ᖃᖓᑕᓲᖅ ᓵᑕᖅᑕᐅᓯᒪᔪᖅ ᒥᕝᕕᐅᑉ ᓴᓂᐊᒎᖅᑐᖅ ᑲᖏᕐᓱᒃᒥ

For the English version of this story, please see Charter flight skids off runway in Kangirsuk.

ᒥᑭᑦᑐᖅ ᓵᑕᒐᒃᓴᖅ ᖃᖓᑕᓲᖅ ᒥᓐᓇᓱᒃᑐᖅ ᑲᖏᕐᓱᒃ ᒥᕝᕕᒃᒧᑦ ᐊᓄᕌᕈᓘᔭᖅᑎᓪᓗᒍ ᑕᖅᑭᐅᓚᐅᖅᑐᒥ ᓴᓂᒧᑦ ᐃᖏᕐᕋᓕᕋᒥ ᒥᕝᕕᐅᑉ ᓴᓂᐊᓅᓚᐅᕐᑐᖅ, ᑖᓐᓇᓗ ᒪᑐᔾᔪᑎᐅᓚᐅᑲᒃᖢᑎ ᒥᕝᕕᒃᒥᑦ.

ᒪᕐᕉᒃ ᖃᖓᑕᓲᖅᑏᒃ ᖃᖓᑕᓲᒥ ᐊᔪᓕᓚᐅᕐᒪᑎ ᐃᖏᕐᕋᑎᑦᑎᐊᕆᐊᒃᓴᖅ ᐊᓄᕆᒧᑦ, ᐅᖃᕐᑐᖅ ᕼᐃᐅᒍ ᕚᓐᑕᐃᓐ, ᐅᖃᓪᓚᒃᑎᒋᔭᐅᔪᖅ ᐃᖏᕐᕋᔾᔪᑎᓕᕆᔨᒃᑯᑦ ᐱᕐᕈᓗᐊᕿᑦᑕᐃᓕᓂᕐᒧ ᑲᑎᒪᔨᓄᑦ ᑲᓇᑕᒥ.

ᐱᕐᕈᓗᐊᕿᑦᑕᐃᓕᓂᕐᒧᑦ ᑲᑎᒪᔩᑦ ᑐᓴᖅᑎᑦᑎᓚᐅᖅᑐᑦ ᐊᐃᕆᓕ 5ᒥ ᐱᓕᕆᔨᓂ ᑲᖏᕐᓱᒃᒧᑦ ᑎᑭᑎᑦᑎᓂᐊᕐᓂᕋᖅᖢᑎᒃ ᖃᐅᔨᓴᕐᓂᐊᖅᑐᓂ ᖃᓄᐃᓕᔾᔪᑎᐅᓂᑯᒥᒃ.

ᓇᓕᐊᒃ ᑎᓴᒪ ᐅᓯᔭᐅᔪᑦ ᐃᓄᐃᑦ ᐋᓐᓂᓚᐅᙱᑦᑐᑦ ᒫᔅᓯ 25ᒥ ᑕᐃᒪᐃᓕᐊᓪᓚᓚᐅᖅᖢᑎᒃ ᐊᒻᒪᓗ ᒥᕝᕕᒃ ᒪᑐᐃᖓᓕᕆᓪᓗᓂ.

“ᒥᓐᓇᓱᓚᐅᕐᓯᒪᖕᒪᑕ ᐊᒻᒪ ᓴᓂᒧᑦ ᓯᐊᕐᕆᖢᑎᒃ ᒦᕝᕕᐅᑉ ᓯᓚᑖᓅᖅᖢᑎᒃ,” ᐅᖃᕐᑐᖅ ᑲᖏᕐᓱᒃ ᒪᐃᔭᖓ ᓄᐊ ᐃᑐᒃ ᐅᖄᓚᐅᑎᒃᑯᑦ ᐊᐱᖅᓱᖅᑕᐅᑎᓪᓗᒍ ᐊᐃᕆᓕ 3ᒥ.

ᐅᖃᓚᐅᕐᑐᖅ ᓯᓚ ᐱᐅᙱᓐᓂᖓᓄᑦ ᐃᓄᐃᑦ ᖃᖓᑕᓲᖏ ᑲᖏᕐᓱᒃᒧᙵᐅᑎᑕᐅᓚᐅᙱᑦᑐᑦ ᑕᕝᕙᓂ ᐅᓪᓗᕐᒥ. ᐊᓄᕆ ᓱᒃᑲᓂᖃᖅᑎᒋᓚᐅᕐᒪᑦ 70 ᑭᓛᒥᑕᓂ ᐃᑲᕐᕋᒥ, ᐊᒻᒪᓗ ᐃᓄᐃᑦ ᖃᖓᑕᓲᖓ ᒪᓕᒐᖃᓚᐅᖅᖢᑎᒃ ᖃᖓᑕᓲᓂ ᑕᐃᒪᓐᓇᑎᒋ ᐊᓄᕌᖅᑎᓪᓗᒍ ᖃᖓᑕᑎᑦᑎᕙᙱᖢᑎᒃ, ᐅᖃᕐᑐᖅ.

ᐃᑐᒃ ᐅᖃᓚᐅᕐᑐᖅ ᖃᖓᑕᓲᖅ ᓵᑕᒋᔭᐅᔪᖅ ᒥᑦᑕᕆᐊᖃᓚᐅᕐᒪᑦ ᐅᕐᓴᒋᐊᖃᕐᓂᖓᓄᑦ.

“ᑕᕝᕗᖓ ᐊᖅᑯᓵᕆᐊᖃᓕᓚᐅᕐᒪᑕ ᐅᕐᓴᒋᐊᖃᕋᒥᒃ ᑕᐃᒪᓕ ᒥᓐᓇᓱᓗᐊᓚᐅᕐᑐᑦ,” ᐅᖃᕐᑐᖅ.

ᐃᐊᓐ ᑖᕐᓕᖕ, ᐃᖏᕐᕋᔾᔪᑎᓕᕆᓂᕐᒧᑦ ᑐᑭᒧᐊᖅᑎᑦᑎᔨ ᑲᑎᕕᒃ ᓄᓇᓕᓕᒫᑦ ᒐᕙᒪᖓᓄᑦ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᖢᓂ ᐃᒪᓐᓇ “ᐊᓄᕌᕈᓘᔭᕋᓗᐊᖅᑎᓪᓗᒍ ᒥᕝᕕᒃ ᖃᓄᐃᓚᐅᙱᑦᑎᐊᖅᑐᖅ ᐅᑭᐅᕐᒧᑦ ᐊᒻᒪᓗ ᒥᕝᕕᐅᑉ ᖃᐅᒻᒪᖅᑯᑎᖏᑦ ᐊᔪᙱᑦᑎᐊᖅᖢᑎᒃ.”

ᐅᖃᓚᐅᕐᑐᖅ ᖃᖓᑕᓲᓕᕆᔨᒃᑯᑦ ᐃᖅᑲᓇᐃᔭᖅᑎᖏ ᐃᑭᒪᔪᓂ ᐃᑲᔪᓚᐅᕐᑐᑦ ᐊᒻᒪ ᖃᖓᑕᓲᖅᑎᖏᓐᓂᒃ ᐅᑕᖅᑭᕕᐊᓄᑦ ᑕᐃᑲᓂᓗ ᐋᓐᓂᐊᓯᐅᖅᑎᓄᑦ ᖃᐅᔨᓴᖅᑕᐅᓪᓗᑎᒃ.

“ᖃᖓᑕᓲᖅᑏᑦ ᑐᓴᐅᒪᑎᑕᐅᓚᐅᖅᑐᑦ ᒥᕝᕕᒃ ᐊᒻᒪ ᓯᓚ ᖃᓄᐃᓕᖓᓂᖓᓂᒃ ᒥᓐᓇᓱᓚᐅᖅᑎᓐᓇᒋᑦ,” ᐅᖃᕐᑐᖅ. “ᖃᖓᑕᓲᖅᑎ ᐃᓱᒪᓕᐅᕆᓚᐅᕐᑐᖅ ᒥᓐᓇᓱᒍᒪᓂᕐᒥᑦ.”

ᓱᓕ ᓱᖅᑯᐃᓇᓗᐊᙱᑦᑐᖅ ᖃᓄᑎᒋ ᐊᑯᓂᐅᑎᒋᔪᖅ ᒥᕝᕕᒃ ᒪᑐᓯᒪᓚᐅᕐᒪᖔᑦ. ᐃᑐᒃ ᐅᖃᓚᐅᕐᑐᖅ ᐅᓪᓗᕐᓂ ᑎᓴᒪᓂ ᒪᑐᓯᒪᓂᕋᖅᖢᓂᐅᒃ ᑭᓯᐊᓂᓕ ᑖᕐᓕᖕ ᐅᖃᓚᐅᕐᑐᖅ ᐃᑲᕐᕋᒐᓴᖕᓂ ᒪᑐᓯᒪᓚᐅᕐᓂᕋᖅᖢᓂᐅᒃ.

ᖃᖓᑕᓲᒥ ᓇᖕᒥᓂᓖᑦ, ᑯᕌᓄ ᐄᕕᐄᓴᓐ ᐃᖕᒃ. (Chrono Aviation Inc.,) ᐅᑯᓇᓂ ᒪᓐᑐᕆᐊᒥ, ᑯᐸᐃᒃᓯᑎᒥ ᐊᒻᒪ ᕆᒨᔅᑭᒥ ᓵᑕᖅᑕᐅᖃᑦᑕᕐᒪᑕ.

ᖃᖓᑕᓲᓂᓪᓕ ᖃᐅᔨᓇᓱᒍᑎ ᖃᕋᓴᐅᔭᒃᑯᑦ ᓴᖅᑭᔮᒐᖓ ᐅᓇ FlightAware, ᒫᔅᓯ 25ᒥ ᐅᓇ ᖃᖓᑕᓲᖅ Pilatus PC-12/47 — ᐊᐅᓚᐅᑎᑐᐊᓕᒃ ᖃᖓᑕᓲᖅ 9ᓂ ᐃᓄᖕᓂ ᐅᓯᔪᓐᓇᖅᑐᖅ — ᖃᖓᑕᓚᐅᕐᓯᒪᔪᖅ ᑯᐸᐃᒃ ᓯᑎᐅᒃ  ᔮᓐ-ᓚᓵᔾ ᖃᖓᑕᓲᒃᑯᕕᐊᓗᐊᓂ ᐳᓇᕕᐊᓐᓱᒧᑦ ᐊᒻᒪᓗ ᑭᖑᓂᐊᒍ ᓴᕗᕕᐊᓪᒧ ᐊᒻᒪ ᖁᐊᖅᑕᖅᒧᑦ.

ᑕᐃᒪᓕ ᑲᑎᖢᑎᒃ ᖃᖓᑕᓂᕆᓚᐅᖅᑕᖓ ᐃᑲᕐᕋᑦ ᑕᓪᓕᒪᑦ.

ᐅᕘᓇᓂ Pilatus’s ᖃᕋᓴᐅᔭᒃᑯᑦ ᓴᖅᑭᔮᒐᖓᒍᑦ, ᒪᑯᐊ ᖃᖓᑕᓲᑦ PC-12 ᒪᕐᕉᖕᓂ ᖃᖓᑕᓲᖅᑎᖃᖅᖢᑎᒃ ᐊᒻᒪ ᑎᓴᒪᓂᒃ ᐃᓄᖕᓂ ᐅᓯᓪᓗᑎᒃ “ᐅᖓᓯᒃᑐᓕᐊᕐᓂᐊᕐᓗᑎᒃ” ᐃᒪᓐᓇᑎᒋᐅᔪᖅ 3,222 ᑭᓛᒥᑕᔅ.

ᑕᐃᕕᑦ ᓵᑏ, ᐊᖓᔪᖅᑳᑉ ᑐᒡᓕᖓ ᐊᐅᓚᑕᐅᔾᔪᑎᓂᒃ ᐅᕌᓄ ᐄᕕᐄᓴᓐᑯᓐᓂ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᓇ “ᐅᓇ ᖃᖓᑕᓂᖅ ᐊᑐᖅᑕᐅᕙᒃᑐᖅ ᖃᖓᑕᓲᒥ ᐊᑐᖅᑐᐊᖃᑦᑕᖅᑐᒧᑦ.”

ᐅᖃᓚᐅᕐᑐᖅ ᑯᕌᓄᒃᑯᑦ ᖃᖓᑕᓲᖅᑎᖏ “ᑐᓴᐅᒪᑎᑕᐅᑦᑎᐊᓚᐅᕐᑐᑦ ᓯᓚᐅᑉ ᒥᒃᓵᓂ ᓯᕗᓂᐊᓂ ᐊᒻᒪ ᒥᑉᐸᓪᓕᐊᓇᓱᓕᖅᑎᓪᓗᒋᑦ.”

“ᖃᖓᑕᓲᖅ ᒥᑦᑕᕆᐊᖃᓪᓚᕆᒃᑎᓪᓗᒍ,” ᐅᖃᕐᑐᖅ, “ᓯᕗᓪᓕᖅᐹᕐᓕ ᐱᕐᕈᓗᐊᕿᑎᑦᑎᑦᑕᐃᓕᓂᖅ ᐃᓱᒪᒋᓛᕆᕙᒃᑕᕗᑦ.

“ᑕᐃᒪᐃᑎᓪᓗᒍ, ᖃᖓᑕᓲᑎᕗᑦ ᐊᔪᕈᓐᓃᖅᓴᖅᓯᒪᔪᑦ ᓯᓚ ᖃᓄᐃᓕᖓᓂᖓᓂᒃ ᐊᒻᒪᓗ ᐃᓱᒪᓕᐅᕆᕙᒃᖢᑎᒃ ᐊᑐᖅᖢᑎᒃ ᐊᑐᕆᐊᖃᖅᐸᒃᑐᓂᒃ ᐊᒻᒪ ᑐᑭᒧᐊᕈᑎᒋᔭᐅᔪᓂᒃ.”

ᓵᑏ ᐅᖃᓚᐅᕐᑐᖅ ᖃᖓᑕᓲᑉ ᐸᐱᕈᙳᐊᖓ ᓱᕋᕈᔪᓚᐅᕐᓂᕋᖅᖢᓂᐅᒃ ᐊᒻᒪᓗ ᐊᐅᓚᐅᑎᖓ ᐊᓯᔾᔨᖅᑕᐅᔭᕆᐊᖃᖅᖢᓂ.

“ᑖᒃᑯᐊ ᓴᓇᔭᐅᓂᐊᕐᓗᑎᒃ, ᓱᕋᒃᓯᒪᔪᓕᕆᔨᑦ ᑲᖏᕐᓱᒃᒧᐊᖅᑕᐅᓚᐅᖅᑐᑦ ᑕᕝᕙᓂ ᓴᓇᔭᐅᓂᐊᕐᒪᑦ,” ᐅᖃᕐᑐᖅ.

“ᓯᕗᓪᓕᖅᐹᕐᓕ ᐱᓇᓱᐊᒐᕗᑦ ᓴᓇᔭᐅᑦᑎᐊᕐᓂᐊᕐᓗᓂ ᐊᒻᒪᓗ ᖃᖓᑕᓲᖅ ᐊᑐᕈᓐᓇᕐᓯᖕᒥᓗᓂ.”

ᐅᓇ ᐊᐃᑉᐸᕆᓕᕐᑕᖓ ᖃᖓᑕᓲᓂ ᒥᑦᑎᐊᕐᓯᒪᙱᑦᑐᓂᒃ ᐅᖓᕙᐅᑉ ᓯᒡᔭᖓᓂ.

ᒫᔅᓯ 30ᒥ, ᐃᓄᐃᑦ ᖃᖓᑕᓲᖓ ᐱᖁᑎᓂ ᐅᓯᑲᖅᑕᖅᑎ “ᖃᓄᐃᓕᕈᓘᔭᓚᐅᕐᒪᑦ” ᒥᓐᓇᓱᓕᖅᑎᓪᓗᒍ ᑲᖏᖅᓱᒧᐊᖅᒧᑦ. ᐋᓐᓂᖅᑐᖃᓚᐅᖅᓯᒪᙱᑦᑐᖅ.