ᐊᕐᕌᒍᓂ 100−ᓂ ᖃᖅᓴᐅᖅ ᓇᓴᖅ ᐊᖏᕐᕋᐅᔾᔭᐅᕗᖅ ᐃᖃᓗᒃᑑᑦᑎᐊᕐᒧᑦ
ᓇᓗᓇᐃᒃᑯᑕᐅᓪᓗᓂ ᖃᓄᐃᓐᓂᐅᔪᖅ ᐅᐸᒃᑎᑦᑎᕗᖅ 200−ᓂ ᐃᓄᖕᓂ ᑕᑯᔪᒪᓪᓗᑎᒃ ᓇᓴᕐᒥ
ᐃᓄᑐᖃᐃᑦ ᑲᑎᑉᐳᑦ ᓄᓇᓕᖕᓂ ᖃᓄᐃᓐᓂᐅᔪᒥ ᐋᒍᔅᑎ 6−ᒥ ᑐᕌᖓᔪᒥ ᐅᑎᖅᑎᑕᐅᓂᖓᓂ ᑲᓇᑕᒧᑦ ᖃᖅᓴᐅᕐᒥ ᒧᒥᕐᓂᕐᒧᑦ ᓇᓴᕐᒥ ᐃᖃᓗᒃᑑᑦᑎᐊᕐᒧᑦ. (ᒪᑕᓐᓯ ᐳᕋᐅᓐ ᐊᔾᔨᓕᐅᖅᑕᖓ/ᒐᓚᓐᐸᐅ ᑕᑯᔭᒐᖃᕐᕕᒃ)
For the English version of this story, please see Loon hat returned to Cambridge Bay.
ᐊᕐᕌᒍᑲᓴᓂ 10−ᓂ ᐅᑎᖅᑎᕆᓂᐅᔪᒥ ᐱᓕᕆᓂᐅᔪᒥ, 100-ᓂ-ᐅᑭᐅᓕᖕᓂ ᒧᒥᕐᓂᕐᒧᑦ ᓇᓴᕐᒥ ᖃᖅᓴᐅᑉ ᓯᒡᒍᖓᓂ ᐅᑎᖅᑎᑕᐅᓯᒪᕗᖅ ᐃᖃᓗᒃᑑᑦᑎᐊᕐᒧᑦ, ᐱᑎᑦᑎᓂᐅᓚᐅᖅᑐᒥ ᖁᕕᐊᓱᒍᑎᖃᕐᓂᕐᒥ.
“ᓇᒃᓴᓚᐅᖅᐳᖅ ᓱᕈᓯᐅᑎᓪᓗᒋᑦ ᐃᖅᑲᐅᒪᓂᐅᔪᓂ ᐃᓄᑐᖃᑦᑎᓐᓄᑦ,” ᐅᖃᓚᐅᖅᐳᖅ ᐃᒪᓕ ᐊᖑᓚᓕᒃ, ᐃᓱᒻᒥᖅᑐᐃᔨᐅᔪᖅ ᕿᑎᕐᒥᐅᓂ ᐃᑦᑕᕐᓂᓴᓕᕆᓂᕐᒧᑦ ᑲᑐᔾᔨᖃᑎᒌᖑᔪᓄᑦ.
ᓇᓴᖅ, ᓴᓇᓯᒪᔪᖅ ᑐᒃᑑᑉ ᐊᒥᖓᓂ ᖃᖅᓴᐅᑉ ᓯᒡᒍᖓᓂ ᕿᑎᐊᒍᑦ, ᑕᑯᒃᓴᐅᑎᑕᐅᓚᐅᖅᐳᖅ ᐋᒍᔅᑎ 6−ᒥ ᓄᓇᓕᖕᓂ ᖁᕕᐊᓱᒍᑕᐅᔪᒥ ᓇᓗᓇᐃᖅᓯᓂᖓᓂ ᐅᑎᖅᑎᑕᐅᓂᖓᓂ. ᐅᓄᕐᓂᖅᓴᐅᔪᓂ 200−ᓂ ᐃᓄᖕᓂ ᐅᐸᓚᐅᖅᐳᑦ ᓇᓗᓇᐃᖅᓯᓂᕐᒥ ᖃᓄᐃᓐᓂᐅᔪᒥ.
ᖃᖅᓴᐅᕐᒥ ᒧᒥᕐᓂᕐᒧᑦ ᓇᓴᖅ ᑕᑯᒃᓴᐅᑎᑕᐅᕗᖅ ᐋᒍᔅᑎ 6−ᒥ ᖁᕕᐊᓱᒍᑕᐅᔪᒥ ᑲᑎᑎᕆᓚᐅᖅᑐᒥ 200−ᓂ ᐃᓄᖕᓂ ᐃᖃᓗᒃᑑᑦᑎᐊᕐᒥ. (ᒪᑕᓐᓯ ᐳᕋᐅᓐ ᐊᔾᔨᓕᐅᖅᑕᖓ/ᒐᓚᓐᐸᐅ ᑕᑯᔭᒐᖃᕐᕕᒃ)
ᐃᓄᑐᖃᐃᑦ ᐃᖅᑲᐅᒪᓚᐅᖅᐳᑦ ᐊᑖᑕᖏᓐᓂ ᐊᒻᒪ ᐊᑖᑕᑦᑎᐊᖏᓐᓂ ᐊᑐᖅᐸᓚᐅᖅᑐᓂ ᓇᓴᕐᓂ ᐆᒥᖓᑎᑐᑦ ᐱᙳᐊᖅᑎᓪᓗᒋᑦ ᐊᒃᑯᐊᕐᒥᐅᔪᒥᑦ “ᐃᓱᒪᖅᓱᕈᑕᐅᓪᓗᓂ” ᒧᒥᕐᓂᕐᒧᑦ ᐱᔭᕆᐊᖃᖅᑎᑦᑎᔪᒥ ᒧᒥᖅᑎᐅᔪᒥ ᓱᒃᑲᑎᒋᓗᓂ ᓯᒃᓯᒃᑎᑐᑦ ᐊᒻᒪ ᓂᐱᖅᑯᖅᑐᑎᒋᔪᑐᑦ ᖃᖅᓴᐅᖅᑎᑐᑦ ᑭᐊᕝᕙᓗᒃᑐᒥ ᓂᓪᓕᐊᓕᕌᖓᑦ, ᐊᖑᓚᓕᒃ ᐅᖃᓚᐅᖅᐳᖅ.
ᑐᑭᓯᓇᙱᓚᖅ ᖃᖓᓂ ᓇᓴᖅ ᕿᒪᒃᓯᓚᐅᕐᓂᖓᓂ ᐃᓄᐃᑦ ᓄᓇᖓᓐᓂ, ᑭᓯᐊᓂ ᑲᑎᖅᓱᖅᑕᐅᓂᓃᓕᓚᐅᖅᐳᖅ Imperial Oil−ᑐᓐᓂ, ᐅᖅᓱᐊᓗᖕᒥ ᑲᒻᐸᓂᐅᔪᒥ ᑐᙵᕕᖃᖅᑐᒥ ᑭᐊᓪᒍᕆᒥ.
“ᐊᒥᓱᓂ ᐃᓄᖕᓂ ᖄᖏᖅᓯᒪᓕᖅᑐᓂ ᐊᕐᕌᒍᓄᑦ 150−ᓄᑦ ᐱᓯᒪᕗᑦ ᐱᖁᑎᓂ ᓄᓇᖃᖅᑳᖅᓯᒪᔪᓄᑦ ᓄᓇᓕᐅᔪᓂ, ᐅᕙᙶᕐᒪᖔᑕ ᐊᓪᓚᓄᑦ ᐱᔨᕆᔨᐅᔪᓄᑦ ᐅᕝᕙᓘᓐᓃᑦ ᐃᒃᓯᕋᕐᔪᐊᓂ, ᐅᕝᕙᓘᓐᓃᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᓂᕐᒧᑦ, ᐅᕝᕙᓘᓐᓃᑦ ᐃᓄᖕᓂ ᐃᓗᐊᖅᓴᐃᔨᐅᔪᓄᑦ,” ᐅᖃᓚᐅᖅᐳᖅ ᔪᐋᓐ ᓯᒥᑦ, ᐸᖅᑭᔨᐅᔪᒥ ᓄᓇᖃᖅᑳᖅᓯᒪᔪᓄᑦ ᖃᐅᔨᓴᕐᓂᐅᔪᓄᑦ ᐊᒻᒪ ᓄᓇᕐᔪᐊᒥ ᐃᓕᖅᑯᓯᐅᔪᓂ ᒐᓚᓐᐴ ᑕᑯᔭᒐᖃᕐᕕᖓᓂ ᑭᐊᓪᒍᕆᒥ.
ᑕᐃᒪᐃᒐᔪᒃᑐᒥ, ᓄᓇᓕᐅᔪᑦ ᐊᔭᐅᕆᔭᐅᕙᓚᐅᖅᐳᑦ ᓂᐅᕕᐊᒃᓴᖃᕐᓂᖏᓐᓂ ᖁᕕᐊᓱᒍᑕᐅᔪᓂ ᐱᖁᑎᖏᓐᓂ ᑮᓇᐅᔭᓕᕆᓂᕐᒧᑦ ᐱᔾᔪᑕᐅᔪᓂ ᐅᕝᕙᓘᓐᓃᑦ ᐱᖁᔭᐅᕙᓚᐅᙱᒻᒪᑕ ᒐᕙᒪᒃᑯᓐᓂ ᐋᖅᑭᐅᒪᑎᑦᑎᓂᖏᓐᓂ ᐱᖅᑯᓯᑐᖃᖅᑎᒍᑦ ᐊᑐᖅᐸᓚᐅᖅᑕᖏᓐᓂ.
ᓇᓴᖅ ᓇᒃᓴᖅᑕᐅᓚᐅᖅᐳᖅ ᒐᓚᓐᐴ ᑕᑯᔭᒐᖃᕐᕕᖓᓄᑦ 2016−ᒥ ᑐᕌᒐᒃᓴᖃᖅᖢᓂ ᐅᑎᖅᑎᑕᐅᓂᖓᓄᑦ ᐃᓄᖕᓄᑦ, ᓯᒥᑦ ᐅᖃᓚᐅᖅᐳᖅ. ᑭᒡᒐᖅᑐᐃᔨᐅᔪᑦ ᑕᑯᔭᒐᖃᕐᕕᖕᒥ ᐱᓕᕆᓚᐅᖅᐳᑦ ᐊᕐᕌᒍᒐᓴᓂ ᓇᓗᓇᐃᖅᓯᓇᓱᐊᖅᖢᑎᒃ ᓇᓴᖅ ᓇᑭᙶᕐᓂᖓᓂ.
“ᕿᒥᕐᕈᓚᐅᖅᐳᒍᑦ ᑲᑎᖅᓱᖅᑕᐅᓯᒪᔪᖁᑎᑦᑎᓐᓂ ᐊᒻᒪ ᐃᓴᓚᐅᖅᐳᒍᑦ ᐊᓯᖏᓐᓄᑦ ᑕᑯᔭᒐᖃᕐᕕᖕᓄᑦ,” ᓯᒥᑦ ᐅᖃᓚᐅᖅᐳᖅ.
“ᖃᐅᔨᓴᕐᓂᐅᕗᖅ ᐅᖃᓕᒫᒐᕐᓂ, ᕿᓂᕐᓂᕐᒥ ᖃᕋᓴᐅᔭᑎᒍᑦ ᑎᑎᕋᖅᑕᐅᓯᒪᔪᓂ, ᖃᐅᔨᒋᐊᕐᓂᕐᒥ ᐊᔾᔨᖁᑎᓂ ᐊᔾᔨᐸᓗᖏᓐᓂ ᐱᖁᑎᓂ ᐅᕝᕙᓘᓐᓃᑦ ᐃᓄᖕᓂ ᐊᑐᖅᑐᓂ ᐊᔾᔨᐸᓗᖏᓐᓂ.”
ᓱᓕ ᑐᑭᓯᓇᙱᓚᖅ ᓇᓕᐊᖕᓂ ᓄᓇᓕᐅᔪᒥ ᖃᓂᒋᓛᕆᔭᖓᓂ ᓯᕗᓕᖏᓐᓂ ᐃᓄᖕᓂ ᓴᓇᓚᐅᖅᑐᒥ ᖃᖅᓴᐅᑉ ᓇᓴᖓᓂ, ᑭᓯᐊᓂ ᖃᐅᔨᓴᖅᑎᑦ ᓇᓗᓇᐃᖅᓯᓚᐅᖅᐳᑦ ᐅᕙᙶᕐᓂᖓᓂ ᕿᑎᕐᒥᐅᓂ ᐊᕕᒃᑐᖅᓯᒪᓂᐅᔪᒥ.
ᓇᓴᖅ ᕿᓚᒻᒥᐅᔪᒥ ᑕᑯᒃᓴᐅᑎᑕᐅᓂᐊᖅᐳᖅ ᐅᖃᓕᒫᒐᖃᕐᕕᖓᓂ ᕿᑎᕐᒥᐅᓂ ᐃᑦᑕᕐᓂᓴᓕᕆᓂᕐᒧᑦ ᑲᑐᔾᔨᖃᑎᒌᖑᔪᓄᑦ — ᐊᖑᓚᓕᒃ ᓱᓕ ᐋᖅᑭᒃᓱᐃᕙᓪᓕᐊᕗᖅ ᓈᒻᒪᒃᑐᒥ ᐃᓂᒃᓴᖓᓂ.
ᑲᑐᔾᔨᖃᑎᒌᖑᔪᑦ ᓴᓇᓇᓱᒍᒪᕗᑦ ᖃᔅᓯᒐᓚᖕᓂ ᐊᔾᔨᖓᓂ ᓇᓴᕐᒥ ᓯᕗᓂᒃᓴᒧᑦ ᐱᓕᕆᐊᒃᓴᐅᔪᓄᑦ.
“ᐅᓇ ᐊᖏᒡᓕᒋᐊᖅᑎᑦᑎᓇᔭᑦᑎᐊᖅᐳᖅ ᐃᓕᖅᑯᓯᒥ ᐱᔪᒪᓂᖃᒃᑲᓐᓂᕐᓂᐅᔪᒥ ᐊᒻᒪ ᐃᒻᒪᖄ ᐱᓕᕆᓂᐅᔪᒥ ᐃᓕᖅᑯᓯᒧᑦ ᐅᑎᖅᑎᕆᓂᐅᔪᒥ,” ᐊᖑᓚᓕᒃ ᐅᖃᓚᐅᖅᐳᖅ.
(0) Comments