ᔦᒥᔅ ᐯ ᐱᓇᓱᒐᖓ ᓄᓇᓕᓕᒫᒥᒃ ᓄᑦᑎᑎᓚᖀᓯᒪᔪᖅ

ᑌᓯ ᕼᐊᐅᔅ ᐊᖓᔪᕐᖄᕆᔭᐅᔪᖅ ᐊᓪᓚᓄᑦ ᓄᓇᓕᑐᖃᑦᓴᔭᓄᑦ ᓯᓵᓯᐱᒥᐅᓄᑦ. ᑲᒃᑲᓛᕌᐱᐅᓯᒪᔪᖅ ᓄᓇᓕᒃ ᓄᑦᑎᑎᕐᑕᐅᑎᓗᒍ ᒣᓚᓯᒃᑯᑦ ᕿᑭᕐᑕᖓᓂᑦ. (ᐊᑦᔨᓕᐅᕐᑐᕕᓂᖅ ᐊᓪᓓᑦ ᓄᓇᓕᑐᖃᑦᓴᔦᑦ ᓯᓵᓯᐱᒥᐅᑦ)

For an English version of this article, please see: Chisasibi: One village left behind following the JBNQA.

ᑌᓯ ᕼᐊᐅᔅ ᒥᑭᔫᑦᓱᓂ, ᐊᓇᕐᕋᓚᐅᕐᑐᕕᓂᖅ ᑕᑯᑦᓱᓂᓗ ᐊᖑᑎᓂᒃ ᐃᓪᓗᖓᑕ ᑐᖕᖓᕕᖓᓂᒃ ᑲᐅᑖᓗᒻᒧᑦ ᑲᑦᔪᑐᓂᒃ. ᐊᑯᓂᐅᖕᖏᑐᕐᓗ, ᐱᓇᓱᐊᓯᑦᓱᑎᒃ ᐊᓯᖏᓐᓂᒃ ᐃᓪᓗᕆᔭᐅᔪᓂᒃ ᕗᐊᑦ ᔪᐊᑦᔅ ᕿᑭᕐᑕᖓᓂ.

ᒥᑭᓗᐊᓚᐅᕐᓯᒪᔪᖅ ᓱᔪᖃᓕᕐᒪᖔᑦ ᖃᐅᔨᒪᑦᔭᒐᓂ ᓄᓇᓕᓕᒫᖓᑕ ᐸᕐᓀᑕᐅᓕᕐᓂᖓᓂᒃ ᐊᒻᒪᓗ ᓄᑦᑎᑎᕐᑎᑕᐅᓚᖓᓯᑦᓱᑎᒃ ᑰᑉ ᐊᑭᐊᓄᑦ 10 ᑭᓗᒥᑌᑦ ᓴᓂᐊᓂ ᐅᖓᓯᓐᓂᓕᒻᒥᒃ ᓯᕿᓂᖓᓃᑦᑐᒧᑦ ᓄᐃᕕᐊᕙᓯᖓᓂ ᓄᓇᒻᒪᕆᒻᒦᓱᓂ. 1979-ᒍᓚᐅᕐᓯᒪᔪᖅ ᐅᕝᕙᓘᓐᓃᑦ 1980-ᐅᑦᓴᕈᓂ.

“ᐃᓄᐃᑦ ᓱᓕ ᑖᑦᓱᒥᖓ ᐅᖄᕙᑦᑐᑦ,” ᓚᓚᐅᔫᖅ ᕼᐊᐅᔅ, ᑐᖓᓕᐊᓂ ᓂᕈᐊᕐᑕᐅᓯᒪᑦᓱᓂ ᐃᓕᒪᓕᕐᑐᖅ ᐊᖓᔪᕐᖃᐅᕕᒻᒥ ᐊᓪᓓᑦ ᓄᓇᓕᑐᖃᑦᓴᔭᔦᑦ ᑲᑎᒪᔨᖏᓐᓂ ᓯᓵᓯᐱᐅᑉ, ᓇᔪᕐᑕᖃᕐᓱᓂ ᓚ ᑲᕌᓐ ᑰᖓᓂ ᓴᓂᐊᓂ ᔦᒥᔅ ᐯᑉ ᑯᐯᒻᒦᑑᑉ.

“ᐃᒫ ᐅᖃᐅᓯᕆᔭᐅᒍᓐᓇᑐᖅ ᐱᐅᓯᕆᓕᕐᑕᕗᑦ, ᓇᓪᓕᒋᐅᑎᑦᓴᕋᓗᐊ-ᖀᓕᖕᖒᑎᓂᕐᒦᐸᑦᓱᑕ.”

ᓄᓇᓕᒃ ᓄᑦᑎᑎᕐᑎᑕᐅᓚᕿᓯᒪᔪᖅ ᑯᐯᑉ-ᐃᑯᒪᓐᓂᐊᑎᒃᑯᖏᑦ ᓴᓇᓚᐅᕐᓯᒪᒻᒪᑕ ᐊᖏᔪᐊᓗᒻᒥᒃ ᔦᒥᔅ ᐯᒥ ᐱᓇᓱᒐᕐᒥᒃ, ᐃᓚᒌᑦᑎᑐᓂᒃ ᑰᓐᓂᒃ ᓯᒥᑦᓯᓱᑎᒃ ᐊᒻᒪᓗ ᐃᑯᒪᐅᑎᖃᕐᑎᓯᐅᑎᓂᒃ. ᓯᕗᓂᐊᒍᑦ ᐃᓱᒫᓘᑎᐅᖃᑦᑕᓯᒪᔪᑦ ᓄᓇᖃᕐᖄᑐᕕᓃᑦ ᓄᓇᒥᓄᑦ ᐱᔪᓐᓇᐅᑎᖏᓐᓄᑦ ᐃᓕᖓᔪᑦ ᑖᑦᓱᒧᖓ ᐱᓇᓱᒐᕐᒧᑦ ᐊᑎᓕᐅᕈᑕᐅᓚᕿᓯᒪᒻᒪᑕ ᐊᖏᖃᑎᒌᒍᑎᒥᒃ 1975-ᒍᑎᓪᓗᒍ.

ᓄᑦᑎᑎᕐᑕᐅᓂᖏᑦ, ᐱᔭᕆᐊᑑᒍᓚᐅᕐᓯᒪᔪᑦ. 200 ᓴᓂᐊᓃᑦᑐᑦ ᐃᓪᓗᐃᑦ ᐃᒪᒃᑯᑦ ᐅᓯᒍᑎᑎᒍᑦ ᑰᑉ ᐊᑭᐊᓅᕐᑕᐅᖃᓚᐅᕐᓯᒪᔪᑦ, ᐃᓚᐅᑎᓗᒋᒃ ᐋᓐᓂᐊᓯᐅᑎᒃᑯᑦ ᐊᒻᒪᓗ ᐃᑦᓯᒐᕐᔪᐊᑦ ᑐᑦᓯᐊᕕᖁᑎᖓ. ᓄᑖᒥ ᓄᓇᑖᕆᔭᐅᔪᒥ, ᓴᓇᔭᐅᓚᐅᕐᓯᒪᔪᑦ ᓄᑖᑦ ᐳᕐᑐᓂᕐᓭᑦ ᖁᓕᖏᓐᓃᑐᑦ ᐃᓕᓴᕐᕕᖓ, ᓂᐅᕕᕐᕕᐊᓗᒃ, ᐊᖏᓕᑫᑦ ᑐᑦᓯᐊᕕᖓ, ᐊᑦᓴᓐ ᐯᒃᑯᑦ ᓂᐅᕕᕐᕕᖓ ᐊᒻᒪᓗ 100-ᒋᐊᓪᓓᑦ ᐃᓪᓗᐃᑦ ᐊᓇᕐᕋᕆᔭᐅᓚᖓᔪᑦ.

ᖁᓛᓃᑦᑐᒧᑦ ᐊᑦᔨᓕᐊᕆᔭᐅᓯᒪᔪᑦ ᑕᑯᑦᓴᐅᑎᑦᓯᔪᖅ ᕗᐊᑦ ᔪᐊᑦᔅ ᒣᓚᓯᒃᑯᑦ ᕿᑎᕐᑕᖓᓂᒃ ᐊᒻᒪᓗ ᑯᐯᒻᒥ ᓄᓇᓕᒋᓕᕐᑕᖓᓂᒃ ᓯᓵᓯᐱᐅᑉ (ᐊᑦᔨᓕᐊᕕᓂᖅ Google Earth-ᒧᑦ)

ᐊᕐᕌᒍᑦ ᓯᑕᒣᑐᕐᑐᑦ ᑕᓪᓕᒪᐅᔪᕐᑑᓈᕐᑎᑐᑦ ᐅᖓᑖᓄᑦ ᑌᑦᓱᒪᓂᓂᑦ, ᓯᓵᓯᐱ ᐱᕈᕐᐸᓕᐊᓯᒪᓂᓕᒃ 2,000-ᓂᑦ ᐃᑭᓐᓂᓴᕕᓂᐅᑦᓱᑎᒃ ᐃᓄᖏᑦ ᑌᑦᓱᒪᓂ 5,000 ᐅᖓᑖᓅᓕᕐᑐᑦ ᐅᓪᓗᒥ.

ᕼᐊᐅᔅ ᓚᓚᐅᔫᖅ ᐸᕐᓀᓯᒪᐅᑎᖃᓕᕐᑐᐃᒎᖅ ᒪᕐᕈᕕᓪᓗᐊᑎᓗᒍ ᐊᖏᓕᒋᐊᕐᑕᐅᓂᑦᓴᖓᓄᑦ 40-ᓂᒃ ᐃᓪᓗᐊᕈᓯᓕᒃ ᓯᓂᑦᑕᕕᒃ, ᓅᑖᕐᓗ ᓯᕗᓪᓕᐹᑦᓴᓃᑦᑐᑦ ᐊᒻᒪᓗ ᐳᕐᑐᓂᕐᓭᑦ ᖁᓕᖏᓐᓃᑐᑦ ᐃᓕᓴᕐᕕᒋᒃ ᐅᒃᑯᐃᓚᐅᔪᑦᓱᑎᒃ ᐊᕐᕌᓂ, ᐊᒻᒪᓗ ᑯᔩᑦ ᐊᓪᓓᑦ ᑲᑎᒪᔨᖏᑦ ᐃᓗᓯᓕᕆᓂᕐᓄᑦ ᐊᒻᒪᓗ ᐃᓅᓯᓕᕆᓂᕐᓄᑦ ᔦᒥᔅ ᐯᒥ ᓴᓇᒍᒪᓕᕐᓱᑎᒃ ᐊᖕᖏᐊᖏᔭᕐᕕᒥᒃ, ᓯᕗᓪᓕᐸᐅᓛᕐᑎᓗᒍ ᐊᓪᓓᑦ ᑯᔩᑦ ᓄᓇᖁᑎᖓᓂ.

“ᖃᓄᕐᓖ ᐊᖕᖏᐊᖏᔭᕈᓐᓇᑲᕕᑦ ᐅᖃᐅᓰᑦ ᐊᑐᕐᓗᒍ ᐅᖄᕐᖃᔭᖕᖏᑯᕕᑦ, ᖃᓪᓗᓈᑦ ᓄᓇᖓᓂ?” ᑌᒫᒃ ᐊᐱᕐᓱᓚᐅᔫᖅ.

ᑭᓯᐊᓂ ᓄᑦᑎᑎᕐᓂᐅᓯᒪᔪᖅ ᐊᓯᑦᔨᑐᕐᓂᖃᕐᑎᓯᓯᒪᒻᒥᔪᖅ ᐅᓪᓗᒥ ᓱᓕ ᐃᑉᐱᒋᔭᐅᔪᓂᒃ.

ᑖᓐᓇᑑᒐᓂᓗ, ᑰᒃ ᓯᑯᓪᓚᕆᓲᒍᒍᓐᓀᑐᖅ ᐃᖏᕐᕋᓂᕐᒧᑦ ᑌᒣᑕᐅᓚᕿᑦᓱᓂ. ᐃᒣᓪᓗᐊᓚᑳᓕᕐᒪᑦ ᓅᕕᒻᐸ ᐱᒋᐊᕐᐸᓕᐊᑎᓗᒍ ᑎᑭᑦᓱᒍ ᒣ, ᐃᑳᕐᑐᕋᐅᑎᒃ ᑌᒣᓪᓗᐊᓕᕐᒪᑦ ᐃᖏᕐᕋᓲᒍᖕᖏᑐᖅ ᓄᕐᖃᖓᑦᓱᓂ, ᕿᑭᕐᑕᓕᐊᕆᐊᖅ ᐱᔭᕐᓃᑑᕙᑦᑐᖅ.

ᑐᖕᖓᓱᖁᔨᐅᑎᒃ ᑕᑯᑦᓴᐅᑎᑦᓯᔪᖅ ᓯᓵᓯᐱᒧᑦ ᑎᑭᑦᑐᓂᒃ, ᓇᔪᕐᑕᖓ ᓚᑲᕌᓐ ᑰᖓ ᑯᐯᒻᒥ (ᐊᑦᔨᓕᐅᕐᑐᕕᓂᖅ ᐊᓪᓓᑦ ᓄᓇᓕᑐᖃᑦᓴᔦᑦ ᓯᓵᓯᐱᒥᐅᑦ)

“ᖃᐅᔨᒪᖕᖏᑐᖓ ᑭᓇᒃᑯᒋᐊᓪᓓᑦ ᓯᓚᕐᔪᐊᒥ ᓯᑕᒪᐅᔪᕐᑐᓂᒃ ᑰᓐᓂᒃ ᓯᒥᑦᓯᓯᒪᐅᑎᑕᖃᕐᒪᖔᑕ ᐱᐅᓯᑐᖃᕐᑎᒍᑦ ᓄᓇᑐᖃᕐᒥᓂ,” ᓚᓚᐅᔫᖅ ᕼᐊᐅᔅ. “ᐱᑕᖃᕐᑐᒍᑦ 11-ᓂᒃ ᑰᓐᓂᒃ ᓯᒥᑦᓯᓯᒪᒍᑎᓂᒃ [ᐃᑦᓰ ᔦᒥᔅ ᐯᑉ ᒧᓂᓯᐹᓕᑎᖓᓂ] ᑕᕝᕙᓂᑐᐊᖅ, ᐊᓪᓓᑦ ᑯᔩᑦ ᓄᓇᖁᑎᖓᓂ. ᐄᔫ ᐃᑦᓰᑦ ᑌᒣᓪᓗᐊᑲᓵᑦᑐᖅ ᐊᖏᓂᖓᑕ ᕗᔮᓐᔅ ᐅᐃᒍᐃᑦ ᓄᓇᖓᓂᑦ, ᓄᓇᖁᑎᓕᒫᕗᑦ.”

ᐊᒻᒪᓗ ᐊᒥᓱᑦ ᐊᓪᓓᑦ ᐃᖃᓗᑦᓯᐅᕕᖃᓲᒍᒍᓐᓀᓱᑎᒃ ᓚ ᑲᕌᓐ ᑰᖓᓂ, ᓚᓚᐅᔫᖅ ᕈᑕᕆᒃ ᐸᑦᓵᓄ, ᓄᓇᓕᓐᓂ ᐊᖓᔪᕐᖄᒍᓯᒪᔪᖅ ᐃᑲᔪᕐᓯᒪᑦᓱᓂ ᐊᖏᖃᑎᒌᒍᑕᐅᒐᓱᐊᕐᑎᓗᒍ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᒃ ᐱᑦᔪᑎᐅᑎᓗᒋᑦ ᐊᓪᓓᑦ ᑯᔩᑦ ᓄᓇᓕᑐᖃᑦᓴᔦᑦ.

ᑌᒣᑦᓭᓇᕈᓐᓀᑐᑦ ᐃᖏᕐᕋᓃᑦ ᖃᓄᐃᓕᖕᙰᓯᒪᓕᕐᑐᑦ ᐊᕙᑎᒥᒃ ᐊᒻᒪᓗ ᐆᒪᔪᓂᒃ; ᐃᒪᖅ ᑲᑭᐊᑦᑑᔭᒍᓐᓀᑐᖅ, ᐊᒻᒪᓗ ᐃᖃᓗᐃᑦ ᐃᓚᖏᑦ ᐊᔪᒉᑦᑐᓂᒃ ᑕᕐᓯᓯᒪᕙᓕᕐᓱᑎᒃ, ᑎᓪᓘᔭᕐᑑᔮᕐᓱᑎᒃ. ᐸᑦᓵᓄ ᑐᑭᓯᑎᑦᓯᓚᐅᔫᖅ ᑌᒣᓚᕿᓯᒪᓂᖏᓐᓂᒃ ᐃᒪᐅᑉ ᒥᐅᑯᔨᒥᒃ ᐱᑕᖃᓕᕐᓂᖓᓄᑦ.

ᓄᑦᑎᑎᕐᑎᑕᐅᓯᒪᓂᐅᑉ ᓯᑯᑦᓴᔭᖁᑎᖏᑦ ᑐᕐᖁᑐᐃᓐᓇᓱᒋᑦ ᐳᐃᒍᕐᑕᐅᓯᒪᖕᖏᑐᑦ.

“ᐳᐃᒍᕐᓴᐅᓚᖓᖕᖏᑐᖅ,” ᐸᑦᓵᓄ ᓚᓚᐅᕐᑐᖅ. “ᐃᓱᒪᓇᕐᑐᖅ ᓱᔭᐅᓯᒪᕙᑦ ᐊᓯᖏᑦ ᖃᓄᐃᑦᑐᑐᐃᓐᓀᑦ ᐃᓄᐃᑦ ᓯᓚᕐᔪᐊᒥ, ᐳᐃᒍᕈᒪᒐᓗᐊᕐᓱᑎᒃ, ᑭᓯᐊᓂ ᐃᓚᖓᓐᓂ ᐳᐃᒍᕐᓴᐅᖏᑦᑐᒥᒃ ᐊᑑᑎᓲᑦ.

“ᐃᓚᖓᓐᓂ, ᐱᐅᓂᕐᓴᐅᓲᒍᑦᓱᓂ ᐳᐃᒍᕐᑌᓕᒋᐊᒥᒃ.”

This project has been made possible in part by the Government of Canada.