ᖁᕕᐊᓲᑎᖃᕐᓂᖅ ᐅᓇ ᐹᓐ-ᐋᑎᒃ ᕕᓴᓐ ᓂᐱᖃᖅᑎᑦᑎᓂᖓᓂ ᐃᖃᓗᖕᓂ

For English version, see Celebration, revolution as Pan-Arctic Vision rocks Iqaluit

ᐅᓐᓅᓚᐅᕐᑐᖅ ᖁᕕᐊᓲᑎᖃᕐᓇᐅᓪᓗᓂ ᐊᒻᒪ ᒪᑭᑉᐹᓪᓕᕐᓇᐅᓪᓗᓂᓗ ᐃᖃᓗᖕᓂ ᓯᕙᑖᕐᕕᐅᑎᓪᓗᒍ ᐅᑯᐊ ᐹᓐ-ᐋᑎᒃ ᕕᓴᓐ ᓂᐱᖃᕈᑎᐅᑎᓪᓗᒍ ᐃᖃᓗᖕᓂ

ᓱᕖᑕᓐᒥᐅᑕᖅ ᐅᑯᓄᖓ NTÏV ᐃᙱᕐᑐᖅ ᓯᕙᑖᕐᕕᒃᒥ ᐅᕙᓂ ᐹᓐ-ᐋᑎᒃ ᕕᓴᓐᒥ ᐃᖃᓗᖕᓂ. (ᐊᔾᔨᓕᐅᕆᔨ ᔨᐊᕝ ᐃᐊᑦᓯᐄ)

9 ᑎᑕᒃᑏᑦ, ᐊᑐᓂ ᑭᒡᒐᖅᑐᐃᓪᓗᑎ ᐅᑭᐅᕐᑕᖅᑐᕐᒥ ᐊᕕᒃᑐᕐᓯᒪᓂᒃᑰᖓᔪᓂ, ᖁᕕᐊᓱᒃᑎᑦᑎᒻᒪᕆᓚᐅᕐᑐᑦ ᖁᙱᐊᕆᐊᖅᑐᓂᒃ ᐅᓇᑕᕐᑐᒃᓴᙳᐊᑦ ᐃᒡᓗᐊᓗᖓᓂ ᑎᑕᑲᑕᒃᖢᑎᒃ.

ᐱᖓᓱᓂ ᓵᓚᒃᓴᐅᓯᐊᒃᓴᖅᑕᖃᓚᐅᕐᑐᖅ ᑎᑕᑦᑎᐊᓛᓄᑦ, ᑖᒃᑯᐊᓗ ᓂᕈᐊᕆᔭᐅᔪᓐᓇᖅᖢᑎᒃ ᐅᐸᒍᑎᓯᒪᔪᓄᑦ ᐊᒻᒪᓗ ᓈᓚᐅᑎᒃᑯᑦ ᑐᓵᔪᓄᑦ ᖃᕋᓴᐅᔭᒃᑰᖓᔪᓂ ᐅᑯᓇᙵ ᖃᓛᓪᖡᑦ ᓄᓇᖓᓂ, ᐊᓛᔅᑲᒥ ᐊᒻᒪ ᓄᐊᕗᐃᒥ.

“ᐅᐊᑲᓪᓛᓗᖔ,” ᑕᐃᒪᓐᓇ ᐅᖃᐅᓯᖃᓚᐅᕐᑐᖅ ᐃᑲᑐᕆᓇ ᓴᕝᕕᓄᕙ, ᐃᖏᕐᑎ ᓴᐃᓇᒥ ᐊᑎᖃᖅᖢᓂ, ᐅᖃᐅᓯᖃᕐᑎᓪᓗᒍ ᓵᓚᒃᓴᐅᓯᐊᕆᔭᐅᔪᒥ ᐅᑭᐅᕐᑕᖅᑐᕐᒥᐅᑕᐅᓂᕐᒧᑦ ᐃᙱᐅᑎᒥ.

ᐅᕙᙶᖅᖢᓂ ᔭᑯᔅᒃ ᕌᓯᐊᑉ ᑲᓇᖕᓇᖅᐸᓯᐊᓂ, ᓴᐃᓇ ᐃᙱᓚᐅᕐᑐᖅ ᑲᑕᔾᔭᓕᖅᐸᒃᖢᓂ, ᕿᓚᐅᔾᔭᖅᐸᒃᖢᓂ ᐊᒻᒪ ᐃᖏᑲᑕᒃᖢᓂ ᓱᐴᒐᓕᔭᖅᖢᓂ.

ᔪᐳᕆᒍ, ᑎᓴᒪᓂ ᑎᑕᒃᑎᖃᖅᖢᓂ ᐊᐃᔅᓚᓐᒥ, ᓵᓚᒃᓴᐅᓯᐊᓚᐅᕐᑐᑦ ᐃᙱᕈᑎᐊᓄᑦ ᓂᐱᖃᕈᓘᔭᕐᓇᖅᑐᒥ ᐃᙱᑲᑕᒃᑎᓪᓗᒍ.

ᓚᐃᓇᔅ ᔮᓐᓴᓐ, ᐅᕙᓂ ᓄᓇᓕᒃ ᓵᑉᒥ ᓄᓇᓂ ᓄᐊᕗᐃ ᐅᐊᖕᓇᖓᓂ, ᓵᓚᒃᓴᐅᓯᐊᓚᐅᕐᑐᖅ “ᐃᙱᐅᓯᕐᒧᑦ ᐃᒃᐱᒍᓱᖕᓇᓛᒧᑦ ᓄᓇᓕᖕᓂ ᐊᒻᒪ ᐃᓅᖃᑎᒌᖕᓂᕐᒥ.”

ᖁᕕᐊᓇᕐᓂᐹᖑᖃᑕᐅᓚᐅᕐᑐᖅ ᑐᙵᓱᒃᑎᑕᐅᓂᖓ ᐃᙱᕐᑎᐅᖃᑕᐅᔪᖅ ᓯᕙᑖᕐᕕᐅᑎᓪᓗᒍ ᐆᒧᖓᐅᓚᐅᕐᑎᖅ ᓵᓇ ᓯᑏᓇᒃ.

ᖃᒪᓂᑦᑐᐊᕐᒥᐅᑕᐅᓂᑯ ᓄᓇᖃᓕᕐᑐᕐᓕ ᐃᖃᓗᖕᓂ, ᓯᑏᓇ ᓄᓇᕗᒥ ᑭᒡᒐᖅᑐᐃᓚᐅᕐᑐᖅ ᑖᒃᑯᓇᓂ ᓂᕈᐊᕆᔭᐅᓚᐅᕐᑎᓪᓗᒍ ᐊᓕᐊᓇᐃᑦ ᖁᕕᐊᓱᖕᓇᐅᑎᓪᓗᒍ ᑕᒪᑐᒪᓂ ᐊᕐᕌᒍᒥ.

ᐃᒃᐱᖕᓇᕐᓇᖅᑐᒥ ᐃᙱᐅᓯᖃᓚᐅᕐᑐᖅ, ᒪᑯᓂᖓ ᐃᒻᒥᓃᔭᑦᑐᓂᒃ, ᐃᓱᒪᒃᑯᑦ ᐋᓐᓂᐊᖃᕐᓇᒥ ᐊᒻᒪ ᐊᑐᓗᐊᔭᓐᓇᒥᒃ ᐋᖓᔮᕐᓇᖅᑐᓂ.

ᐃᖃᓗᖕᓂ ᐃᙱᕐᑎ ᓛᑯᓗ ᕗᐃᓕᐊᒻᓴᓐ ᐅᖃᕐᑎᒋᔭᐅᓚᐅᕐᑐᖅ, ᖁᓪᓕᕐᒥᓪᓗ ᐃᑯᒻᒪᕐᓴᐃᓪᓗᓂ ᓇᔭ ᐱᐅᔅ.

ᐅᑯᐊ 9 ᐃᙱᕐᑏᑦ ᖁᙱᐊᖅᑕᐃᓯᓐᓇ ᐊᓯᖏᓐᓂ ᖁᙱᐊᖅᑕᐅᔪᖃᓚᐅᕐᒥᔪᖅ ᐃᓱᓕᓕᕐᑎᓪᓗᒍ ᐅᑯᐊ ᐃᓚᒋᔭᐅᓪᓗᑎ ᓈᓐᓯ ᒪᐃᒃ ᐊᒻᒪ ᐃᕙᓗᐊᕐᔪᒃ ᑳᑕᓖᓐ ᒥᐅᕆᑦ, ᐊᒻᒪᓗ ᕿᓚᐅᔾᔭᖅᖢᑎᒃ ᐃᙱᕐᖢᑎᒡᓗ ᐃᓄᒃᓱᒃ ᕿᓚᐅᔾᔭᖅᑎᖏᑦ.

ᐊᒻᒪᓗ ᑕᒪᕐᒥ 9 ᖁᙱᐊᖅᑕᐅᓗᐊᕐᑐᑦ ᑲᑎᓚᐅᕐᒥᔪᑦ ᐃᙱᖃᑎᒌᒃᖢᑎᒃ.

ᐹᓐ ᐋᑎᒃ ᕕᓴᓐ ᐅᑎᔾᔮᙱᑦᑐᖅ ᐃᖃᓗᖕᓄ ᐊᕐᕌᒍ. ᖁᙱᐊᕐᑐᐃᑦ ᓂᕈᐊᖅᑎᑕᐅᓪᓗᑎᒃ ᓂᕈᐊᓚᐅᕐᒪᑕ ᕕᐅᕈ ᕿᑭᕐᑕᐃᑦ ᑭᖑᓪᓕᕐᒥ ᐃᙱᕆᐊᕐᑐᕐᕕᐅᓂᐊᕐᓗᓂ.

“ᖁᕕᐊᓇᑦᑎᐊᓚᐅᕐᑐᖅ ᐃᖃᓗᖕᓂ ᓄᓇᓖᑦ ᐅᐸᒃᑎᓪᓗᒋ ᐊᒻᒪ ᖁᕕᐊᓲᑎᖃᑲᑕᒃᖢᑎᒃ ᐃᙱᕐᑎᓂ, ᑖᔅᓱᒥᖓᓗ ᖃᓄᐃᓕᐅᕐᓇᐅᔪᒥ,” ᐅᖃᕐᑐᖅ ᐃᒪᓐ ᓯᐅᓕ ᓯᕖᓐ, ᐹᓐ-ᐋᑎᒃ ᕕᓴᓐᒧᑦ ᑐᑭᒧᐊᖅᑎᑦᑎᔨ.