ᓵᓕ ᐊᖕᓇᑐᒃ ᖁᑦᑎᓛᖑᕗᖅ ᐃᕙᒃᑲᒃ ᓱᒃᑲᓴᐅᑎᓂᕐᒥ
ᓯᕗᓪᓕᐅᖏᓐᓇᖅᖢᓂ ᐱᓕᕆᓂᐅᔪᒥ ᑕᐃᑲᓂᓗᒃᑖᖅ ᕿᒧᒃᓯᐅᔾᔪᐊᕐᓂᕐᒥ, ᑕᓯᐅᔭᐅᑉ ᐊᖕᓇᑐᒃ ᐊᒻᒪ ᓵᑲᐸᐃᔭ ᓵᓐᑐᔅ ᐊᖏᕐᕋᐅᔾᔨᕗᑦ ᓵᓚᖃᕐᓂᐅᔪᒥ
ᓯᕗᓪᓕᖅᐸᐅᔪᒥ-ᐃᓂᖓᓂ ᐱᔭᕇᖅᑎᐅᔪᓂ ᓵᓕ ᐊᖕᓇᑐᒃ ᐊᒻᒪ ᓵᑲᐸᐃᔭ ᓵᓐᑐᔅ of ᑕᓯᐅᔭᕐᒥᐅᑕᑦ, ᐊᑐᖅᑐᑦ ᓈᓴᐅᑎᓕᖕᒥ 9 ᐃᑭᐊᖅᖠᓂ, ᐱᕗᑦ ᐃᕙᒃᑲᒃ ᕿᒧᒃᓯᐅᔾᔪᐊᕐᓂᕐᒥ ᓵᓚᖃᐅᓯᐊᖏᓐᓂ ᓵᓚᒃᓴᓚᐅᖅᑎᓪᓗᒋᑦ ᒫᔾᔨ 6−ᒥ. ᐃᓚᐅᖃᑕᐅᔪᓂ ᐅᐃᓕ ᑲᐃᓐ ᓄᖃᖅᖠᖅ ᐊᒻᒪ ᑕᒥᓴ ᓵᓐᑐᔅ, ᑕᓯᐅᔭᕐᒥᐅᑕᐅᖕᒥᔪᑦ, ᐱᔭᕇᓚᐅᖅᑐᓂ ᒪᕐᕈᒋᔭᐅᓪᓗᑎᒃ ᐊᒻᒪ ᐊᑐᖅᖢᑎᒃ ᓈᓴᐅᑎ 7−ᒥ, ᐊᒻᒪᓗ ᐱᖓᔪᖓᓐᓂ-ᐃᓂᖓᓂ ᐱᔭᕇᖅᑎᐅᔪᓂ ᔮᓐ-ᒪᕆ ᐳᐃᐅᓪᓐ ᐊᒻᒪ ᔮᑯᓯ ᐊᒪᒪᑐᐊᒃ. (ᓘᑲᓯ ᑭᐊᑕᐃᓐᓇᖅ ᐊᔾᔨᖁᑎᖓ | ᐃᕙᒃᑲᒃ)
For the English version of this story, please see Charlie Angnatuk is top dog in Ivakkak 2025 race.
ᓵᓕ ᐊᖕᓇᑐᒃ ᐊᒻᒪ ᓵᑲᐸᐃᔭ ᓵᓐᑐᔅ 2025−ᒥ ᐃᕙᒃᑲᒃ ᓵᓚᖃᖅᑎᐅᕗᑦ ᐅᓪᓗᓂ-6−ᓂ ᕿᒧᒃᓯᐅᔾᔪᐊᕐᓂᐅᔪᒥ ᓱᒃᑲᓴᐅᑎᓂᐅᔪᒥ ᐅᐸᒃᑎᑦᑎᓚᐅᖅᑐᒥ ᑲᖏᖅᓱᐊᓗᔾᔪᐊᕐᒥ ᐱᔭᕇᕐᓂᕐᒧᑦ ᐊᖏᕐᕋᖓᓄᑦ ᑕᓯᐅᔭᕐᒧᑦ.
ᑎᑭᓚᐅᖅᐳᑦ ᒫᔾᔨ 6−ᒥ ᐃᖏᕐᕋᓚᐅᖅᑎᓪᓗᒋᑦ 328 ᑭᓛᒥᑐᓂ ᓱᒃᑲᓴᐅᑎᓂᐅᔪᒥ ᐊᑯᓂᐅᓂᐅᔪᒥ ᐃᑲᕐᕋᓂ 26−ᓂ ᐊᒻᒪ 23 ᒥᓂᑦᓂ. 14 ᒥᓂᑦᑐᐃᓐᓇᓂ ᑭᖑᓂᐊᓂ ᐅᐃᓕ ᑲᐃᓐ ᓄᑲᖅᖠᐅᓚᐅᖅᐳᖅ ᐊᒻᒪ ᑕᒥᓴ ᓵᓐᑐᔅ, ᕿᒧᒃᓯᖅᑎᐅᖕᒥᔪᑦ ᑕᓯᐅᔭᕐᒥ.
ᒪᕐᕉᒃ ᕿᒧᒃᓯᖅᑎᐅᔪᑦ ᓇᓕᒧᖃᑦᑕᐅᑎᓚᐅᖅᐳᑦ ᐊᑐᓂ ᐃᖏᕐᕋᓂᕆᔭᖓᓂ ᑕᐃᑲᓂᓗᒃᑖᖅ ᕿᒧᒃᓯᐅᔾᔪᐊᕐᓂᐅᔪᒥ. ᑭᖑᓪᓕᖅᐹᖓᓂ ᐅᓪᓗᖓᓂ, ᑲᐃᓐ ᓄᑲᖅᖠᖅ ᑎᑭᓚᐅᖅᐳᖅ ᑕᓯᐅᔭᕐᒧᑦ ᐊᖕᓇᑐᒃ ᓯᕗᓂᐊᓂ, ᑭᓯᐊᓂ ᓈᒻᒪᓚᐅᙱᓚᖅ ᖄᖏᐅᑎᓂᐅᔪᒥ ᓱᓕᓂᐅᔪᒥ ᐊᖕᓇᑐᒃ ᑕᒪᐃᑎᒍᑦ ᕿᒧᒃᓯᐅᔾᔪᐊᕐᓂᕐᒥ ᐊᑯᓂᐅᓂᖓᓂ ᓱᒃᑲᓂᖅᓴᐅᓚᐅᕐᓂᖓᓂ.
ᐱᖓᔪᖓᓐᓂ ᐃᓂᐅᔪᒥ ᐳᕕᕐᓂᖅᑑᑉ ᔮᓪ−ᒪᕆ ᐳᐃᓪᓐ ᐊᒻᒪ ᔮᑰᓯ ᐊᒪᒪᑐᐊᒃ, ᐱᔭᕇᓚᐅᖅᑐᒥ ᓵᓚᖃᕋᓱᐊᕐᓂᐅᔪᒥ ᐃᑲᕐᕋᓂ 27−ᓂ ᐊᒻᒪ 45 ᒥᓂᑦᓂ.
ᕿᒧᒃᓯᐅᔾᔪᐊᕐᓂᖅ ᐱᒋᐊᓚᐅᖅᐳᖅ ᕕᕗᐊᕆ 26−ᒥ ᑭᓯᐊᓂ ᖃᔅᓯᒐᓚᖕᓂ ᐅᓪᓗᓂ ᓄᖅᑲᖅᑎᑕᐅᓚᐅᑲᓚᐅᖅᐳᖅ, ᐱᔾᔪᑎᖃᖅᑐᒥ ᓯᓚᑦᑎᐊᕙᐅᙱᓐᓂᐅᔪᒥ ᐅᕝᕙᓘᓐᓃᑦ ᑕᖃᐃᖅᓯᓚᐅᑲᖕᓂᕐᒧᑦ. ᕿᒧᒃᓯᖅᑏᑦ ᓵᙵᓚᐅᖅᐳᑦ ᖃᔅᓯᒐᓚᖕᓂ ᐊᒃᓱᕈᕐᓇᕐᓂᐅᔪᓂ ᑕᐃᑲᓂᓗᒃᑖᖅ; 11−ᓂ ᕿᒧᒃᓯᖅᑎᐅᔪᓂ ᑲᑎᙵᔪᓂ ᐱᒋᐊᓚᐅᖅᐳᑦ ᕿᒧᒃᓯᐅᔾᔪᐊᕐᓂᕐᒥ ᑭᓯᐊᓂ ᐊᑕᐅᓯᖅ ᓄᖅᑲᓚᐅᖅᐳᖅ ᕿᑎᖅᐸᓯᐊᓂ.
ᕿᒧᒃᓯᖅᑎᐅᓚᐅᖅᓯᒪᔪᖅ ᔪᐊᔾ ᑲᐅᑭ ᑕᐃᓯᓚᐅᖅᐳᖅ ᐊᖅᑯᑎᖓᓂ ᕿᑎᐊᓂ ᑲᖏᖅᓱᔾᔪᐊᒥ, ᕿᒧᒃᓯᐅᔾᔪᐊᕐᓂᖅ ᐱᒋᐊᓚᐅᖅᑐᒥ, ᐊᒻᒪ ᑰᔾᔪᐊᕐᒥ ᐊᔪᕐᓇᓛᖑᔪᒥ ᐃᒡᓕᓂᖓᓂ ᓄᓇᕕᖕᒥ ᖃᓕᕈᓯᖃᐃᓐᓇᖅᑐᒥ ᐊᒻᒪ ᐊᕿᑦᑐᒥ ᐊᐳᒻᒥ.
ᐅᑯᓇᓂ ᒪᕐᕉᔪᓂ ᓄᓇᓕᐅᔪᓂ, ᕿᒧᒃᓯᖅᑎᐅᔪᑦ ᐊᑐᓚᐅᖅᐳᑦ ᓂᒡᓚᓱᖕᓂᐅᔪᓂ ᑕᐅᕙᓂᒐᓚᒃ -30 C−ᒥ ᐊᒻᒪ ᓄᖅᑲᕆᐊᖃᓚᐅᖅᐳᑦ ᐅᓪᓗᕐᒥ ᐊᑕᐅᓯᕐᒥ ᐱᔾᔪᑎᖃᖅᑐᒥ ᐱᖅᓯᒐᓚᒃᑐᒥ ᐊᒻᒪ ᖃᑯᖅᓯᓯᒪᑦᑎᐊᖅᑐᒥ ᖃᓄᐃᓐᓂᐅᔪᓂ.
ᑰᔾᔪᐊᕐᒥ, ᑲᑎᙵᓂᐅᔪᑦ ᓄᖅᑲᓚᐅᖅᐳᑦ ᐅᓪᓗᓄᑦ ᒪᕐᕉᖕᓄᑦ ᕿᒻᒥᖏᓐᓂ ᑕᖃᐃᖅᓯᓚᐅᑲᖕᓂᖏᓐᓄᑦ ᐊᒻᒪ ᓄᓇᓕᖕᓂ ᓂᕆᕕᒡᔪᐊᖅᑎᑕᐅᓂᖏᓐᓄᑦ. ᑕᓯᐅᔭᖅ ᑐᙵᓵᕆᓚᐅᕆᕗᑦ ᐱᔭᕇᖅᑎᐅᔪᓂ ᓂᕆᕕᒡᔪᐊᕐᓂᐅᔪᒥ ᐊᒻᒪ ᓵᓚᖃᐅᓯᐊᒥᒃ ᖁᕕᐊᓱᒍᑕᐅᔪᒥ, ᐅᐱᒍᓱᖕᓂᕐᒥ ᐊᖕᓇᑐᖕᒥ ᐊᒻᒪ ᓵᓐᑐᔅᒥ ᓵᓚᖃᕐᓂᖏᓐᓄᑦ.
ᐊᐱᖅᓱᖅᑕᐅᓂᐅᔪᒥ ᓄᖅᑲᖓᓚᐅᑲᖕᓂᖏᓐᓂ ᑰᔾᔪᐊᕐᒥ, ᒪᑭᕝᕕᒃ ᐊᖓᔪᖅᑳᖓ ᐲᑕ ᐋᑕᒥ ᐅᖃᓚᐅᖅᐳᖅ 16−ᓂ ᕿᒧᒃᓯᖅᑎᐅᔪᓂ ᑲᑎᙵᔪᓂ ᐊᑎᓕᐅᕆᓚᐅᖅᐳᑦ ᕿᒧᒃᓯᐅᔾᔪᐊᕐᓂᕐᒥ ᑕᒪᑐᒪᓂ ᐊᕐᕌᒎᔪᒥ ᑭᓯᐊᓂ ᓇᓃᓐᓂᖓᓂ ᐅᓯᑲᑦᑕᕐᓂᕐᒥ ᕿᒻᒥᓂᑦ ᓵᑕᖅᑕᐅᓯᒪᔪᓂ ᖃᖓᑕᓲᓂ, 11−ᑐᐃᓐᓇᓂ ᕿᒧᒃᓯᖅᑎᐅᔪᓂ ᑲᑎᙵᔪᓂ ᐃᓚᐅᖃᑕᐅᔪᓐᓇᓚᐅᖅᐳᑦ.
ᖃᔅᓯᐊᕐᔪᖕᓂ ᐊᕐᕌᒎᔪᓂ ᖄᖏᖅᓯᒪᓕᖅᑐᓂ, ᐅᖃᓚᐅᖅᐳᖅ, ᐊᑕᐅᓯᑐᐊᕐᒥ ᕿᒧᒃᓯᖅᑎᐅᔪᒥ ᐃᓚᐅᔪᖃᓚᐅᖅᐳᖅ, “ᑕᐃᒫᒃ ᓱᓕ ᐱᕙᓪᓕᐊᕗᒍᑦ.”
“ᕿᓂᖅᐳᒍᑦ ᖃᓄᖅ ᐱᐅᓯᒋᐊᖅᑎᒃᑲᓐᓂᕈᓐᓇᕐᓂᑦᑎᓐᓂ ᑭᒃᑯᓕᒫᓄᑦ ᐊᑭᑐᔪᐊᓘᖕᒪᑦ ᐱᓕᕆᓂᕐᒥ ᕿᒧᒃᓯᐅᔾᔪᐊᕐᓂᕐᒥ,” ᐋᑕᒥ ᐅᖃᓚᐅᖅᐳᖅ.
“ᓱᓕ ᐱᕙᓪᓕᐊᕗᒍᑦ ᐊᕐᕌᒍᓄᑦ 23−ᓂ ᕿᒧᒃᓯᐅᔾᔪᐊᕐᓂᕐᒥ,” ᐅᖃᓚᐅᖅᐳᖅ. “ᓱᓕ ᐱᐅᓯᒋᐊᖅᑎᑉᐹᓪᓕᕈᒪᕙᕗᑦ.”
ᐊᕐᕌᓂᐅᓛᖅᑐᒥ ᕿᒧᒃᓯᐅᔾᔪᐊᕐᓂᕐᒥ, ᐅᖃᓚᐅᖅᐳᖅ ᒪᑭᕝᕕᒃ ᐃᓚᐅᖃᑕᐅᓂᐊᖅᐳᑦ ᕿᒧᒃᓯᖅᑎᐅᔪᓂ ᐅᖃᐅᓯᒃᓴᖏᓐᓂ ᐱᓂᕐᒧᑦ ᖃᓄᖅ ᐱᐅᓯᒋᐊᖅᑎᑕᐅᔪᓐᓇᕐᓂᖏᓐᓂ.
“ᐱᓯᒪᐃᓐᓇᕈᒪᕙᕗᑦ ᐅᑎᖅᑎᕆᕙᖕᒪᑦ ᐃᖅᑲᐅᒪᓂᐅᔪᓂ ᐃᓐᓇᐅᓂᖅᓴᓄᑦ, ᑭᓯᐊᓂ ᑐᓂᓯᓲᖑᖕᒪᑦ ᐅᐱᒋᔭᖃᕐᓂᐅᔪᒥ ᒪᒃᑯᖕᓂᖅᓴᐅᔪᓄᑦ ᐱᐅᓯᖃᑎᒌᖑᔪᓄᑦ,” ᐋᑕᒥ ᐅᖃᓚᐅᖅᐳᖅ.
(0) Comments