ᓄᓇᓕᐸᐅᔭᐃᑦ ᑲᑎᒪᔨᖏᑦ ᐃᓱᒪᒋᔭᖃᖅᑐᑦ ᐃᒡᓗᖃᕐᕕᒃᓴᓂ ᐊᖅᓴᕐᓃᑦ ᑐᔪᕐᒥᕕᐅᑉ ᖃᓂᒋᔭᖓᓂ

For English version, see City of Iqaluit considers new subdivision near Inuit lands, Aqsarniit hotel

ᐃᖃᓗᐃᑦ ᓄᓇᓕᐸᐅᔭᖓ ᐃᓱᒪᒋᔭᖃᓕᕐᑐᑦ ᓄᑖᒥ ᐃᒡᓗᓕᐅᕐᕕᐅᓂᐊᖅᑐᒥ ᐅᑯᓄᖓ ᐋᖅᑭᒃᑕᐅᓂᐊᕐᓗᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᖅᓴᕐᓃᑦ ᑐᔪᕐᒥᕕᐅᑉ ᖃᓂᒋᔭᖓᓂ.

ᒫᑎᐅ ᑖᑦᔅ, ᐃᖃᓗᖕᓂ ᑐᑭᒧᐊᖅᑎᑦᑎᔨ ᐸᕐᓇᐃᓂᕐᒧᑦ ᐊᒻᒪ ᐱᕙᓪᓕᐊᔪᓕᕆᓂᕐᒧᑦ, ᑐᒃᓯᕋᐅᑎᓂ ᑐᓂᓯᓚᐅᕐᑐᖅ ᐱᓇᓱᐊᕈᓯᐅᓚᐅᕐᑐᒥ ᐸᕐᓇᐃᔨᒃᑯᑦ ᐊᒻᒪ ᐱᕙᓪᓕᐊᔪᓕᕆᔨᒃᑯᑦ ᑲᑎᒪᑎᓪᓗᒋᑦ.

ᐅᖃᖅᖢᓂᓗ ᑲᑎᒪᔩᑦ ᓯᕗᓂᐊᓂ ᓂᕈᐊᓚᐅᕐᓯᒪᓂᖏᓐᓂᒃ ᑖᔅᓱᒥᖓ ᐃᒡᓗᓕᐅᕐᕕᒃᓴᓂ 2022-ᖑᑎᓪᓗᒍ, ᑭᓯᐊᓂᓕ ᓄᑖᓂ ᐃᓱᒪᒋᔭᕆᐊᓕᖕᓂ ᓴᖅᑭᑦᑐᖃᕐᓯᒪᓕᕐᒪᑦ.

ᐃᓚᖃᖅᖢᓂ ᐃᖃᓗᐃᑦ ᑮᓇᐅᔭᓂ ᒐᕙᒪᑐᖃᒃᑯᓐᓂ ᐃᒡᓗᓂ ᐃᑲᔪᕈᑎᒃᓴᓂ ᑐᓂᔭᐅᓯᒪᓪᓗᑎᑦ ᑕᒪᓐᓇ ᐅᑭᐅᖅ ᐱᒋᐊᕐᓯᒪᓕᖅᑎᓪᓗᒍ, ᖃᐅᔨᓴᖅᓯᒪᓪᓗᑎᒃ ᓄᓇᓯᐅᑎᓄᑦ ᐃᖏᕐᕋᕝᕕᐅᕙᖕᓂᐊᖅᑐᓂ ᐃᓄᒃᓱᒃ ᐃᓕᓐᓂᐊᕐᕕᐊᓘᑉ ᖃᓂᒋᔭᖓᓂᒃ ᐊᒻᒪ ᐊᓯᖏᓐᓂ ᐃᒡᓗᓂ ᓄᑖᙳᕆᐊᖅᑎᑦᑎᔾᔪᑎᒃᓴᓂ.

ᐃᓚᖓ ᐃᓱᒪᒋᔭᐅᔾᔪᑎᐅᓚᐅᕐᒥᔪᖅ ᓄᑖᒥ ᐃᒡᓗᓕᐅᕐᕕᒃᓴᖅ ᐃᓚᖃᕋᔭᕐᓂᖓᓂᒃ ᓄᓇᑖ ᐊᖅᑯᑎᓕᐅᕐᓗᑎᒃ ᓄᓇᓯᐅᑏᑦ ᐃᖏᕐᕋᕝᕕᖃᐅᕐᓂᕐᓴᐅᔪᓐᓇᕐᓗᑎᒃ ᐅᑯᓇᙶᖅᑐᓂ ᑲᖏᖅ ᐊᑐᕆᐊᖅᒥᑦ ᐊᒻᒪ ᐃᓂᖅᒥ ᑕᐃᒪᓐᓇᓗ ᓄᓇᓯᐅᑏ ᓄᖃᑲᑕᙱᓐᓂᕐᓴᐅᔪᓐᓇᕐᓗᑎᒃ.

ᑲᑎᒪᔨ ᑲᐃᐅᓪ ᓴᐳᑦ ᑲᑎᒪᔨᑐᐊᖑᓚᐅᕐᑐᖅ ᐅᖃᐅᓯᖃᖅᖢᓂ ᑐᒃᓯᕋᐅᓯᐊᒥ ᑲᑎᒪᑎᓪᓗᒋᑦ.

ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᓄᓇᓕᐸᐅᔭᐃᑦ “ᑕᒪᑐᒥᖓ ᐱᓕᕆᐊᖃᑲᐅᖅᑐᕐᓗᑎᒃ ᐊᔪᕐᓇᕈᓐᓃᑐᐊᖅᐸᑦ,” ᖃᐅᔨᓴᓂᐅᔪᖅ ᐱᐊᓂᒃᑕᐅᓗᓂ ᐊᒻᒪᓗ ᐱᕙᓪᓕᐊᔨᐅᓂᐊᖅᑐᒥ ᐋᔩᖃᑎᖃᖅᐸᓪᓕᐊᓕᕐᓗᑎᒃ.

ᐅᖃᓚᐅᕐᒥᔪᖅ ᓄᓇᓕᐸᐅᔭᐃᑦ ᐃᑲᔪᖅᑕᐅᔭᕆᐊᖃᕐᓂᐊᕐᓂᖏᓐᓂᒃ ᒪᑯᐊ ᐱᔨᑦᑎᕋᐅᑎᖏᑦ ᓲᕐᓗ ᖃᑦᑎᕆᔨᒃᑯᑦ ᐊᒻᒪ ᐃᒥᖅᑕᕐᕕᓕᕆᔨᒃᑯᑦ ᓈᒻᒪᒐᔭᕆᐊᒃᓴᖏᓐᓂ ᐱᕈᖅᐸᓪᓕᐊᓂᕐᒧᑦ.

“ᐊᕐᕌᒍᓂ ᐊᒡᒋᖅᑐᓂᒃ ᑕᑯᑐᐃᓐᓇᕆᐊᖃᕋᑦᑕ 1,000-ᓂ ᐅᖓᑖᓂᓪᓘᓐᓃᑦ ᓄᑖᓂ ᐃᒡᓗᒃᓴᐅᓂᐊᖅᑐᓂ ᓄᓇᑦᑎᓐᓂ, ᐊᒻᒪᓗ ᑐᓴᑲᑕᓗᐊᙱᖢᑕ ᐊᓯᖏᓐᓂ ᐃᑲᔪᕋᔭᖅᑐᓂ ᐱᕈᖅᐸᓪᓕᐊᓂᕐᒥᒃ,” ᓴᐳᑦ ᐅᖃᕐᑐᖅ.

“ᐃᓄᐃᑦ ᑲᑐᔾᔨᖃᑎᒌᖏᓪᓘᓐᓃᑦ, ᐃᒻᒥᒃᑰᖓᔪᑦ ᓴᓇᔨᐅᕙᒃᑐᑦ, ᓄᓇᕗᒥᑦ ᒐᕙᒪᒃᑯᑦ ᐅᕝᕙᓘᓐᓃᑦ ᓄᓇᕗᒥᑦ ᐃᒡᓗᓕᕆᔨᕐᔪᐊᑯᓐᓂ, ᐃᑲᔪᖅᑕᐅᔭᕆᐊᖃᕐᓂᐊᕋᑦᑕ ᓈᒻᒪᑐᓂ ᐱᔨᑦᑎᕋᐅᑎᖃᖅᑎᑦᑎᓂᕐᒥ ᐃᒡᓗᓕᐅᕐᕕᐅᓂᐊᖅᑐᑦ.”

ᑲᑎᒪᔨᐅᔪᑦ ᓂᕈᐊᓚᐅᕐᑐᑦ 6-0 ᐱᒋᐊᖅᐸᓪᓕᐊᖁᔨᓕᖅᖢᑎᒃ ᐱᓕᕆᐊᒃᓴᒥ. ᑲᑎᒪᔨ ᕈᒦᓐ ᓯᑏᕙᓐᓴᓐ ᐊᒻᒪ ᕼᐃᐅᕆ ᕕᓕᐅᕋᑎ ᓂᕈᐊᓚᐅᙱᑦᑑᒃ ᓇᓗᓇᐃᖅᖢᑎᒃ ᐅᖃᐅᓯᐅᔪᓄᑦ ᐊᒃᑐᐊᓂᖃᓗᐊᕐᓂᖏᓐᓂᒃ.

ᐅᓇ ᐱᓕᕆᓂᒃᓴᖅ ᐃᓚᖃᖅᑐᖅ ᓄᓇᓕᐸᐅᔭᐃᑦ ᐃᖅᑲᓇᐃᔭᖅᑎᖏᑦ ᐸᕐᓇᑎᑕᐅᓗᑎᑦ ᑐᑭᓯᖃᑦᑕᐅᑎᔾᔪᑎᒃᓴᒥ ᐅᑯᐊᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏ ᒪᑯᓄᖓ ᐸᕐᓇᐅᓯᐅᕐᓂᕐᒧᑦ ᐊᒻᒪ ᓴᓇᕙᓪᓕᐊᓂᕐᒧᑦ, ᓄᓇᓕᖕᓂ ᖃᐅᔨᓇᓱᑲᑕᒡᓗᑎᒃ, ᑎᑎᕋᕐᓗᑎᒃ ᐱᒋᐊᕈᑎᓂ ᓇᖕᒥᓂᕆᔭᐅᔪᒥ ᓄᓇᒥ ᓴᓇᓂᕐᒧᑦ ᐊᖏᖃᑎᒌᒍᑎᓂ ᐅᑯᐊᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏ ᐊᒻᒪᓗ ᐋᖅᑭᒃᓱᐃᕙᓪᓕᐊᓗᓂ ᓄᓇᐅᑉ ᖃᓄᐃᓕᖓᓂᐊᕐᓂᖓᓄᑦ ᒪᓕᒐᕋᓚᒥ ᑲᑎᒪᔨᓄ ᐃᓱᒪᒃᓴᖅᓯᐅᕈᑎᐅᓂᐊᖅᑐᒥ.

ᑕᒪᓐᓇ ᐃᒡᓗᒃᓴᖃᕐᕕᐅᔪᒪᔪᖅ ᐃᓄᐃᑦ ᓇᖕᒥᓂᖅ ᓄᓇᖓᓂ ᐃᓱᖃᕐᓯᒪᖕᒪᑕ, ᑕᐃᒪᓐᓇᓗ ᓄᓇᓕᐸᐅᔭᐃᑦ ᐊᑎᓕᐅᕆᐊᖃᕐᓂᐊᖅᖢᑎᒃ ᐊᖏᖃᑎᒌᒍᑎᒥ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓪᓗ ᓇᓗᓇᐃᕐᓯᒪᓗᑎᒃ ᑲᒪᒋᔭᐅᓂᐊᖅᑐᓂᒃ ᒪᑯᓂᖓ ᐊᑐᕆᐊᒃᓴᓂᒃ ᐊᒻᒪ ᐃᒡᓗᓕᐅᕋᔭᖅᑐᓂᒃ, ᐸᕐᓇᐅᓯᐅᕐᓂᕐᒧᑦ ᐊᒻᒪ ᐱᕙᓪᓕᐊᓂᕐᒧᑦ ᖃᓄᐃᓕᐅᕈᑎᒃᓴᓂᒃ, ᐅᖃᕐᑐᖅ ᐊᓚᒃᓯ ᑳᒧᕋᓐ, ᓄᓇᓕᐸᐅᔭᓄᑦ ᐅᖃᖅᑎᒋᔭᐅᔪᖅ.

ᓄᓇᓕᖕᓂ ᐃᓚᐅᑎᑦᑎᓂᖅ ᐊᒻᒪᓗ ᑐᑭᓯᖃᑦᑕᐅᑎᓂᕐᒧᑦ ᐊᖏᕈᑎᒃᓴᖅ ᑲᑎᒪᔨᕋᓛᓄᑦ ᑲᑎᒪᔨᓄᓪᓗ ᕿᒥᕐᕈᐊᖅᑕᐅᓛᖅᑐᖅ, ᑳᒧᕋᓐ ᐅᖃᕐᑐᖅ.