ᐊᓯᔾᔨᕐᓯᑲᑕᖕᓂᐊᓕᕐᑐᑦ ᒥᑦᑕᕐᕕᒃᒥ ᓴᐳᓐᓂᐊᕐᓂᕐᒥ ᐋᓐᓂᕐᓱᐃᕆᔪᖃᓚᐅᕐᑎᓪᓗᒍ

For the English version of this story, please see Changes coming to regional airports following Cambridge Bay assault.

ᐃᖃᓗᒃᑑᑦᑎᐊᑉ ᒪᐃᔭᖓ ᐅᖃᕐᑐᖅ “ᑲᒪᓂᐊᕐᑐᒃᓴᐅᕗᑦ” ᐊᓯᔾᔨᖅᑕᐅᔪᓂᒃ ᒥᑦᑕᕐᕕᒃᒥ ᓴᐳᓐᓂᐊᕐᓯᒪᔾᔪᑎᖏᓐᓂ ᐃᓚᖏᓐᓂ ᓄᓇᓕᖕᓂ ᐋᓐᓂᕐᓱᐃᕆᔪᖃᕐᔪᐊᓚᐅᕐᑎᓪᓗᒍ.

ᐱᖓᓱᑦ ᐊᖑᑎᑦ ᐸᓯᔭᒃᓴᐅᑎᑕᐅᓕᓚᐅᕐᑐᑦ ᐊᔾᔨᒌᙱᑦᑑᑎᓄᑦ ᐸᓯᔭᒃᓴᐅᔾᔪᑎᓄᑦ ᐅᑯᓄᖓ ᐋᓐᓂᕐᓱᐃᕆᕐᔪᐊᕐᓂᕐᒧᑦ, ᐊᓂᑎᑦᑎᑦᑕᐃᓕᓂᕐᒧᑦ ᐊᒻᒪ ᓂᐅᕕᐊᒃᓴᖃᕐᓂᕐᒥ ᐋᖓᔮᕐᓇᖅᑐᓂ ᐊᑐᐃᓐᓇᐅᑎᑕᐅᙱᑦᑐᓂ ᔪᓚᐃ 8-ᒥ ᒪᕐᕉᖕᓂ ᐊᖑᑏᖕᓂ ᐊᑦᒪᓐᑕᓐᒧ ᐊᐅᓪᓚᖅᑎᑕᐅᑎᓪᓗᒋᑦ ᐋᓐᓂᐊᕕᐊᓗᒃᒧᑦ ᓄᓇᓕᖕᓂᓪᓗ ᑲᑉᐱᐊᓱᒍᑎᐅᑲᑕᒃᖢᓂ. ᑎᓴᒪᒋᔭᐅᔪᖅ ᐊᖑᑎ ᒪᕐᕈᐃᓄᑦ ᐸᓯᔭᒃᓴᙳᖅᑎᑕᐅᓚᐅᕐᒥᔪᖅ.

ᐊᖓᔪᖅᑳᕆᔭᐅᔪᖅ ᓲᐳᐃᓐᑕᓐᑕᓐᑦ ᑭᐊᓐᑦ ᐸᐃᒃ, ᕿᑎᐊᓃᑦᑐᖅ, ᐅᖃᓪᓚᒃᑐᖅ ᐅᑯᐊ ᐹᒥᓚ ᒍᕉᔅ, ᓴᐅᒥᐊᓂᒃ, ᐊᒻᒪ ᐸᓖᓯᒃᑯᓐᓄᑦ ᓵᔾᔭᓐᑦ ᐱᐊᑦ ᕕᓕᑉ ᑐᓵᓪᓗᑎᒃ ᓄᓇᓖᑦ ᑲᑎᒪᕝᕕᐊᓂ ᔪᓚᐃ 14-ᖑᑎᓪᓗᒍ ᐃᖃᓗᒃᑑᑦᑎᐊᕐᒥ ᐅᖃᐅᓯᖃᖅᖢᑎᒃ ᐊᑦᑕᓇᖅᑐᒦᑦᑕᐃᓕᓂᕐᒧᑦ ᐃᓱᒫᓘᑎᒋᔭᐅᔪᓂ ᓄᓇᓕᖕᓂ. (ᐊᔾᔾᔨᙳᐊᖅ ᐅᑯᓇᙵᑦ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ)

ᑖᒃᑯᐊ ᐋᓐᓂᕐᓱᖅᑕᐅᓂᕋᖅᑕᐅᔫᒃ ᕿᓚᒃᓱᖅᑕᐅᓯᒪᓂᕋᖅᑕᐅᓚᐅᕐᑑᒃ, ᐋᓐᓂᐊᕐᓱᖅᑕᐅᓪᓗᑎᒡᓗ ᑲᐅᑕᐅᔭᕐᓄᑦ ᐊᒻᒪ ᖃᓛᕐᑐᒧᑦ ᐃᒪᕐᒧᑦ ᐆᑎᑕᐅᓪᓗᑎᒃ. ᑐᓴᑲᑕᓕᓚᐅᕐᑐᑦ ᐋᓐᓂᕐᓱᐃᕆᔪᕕᓂᕐᓂ ᓱᒋᐅᑎᖃᕐᑐᓄᑦ ᓄᓇᓕᖕᓂ ᐊᒻᒪᓗ ᓄᓇᓕᖕᓃᑦᑐᑦ ᐊᓂᖁᔭᐃᔪᓐᓃᑐᐃᓐᓇᕆᐊᖃᕐᓂᖏᓐᓂ.

ᒪᐃᔭ ᕗᐃᓐ ᒍᕋᒍᕆ, ᐃᖃᓗᒃᑑᑦᑎᐊᕐᒧᑦ ᒪᓕᒐᓕᐅᕐᑎ ᐹᒥᓚ ᒍᕉᔅ ᐊᒻᒪ ᐸᓖᓯᒃᑯᑦ ᓲᐳᐃᓐᑕᓐᑕᙵ ᑭᐊᓐᑦ ᐸᐃᒃ ᑲᑎᒪᑎᑦᑎᔨᐅᓚᐅᕐᑐᑦ ᓄᓇᓕᖕᓄᑦ ᑲᑎᒪᕝᕕᒃᒥ ᔪᓚᐃ 14-ᖑᑎᓪᓗᒍ ᓘᒃ ᓄᕗᓕᒐᒃ ᐱᙳᐊᕐᕕᒃᒥ, ᑕᕝᕙᓂᓗ ᐃᓄᐃᑦ ᐃᓱᒫᓘᑎᖏᓐᓂ ᐅᖃᑲᑕᒍᓐᓇᓚᐅᖅᖢᑎᒃ ᐊᒻᒪᓗ ᓯᕗᓕᐅᕐᑎᒋᔭᐅᔪᑦ ᐱᐅᓯᕚᓪᓕᕈᑎᒃᓴᓂ ᐊᑦᑕᓇᖅᑐᒦᑦᑕᐃᓕᓂᕐᒧᑦ ᐅᖃᐅᓯᖃᑲᑕᒃᖢᑎᒃ.

ᐃᓱᒫᓘᑎᒋᔭᐅᓚᐅᕐᒥᔪᖅ ᓴᐳᓐᓂᐊᕐᓂᕐᒥ ᐱᑕᖃᙱᓗᐊᕐᓂᖓᓂ ᖃᖓᑕᓲᒃᑯᑦ ᑎᑭᑉᐸᓪᓕᐊᔪᓄᑦ, ᓲᕐᓗ ᔭᓗᓇᐃᓪᓗ ᐃᖃᓘᒃᑑᑦᑎᐊᓪᓗ ᐊᑯᓐᓂᖓᒎᕐᑐᓂᒃ.

ᒍᕋᒍᕆ ᐅᖃᓚᐅᕐᑐᖅ ᐅᖃᓪᓚᖃᑎᖃᓚᐅᕐᓂᖓᓂ ᔭᓗᓇᐃᒥ ᒪᐃᔭᒥ ᐱᐊᓐ ᕼᐊᓐᑐᕆᒃᓴᓐ ᐊᒻᒪᓗ ᒐᕙᒪᒃᑯᓐᓄᑦ-ᓄᓇᖃᖅᑳᖅᑐᓄᓪᓗ ᒥᓂᔅᑕᒧᑦ ᐅᕇᐱᑲ ᐋᓪᑎ — ᑖᓐᓇᓗ ᓯᕗᓂᐊᒍᑦ ᒪᐃᔭᐅᓂᑰᓪᓗᓂ — ᒪᑯᓂᖓ ᐋᖓᔮᕐᓇᖅᑐᓂᒃ ᓄᓇᑦᓯᐊᑉ ᐊᖓᔪᖅᑳᖃᕐᕕᐊᓂᙶᖅᑐᓂ ᕿᑎᕐᒥᐅᓄᑦ.

“ᖃᓄᐃᓕᐅᕈᑎᐅᔪᓐᓇᓚᐅᕐᑐᑦ ᖃᖓᒃᑲᓐᓂᖅ ᑎᑭᑎᑦᑎᓇᓱᒃᖢᑎᒃ ᒪᐅᖓ ᑭᓯᐊᓂᓕ ᑕᒪᒃᑯᐊ ᐊᑐᕐᑎᑕᐅᔾᔮᔪᓐᓃᕐᑐᑦ,” ᒍᕋᒍᕆ ᐅᖃᕐᑐᖅ.

ᐅᖃᐅᓯᖃᓚᐅᙱᑦᑐᑦ ᖃᓄᐃᑦᑐᓂ ᐊᓯᔾᔨᕐᓯᓂᐊᕆᐊᒃᓴᖏᓐᓂ ᓴᐳᓐᓂᐊᕐᓂᒃᑯᑦ, ᐅᕝᕙᓘᓐᓃᑦ ᑕᒪᒃᑯᐊ ᖃᖓ ᐊᑐᖅᑕᐅᓕᓛᕐᓂᖏᓐᓂᒃ.

ᒫᓂ 90-ᖏᓐᓃᑦᑐᑦ ᓄᓇᖃᕐᑐᐃᑦ ᑲᑎᒪᔪᓂ ᐅᖃᐅᓯᖃᓚᐅᕐᑐᑦ “ᑲᑉᐱᐊᓱᑲᑕᖕᓂᖏᓐᓂᒃ ᐊᒻᒪ ᓯᕘᕋᑲᑕᖕᓂᕋᖅᖢᑎᒃ,” ᒍᕋᒍᕆ ᐅᖃᕐᑐᖅ.

ᐊᑕᐅᓯᖅ ᐊᓯᔾᔨᖅᑕᐅᓂᐊᕐᑐᕐᓕ ᐃᖃᓗᒃᑑᑦᑎᐊᕐᓂ ᐅᔾᔨᕈᓱᒋᐊᖃᕐᓂᕐᒧᑦ ᖃᓄᐃᓕᐅᕈᑎᒃᓴᓂ, ᑕᒪᒃᑯᐊᓗ ᐅᖄᓚᐅᑎᕋᓛᒃᑯᑦ ᓴᖅᑭᒍᓐᓇᕐᓗᑎᒃ, ᑕᓚᕖᓴᓐᑯᑦ ᐊᒻᒪ ᓈᓚᐅᑎᑎᒍᑦ.

ᒍᕋᒍᕆ ᐅᖃᓚᐅᕐᑐᖅ ᐸᓖᓯᒃᑯᓐᓃᓚᐅᕐᓂᕋᖅᖢᓂ ᐃᓄᐃᑦ ᑎᑎᕋᑲᑕᓕᕐᑎᓪᓗᒋᑦ ᓱᓕᙱᑦᑐᓂᒃ ᔪᓚᐃ 8-ᒥ ᓱᒋᐅᑎᖃᕐᑐᒥᒃ ᐊᒻᒪᓗ ᓄᓇᓕᖕᓂ ᐊᓂᑲᑕᒋᐊᖃᙱᓐᓂᖏᓐᓂᒃ. ᐅᖃᕐᖢᓂ ᑖᓐᓇ ᓱᓕᙱᓐᓂᖓᓂ ᐅᖃᐅᓯᕆᔪᓐᓇᓚᐅᙱᑕᖓ ᓲᖃᐃᒻᒪ ᑕᒪᒃᑯᐊ ᓱᓕᒐᓗᐊᕐᒪᖔᑕ ᖃᐅᔨᙱᓐᓇᒥ.

“ᑕᐃᒪᒃᑯᐊ ᐃᓱᒫᓘᑎᐅᓕᔭᒻᒪᑕᑦ — ᐅᖃᐅᓯᐅᑲᑕᒃᑐᓂ ᑐᓴᕐᑎᑕᐅᑲᑕᒃᓗᑎ, ᑎᑎᕋᖅᑕᐅᔪᓂ ᑕᑯᓪᓗᑎ ᓱᓕᒻᒪᖔᑕ ᐃᓱᒪᒋᔭᐅᓕᑐᐃᓐᓇᖅᖢᓂ, ‘ᖃᓄᐃᒻᒪᓪᓕ ᕼᐋᒻᒪᓚᒃᑯᑦ ᑎᑎᕋᐅᓯᖃᙱᓚᑦ ᑕᒪᑐᒥᖓ?” ᒍᕋᒍᕆ ᐅᖃᕐᑐᖅ. “ᐃᒪᐃᒻᒪ ᐸᓖᓯᓄᑦ ᑭᓯᐊᓂ ᑕᐃᒪᐃᓐᓂᕋᖅᑕᐅᒃᐸᑕ ᑎᑎᕋᐅᓯᕆᓕᕋᔭᕋᑦᑎᒍᑦ.”

ᖃᓄᐃᓕᐅᕈᑎᐅᓇᔭᕐᑐᓂᒃ ᐅᖃᐅᓯᖃᑲᑕᒃᑎᓪᓗᒋᑦ ᐋᖅᑭᒃᓱᐃᔪᖃᕈᒪᓚᐅᕐᑐᖅ ᓄᓇᖃᖅᑐᓂᒃ ᖃᐅᔨᓴᖅᑎᖃᕐᓗᑎᒃ ᐅᕝᕙᓘᓐᓃᑦ ᓄᓇᓕᖕᓂ ᐸᓖᓯᓕᕆᑎᑦᑎᕙᒡᓗᑎ ᐊᒻᒪᓗ ᐸᓖᓯᒃᑯᑦ ᕿᒻᒥᖓᓂ ᐋᖓᔮᕐᓇᖅᑐᓂ ᓇᐃᓯᔪᓐᓇᖅᑐᓂ ᐊᑐᖃᑦᑕᕐᓗᑎᒃ ᓄᓇᓕᖕᓂᑦ.

ᐃᖃᓗᒃᑑᑦᑎᐊᖅ ᐃᓚᒋᔭᐅᔪᖅ 7-ᓂ ᓄᓇᕗᒥᑦ ᓄᓇᓕᖕᓂ ᐊᑦᑕᓇᖅᑐᒦᑦᑕᐃᓕᑎᑦᑎᔨᒥ ᑐᑭᒧᐊᖅᑎᑖᕋᓱᒃᑐᓂᒃ, ᑖᓐᓇᓗ ᐱᓕᕆᐊᒃᓴᖅ ᐱᒋᐊᖅᑕᐅᓚᐅᖅᖢᓂ ᑕᒪᑐᒪᓂ ᐊᕐᕌᒍᒥ ᓄᓇᕗᒥᑦ ᕼᐋᒻᒪᓚᒃᑯᑦ ᑲᑐᔾᔨᖃᑎᒌᖏᓐᓄᑦ.

ᒍᕋᒍᕆ ᖃᐅᔨᒪᓂᕋᓚᐅᕐᑐᖅ ᓴᙱᔪᓂ ᓱᐴᕐᑐᒐᕐᓂ ᐱᑕᖃᕐᓂᖓᓂ ᓄᓇᓕᖕᓂ ᐊᒻᒪ ᓄᓇᖃᖅᑐᓂ ᐅᔾᔨᕈᓱᑦᑎᐊᖁᔨᓪᓗᓂ ᐊᒻᒪᓗ ᐸᓖᓯᓄᑦ ᓈᒻᒪᙱᑦᑐᒃᑯᑦ ᖃᓄᐃᓕᐅᕐᑐᓂ ᐅᖃᐅᓯᖃᖃᑦᑕᖁᔨᓪᓗᓂ.

“ᑕᒪᓐᓇ ᖃᐅᔨᒪᒐᑦᑎᒍᑦ, ᐊᒻᒪᓗ ᐱᑕᖃᕐᔫᒥᓚᐅᖅᐸᒃᖢᓂ ᐊᒻᒪ ᐊᑯᓂᕈᓗᒃ ᑕᐃᒪᐃᓕᖅᖢᓂ,” ᒍᕋᒍᕆ ᐅᖃᕐᑐᖅ.

ᐅᖃᒃᑲᓐᓂᖅᖢᓂ ᐃᓄᐃᑦ ᐅᖄᓚᒍᓐᓇᕐᓂᖏᓐᓂᒃ ᐱᕋᔭᒃᑐᓂ ᓄᖅᑲᖅᑎᑦᑎᔨᓄᑦ Crime Stoppers ᐅᕗᖓ 1-800-TIPS ᖃᐅᔨᒪᔭᐅᔪᒪᙱᒃᑯᑎᒃ.

“ᓄᓇᓖᑦ ᐃᓄᑭᓐᓂᕐᓴᐃᑦ ᐊᒻᒪᓗ ᓄᓇᕗᑦ ᐱᕈᖅᐸᓪᓕᐊᓪᓗᓂ ᑎᑭᑦᑐᖃᖅᐸᓪᓕᐊᓪᓗᓂᓗ, ᑕᐃᒪᓕ ᑕᒪᓐᓇ ᖃᓄᐃᓕᐅᕈᑎᐅᒃᑲᓐᓂᓛᕐᓂᖓ ᖃᐅᔨᒪᓇᕐᑐᖅ, ᑭᓯᐊᓂᓕ ᖃᖓᐅᓇᔭᕐᒪᖔᑦ ᓇᓗᓇᖅᖢᓂ,” ᒍᕋᒍᕆ ᐅᖃᕐᑐᖅ.

“ᐃᓚᖏ ᐃᓄᐃᑦ ᑕᑯᔪᓐᓇᕐᒪᑕ ᓈᒻᒪᙱᓕᐅᕈᑎᒋᔭᐅᔪᓂᒃ ᑕᐃᒪᓕ ᑕᒪᓐᓇ ᑐᓴᐅᒪᔭᐅᑎᑕᐅᒍᓂ ᐱᐅᓂᕐᓴᖅ. ᐅᓇ ᐸᓖᓯᓄᑦ ᖃᐅᔨᒪᙱᔾᔪᑎᑐᐃᓐᓇᐅᑐᐃᓐᓇᕆᐊᓕᒃ.”

ᐸᓯᔭᒃᓴᙳᕐᑎᑕᐅᓚᐅᕐᑐᑦ ᐅᑯᐊᖑᓂᕋᖅᑕᐅᓚᐅᕐᑐᖅ — ᕼᐊᑎ ᐋᕼᐊᓰᔅ, 19, ᓯᓕᕗᐊᒃ ᐳᕆᑎᔅ ᑲᓚᒻᐱᐊᒥ; ᓚᐃ ᒌᐳᕆᐊᓪ ᒐᓖᑐ, 22, ᐊᒻᒪ ᐊᔮᓐ ᕗᐊᓯ, 18, ᑖᒃᑯᐊᒡᓗ ᐊᑦᒪᓐᑕᒻᒥᐅᑕᐅᓪᓗᑎᒃ — ᑎᒍᔭᐅᓯᒪᓪᓗᑎᒡᓗ.