ᓄᓇᕗᒥᑦ ‘ᐱᓗᐊᖅᑐᐊᓘᓕᕐᒪᑕ’ ᓱᕈᓯᕐᓂᒃ ᖁᓄᔪᕐᓂᐊᖃᑦᑕᖅᑐᑦ, ᐃᑲᔪᖅᑐᐃᔨᐅᕙᒃᑐᖅ ᐅᖃᖅᑐᖅ

ᖃᓄᐃᓕᐅᕈᑎᐅᓯᒪᔪᑦ ᓇᓗᓇᐃᔭᖅᑕᐅᑦᑎᐊᖅᓯᒪᙱᒃᑲᓗᐊᖅᖢᑎᒃ ᓱᓕ ᐅᓄᖅᑐᐊᓘᓂᖏᑦ ‘ᐅᐊᑲᓪᓚᓗᐊᕌᓘᖕᒪᑕ,’ ᐅᖃᓚᐅᖅᑐᖅ ᓄᓇᕗᒥᑦ ᓱᕈᓯᕐᓂ ᐊᒻᒪ ᐃᓅᓱᒃᑐᓂ ᑭᒡᒐᖅᑐᐃᔨ

ᔭᐃᓐ ᐸᐃᑦᔅ, ᓄᓇᕗᒥ ᑭᒡᒐᖅᑐᐃᔨ ᓱᕈᓯᕐᓄᑦ ᐊᒻᒪ ᐃᓅᓱᒃᑐᓄᑦ, ᐊᐱᖅᓱᖅᑕᐅᑲᑕᒃᑎᓪᓗᒍ ᐅᑯᓄᖓ ᒐᕙᒪᒃᑯᑦ ᐊᐅᓚᑦᑕᖏᓐᓄᑦ ᐊᒻᒪ ᑭᒃᑯᓕᒫᓄᑦ ᑲᑎᒪᔨᕋᓛᖏᓐᓄᑦ ᐊᐱᖅᓱᖅᑕᐅᑎᓪᓗᒍ ᐅᓪᓘᖕᓂ ᒪᕐᕉᖕᓂ ᖃᐅᔨᓴᖅᑕᐅᑎᓪᓗᒍ ᑎᑎᕋᕐᕕᖓᑕ ᐊᕐᕌᒍᒧᑦ 2019/20 ᐅᓂᒃᑳᓕᐊᖏᑦ. (ᐊᔾᔨᓕᐅᕆᔨ ᑕᔅᑎᓐ ᐸᑖᕐ)

By ᒥᓚᓂ ᐅᕆᑦᓵᑦ

For an English version of this story, see Child sex abuse in Nunavut at a ‘crisis’ level, advocate says

ᐊᑭᑐᔫᑎᐅᓗᐊᖅᑐᐊᓗᐃᑦ ᐊᒻᒪ ᓱᕈᓯᕐᓂ ᖁᓄᔪᓐᓂᐊᖅᑐᕕᓂᕐᓄᑦ ᑎᑎᕋᐅᓯᐅᓯᒪᔪᑦ ᓈᒻᒪᖃᑦᑕᙱᓗᐊᕐᓂᖏᓐᓄᑦ ᐊᒻᒪᓗ ᓄᓇᕗᒥᑦ ᒐᕙᒪᒃᑯᓐᓂᒃ ᑕᒪᑐᒥᖓ ᑭᐅᔨᐅᔪᖃᙱᓗᐊᕐᓂᖓ, ᐅᖃᐅᓯᐅᓚᐅᖅᑐᑦ ᒪᓕᒐᓕᕆᕕᒡᔪᐊᖅᒥᒃ ᑕᖅᑭᐅᓚᐅᖅᑐᒥᓐ ᐅᖃᐅᓯᐅᓚᐅᖅᑐᑦ ᑖᒃᑯᐊ ᒪᓕᒐᓕᕆᔨᐅᔪᑦ ᐊᐱᖅᓱᖅᑎᓪᓗᒋᑦ ᓱᕈᓯᕐᓂᒃ ᐊᒻᒪ ᐃᓅᓱᒃᑐᓂᒃ ᑭᒡᒐᖅᑐᐃᔨᐅᔪᖅ ᖃᖓᑦᑎᐊᓕᓵᕐᓂᒃ ᐅᓂᒃᑳᓕᐊᕕᓃᑦ ᒥᒃᓵᓅᖓᔪᓂᒃ.

ᐅᑯᓇᙵᑦ 625 ᓇᓗᓇᐃᖅᑕᐅᓯᒪᓪᓚᕆᒃᑐᓂᒃ ᖁᓄᔪᕐᓂᐊᖅᑎᐅᓂᖏᓐᓄᑦ ᓄᓇᕗᒥᑦ, 70 ᐳᓴᓐᑎᖏᑦ ᓱᕈᓯᕐᓂᒃ ᐱᓕᕆᐊᖃᖅᓯᒪᔪᑦ ᐅᕘᓇᓕ ᐅᓂᒃᑳᓕᐊᖑᓯᒪᔪᓂᒃ 2019/20 ᐊᕐᕌᒍᒧᑦ, ᑖᓐᓇᓗ ᑭᖑᓪᓕᖅᐹᖑᓪᓗᓂ ᐅᓂᒃᑳᓕᐊᕆᔭᐅᓯᒪᔪᓂᒃ ᑎᑎᕋᖅᕕᖓᓂ.

ᔭᐃᓐ ᐸᐃᑦᔅ, ᑭᒡᒐᖅᑐᐃᔨ, ᐅᖃᐅᓯᖃᓚᐅᖅᑐᖅ ᑖᒃᑯᓂᐊ ᓇᐃᓴᐅᑎᓂᒃ ‘ᐅᐊᑲᓪᓚᓗᐊᕌᓘᓂᕋᖅᖢᓂᒋᑦ’ ᑭᐅᓯᑲᑕᒃᖢᓂᓗ ᐊᐱᖅᓱᖅᑕᐅᑎᓪᓗᒍ ᑲᑎᒪᔨᕋᓛᓂᒃ ᒪᓕᒐᓕᕆᕕᒡᔪᐊᒥᑦ ᔫᓂ 21 ᐊᒻᒪ 22-ᒥ. ᑭᒡᒐᖅᑐᐃᔨᐅᓂᖓᓄᑦ ᓱᕈᓯᕐᓂᒃ ᐊᒻᒪ ᐃᓅᓱᒃᑐᓂᒃ, ᐸᐃᑦᔅ ᑲᒪᒋᔭᖃᖅᑐᖅ ᓄᓇᕗᒥᑦ ᒐᕙᒪᒃᑯᑦ ᐱᔨᑦᑎᕋᐅᑎᖃᖅᑎᑦᑎᓂᖏᓐᓂᒃ ᓈᒻᒪᒃᑐᓂᒃ, ᐊᔾᔨᒌᒃᑎᑦᑎᓯᒪᓂᒃᑯᑦ ᐊᒻᒪᓗ ᐱᓕᕆᐊᕆᔭᐅᖃᑦᑕᐃᓐᓇᕐᓗᓂ ᐱᔨᑦᑎᕋᐅᑎᓂᒃ ᐃᓅᓱᒃᑐᓄᑦ ᓄᓇᕗᒻᒥᐅᓄᑦ  ᐃᓚᖏᓐᓄᓪᓗ ᑖᔅᓱᒪ ᑎᑎᕋᖅᕕᖓᑕ ᖃᕋᓴᐅᔭᒃᑯᑦ ᓴᖅᑭᔮᒐᖓ ᐅᖃᖅᓯᒪᔪᖅ.

ᒪᓕᒐᓕᐅᖅᑎ ᐋᑕᒻ ᐋᕆᐊᒃ ᓚᐃᑦᓯᑑᓐ, ᑲᑎᒪᔨᕋᓛᓂ ᐃᓚᒋᔭᐅᔪᖅ ᕿᒥᕐᕈᐊᖅᑐᓂᒃ ᐸᐃᑦᔅ ᐅᓂᒃᑳᓕᐊᖏᓐᓂᒃ, ᐊᐱᕆᓚᐅᖅᑐᖅ ᑖᔅᓱᒧᖓ ᖃᖓᒃᑯᓪᓕ ᒪᓐᓇ ᐊᑐᖅᑕᐅᑎᓪᓗᒍ ᐋᓐᓂᖅᓱᐃᕆᕐᔪᐊᖃᑦᑕᕐᓂᐊᓗᒃ ᐊᒻᒪ ᖁᓄᔪᕐᓂᐊᖃᑦᑕᕐᓂᐊᓗᒃ ᓱᕈᓯᕐᓂ ᓄᓇᕗᒥᑦ ᐃᓱᒪᒋᔭᐅᔪᓐᓇᖅᓯᒐᔭᕐᓂᖓᓂᒃ ᐱᓗᐊᖅᑐᐊᓘᓕᕐᓂᖓᓂᒃ.

ᐸᐃᑦᔅ ᐅᖃᓚᐅᖅᑐᖅ ᑕᒪᓐᓇ ᐱᓗᐊᖅᑐᐊᓘᕌᓂᓕᕐᓂᖓᓂᒃ.

ᐅᓂᒃᑳᖏᓐᓂ, ᐸᐃᑦᔅ ᐅᖃᓚᐅᕐᑐᖅ ᑕᒪᑐᒥᖓ ᑲᒪᒋᔭᖃᑐᐃᓐᓇᓚᐅᙱᑦᑐᖅ ᐊᑐᖅᑕᐅᓗᐊᖅᑐᐊᓘᓂᖓᓂᒃ ᓄᓇᕗᒥᑦ ᑭᓯᐊᓂᓕ ᑕᒪᒃᑯᐊ ᑎᑎᕋᐅᓯᐅᖃᑦᑕᖅᓯᒪᒋᓐᓂᖏᓐᓂᒃ.

“ᐃᓄᓕᕆᔨᒃᑯᑦ ᐅᖃᓚᐅᕐᑐᑦ ᑕᒪᒃᑯᐊ ᑎᑎᕋᐅᓯᐅᖏᓐᓇᐅᔭᙱᓐᓂᖏᓐᓂᒃ,” ᐅᖃᓚᐅᖅᑐᖅ ᒪᓕᒐᓕᕆᕕᒡᔪᐊᒥᓐ.

ᐸᐃᑦᔅ ᐅᖃᐅᓯᖃᒃᑲᓐᓂᓚᐅᕐᒥᔪᖅ ᐃᓄᓕᕆᔨᒃᑯᑦ ᒥᓂᔅᑕᖓᑕ ᐃᓕᓴᐱ ᓯᐅᑎᐊᐱᐅᑉ ᐅᖃᐅᓯᕆᓚᐅᖅᓯᒪᔭᖏᓐᓂ ᒫᔅᓯ 2020-ᖑᑎᓪᓗ, ᐅᖃᖅᑎᓪᓗᒍ ᓴᓇᕝᕕᖓ ᒪᕐᕈᐃᓪᓘᐊᑎᒃ ᐱᓇᓱᐊᕈᓯᕐᒥ ᐅᖄᓚᕝᕕᐅᖃᑦᑕᕐᓂᖏᓐᓂᒃ ᖁᓄᔪᕐᓂᐊᖅᑕᐅᔪᓂᒃ ᓱᕈᓯᕐᓂ.

“ᑕᐃᒪᓕ ᑕᒪᓐᓇ ᑐᑭᖃᖅᑐᖅ ᐃᓄᓕᕆᔨᒃᑯᑦ ᒫᓂ 104-ᓂ ᓱᕈᓯᕐᓂ ᖁᓄᔪᕐᓂᐊᖅᑐᓂᒃ ᑐᓴᖅᑎᑕᐅᖃᑦᑕᖅᑐᑦ,” ᐸᐃᑦᔅ ᐅᖃᖅᑐᖅ, ᐅᖃᒃᑲᓐᓂᖅᖢᓂ ᖃᔅᓯᒻᒪᕆᐅᓇᔭᕐᓂᖏᑦ ᓇᓗᓇᐃᕐᓂᕋᖅᖢᓂᒋᑦ ᓲᖃᐃᒻᒪ ᑎᑎᕋᐅᓯᐅᖃᑦᑕᐃᓐᓇᙱᒻᒪᑕ. ᐊᒻᒪᓗ ᖃᐅᔨᒪᔭᐅᓇᓱᙱᖢᑎᒃ.

ᓄᓇᕗᒥᑦ ᒐᕙᒪᒃᑯᑦ ᐱᖃᙱᓗᐊᕐᓂᖏᑦ ᒪᑯᓂᖓ ᑐᓴᐅᒪᔭᐅᔭᕆᐊᖃᖅᐸᒃᑐᓂᒃ ᐃᓄᓕᕆᔨᒃᑯᓐᓂ ᒪᑯᓂᖓ ᐱᔨᑦᑎᕋᐅᑎᐅᔪᓐᓇᖅᑐᓂᒃ ᐃᓅᓱᒃᑐᓄᑦ ᖃᐅᔨᔭᐅᓕᓚᐅᕐᒥᔪᖅ ᓴᓇᕝᕕᖓᓂ ᑲᑎᕐᓱᐃᑎᓪᓗᒋᑦ ᓄᓇᕗᒥᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᒃ ᐊᕐᕌᒍᒧ ᐅᓂᒃᑳᓕᐅᖅᐸᓪᓕᐊᑎᓪᓗᒋᑦ, ᐸᐃᑦᔅ ᐅᖃᖅᑐᖅ.

“ᐃᖅᑲᓇᐃᔭᖅᑎᒋᔭᒃᑲ ᐊᑯᓂᕈᓗᒃ ᐃᑲᕐᕋᑲᓪᓚᒻᒪᕆᖕᓂᒃ ᐱᓕᕆᐊᖃᓚᐅᖅᓯᒪᔪᑦ ᕿᓂᑲᑕᒃᖢᑎᒃ, ᓇᓗᓇᐃᔭᐃᓇᓱᒃᖢᑎᒃ, ᐊᒻᒪᓗ ᑐᑭᓯᒋᐊᖅᑎᑦᑎᒃᑲᓐᓂᕋᓱᒃᖢᑎᒃ ᑭᓱᓂ ᐱᓕᕆᔾᔪᑎᖃᓚᐅᕐᓂᖏᓐᓂᒃ,” ᐅᖃᖅᑐᖅ.

ᐸᐃᑦᔅ ᐅᖃᓚᐅᖅᑐᖅ ᑕᒪᓐᓇ ᐱᓕᕆᐊᕆᓕᕐᓂᐊᕐᓗᒍ ᖃᐅᔨᒪᔭᕆᐊᖃᕐᓂᖏᓐᓂᒃ ᖃᓄᑎᒋ ᑕᒪᓐᓇ ᓈᒻᒪᙱᓕᐅᕈᑎᒻᒪᕆᐅᔭᕆᐊᒃᓴᖓᓂᒃ.

“ᓄᓇᓕᖕᓂ ᑐᑭᓯᓯᒪᔭᕆᐊᖃᕐᒪᑕ ᐊᒻᒪᓗ ᐅᖃᖅᓯᒪᓗᑎᒃ ᓱᕈᓯᕐᓂᒃ ᖁᓄᔪᕐᓂᐊᖃᑦᑕᕐᓂᐊᓗᖕᒥ ᐊᑐᖃᑦᑕᕐᓂᐊᓗᖕᒥ,” ᐅᖃᖅᑐᖅ.

ᐸᐃᑦᔅ ᐅᖃᓚᐅᖅᑐᖅ ᐱᓕᕆᕝᕕᒋᔭᖓ ᐅᔾᔨᕆᓯᒪᓂᖏᓐᓂᒃ ᐅᓄᒻᒪᕆᒃᑐᓂᒃ ᐅᓂᒃᑳᓕᐊᖑᓯᒪᔪᓂᒃ ᐊᕐᕌᒍᒐᓴᐅᓕᖅᑐᓂᒃ “ᖃᓄᐃᓕᐅᕈᑎᐅᓯᒪᙱᑦᑐᓂᒃ ᐅᕝᕙᓘᓐᓃᑦᖅ ᐱᓕᕆᐊᖑᒻᒪᕆᒃᓯᒪᙱᑦᑐᓂᒃ”.

ᐅᓂᒃᑳᖏᓐᓂᒃ, ᐸᐃᑦᔅ — ᐃᖅᑲᓇᐃᔮᖃᓕᖅᑐᖅ ᐊᕐᕌᒎᖕᓂ ᐱᓕᕆᐊᖓᓂᒃ — ᐅᖃᓚᐅᖅᑐᖅ ᐃᓚᖏᑦ ᓄᓇᕗᒥᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᐱᓕᕆᐊᓄᑦ ᑭᐅᔨᐅᑎᑕᐅᕙᙱᓐᓂᖏᓐᓂᒃ. ᑕᒪᑐᒧᖓᓕ ᖃᓄᐃᓕᐅᖁᔨᓕᖅᖢᓂ ᐅᖃᓕᓚᐅᖅᑐᖅ.

“ᐅᓄᒻᒪᕆᒃᑐᑦ ᐃᖅᑲᓇᐃᔭᖅᑎᐅᔪᑦ ᖁᓕᕇᖕᓂᒃᑯᑦ ᐊᔾᔨᒌᙱᑦᑐᓃᑦᑐ ᒪᓕᖃᑦᑕᙱᒻᒪᑕ ᐊᑐᐊᒐᕐᓂᒃ, ᐊᑐᖅᑕᐅᔭᕆᐊᓕᖕᓂᒃ ᐊᒻᒪᓗ ᒪᓕᒐᕐᓂᒃ,” ᐸᐃᑦᔅ ᐅᖃᓚᐅᖅᑐᖅ ᐊᐱᖅᓱᖅᑕᐅᑲᑕᒃᑎᓪᓗᒍ.

ᓲᕐᓗ ᐃᒪᓐᓇ, ᐅᖃᓚᐅᖅᑐᖅ ᑎᑎᖃᑦ ᐱᔭᐅᓯᒪᔭᕆᐊᖃᖃᑦᑕᖅᑐᑦ ᐱᐊᓂᒃᑕᐅᖃᑦᑕᙱᓗᐊᕐᒪᑕ ᐃᓄᓕᕆᔨᒃᑯᑦ ᐃᖅᑲᓇᐃᔭᖅᑎᖏᓐᓄᑦ.

“ᐅᓇ ᐊᑕᐅᓯᕐᓂᙶᑐᐃᓐᓇᙱᑦᑐᖅ,” ᐸᐃᑦᔅ ᐅᖃᖅᑐᖅ. “ᑕᑯᓯᒪᔭᕗᑦ ᑕᒪᐃᓐᓂᓕᒫᖅ ᐱᓕᕆᕝᕕᒋᔭᐅᔪᑎᒍᑦ.”

ᓇᓗᓇᐃᒃᑯᑎᒃᑲᓐᓂᕆᓚᐅᕐᒥᔭᖓ ᐸᐃᑦᔅ ᐃᒪᓐᓇ ᑕᒪᒃᑯᐊ ᐃᓚᒋᔭᐅᔪᑦ ᑐᓴᐅᒪᑎᑕᐅᙱᑦᑎᐊᕐᓂᖏᓐᓂᒃ ᐱᔪᓐᓇᐅᑎᖏᓐᓂᒃ ᐊᒻᒪᓗ ᑲᒪᒋᔭᖃᕈᑎᐅᓇᔭᖅᑐᑦ ᐋᖅᑭᒃᓱᖅᑕᐅᙱᓗᐊᕐᓂᖏᓐᓂᒃ ᑕᒪᓐᓇᓗ ᒪᓕᒐᒻᒪᕆᐅᓪᓗᓂ.

ᒪᑯᐊ ᑲᒪᒋᔭᖃᕐᓂᐊᕐᓂᖅᒧᑦ ᐸᕐᓇᐅᑎᒋᔭᐅᔪᑦ ᑎᑎᕋᖅᑕᐅᓯᒪᔪᑦ ᐊᖏᕈᑎᒋᔭᐅᓪᓗᑎᒃ ᐊᖓᔪᖅᑳᓄᑦ ᐊᒻᒪ ᐱᓕᕆᕝᕕᐅᔪᒧᑦ ᐋᖅᑭᒃᓯᓯᒪᔪᒥᒃ ᐸᕐᓇᐅᑎᓂᒃ ᑖᓐᓇ ᓱᕈᓯᖅ ᐅᓗᕆᐊᓇᙱᑦᑐᒦᑎᑦᑕᕆᐊᖃᕐᓂᖅᒧᑦ ᐅᕝᕙᓘᓐᓃᑦ ᐃᓚᒌᓂᒃ ᐃᑲᔪᖅᑕᐅᔭᕆᐊᓕᖕᓂᒃ, ᑭᓯᐊᓂᓕ ᐃᓱᒫᓘᑎᖃᓗᐊᖅᑰᔨᙱᒻᒪᑕ ᓱᕈᓰᑦ ᐅᓗᕆᐊᓇᙱᑦᑐᒦᑦᑕᕆᐊᖃᕐᓂᖏᓐᓂᒃ ᐊᒻᒪ ᖃᓄᐃᑎᑦᑕᐃᓕᔭᕆᐊᖃᕐᓂᖏᓐᓂᒃ.

ᐱᕕᖃᖅᑎᑦᑎᕙᖕᒪᑕ ᐃᓚᒌᑦ ᓈᒻᒪᙱᓕᐅᕈᑎᓂᒃ ᐋᖅᑭᒃᓱᐃᔪᓐᓇᖅᑎᑕᐅᓗᑎᒃ ᐃᖅᑲᖅᑐᐃᕕᒃᑰᓚᐅᙱᓐᓂᖏᓐᓂᒃ, ᐄᓕ ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᐅᖃᖅᓯᒪᔪᑦ.

ᐸᐃᑦᔅ ᐅᖃᓚᐅᖅᑐᖅ ᑎᑎᕋᖅᕕᖓ ᑐᓴᓚᐅᖃᑦᑕᕐᓂᕋᖅᖢᓂᐅᑦ ᐃᖅᑲᓇᐃᔭᖅᑎᑕᖃᙱᓗᐊᕐᓂᖅᒥᒃ, ᐊᒻᒪᓗ ᐃᖅᑲᓇᐃᔭᖅᑎᑕᖃᑦᑎᐊᕋᓗᐊᖅᑎᓪᓗᒋᑦ ᓱᓕ ᐊᑐᐊᒐᓂᒃ ᒪᓕᖃᑦᑕᙱᓗᐊᕐᒪᑕ.

ᐃᕚᓐ ᓇᐃᒍ, ᒥᓂᔅᑕᐅᑉ ᑐᒡᓕᖓ ᐃᓄᓕᕆᔨᒃᑯᓐᓄᑦ, ᐅᖃᓚᐅᕐᑐᖅ ᓈᒻᒪᙱᓕᐅᕈᑎᓂᒃ ᐱᑕᖃᖃᑦᑕᓗᐊᕐᓂᖓᓂᒃ ᐱᓕᕆᕝᕕᐅᔪᓂ ᒪᑯᓂᖓ ᐃᓚᖃᖅᖢᑎᒃ ᐃᖅᑲᓇᐃᔭᕈᓐᓃᖅᓴᕋᐃᑦᑐᓂᒃ ᐊᒻᒪᓗ ᐃᓄᓕᕆᔨᓄᑦ ᐱᔭᒃᓴᖅᑕᖃᐅᓗᐊᖃᑦᑕᕐᓂᐅᔪᖅ.

ᐅᖃᓚᐅᕐᒥᔪᖅ ᑕᒪᓐᓇ ᐱᕙᓪᓕᐊᔾᔪᑎᐅᓂᖅᓴᐅᓕᕐᓂᕋᖅᖢᓂᐅᒃ, ᓲᕐᓗ ᒪᐅᓇ ᐃᓚᒌᓄᑦ ᒪᒥᓴᕈᑎᓕᕆᕝᕕᖕᒥᑦ ᐊᒻᒪᓗ ᐋᖅᑭᒃᓱᐃᒃᑲᓐᓂᖅᖢᑎᒃ ᐊᐅᓚᑦᑎᔨᐅᔪᓂᒃ ᐊᒻᒪ ᐃᖅᑲᓇᐃᔭᖅᑎᓂᒃ ᐃᖅᑲᓇᐃᔮᒃᓴᐃᑦ ᐊᕕᒃᑐᖅᑕᐅᓂᕐᓴᐅᓂᖏᑦᑎᒍᑦ ᐊᒻᒪᓗ “ᓴᙱᒃᑎᕚᓕᖅᑎᑦᑎᓂᕐᒥᒃ ᑲᒪᒋᔭᖃᕐᓂᖅᒥᒃ’ ᐊᒻᒪ ᑐᓴᐅᒪᔾᔪᑎᑎᒍᑦ.

ᓄᑖᒥᒃ ᖃᓄᐃᓕᐅᖅᐸᓪᓕᐊᔾᔪᑎᓄᑦ ᑎᑎᕋᐅᓯᐅᕙᓪᓕᐊᔪᓄᑦ ᐋᖅᑭᒃᓱᐃᕝᕕᖃᓕᕐᓂᖅ, ᐊᒻᒪᓗ ᐱᓕᕆᔨᓂᒃ ᑕᒪᒃᑯᓂᖓ ᐱᓕᕆᐊᖃᕈᓐᓇᑦᑎᐊᖅᑐᓂᒃ ᐊᒻᒪᓗ ᓄᑖᒥᒃ ᐅᖄᓚᐅᑎᖃᓕᕐᓂᖅ ᓱᕈᓯᓕᕆᓂᖅᒧᑦ ᐅᖃᖅᕕᒃᓴᒥᒃ ᐱᐅᓯᕚᓕᕈᑎᐅᖕᒥᔪᑦ ᓇᐃᒍ ᓇᓗᓇᐃᓚᐅᖅᑕᖏᓐᓂ.

ᒪᐅᓇᓕ ᐋᖅᑭᒃᓱᐃᓇᓱᖃᑦᑕᕐᓂᒃᑯᑦ, ᐸᐃᑦᔅ ᐅᖃᓚᐅᖅᑐᖅ ᐃᓱᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ, ᐊᑐᓗᐊᖅᑐᓄᑦ ᒪᒥᓴᖅᕕᒃ, ᐊᒻᒪᓗ ᐱᓂᕐᓗᒃᓯᒪᓂᕐᒧᑦ ᐃᓅᓯᓕᕆᔭᐅᓂᖅ ᐊᒻᒪ ᐃᓱᒪᒋᔭᐅᔭᕆᐊᖃᕐᓂᕋᖅᖢᓂᐅᒃ, ᐊᒻᒪᓗ ᖃᖓᑲᓪᓚᖕᓂ ᖃᓄᐃᓕᐅᕈᑎᕕᓂᐅᓂᑯᓂᒃ ᐊᒻᒪᓗ “ᐊᓯᓕᒫᖏᑦ ᑕᒪᒃᑯᓄᖓ ᐊᒃᑐᐃᔾᔪᑎᐅᔪᓂᒃ” ᓱᕈᓯᕐᓂᒃ ᐋᓐᓂᖅᓱᐃᕆᕙᖕᓂᕐᒥᒃ ᐊᒻᒪ ᐃᒃᓯᖕᓇᖅᓯᓯᒪᖃᑦᑕᓗᐊᕐᓂᖅᒧᑦ.

ᐅᖃᓚᐅᕐᒥᔪᖅ ᐃᓚᒋᔭᐅᔪᑦ ᐊᒻᒪᓗ ᓄᓇᓕᖕᓃᑦᑐᑦ ᐃᓚᐅᑎᑕᐅᖃᑦᑕᕆᐊᖃᕐᓂᖏᓐᓂᒃ ᐊᒻᒪ ᐃᓱᒪᒋᔭᐅᕙᒡᓗᑎᒃ.

“ᐃᓚᒌᓂᒃ ᐊᕕᑎᑦᑎᑦᑕᐃᓕᓂᖅ ᓯᕗᓪᓕᐅᔭᕆᐊᖃᙱᑦᑐᖅ ᓄᑕᕋᐅᐃᑉ ᐃᓅᓯᖓᓂᒃ ᓴᐳᔾᔨᓯᒪᓇᓱᖕᓂᖅᒥᒃ ᐋᓐᓂᖅᓱᖅᑕᐅᕙᖕᓂᖅᒧᑦ,” ᐅᖃᖅᑐᖅ. “ᑭᓯᐊᓂᓕ ᑐᑭᖃᙱᑦᑐᖅ ᑖᒃᑯᐊ ᑲᒪᒋᔭᐅᔭᕆᐊᖃᓕᕐᓂᖏᓐᓂᒃ ᑐᑭᒧᐊᖅᑎᑦᑎᔨᒧᑦ.”

ᒪᓕᒃᖢᑎᒡᓕ ᐅᖃᐅᓯᐅᔪᕕᓂᕐᓂᒃ ᖃᐅᔨᓇᓱᒃᑎᓪᓗᒋᑦ, ᑖᒃᑯᐊ ᑲᑎᒪᔨᕋᓛᑦ ᐃᓱᒪᓕᐊᕆᔭᖏᓐᓂᒃ ᓴᖅᑭᑎᑦᑎᓛᖅᑐᑦ ᐅᑭᐊᒃᓵᖅ ᒪᓕᒐᓕᕆᕕᒡᔪᐊᖅᒧᑦ.

Share This Story

(0) Comments