ᐅᕕᙱᐊᕋᖅᑐᑦ, ᐸᑦᑕᒃᑐᖅᑐᑦ ᐃᒡᓗᓕᖕᒥ ᑯᓅᑉ ᑭᖑᓪᓕᖅᐹᖑᔪᒥ ᑕᕐᕆᔭᓕᐊᖓᓐᓂ

ᐃᒡᓗᓕᖕᒥ ᑕᕐᕆᔭᓕᐅᖅᑎ ᓴᖅᑲᓕᐊᓯ ᑯᓄᒃ ᐱᔭᕇᖅᓯᒪᕗᖅ ᑕᕐᕆᔭᓕᐅᕆᓂᕐᒥ ᐊᒻᒪ ᑭᖑᓂᐊᒍᑦ−ᓴᖅᑭᑎᑦᑎᓂᐅᔪᒥ ᐱᓕᕆᓂᐅᔪᒥ ᑭᖑᓪᓕᖅᐹᕆᔭᖓᓂ ᑕᕐᕆᔭᓕᐊᖑᔪᒥ ᐅᐃᒃᓴᕆᙱᑕᕋ, ᐅᕙᙶᖅᑐᒥ ᑕᐃᔅᓱᒪᓂᑐᖃᕐᒥ ᐃᓄᖕᓂ ᐅᓂᒃᑳᖅᑐᐊᖑᔪᓂ ᐅᓂᒃᑳᕆᓂᕐᒥ ᐋᖅᑭᒃᑕᐅᓯᒪᔪᒥ ᑲᑎᑎᑕᐅᓂᐅᔪᒥ ᐱᓕᕆᑦᑎᐊᙱᑦᑐᒥ.

ᐃᓚᒌᑦ, ᐃᓄᑐᖃᐃᑦ ᐊᒻᒪ ᐃᓕᓐᓂᐊᖅᑏᑦ ᐃᓗᓪᓕᖅᓯᕗᑦ ᐃᖃᐃᓕᓴᕐᕕᖓᓂ ᐊᑕᒍᑦᑖᓗᒃ ᐱᒋᐊᓕᓵᖅᑐᓄᑦ ᐃᓕᓐᓂᐊᕐᕕᖓᓂ ᔭᓄᐊᕆ 12−ᒥ ᑕᕐᕆᔭᖅᑕᐅᔭᕆᐅᕐᓂᐅᔪᒥ ᐅᐃᒃᓴᕆᙱᑕᕋᒥ. (ᓴᖅᑲᓕᐊᓯ ᑯᓄᒃ ᐊᔾᔨᓕᐅᖅᑕᖓ)

“ᑕᕐᕆᔭᓕᐊᖑᔪᖅ ᐱᔭᕇᖅᐳᖅ, ᑭᓱᓕᒫᑦ ᐊᑦᑐᖏᖅᓯᒪᓕᖅᐳᑦ,” ᐅᖃᓚᐅᖅᐳᖅ ᑯᓄᒃ.

ᑕᕐᕆᔭᓕᐅᕐᓂᕐᒥ ᐱᓕᕆᐊᖑᓚᐅᖅᐳᖅ 2023−ᒥ ᓇᐹᖅᑐᖃᕈᓐᓇᙱᑦᑐᒥ ᐃᒡᓗᓕᐅᑉ ᕿᑭᖅᑕᖓᓂ, ᓄᓇᓕᐅᑉ ᓯᓚᑎᑦᑎᐊᖓᓂ.

ᓴᖑᔭᕆᐊᖃᓕᕌᖓᑕ ᑕᑯᒃᓴᐅᓂᐅᔪᓂ, ᑲᑎᙵᓂᐅᔪᑦ ᐊᑐᓚᐅᖅᐳᑦ ᐊᐅᔭᒃᑯᑦ ᑕᖕᒫᕐᕕᐅᔪᒥ ᐋᖅᑭᒃᑕᐅᓯᒪᓂᖓᓂ ᑕᕐᕆᔭᓕᐊᒧᑦ ᐱᙳᐊᖅᑎᐅᔪᓂ ᐊᒻᒪ ᐃᖅᑲᓇᐃᔭᖅᑎᓂ ᑐᐱᕐᒥᐅᑕᐅᓪᓗᑎᒃ ᐊᒻᒪ ᐱᓕᕆᖃᑎᒌᒃᖢᑎᒃ.

“ᓅᕈᓘᔭᕆᐊᖃᓚᐅᙱᑉᐳᒍᑦ ᐊᒻᒪ ᓇᓂᓯᓇᓱᐊᖅᖢᑕ ᐃᓂᒃᓴᐅᔪᓂ. ᐊᑕᐅᓯᑦᑕᐃᓐᓇᕐᒦᓚᐅᖅᐳᒍᑦ ᐊᒻᒪ ᐱᓕᕆᔪᓐᓇᖅᓯᑎᓚᐅᖅᐸᕗᑦ,” ᑯᓄᒃ ᐅᖃᓚᐅᖅᐳᖅ.

“ᑕᕐᕆᔭᓕᐊᖅ ᐊᓯᐊᒎᖅᑐᓂ ᐊᒃᑐᐃᓂᖃᖅᐳᖅ ᑕᐃᒫᒃ ᐊᑯᓂᐊᓗᒃ ᐱᔭᕇᕋᓱᓚᐅᖅᐸᕗᑦ, ᑭᓯᐊᓂ ᖁᕕᐊᓱᒋᐊᖃᖅᐳᖓ ᐊᒻᒪ ᓈᒻᒪᒋᔭᕆᐊᖃᖅᐸᕋ ᑕᕐᕆᔭᓕᐊᖅ,” ᐅᖃᓚᐅᖅᐳᖅ.

ᑲᓇᑕᒥ ᖁᙱᐊᖅᑎᐅᔪᑦ ᑕᑯᔪᓐᓇᔾᔭᙱᑎᓪᓗᒋᑦ ᑭᓯᐊᓂ ᖃᖓᒃᑲᓐᓂᖅ ᑕᒪᑐᒪᓂ ᐊᕐᕌᒎᔪᒥ, ᐃᓄᐃᑦ ᐃᒡᓗᓕᖕᒥ ᐃᒻᒥᒃᑰᖅᑐᒥ ᑕᕐᕆᔭᖅᑎᑕᐅᖅᑳᓚᐅᖅᐳᑦ ᑯᓅᑉ ᑕᕐᕆᔭᓕᐊᖓᓂ ᓄᓇᓕᖕᓂ ᓯᕿᓐᓈᕈᒻᒥ ᖁᕕᐊᓱᒍᑕᐅᔪᒥ.

ᐱᓕᕆᐊᖑᓪᓗᓂ ᔭᓄᐊᕆ 12−ᒥ ᐊᑕᒍᑦᑖᓗᒃ ᐱᒋᐊᓕᓵᖅᑐᓄᑦ ᐃᖃᐃᓕᓴᕐᕕᖓᓂ, ᖃᓄᐃᓐᓂᐅᔪᖅ ᖁᕕᐊᓱᒍᑕᐅᓚᐅᖅᐳᖅ ᓄᓇᓕᖕᓂ ᐊᔪᙱᓐᓂᓕᖕᓂ ᓄᓇᓕᐅᔪᒥ 2,000−ᐸᓗᖕᓂ ᓄᓇᖃᖅᑎᐅᔪᓂ.

“ᑕᕐᕆᔭᕐᓇᖅᓯᖕᒪᑦ 6 ᐅᓐᓄᒃᑯᑦ, ᐃᖃᐃᓕᓴᕐᕕᒃ ᑕᑕᓚᐅᖅᐳᖅ, ᓴᓂᕋᕐᒥ ᓴᓂᕋᕐᒧᑦ,” ᑯᓄᒃ ᐅᖃᓚᐅᖅᐳᖅ.

“ᐅᖃᓪᓚᓚᐅᖅᐳᖓ ᖁᙱᐊᕐᕕᖓᓂ ᑕᕐᕆᔭᓕᐊᖅ ᐱᒋᐊᒪᐅᙱᑎᓪᓗᒍ ᐊᒻᒪ ᐱᔭᕇᕋᒪ ᐊᖅᑲᖅᑎᓚᐅᖅᐳᖓ ᐊᒻᒪ ᐃᒃᓯᕙᐅᑕᓐᓂ ᓇᓂᓯᔪᓐᓇᓚᐅᙱᓚᖓ. ᐅᓇ ᑕᕐᕆᔭᓕᐊᕋ!”

ᖁᙱᐊᖅᑐᑦ ᖁᕕᐊᓐᓂᖓᑦ, ᐅᖃᓚᐅᖅᐳᖅ, ᖁᑦᑎᓛᖓᓂ ᑎᑭᐅᑎᓚᐅᖅᐳᖅ ᖁᙱᐊᖅᑕᐅᓂᐅᔪᒥ ᑕᑯᒃᓴᐅᑎᑦᑎᔪᒥ ᖃᐅᔨᒪᔭᐅᔪᓂ ᑮᓇᕐᓂ ᓄᓇᓕᖕᓂ.

“ᖁᙱᐊᖅᑐᑦ ᑕᑯᖔᒥᒃ ᓄᑖᖑᔪᒥ ᑕᕐᕆᔭᓕᐊᒧᑦ ᐱᙳᐊᖅᑎᐅᔪᒥ ᑕᕐᕆᔭᖅᑕᐅᔪᒥ, ᑕᒪᒃᑭᒐᓚᑦ ᑕᕐᕆᔭᓕᐊᒧᑦ ᐱᙳᐊᖅᑎᐅᔪᑦ ᑕᕐᕆᔭᓕᐊᖑᔪᒥ ᒪᒃᑯᖕᒪᑕ, ᖁᙱᐊᖅᑐᑦ ᐸᑦᑕᒃᑐᓚᐅᖅᐳᑦ ᖃᐅᔨᒪᓪᓚᕆᖕᒪᑕ ᑖᒃᑯᓂᖓ ᐃᓄᖕᓂ,” ᑯᓄᒃ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᑕᒪᒃᑭᒐᓚᑦ ᑕᕐᕆᔭᓕᐊᒥ ᐱᙳᐊᖅᑎᑦ ᐃᒡᓗᓕᖕᒥ ᖁᑦᑎᒃᑐᒥ ᐃᓕᓐᓂᐊᕐᕕᖕᒥᙶᕐᓂᖏᓐᓂ ᐊᒻᒪ ᓯᕗᓃᑦ ᕿᑎᖅᐸᓯᐊᓂ ᐃᓕᓐᓂᐊᕐᕕᖓᓂ.

ᑕᑯᒃᓴᐅᓂᐅᔪᑦ ᓲᕐᓗ ᓴᖅᑭᓐᓂᐅᔪᒥ ᑕᖅᓯᕐᒥ ᐊᕐᓇᒥ ᓯᕗᓂᐊᓂ ᐊᖓᒃᑯᕐᒥ ᐊᕐᓇᒥᒃ ᐱᓚᐅᖅᐳᖅ ᐱᓗᐊᖅᑐᒥ ᖁᕕᐊᓐᓂᐅᔪᒥ ᖁᙱᐊᖅᑐᑦ ᐸᑦᑕᒃᑐᖅᖢᑎᒃ, ᐃᒡᓚᖅᖢᑎᒃ ᐊᒻᒪ ᐃᓚᖏᓐᓂ ᓂᐱᖃᙱᓐᓂᐅᔪᓂ.

“ᐱᐅᓪᓗᓂ ᓇᓗᓇᐃᒃᑯᑕᐅᕗᖅ ᐃᒡᓗᓕᖕᒥᐅᑦ ᐊᓕᐊᓇᐃᒋᓚᐅᕐᓂᖏᓐᓂ,” ᑯᓄᒃ ᐅᖃᓚᐅᖅᐳᖅ ᐊᑐᕐᓂᑯᖏᓐᓂ.

ᑕᑯᒃᓴᐅᑎᑕᐅᓂᖓᓂ ᑕᒪᒃᑭᓂ−ᐃᓄᖕᓂ ᑕᕐᕆᔭᓕᐊᒧᑦ ᐱᙳᐊᖅᑎᐅᔪᓂ, ᐅᐃᒃᓴᕆᙱᑕᕋ ᑕᒪᒃᑭᑦᑎᐊᖅᑐᒥ ᐃᓄᒃᑎᑑᖅᐳᖅ ᐃᒡᓗᓕᒃ ᐅᖃᓪᓚᐅᓯᖓᓂ.

ᐅᓂᒃᑳᖅᑎᐅᓚᐅᖅᑐᖅ ᐊᒻᒪ ᑐᑭᒧᐊᒃᑎᑦᑎᔨ ᓲᓴᓐ ᐊᕕᙵᖅ, ᐃᓅᔪᓐᓃᓚᐅᖅᑐᒥ ᐊᕐᕌᓂ, ᑕᕐᕆᔭᓕᐊᖑᔫᑉ ᓴᓇᐅᒐᓂ ᑐᑭᒧᐊᒃᑎᑦᑎᔨᐅᓚᐅᖅᐳᖅ. ᐊᕕᙵᖅ ᐊᑕᐅᓯᐅᓪᓗᓂ ᓴᖅᑭᑎᑦᑎᖃᑕᐅᓚᐅᖅᐳᖅ ᐊᕐᓇᐃᑦ ᑕᕐᕆᔭᓕᐊᖑᔪᓄᑦ ᓴᖅᑭᑎᑦᑎᓂᐅᔪᒥ, ᐊᕐᓇᓄᑦ ᑕᕐᕆᔭᓕᐅᕐᓂᕐᒥ ᑲᑎᙵᓂᐅᔪᓂ ᐃᒡᓗᓕᖕᒥ.

ᓴᖅᑭᑎᑕᐅᓪᓗᓂ ᐃᒡᓗᓕᖕᒥ-ᑐᙵᕕᓕᖕᒥ ᑭᖑᓪᓖᑦ ᓴᖅᑭᑎᑕᐅᓂᐅᔪᒥ ᑮᓇᐅᔭᓂ ᐊᑐᖅᑕᐅᔪᒃᓴᖃᖅᖢᓂ $3.2 ᒥᓕᐊᓐᓂ, ᑕᕐᕆᔭᓕᐊᖅ ᓄᓇᕐᔪᐊᓕᒫᒥ ᓴᖅᑭᔮᖅᑎᑕᐅᓂᖃᕐᓂᐊᖅᐳᖅ ᐴᓕᓐ ᓄᓇᕐᔪᐊᒥ ᑕᕐᕆᔭᓕᐊᓄᑦ ᖁᕕᐊᓱᒍᑕᐅᔪᒥ ᕕᕗᐊᕆᒥ.

ᑯᓅᑉ ᒫᓐᓇᓕᓴᐅᓛᖑᔪᓂ ᓴᖅᑭᑎᑕᐅᓂᐅᔪᓂ ᐃᓚᖃᖅᐳᖅ ᓇᐃᑦᑐᒥ ᑕᕐᕆᔭᓕᐊᖅ ᐊᖓᒃᑰᑉ ᐃᑲᔪᖅᑎᖓ 2021−ᒥ, ᐊᒻᒪ ᐊᑕᐅᓯᕐᒥ ᐅᓪᓘᔪᒥ ᓄᐊ ᐱᐅᒑᑦᑑᑉ ᐃᓅᓯᖓᓂ 2019−ᒥ.

2001−ᒥ ᑕᕐᕆᔭᓕᐊᖅ ᐊᑕᓈᕐᔪᐊᖅ: ᐅᕿᓚᔪᖅ ᓵᓚᒃᓴᓚᐅᖅᐳᖅ ᖃᔅᓯᒐᓚᖕᓂ ᓵᓚᖃᐅᓯᐊᓂ ᐃᓚᖃᖅᑐᒥ ᔩᓂᒥ ᐱᐅᓪᓚᕆᖕᓂᐅᔪᒥ ᑲᓇᑕᒥ ᑕᕐᕆᔭᓕᐊᕐᓂᕐᒥ ᐊᒻᒪ ᑕᓚᕖᓴᒧᑦ ᐱᐅᓛᖑᔪᒥ ᑕᕐᕆᔭᓕᐊᖑᔪᒥ, ᐊᒻᒪ ᑯᓄᒃ ᑐᓂᔭᐅᓚᐅᕆᕗᖅ ᔩᓂᒥ ᐱᐅᓛᖑᔪᒥ ᑎᑭᐅᑎᔪᓐᓇᕐᓂᖓᓂ ᑐᕌᖅᑎᑦᑎᓂᕐᒧᑦ.