ᐊᖓᔪᖅᑳᖅ ᓂᕈᐊᖅᑐᓕᕆᓂᕐᒧᑦ ᒪᒥᐊᑦᑐᖅ ᓄᓇᕕᒃᒥᐅᓄᑦ

For the English version of this story, please see Chief electoral officer apologizes for ‘shortcomings’ in Nunavik voting.

ᑲᓇᑕᒥ ᐊᖓᔪᖅᑳᖅ ᓂᕈᐊᖅᑐᓕᕆᓂᕐᒧᑦ ᓯᑕᕚᓐ ᐱᕉ ᒪᒥᐊᓚᐅᕐᑐᖅ ᐅᖃᖅᖢᓂ “ᓈᒻᒪᙱᓕᐅᕈᑎᕈᓗᖕᓂ” ᓄᓇᕕᒃᒥ ᓂᕈᐊᕆᐊᖅᑐᕐᕕᖕᓂ ᐊᐃᕆᓕ 28-ᒥ ᓂᕈᐊᕐᓇᐅᑎᓪᓗᒍ.

ᓂᕈᐊᖅᑐᓕᕆᔨᒃᑯᑦ ᑲᓇᑕᒥ ᖃᕋᓴᐅᔭᒃᑯᑦ ᓴᖅᑭᔮᒐᖓᓂ ᐊᐃᕆᓕ 30-ᒥ, ᐱᕉ ᒪᒥᐊᓐᓂᕋᖅᓯᒪᓚᐅᕐᑐᖅ ᐃᓚᖏᑦ ᓂᕈᐊᕈᓐᓇᖅᑐᑦ ᓄᓇᕕᒃᒥ ᓂᕈᐊᕈᓐᓇᓚᐅᙱᒻᒪᑕ ᒐᕙᒪᑐᖃᒃᑯᓐᓄᑦ ᓂᕈᐊᕐᓇᐅᑎᓪᓗᒍ.

“ᑕᐃᑯᓄᖓ, ᒪᒥᐊᓇᖅ,” ᐅᖃᕐᑐᖅ.

7 ᓄᓇᕕᒃᒥ ᓄᓇᓖᑦ — ᓇᑉᐸᖏᑦ ᓄᓇᕕᐅᑉ ᓄᓇᓕᖏᓐᓂᒃ — ᓈᒻᒪᙱᓕᐅᕈᑎᖃᕐᓂᕋᓚᐅᕐᑐᑦ ᓂᕈᐊᕐᓇᕐᒧᑦ ᖃᓄᐃᓕᐅᕈᑎᐅᔭᕆᐊᓕᖕᓂᒃ ᓂᕈᐊᕐᓇᐅᑎᓪᓗᒍ. ᐃᓚᖏᓐᓂᒃ ᓄᓇᓕᖕᓂ, ᓂᕈᐊᖅᕕᒃᓴᐃᑦ ᕿᓚᒥᕈᓗᒃ ᒪᑐᐃᖓᓚᐅᕐᒪᑕ, ᐅᕙᓂᓕ ᐃᕗᔨᕕᒃᒥᑦ ᐊᒻᒪ ᐊᑯᓕᕕᒃᒥ ᓂᕈᐊᕐᕖᑦ ᒪᑐᙱᑦᑎᐊᒻᒪᕆᒃᖢᑎᒃ.

ᐊᐃᕆᓕ 29-ᒥ ᒪᑭᕝᕕᒃ ᑯᐊᐳᕇᓴᓐᑯᑦ ᐅᖄᓚᓚᐅᕐᓯᒪᔪᑦ ᓂᕈᐊᖅᑐᓕᕆᔨᒃᑯᓐᓄᑦ ᑲᓇᑕᒥ ᖃᐅᔨᓇᓱᒃᖢᑎᒃ ᖃᓄᖅ ᓂᕈᐊᕐᓂᓕᕆᓂᖅ ᐊᐅᓚᑕᐅᓚᐅᕐᓂᖓᓂᒃ, ᑖᒃᑯᐊᓗ ᐃᓚᒋᔭᐅᓪᓗᑎᒃ ᑯᐸᐃᒃᒥ ᐅᑯᓄᖓ ᐊᐱᑎᐱ—ᔭᐃᒻᔅ ᐸᐃ—ᓄᓇᕕᒃ—ᐄᔭᐅᒥ ᓂᕈᐊᒐᒃᓴᓕᕆᓂᕐᒧᑦ.

ᑎᑎᕋᖅᑕᐅᔪᑎᒍᑦ, ᐱᕉ ᐅᖃᓚᐅᕐᑐᖅ ᐊᕐᕌᒎᓕᕐᑐᓂᒃ ᐱᖓᓱᒃ ᓂᕈᐊᖅᑐᓕᕆᔨᒃᑯᑦ ᑲᓇᑕᒥ ᐅᖃᖃᑎᖃᕐᓯᒪᓂᖏᓐᓂᒃ ᓄᓇᖃᖅᑳᖅᑐᑦ ᓄᓇᓕᖏᓐᓂᒃ ᐊᒻᒪᓗ ᑐᓚᒃᑕᕈᑎᐅᔭᑦᑐᓂᒃ ᑲᒪᒋᔭᖃᕐᓂᐊᕐᓗᑎᒃ ᐊᒻᒪ ᐱᐅᓯᕚᓕᖅᑎᓪᓗᒍ ᓂᕈᐊᕋᓱᖕᓂᖅ.

“ᑕᐃᒪᐃᒃᑲᓗᐊᖅᑎᓪᓗᒍ ᒪᑯᐊ ᓈᒻᒪᙱᓕᐅᕈᑎᑦ ᐱᔨᑦᑎᕋᐅᑎᑎᒍᑦ ᓄᓇᕕᒃᒥ ᓂᕈᐊᕐᓇᐅᑎᓪᓗᒍ ᒐᕙᒪᑐᖃᒃᑯᓐᓂ ᐊᑐᙱᓐᓂᕐᓴᐅᔪᖅ ᖃᓄᐃᓕᐅᕈᑎᐅᔭᕆᐊᖃᒻᒪᕆᒃᑐᓂᒃ ᑕᒪᑐᒧᖓ,” ᐅᖃᕐᑐᖅ.

ᐱᕉ ᐅᖃᕐᑐᖅ ᓂᕈᐊᖅᑐᓕᕆᔨᒃᑯᑦ ᕿᒥᕐᕈᐊᕐᓂᐊᕐᓂᕋᖅᖢᓂᒋᑦ ᖃᓄᐃᓕᐅᕈᑎᕕᓃᑦ ᓂᕈᐊᕈᓐᓇᙱᔾᔪᑎᐅᓂᒃᑯᑦ ᓄᓇᕕᒃᒥᑦ, ᐊᒻᒪᓗ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᐱᐅᓯᕚᓪᓕᕈᑎᓂᒃ ᓂᕈᐊᖅᑐᓕᕆᓂᕐᒧᑦ ᓄᓇᖃᖅᑳᖅᑐᓄᑦ.

ᑎᑎᕋᐅᓯᖃᓛᕐᑐᑦ ᖃᐅᔨᔾᔪᑎᐅᔪᓂᒃ, ᐅᖃᕐᑐᖅ.

“ᐱᓇᓱᒍᒪᔪᒍᑦ ᓯᕗᒧᑦ ᐱᓕᕆᓂᕐᓴᐅᓗᑎ ᑲᑐᔾᔨᖃᑎᒌᓂ ᐱᓕᕆ

“ᐱᓇᓱᐊᒐᕗᓪᓕ ᓯᕗᒧᑦ ᑲᔪᓯᓇᓱᒡᓗᑕ ᐱᓕᕆᐊᑦᑎᒍᑦ ᐱᓕᕆᖃᑎᖃᖅᑎᓪᓗᑕ ᑲᑐᔾᔨᖃᑎᒌᓂᒃ ᐊᒻᒪ ᓄᓇᓕᖕᓂ ᐱᐅᓂᕐᓴᒃᑯᑦ ᐱᔨᑦᑎᕋᕋᓱᖕᓂᒃᑯᑦ ᓂᕈᐊᕈᓐᓇᖅᑐᓂᒃ ᓄᓇᕕᒃᒥ,” ᐱᕉ ᐅᖃᕐᑐᖅ.

ᓕᐳᕈᓪ ᒫᓐᑎ ᒑᓪ-ᒫᔅᓯ ᓂᕈᐊᖅᑕᐅᓚᐅᕐᑐᖅ 12,578-ᓄᑦ ᐅᑯᓄᖓ ᐊᐱᑎᐱ—ᔭᐃᒻᔅ ᐸᐃ—ᓄᓇᕕᒃ—ᐄᔭᐅᒥ ᓂᕈᐊᖅᑕᐅᓇᓱᒃᖢᓂ, ᐲᕐᓯᓪᓗᓂ ᓂᕈᐊᖅᑕᐅᓯᒪᓂᑯᒥ ᐸᓛᒃ ᑯᐸᑯᐊᑯᓐᓄᑦ ᐃᓚᒋᔭᐅᔪᒥᒃ ᓯᐊᕕ ᐸᕉᐱᒥᑦ   (10,381-ᓄ ᓂᕈᐊᖅᑐᐅᓪᓗᓂ) ᓂᕈᐊᖅᑕᐅᓂᖏ ᐊᑯᑦᑐᓂᖃᖅᖢᓂ 2,197-ᓄᑦ ᓂᕈᐊᖅᑐᓂ. ᑲᓐᓲᕕᑎᕝᑯᓐᓄᑦ ᓂᕈᐊᒐᒃᓴᖅ ᓂᕈᐊᖅᑕᐅᓚᐅᕐᑐᖅ 6,851-ᓄᑦ ᐊᒻᒪ ᐊᓐᑏᐲᑯᓐᓄᑦ ᓂᕈᐊᒐᒃᓴᖅ ᑕᐃ ᕼᒐᓯᕼᐊᕋ 752-ᓄᑦ.