᔪᖅ ᓴᖅᑭᑕᐅᒻᒪᑦ ᑎᓯᐱᕆᒥ.

ᐅᑭᐅᕐᑕᖅᑐᕐᒧᑦ ᐊᒻᐹᓯᑕᐅᓗᓂ ᒥᐅᓐᔅ ᐱᓕᕆᖃᑎᖃᖃᑦᑕᕐᓂᐊᖅᑐᖅ ᑲᓇᑕᒥ ᐅᑭᐅᕐᑕᖅᑐᐊᓂ ᐱᓕᕆᔨᐅᖃᑕᐅᔪᓂᒃ, ᓄᓇᖃᖅᑳᖅᑐᑦ ᐊᒻᒪ ᐳᕌᕕᓐᓯᓄᑦ ᐊᒻᒪ ᑎᐅᕆᑑᕆᓄᑦ ᒐᕙᒪᓂ ᑲᒪᒋᔭᖃᕐᓗᑎᒃ ᐊᑐᐊᒐᓕᕆᓂᕐᒧᑦ ᐱᓕᕆᐊᒃᓴᓂ ᑲᓇᑕᒥ ᐊᒻᒪ ᐊᓯᐊᓂ ᓄᓇᕐᔪᐊᕐᒥ, ᑲᓇᑕᐅᑉ ᐅᑭᐅᕐᑕᖅᑐᖓᑕ ᐱᓕᕆᐊᕆᔪᒪᔭᖏᓐᓂᒃ ᐅᔾᔨᕆᔭᐅᑎᑦᑎᓂᕐᓴᐅᓗᓂ ᐊᒻᒪ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ ᐅᑭᐅᕐᑕᖅᑐᕐᒥ, ᑕᐃᒪᓐᓇ ᑐᓴᒐᒃᓴᓕᐅᕐᑎ Global Affairs ᑲᓇᑕᒥ.

ᒥᐅᓐᔅ ᒥᓂᔅᑕᒧᑦ ᑐᒡᓕᕆᔭᐅᓂᑯ ᐊᒻᒪᓗ ᑐᒡᓕᕆᔭᐅᖃᑕᐅᓪᓗᓂ ᒐᕙᒪᓕᕆᔨᒃᑯᓐᓄᑦ ᒥᓂᔅᑕᒧᑦ, ᑎᑎᕋᖅᑎᐅᓪᓗᓂ ᐊᒻᒪᓗ ᓄᓇᕗᒥᑦ ᒐᕙᒪᒃᑯᓐᓄᑦ ᑎᑎᕋᖅᑎᒋᔭᐅᓂᑰᓪᓗᓂ.