ᐱᓱᔪᖕᓂᖅ ᑲᖏᖅᓱᔾᔪᐊᑉ ᕿᙳᐊᓂ ᐊᕕᒃᑐᖅᓯᒪᓂᐅᔪᒥ
ᐅᓂᒃᑳᖅᑐᐊᓂ ᐅᓂᒃᑳᕆᔭᕆᐊᒃᓴᖅ ᐊᓕᐊᓇᐃᒋᔭᕗᑦ: ᑲᓱᖃᑎᖃᕐᓂᕐᒥ ᖁᕕᐊᓇᖅᑐᒥ ᐃᖏᕐᕋᓂᐅᔪᒥ ᓄᑖᖑᔪᒥ ᐱᓱᔪᒡᕕᒃᓴᒥ ᐱᖑᐊᓗᐃᑦ ᑲᓇᑕᒥ ᒥᕐᙳᐃᖅᓯᕐᕕᖓᓂ
For English version, see Trekking in Kangiqsujuaq’s Qingngua region
ᖃᐃᖁᔭᐅᓂᐅᔪᒥ ᐳᓚᕋᕐᓂᕐᒧᑦ ᐱᖑᐊᓗᐃᑦ ᑲᓇᑕᒥ ᒥᕐᙳᐃᖅᓯᕐᕕᖓᓄᑦ ᐃᓕᖕᓄᑦ ᑐᓂᔭᐅᒍᓂ, ᐱᓗᒍ.
ᐋᒍᔅᑎᒥ, ᓇᒃᓯᐅᔾᔭᐅᓚᐅᖅᐳᖓ ᐅᓪᓗᓂ-ᑎᓴᒪᓂ ᖁᕕᐊᓇᖅᑐᒥ ᐃᖏᕐᕋᓂᐅᔪᒥ ᐊᔾᔨᖃᙱᓪᓚᕆᒃᑐᒥ, ᐱᓱᔪᒃᖢᖓ ᖃᒃᑲᓕᖕᒥ ᐊᕕᒃᑐᖅᓯᒪᓂᐅᔪᒥ ᑕᐃᔭᐅᔪᒥ ᕿᙳᐊᓂ, ᑲᖏᖅᓱᔾᔪᐊᖅ ᖃᓂᒋᔭᖓᓂ.
ᓯᕗᓪᓕᖅᐹᖑᓪᓗᓂ ᐱᖑᐊᓗᐃᑦ ᒥᕐᙳᐃᖅᓯᕐᕕᖕᒥ ᐃᖅᑲᓇᐃᔭᖅᑎᖏᑦ ᐃᓄᖕᓂ ᐱᓱᔪᒃᑎᑦᑎᓚᐅᖅᐳᑦ ᐆᒥᖓ ᐱᓱᔪᒃᕕᒃᓴᒥ, ᑐᕌᖓᓇᓱᐊᖅᑐᒥ ᐊᑐᐃᓐᓇᐅᑎᑕᐅᓂᖓᓂ ᓇᖕᒥᓂᖅ-ᐊᔪᕆᖅᓱᖅᑕᐅᔪᒥ ᑲᑎᙵᓂᐅᔪᒥ ᐱᓱᔪᓕᒪᔪᓄᑦ.
ᑕᐃᒪᐃᒐᔪᒃᑐᒥ ᓄᓇᕕᖕᒥ ᐋᖅᑭᒃᓯᒪᓂᖓᓂ, ᐊᐅᓪᓛᕐᓂᖅ ᐃᖏᕐᕋᓂᖃᓚᐅᙱᓚᖅ ᐸᕐᓇᒃᑕᐅᓯᒪᓂᖓᓂ.
ᐅᓪᓗᖅ ᐊᑕᐅᓯᕐᒥ, ᓯᓚ ᐅᕙᑦᑎᓐᓂ ᓄᖅᑲᖅᑎᑦᑎᓚᐅᖅᐳᖅ ᓇᐹᖅᑐᖃᙱᑦᑐᒥ ᓄᓇᓕᐊᖅᑎᑦᑎᓚᐅᙱᓚᖅ. ᒥᕐᙳᐃᖅᓯᕐᕕᖓᑕ ᑐᑭᒧᐊᒃᑎᑦᑎᔨᖓ ᑕᐃᔅᓱᒪᓂ, ᒥᐊᕆ ᐱᓕᖅᑑᑦ ᐊᕐᙵᒃ, ᑐᙵᓱᒃᑎᑦᑎᓚᐅᖅᐳᖅ ᑲᑎᙵᓂᕆᔭᑦᑎᓐᓂ ᐃᒡᓗᕋᓛᖓᓄᑦ, ᓯᓂᒃᑕᕐᕕᒋᓚᐅᖅᑕᑦᑎᓐᓂ.
ᐅᓂᒃᑳᓚᐅᖅᐳᖅ ᐅᓂᒃᑳᖅᑐᐊᒥ ᐱᓕᖅᑑᒻᒥ, ᓴᙱᔪᐊᓗᖕᒥ ᐊᖓᒃᑯᕐᒥ ᓄᓇᖃᓚᐅᖅᑐᒥ ᐊᕕᒃᑐᖅᓯᒪᓂᐅᔪᒥ 1800 ᓄᙳᐊᓂ ᐊᒻᒪᓗ 1900−ᖏᓐᓂ ᐱᒋᐊᕐᓂᖓᓂ.
ᑎᑭᐅᑎᒐᑦᑕ ᐃᓂᖓᓄᑦ ᐃᒪᖓ ᓴᖑᕙᖕᓂᖓᓂ ᓴᖑᕙᓪᓕᐊᔪᒥ ᑰᖕᒧᑦ, ᑐᑉᐸᒃᓴᓚᐅᖅᐳᒍᑦ ᐅᕝᕙᓘᓐᓃᑦ ᐱᖅᑯᓯᑐᖃᖅᑎᒍᑦ ᑐᐱᕐᒧᑦ. ᐅᓐᓄᖓ ᒪᓴᐅᓚᐅᖅᐳᖅ ᐊᒻᒪ ᐊᓄᕆᓪᓗᓂ ᐊᒻᒪ ᒪᖁᒃ ᐅᕙᑦᑎᓐᓂ ᒪᓕᓚᐅᖅᐳᖅ ᖃᐅᑎᓪᓗᒍ ᐱᓱᔪᒃᑎᓪᓗᑕ ᐊᒃᓴᑳᔪᓂ ᖃᓕᕈᓯᕐᓂ.
ᑎᑭᐅᑎᓇᓱᐊᖅᑕᕗᑦ ᕿᔫᓪᓗᓂ ᐃᒡᓗᕐᔪᐊᖅ, ᐋᖅᑭᒃᓯᒪᓪᓗᓂ ᐊᖏᔪᒥ ᑕᓯᕐᒥ ᖃᖅᑲᐅᑉ ᖄᖓᓂ.
ᐅᓪᓗᖓᓂ ᐱᖓᓱᖓᓂ, ᓯᕿᓂᖅ ᓴᖅᑭᑕᐃᓐᓇᓚᐅᖅᐳᖅ ᐃᔾᔪᔪᓂ ᓯᐊᕐᓇᓂ ᓄᕗᔭᓂ ᐱᓱᒋᐊᓯᑎᓪᓗᑕ ᐱᓱᔪᖕᓂᕐᒥ ᖁᓗᓱᑦᑕᓕᒃ ᓇᖅᓴᕐᒥ ᖁᙱᐊᕐᓂᕐᒥ ᑲᒪᓇᖅᑐᒥ ᑕᐅᑦᑐᖓᓂ ᐊᒻᒪ ᓇᓗᓇᙱᑦᑐᒥ Y−ᒥ ᓴᓂᒪᓕᓂᖓᓂ.
ᐃᖅᑯᒻᒪᓚᐅᖅᐳᒍᑦ ᐅᓪᓗᖓᓂ ᑎᓴᒪᖓᓂ ᐅᕕᙱᐊᕐᓂᐅᔪᒥ ᓱᒃᑲᔪᒥ-ᐊᓄᕌᕐᔪᐊᖅᑐᒥ ᐊᒻᒪ ᐃᒃᐱᒍᓱᖕᓂᐅᔪᒥ ᕿᔪᖕᒥ ᐃᒡᓗᕐᔪᐊᒥ ᓴᔪᒃᑐᒥ. ᐊᓄᕇᑦ ᑎᑭᐅᑎᓚᐅᖅᐳᑦ 100 ᑭᓛᒥᑐᓂ−ᐃᑲᕐᕋᕐᒥ ᐊᒻᒪ ᑕᐃᒪᐃᖏᓐᓇᓚᐅᖅᐳᖅ ᐅᓪᓗᓕᒫᖑᔪᒥ.
ᑐᕌᕐᓂᕆᓇᓱᐊᖅᑕᕗᑦ ᑕᐃᑲᓂ ᐅᓪᓗᖓᓂ ᐊᒃᓱᕈᕐᓇᓛᖑᓇᔭᖅᐳᖅ, ᐅᑎᒧᑦ ᐱᓱᒋᐊᖃᓚᐅᕋᑦᑕ ᓂᐅᔭᐅᓚᐅᕐᓂᑦᑎᓐᓄᑦ ᐅᒥᐊᒃᑯᑦ ᒪᕐᕈᖓᓂ ᐅᓪᓗᖓᓂ, 20 ᑭᓛᒥᑐᐸᓗᖕᓂ ᐅᖓᓯᒃᑎᒋᔪᒥ ᕿᙳᐊᓂ.
ᐊᒃᓱᑦ ᐊᓕᐊᓇᐃᑦ, ᐊᓄᕆ ᑐᓄᑦᑎᓐᓃᓚᐅᖅᐳᖅ, ᐱᐅᓯᒋᐊᖅᑎᑦᑎᓚᐅᖅᑐᒥ ᐱᓱᖕᓂᑦᑎᓐᓂ ᓱᒃᑲᓂᖓᓂ ᐊᖏᐸᓗᒃᑐᒥ.
ᑎᑭᐅᑎᒐᑦᑕ ᐅᐸᒐᓱᐊᖅᑕᑦᑎᓐᓄᑦ, ᐅᔾᔨᕆᓯᑳᓪᓚᓚᐅᖅᐳᒍᑦ ᐅᒥᐊᖅ ᑎᑭᔾᔮᙱᑦᑐᒃᓴᐅᓂᖓᓂ ᐅᕙᑦᑎᓐᓂ ᐊᐃᒃᓯᕐᓗᓂ ᐱᔾᔪᑎᖃᖅᑐᒥ ᐊᓄᕆᕐᔪᐊᕐᓂᐅᔪᒥ ᐊᒻᒪ ᒪᓪᓕᕐᔪᐊᕐᓂᐅᔪᒥ.
ᕿᙳᐊᑦ ᓄᓇᖓ ᐊᔾᔨᐅᙱᓚᖅ ᑎᓂᙵᑎᓪᓗᒍ ᓯᒡᔭᖓ ᖃᓕᕈᓯᐅᑉ ᐊᑖᓂ ᐃᒻᒥᓂᒃ ᓴᖅᑭᓲᖑᕗᖅ, ᐱᓱᒡᕕᒃᓴᐅᓕᖅᖢᓂ. ᐱᓱᒋᐊᖃᓚᐅᖅᐳᒍᑦ ᓯᒡᔭᒥ ᑎᑭᐅᑎᓂᕐᒥ ᐅᐸᒐᓱᐊᖅᑕᑦᑎᓐᓄᑦ, ᖃᐅᔨᒪᓪᓗᑕ ᓯᔮᖓ ᐊᓯᐅᓇᔭᕐᓂᖓᓂ ᐅᓕᒃᑯᓂ.
ᑎᑭᒃᑲᑦᑕ, 30 ᒥᓂᑦᓂ ᐊᒥᐊᒃᑯᓚᐅᖅᐳᖅ ᐅᓕᓐᓂᐊᕐᓂᖓᓄᑦ.
ᐸᖅᓴᐃᔨᐅᔪᓂ ᑲᑎᙵᓂᐅᔪᓂ ᐅᕙᑦᑎᓐᓂ ᐊᐃᒃᓯᓚᐅᖅᐳᑦ ᐊᒻᒪ ᐃᖏᕐᕋᔾᔪᔾᔭᐅᑲᐅᖅᑐᖅᖢᑕ ᐃᓗᐃᓪᓕᕐᒧᑦ, ᐅᓕᑉᐸᓪᓕᐊᔪᖅ ᑎᑭᙱᓱᖔᕐᔪᒃᑎᓪᓗᒍ.
ᑲᑎᙵᓂᐅᔪᑦ ᐅᖃᓗᒡᕕᐅᓚᐅᖅᐳᑦ ᐃᑲᕐᕋᑦ ᒪᕐᕉᖕᓂ ᓯᕗᓂᐊᓂ ᐊᕐᙵᕐᒧᑦ, ᖃᐅᔨᒪᓚᐅᖅᑐᒥ ᐅᒥᐊᖅ ᐊᐅᓪᓚᕋᔭᓚᐅᙱᓐᓂᖓᓂ ᐅᑯᓇᓂ ᖃᓄᐃᓕᖓᓂᐅᔪᓂ.
ᐅᑎᕈᔾᔭᐅᓚᐅᖅᐳᒍᑦ ᓄᓇᓕᖕᓄᑦ ᐴᑲᖅᑕᕐᓇᖅᑐᒥ ᐃᑲᕐᕋᓂ−ᒪᕐᕉᖕᓂ ᑎᓴᒪᓕᒃᑯᑦ ᐃᖏᕐᕋᕝᕕᐅᔪᒥ, ᐱᓕᕆᓂᖃᕐᔪᐊᓚᐅᖅᑐᒥ ᑰᑦᑎᓐᓈᓐᓄᑦ.
ᖁᕕᐊᓇᕐᓂᐅᔪᒥ ᐃᖏᕐᕋᓂᐅᔪᖅ ᐱᑎᑦᑎᓂᖃᓚᐅᖅᐳᖅ ᖃᔅᓯᒐᓚᖕᓂ ᐅᓂᒃᑳᓕᐊᓂ ᐊᑐᖅᑕᐅᕙᓚᐅᖅᑐᓂ ᓄᓇᕕᖕᒥ ᒥᕐᙳᐃᖅᓯᕐᕕᖏᓐᓂ, ᓴᐳᒻᒥᔮᖅᑕᐅᓇᓱᐊᕐᓂᐅᔪᓂ ᐊᒃᓱᕈᕈᑕᐅᔪᓂ, ᖃᓄᐃᑉᐸᓚᐅᕐᓂᖓᓂ ᐃᒡᓕᓂᖓᓂ ᐃᖏᕐᕋᕝᕕᒋᓚᐅᖅᑕᓐᓂ, ᐊᒻᒪ ᕿᙳᐊᓂ ᐊᕕᒃᑐᖅᓯᒪᓂᐅᔪᒥ.
ᐊᑕᐅᓯᐅᓪᓗᓂ ᐊᒃᓱᕈᕐᓇᓛᒥ, ᑐᑭᖃᓛᑦᑎᐊᖑᔪᒥ ᐊᒻᒪ ᖁᕕᐊᓇᖅᑐᒥ ᐱᓕᕆᐊᒃᓴᕆᔭᓐᓂ ᑐᓴᒐᒃᓴᓕᕆᔨᐅᓂᓐᓂ.
(0) Comments