ᐱᐅᙱᑎᑦᑎᓂᕐᒥ ᐃᒡᓗᖃᖅᑎᑦᑎᓂᕐᒥ ᑕᒻᒪᖅᓯᒪᔪᖅᓯᐅᖅᑕᐅᓂᖓᓂ ᐱᑐᐃᓐᓇᖅᐳᖅ ᐃᓚᖓᓂ ᐅᓐᓂᒃᑳᖅᑐᐊᖑᔪᒥ: ᐊᐅᓚᑦᑎᔨᒻᒪᕆᒃ

For the English version of this story, please see CEO says Nunavut Housing Corp. committed to transparency, improvements after auditor general report.

ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ ᐊᖓᔪᖅᑳᖅ ᐊᒻᒪ ᐊᐅᓚᑦᑎᔨᒻᒪᕆᒃ ᐊᐃᕆᓐ ᑕᕗᕉ ᐅᖃᖅᐳᖅ ᐊᖏᖅᓯᒪᓂᖓᓂ ᐱᐅᓂᖅᓴᐅᔪᒥ ᑕᑯᒃᓴᐅᑎᑦᑎᑦᑎᐊᕐᓂᖅᓴᐅᓂᐅᔪᒥ ᐊᒻᒪ ᐊᑐᓕᖅᑎᑦᑎᓂᕐᒥ ᐱᐅᓯᒋᐊᕈᑕᐅᔪᓂ, ᒪᓕᒃᑐᒥ ᐅᓂᒃᑳᓕᐊᒥ ᑲᓇᑕᒥ ᑕᒻᒪᖅᓯᒪᔪᖅᓯᐅᑎᕐᔪᐊᕐᒥ ᐃᓚᑰᓂᐅᔪᓂ ᐃᓄᓕᒫᓄᑦ ᐃᒡᓗᖁᑎᖏᓐᓂ ᓄᓇᕗᒻᒥ.

ᑕᕗᕉ, ᑕᒻᒪᖅᓯᒪᔪᖅᓯᐅᑎᕐᔪᐊᑉ ᑐᒡᓕᖓ ᐋᓐᑐᕉ ᕼᐊᐃᔅ, ᐊᒻᒪ ᐃᓱᒻᒥᖅᑐᐃᔨᐅᔪᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ ᐊᒻᒪ NCC ᐱᖁᑎᖏᑦ ᑎᒥᖓᑦ ᓴᖅᑭᓚᐅᖅᐳᑦ ᓯᑎᐱᕆ 4−ᒥ ᓯᕗᓂᐊᓂ ᓄᓇᕗᒻᒥ ᒪᓕᒐᓕᐅᖅᑎᒃᑯᑦ ᒐᕙᒪᖓᓂ ᐃᓚᑰᓂᐅᔪᓄᑦ ᑲᑎᒪᔨᕋᓛᖑᔪᓄᑦ.

ᑲᑎᒪᔨᕋᓛᖑᔪᑦ ᕿᒥᕐᕈᐊᖅᐳᑦ ᓇᓂᔭᐅᓂᐅᔪᓂ ᑕᒻᒪᖅᓯᒪᔪᖅᓯᐅᑎᕐᔪᐊᑉ ᐅᓂᒃᑳᓕᐊᖓᓂ, ᓴᖅᑭᑎᑕᐅᔪᓂ ᒪᓕᒐᓕᐅᕐᕕᖕᒥ ᒪᐃᒥ.

ᓇᓗᓇᐃᖅᓯᕗᖅ ᐊᑲᐅᙱᓕᐅᕈᑕᐅᔪᓂ ᐃᓄᓕᒫᓄᑦ ᐃᒡᓗᖁᑎᖏᓐᓂ ᓄᓇᕗᒻᒥ, ᐃᓚᖃᖅᑐᒥ ᐱᐅᙱᑦᑐᒥ ᐋᖅᑭᐅᒪᑎᑦᑎᓂᐅᔪᒥ, ᐊᒃᓱᕈᕈᑕᐅᔪᓂ ᒐᕙᒪᒃᑯᑦ ᓵᙵᓂᖏᓐᓂ ᑭᐅᓂᕐᒥ ᑐᕌᒐᒃᓴᖓᓐᓂ ᓴᓇᓂᕐᒥ 3,000−ᓂ ᓄᑖᓂ ᐃᒡᓗᒃᓴᓂ 2030−ᖑᕋᓱᖕᓂᖓᓂ, ᐊᒻᒪ ᐱᓕᕆᑦᑎᐊᙱᓐᓂᐅᔪᒥ ᑐᓂᓯᓂᕐᒥ “ᐊᔾᔨᒌᖕᓂᑦ” ᐃᒡᓗᖃᖅᑎᑕᐅᓂᐅᔪᒥ ᓄᓇᕗᒻᒥᐅᓄᑦ.

ᑕᒻᒪᖅᓯᒪᔪᖅᓯᐅᑎᕐᔪᐊᑉ ᑐᖏᓕᖓ ᐋᓐᑐᕉ ᕼᐊᐃᔅ ᐅᖃᖃᑎᖃᖅᐳᖅ ᒪᓕᒐᓕᐅᖅᑎᓄᑦ ᓯᑎᐱᕆ 4−ᒥ. (ᔨᐊᕝ ᐱᓚᑦᑎᐊᐃᒧᑦ ᐊᔾᔨᓕᐅᖅᑕᐅᔪᖅ)

“ᐱᓪᓚᕆᐅᕗᖅ ᒐᕙᒪᒃᑯᓐᓂ ᐱᓕᕆᐊᖃᕐᓂᖏᓐᓂ ᐊᒻᒪ ᓇᓗᓇᐃᖅᓯᓗᓂ ᓄᓇᕗᒻᒥᐅᑦ ᐊᑐᐃᓐᓇᖃᕐᓂᖏᓐᓂ ᐊᑲᐅᑦᑎᐊᖅᑐᓂ ᐊᒻᒪ ᓈᒻᒪᒃᑐᓂ ᐃᓄᓕᒫᓄᑦ ᐃᒡᓗᖁᑎᖏᓐᓂ, ᑐᓂᓯᓗᓂ ᓯᕗᓪᓕᐅᑎᑕᐅᔭᕆᐊᖃᖅᑐᓂ ᑕᐃᒃᑯᓄᖓ ᐊᖏᓛᒥᒃ ᐱᔭᕆᐊᓕᖕᓄᑦ,” ᕼᐊᐃᔅ ᐅᖃᓚᐅᖅᐳᖅ ᒪᑐᐃᖅᓯᒋᐊᕐᓂᕐᒧᒃ ᐅᖃᐅᓯᒃᓴᓕᐊᖏᓐᓂ.

ᑕᕗᕉ, ᒪᑐᐃᖅᓯᒋᐊᕐᓂᕐᒧᒃ ᐅᖃᐅᓯᒃᓴᓕᐊᖏᓐᓂ, ᐅᖃᓚᐅᖅᐳᖅ ᐃᒡᓗᓕᕆᔨᕐᔪᐊᒃᑯᑦ ᑐᙵᓱᒃᑎᑦᑎᕗᑦ ᐅᓂᒃᑳᓕᐊᖑᔪᒥ ᐊᒻᒪ ᓈᒻᒪᒃᓴᖅᐳᑦ 10−ᖑᔪᓂ ᐊᑐᓕᖁᔭᐅᓂᐅᔪᓂ, ᐃᓚᖃᖅᑐᒥ ᐱᐅᓯᒋᐊᖅᑎᑦᑎᓂᕐᒥ ᑲᑐᔾᔨᖃᑎᒌᖕᓂᐅᔪᒥ ᐊᒻᒪ ᐋᔩᖃᑎᒌᖕᓂᐅᔪᒥ ᓄᓇᓕᖕᓂ ᐃᒡᓗᓕᕆᔨᒃᑯᓐᓂ ᐊᒻᒪ ᑕᑯᒃᓴᐅᑎᑦᑎᑦᑎᐊᕐᓂᖅᓴᐅᓂᐅᔪᒥ ᐃᖏᕐᕋᓂᖓᓂ ᐱᓕᕆᐊᖑᔪᓂ ᓇᑉᐸᖅᑎᕆᓂᕐᒥ.

“ᐱᒋᐊᕈᒪᕗᖓ ᓇᓗᓇᐃᖅᓯᒃᑲᓐᓂᕐᓂᕐᒥ [ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ] ᓴᙱᔪᒥ ᐊᖏᖅᓯᒪᓂᖏᓐᓂ ᑕᑯᒃᓴᐅᑎᑦᑎᑦᑎᐊᕐᓂᕐᒥ, ᓵᑕᐅᔪᒃᓴᐅᑕᐅᔪᓐᓇᕐᓂᕐᒥ, ᐊᒻᒪ ᑲᔪᓯᔪᒥ ᐱᐅᓯᒋᐊᖅᐸᓪᓕᐊᓂᐅᔪᒥ,” ᐅᖃᓚᐅᖅᐳᖅ, ᐅᖃᓪᓚᓚᐅᖅᑳᕋᓂ ᐃᓚᖏᓐᓂ ᐸᕐᓇᐃᓂᐅᔪᓂ ᐊᒃᓱᕈᕈᑕᐅᔪᓂ ᑐᓂᓯᓂᕐᒥ ᐃᓄᓕᒫᓄᑦ ᐃᒡᓗᖁᑎᖏᓐᓂ ᓄᓇᕗᒻᒥ, ᐊᒻᒪᓗᑦᑕᐅᖅ ᐃᖏᕐᕋᑎᑦᑎᓂᕐᒥ ᑎᒥᖁᑕᐅᔪᒥ ᓴᓇᓯᒪᔭᖏᓐᓂ ᐋᖅᑭᒃᓯᓂᕐᒥ “ᐱᓕᕆᔾᔪᓯᐅᔪᓂ” ᐊᑲᐅᙱᓕᐅᕈᑕᐅᔪᓂ.

“ᐃᒃᐱᒍᓱᑦᑎᐊᕋᓗᐊᖅᑎᓪᓗᑕ ᐱᓕᕆᓂᐅᔪᒥ ᑕᒻᒪᖅᓯᒪᔪᖅᓯᐅᑎᕐᔪᐊᕐᒥ, ᐅᒃᐱᕈᓱᒃᐳᒍᑦ ᑕᒻᒪᖅᓯᒪᔪᖅᓯᐅᖅᑕᐅᓂᖓ ᐱ(ᐃᓐᓇᕐᓂᖓᓂ ᐃᓚᐃᓐᓇᖓᓂ ᐆᒥᖓ ᐅᓂᒃᑳᓕᐊᖑᔪᒥ,” ᑕᕗᕉ ᐅᖃᓚᐅᖅᐳᖅ.

“ᓴᖑᑎᑦᑎᓂᐅᔪᒥ ᓄᓇᕘᑉ ᐃᒡᓗᖃᖅᑎᑦᑎᓂᕐᒥ ᐱᓕᕆᔾᔪᓯᐅᔪᒥ ᐱᓕᕆᐊᖑᕙᓪᓕᐊᕗᖅ ᐊᒻᒪ ᓯᕗᓂᒃᓴᒥ ᑕᒻᒪᖅᓯᒪᔪᖅᓯᐅᖅᑕᐅᓂᖓᓂ ᐱᐅᓂᖅᓴᐅᔪᒥ ᑕᑯᒃᓴᐅᑎᑦᑎᑦᑎᐊᕐᓂᖅᓴᐅᓂᐊᖅᐳᖅ ᐃᓗᑐᓂᖓᓂ ᐆᒥᖓ ᐊᓯᔾᔨᕐᓂᐅᔪᒥ.”

ᓴᖅᑮᓐᓇᖅᑐᒥ ᐅᖃᐅᓯᐅᔪᒥ ᐃᓚᖏᑦ ᐊᑲᐅᙱᓕᐅᕈᑕᐅᔪᑦ ᐃᓄᓕᒫᓄᑦ ᐃᒡᓗᖁᑎᖏᓐᓂ ᓇᓗᓇᐃᖅᑕᐅᔪᓂ 2008−ᒥ ᑕᒻᒪᖅᓯᒪᔪᖅᓯᐅᑎᕐᔪᐊᑉ ᐅᓂᒃᑳᓕᐊᖓᓂ ᐊᔾᔨᐸᓗᒋᓚᐅᖅᐸᖓ ᑕᐃᒃᑯᓄᖓ ᐅᖃᐅᓯᐅᔪᓂ ᑕᒪᑐᒪᓂ ᐊᕐᕌᒎᔪᒥ ᐅᓂᒃᑳᓕᐊᖓᓂ.

ᑕᐃᓐᓇ ᐅᓂᒃᑳᓕᐊᖓ ᑕᐃᔅᓱᒪᓂ-ᑕᒻᒪᖅᓯᒪᔪᖅᓯᐅᑎᕐᔪᐊᖅ ᓰᓚ ᕗᕋᐃᓱᕐᒧᑦ ᐊᔾᔨᐸᓗᐊᓂ ᐅᖃᐅᓯᖃᓚᐅᖅᐳᖅ ᐊᑲᐅᙱᓕᐅᕈᑕᐅᔪᓂ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᐅᓚᑦᑎᓂᕐᒥ, ᐱᑎᑦᑎᑦᑕᐃᓕᒪᓂᕐᒧᑦ ᐋᖅᑭᐅᒪᑎᑦᑎᓂᕐᒧᑦ ᐱᓕᕆᐊᖑᔪᓂ, ᐃᒡᓗᒃᓴᓂ ᑐᓂᓯᓂᐅᔪᒥ ᐊᒻᒪ ᓇᑉᐸᖅᑎᕆᓂᕐᒥ.

“ᐃᓱᒪᕗᖓ ᑐᓂᓯᓂᐅᔪᒥ ᐃᓄᓕᒫᓄᑦ ᐃᒡᓗᖁᑎᖏᓐᓂ ᐱᓕᕆᐊᖑᔪᒥ ᐊᔪᕐᓇᐃᓐᓇᐅᔭᕐᓂᐊᖅᐳᖅ ᐊᒻᒪ ᐊᒃᓱᕈᕐᓇᕐᓂᐅᖏᓐᓇᐅᔭᕐᓂᐊᖅᖢᓂ,” ᑕᕗᕉ ᐅᖃᓚᐅᖅᐳᖅ, ᐅᖃᖅᖢᓂ ᐃᒡᓗᓕᕆᔨᕐᔪᐊᒃᑯᓐᓃᓚᐅᙱᓐᓂᖓᓂ 2008−ᒥ.

“ᑕᐃᒪᑐᖅ, [ᑕᒻᒪᖅᓯᒪᔪᖅᓯᐅᖅᑕᐅᓂᖓᓂ ᐅᓂᒃᑳᓕᐊᖓᓂ], ᑕᒪᒃᑭᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᒻᒪ [ᓄᓇᓕᖕᓂ ᐃᒡᓗᓕᕆᓕᒃᑯᑦ ᑲᑐᔾᔨᖃᑎᒌᖑᔪᓂ] ᓅᑉᐸᓪᓕᐊᓂᖏᓐᓂ ᐱᐅᓂᖅᓴᐅᔪᒥ ᑐᕌᒐᕆᔭᐅᔪᒥ ᐱᐅᓯᒋᐊᖅᑎᑦᑎᓇᓱᐊᕐᓂᕐᒥ ᑖᒃᑯᓄᖓ, ᑎᑭᐅᑎᓇᓱᐊᕐᓂᕐᒥ ᑕᐃᒪᐃᑦᑐᒐᓚᖕᒥ ᐱᐅᑦᑎᐊᖅᑐᒥ ᐱᕙᓪᓕᐊᑎᑕᐅᓂᖓᓂ ᖃᓄᐃᓐᓂᐅᔪᓂ.”

ᕼᐊᐃᔅ ᐅᖃᓚᐅᖅᐳᖅ ᖃᖓᒃᑲᓐᓂᖅ ᖃᐅᔨᒋᐊᒃᑲᓐᓂᖅᑐᖃᓛᖅᑐᒃᓴᐅᕗᖅ ᑕᒪᑐᒧᖓ ᐊᕐᕌᒎᔪᒥ ᐅᓂᒃᑳᓕᐊᖓᓂ. ᑕᕗᕉ ᐅᖃᓚᐅᖅᐳᖅ ᓂᕆᐅᒃᐳᖅ ᑕᑯᒃᓴᐅᑎᑦᑎᓂᐊᕐᓂᖓᓂ ᐃᖏᕐᕋᓂᖃᖅᐸᓪᓕᐊᓂᖓᓂ.

“ᐃᓱᒪᕗᖓ ᐅᕙᙶᕐᓂᕐᒥ ᑕᒻᒪᖅᓯᒪᔪᖅᓯᐅᖅᑕᐅᓂᖓᓂ ᐅᓂᒃᑳᓕᐊᖓᓂ, ᕿᒥᕐᕈᓯᒪᕗᒍᑦ ᓇᓂᔭᐅᓂᐅᔪᓂ, ᐱᓕᕆᓪᓗᑕ ᐱᕙᓪᓕᐊᑎᑦᑎᓂᕐᒥ ᖃᓄᐃᓕᐅᕈᑎᒃᓴᒥ ᐸᕐᓇᐅᑎᒥᒃ ᖃᖓ ᐱᔭᕇᖅᓯᒪᔭᕆᐊᖃᕐᓂᖓᓂ-ᐊᑦᑐᖏᖅᓯᒪᔪᒥ ᐊᒻᒪ ᓇᓗᓇᐃᖅᓯᒪᓪᓗᓂ ᑕᐃᒪᑐᖅ ᑭᐅᓂᐊᖅᐳᖅ ᐊᒥᓱᓂ ᐱᒻᒪᕆᐅᔪᓂ ᑕᑯᔭᐅᓂᐅᔪᓂ,” ᐅᖃᓚᐅᖅᐳᖅ.

“ᐅᒃᐱᕈᓱᒃᐳᖓ ᑎᑎᕋᕐᕕᖓ ᑕᒻᒪᖅᓯᒪᔪᖅᓯᐅᑎᕐᔪᐊᒃᑯᓐᓂ ᐱᓕᕆᓂᐊᕐᓂᖏᓐᓂ ᖃᐅᔨᒋᐊᒃᑲᓐᓂᕐᓂᐅᔪᒥ ᑎᑭᑉᐸᓪᓕᐊᔪᒥ ᐊᕐᕌᒍᒥ ᒪᕐᕉᖕᓂᓪᓘᓐᓃᑦ ᐃᑲᔪᕐᓂᕐᒧᑦ ᐆᒃᑐᕋᐃᓂᖓᓂ ᐃᖏᕐᕋᕙᓪᓕᐊᓂᖓᓂ ᐃᓚᖏᓐᓂ ᐊᑐᓕᖁᔭᐅᔪᓂᑦ.”

ᐊᐱᖅᑯᑕᐅᔪᑦ ᑲᔪᓯᓚᐅᖅᐳᑦ ᐅᓐᓄᓴᕐᔪᐊᒧᑦ ᓯᑎᐱᕆ 4−ᒥ ᐊᒻᒪ ᑲᔪᓯᓚᐅᖅᐳᖅ ᑕᐃᑯᖓ ᓯᑎᐱᕆ 5−ᒧᑦ.