ᖃᓄᐃᓕᐅᖁᔭᐅᔾᔪᑎ ᑲᒥᓴᓐ ᓈᒻᒪᙱᓕᐅᕈᑎᓂ ᓇᓂᓯᔾᔪᑎᐅᔪᖅ ᐸᓖᓯᒃᑯᑦ ᕿᐱᓘᑎᓂᒃ ᐱᓕᕆᔾᔪᓯᖏᓐᓂᒃ

For English version, see Commission finds long list of problems with Nunavut RCMP’s public complaint process

ᖃᓄᐃᓕᐅᖁᔭᐅᔾᔪᑎ ᑲᒥᓴ ᖃᐅᔨᓴᕈᑎᐅᔪᖅ ᓄᓇᕗᒥᑦ ᐸᓖᓯᓄᑦ ᕿᐱᓘᑎᒋᔭᐅᔪᓂ ᐱᓕᕆᔾᔪᓯᖓᓂ ᖃᐅᔨᔾᔪᑎᐅᓕᓚᐅᕐᑐᖅ ᐊᑯᓂᓗᐊᕌᓗᒃ ᕿᐱᓘᑎᓂ ᖃᐅᔨᓴᖃᑦᑕᙱᓐᓂᖏᓐᓂᒃ ᐊᒻᒪᓗ ᕿᐱᓘᑎᑦ ᓲᕐᓗ ᐱᖓᓱᓂ ᒫᕐᕈᐃᑦ “ᐊᑐᙱᓗᐊᕐᓂᖏᓐᓂ ᐃᓱᒪᒋᔭᐅᓯᒪᓪᓗᑎᒃ” ᓲᖃᐃᒻᒪ ᐅᖃᐅᓯᐅᓯᒪᔪᑦ ᐃᓚᑰᓂᕋᖅᑕᐅᓯᒪᓪᓗᑎᒃ.

ᐃᓚᖏᓐᓂᓪᓕ ᐱᓕᕆᐊᒃᓴᐅᔪᓂ ᐊᕐᕌᒍᓂ ᐱᖓᓱᓂ ᑕᓪᓕᒪᓄ ᐱᐊᓂᒃᑕᐅᓇᓱᖃᑦᑕᓚᐅᕐᑐᑦ ᕿᐱᓘᑎᒋᔭᐅᔪᑦ ᖃᐅᔨᓴᖅᑕᐅᓪᓗᑎᒃ.

ᕿᒥᕐᕈᐊᕈᑎᐅᕙᒃᑐᑦ ᐊᒻᒪ ᕿᐱᓘᑎᓄᑦ ᑲᒥᓴᓐ (Civilian Review and Complaints Commission) ᓄᕕᐱᕆ  28-ᒥ ᓴᖅᑭᑦᑎᓚᐅᕐᑐᑦ ᐊᕐᕌᒍᓂ ᑎᓴᒪᓂ ᖃᐅᔨᓴᕈᑎᒋᔭᖏᓐᓂᒃ ᐊᒻᒪᓗ ᓇᓗᓇᐃᔭᐃᓪᓗᑎᒃ 14-ᓂ ᓈᒻᒪᙱᓕᐅᕈᑎᓂᒃ ᕿᐱᓘᑎᓄᑦ ᐱᓕᕆᔾᔪᓯᖏᓐᓂᒃ.

“ᑲᒥᓴᓐ ᐱᔭᒃᓴᖃᕐᒪᑕ ᐱᓕᕆᖃᑎᖃᕐᐸᒡᓗᑎᒃ ᓄᓇᕗᒥᑦ ᐱᓕᕆᖃᑎᖏᓐᓂᒃ ᑭᒃᑯᓕᒫᓂ ᖃᐅᔨᑎᑦᑎᓯᒪᓂᕐᒥ ᓄᓇᖃᖅᑐᓂᒃ ᐱᔪᓐᓇᐅᑎᖏᓐᓂᒃ, ᕿᐱᓘᑎᓂ ᐅᖃᐅᓯᖃᕈᓐᓇᕐᓗᑎ ᐸᓖᓯᒃᑯᑦ ᖃᓄᐃᓕᐅᕈᓯᖏᓐᓂᒃ,” ᐃᒃᓯᕙᐅᑕᖅ ᒥᓯᓕᓐ ᓚᕼᐃ ᐅᖃᓚᐅᕐᑐᖅ ᐅᓂᒃᑳᓂ.

ᐅᓇ ᑲᒥᓴ ᐃᒻᒥᒃᑰᖓᓪᓗᓂ ᑲᑐᔾᔨᖃᑎᒌᖑᔪᖅ ᕿᒥᕐᕈᐊᖅᐸᒃᖢᑎᒃ ᕿᐱᓘᑎᒋᔭᐅᔪᓂᒃ ᐸᓖᓯᓄᑦ ᑕᒪᒃᑯᐊᓗ ᐱᓕᕆᐊᕆᔭᐅᕙᒡᓗᓂ ᐊᔾᔨᒌᒃᑎᑦᑎᖃᑦᑕᕐᓂᒃᑯᑦ.

ᓄᓇᕗᒥᑦ ᐸᓖᓯᒃᑯᑦ ᒥᒃᓵᓄᑦ ᐅᓂᒃᑳᓕᐊᖑᔪᑦ ᖃᐅᔨᔾᔪᑎᐅᓚᐅᕐᑐᑦ ᐃᒪᓐᓇ:

• ᐃᓚᖏᑦ ᐃᓄᖕᓄᑦ ᕿᐱᓘᑎᒋᔭᐅᔪᑦ ᐊᕐᕌᒎᖕᓂ ᒪᕐᕈᑲᓵᖕᓂ ᐱᓕᕆᐊᕆᔭᐅᓕᖃᑦᑕᕐᓂᖏᓐᓂ ᑖᓐᓇ ᕿᐱᓘᑎᒋᔭᐅᔪᑦ ᐅᖃᐅᓯᐅᓚᐅᖅᑎᓪᓗᒍ;
• ᑭᖑᕙᕐᓯᒪᔾᔪᑎᓂ ᑎᑎᕋᐅᓯᖃᖃᑦᑕᓗᐊᙱᖢᑎᒃ, ᐅᓪᓗᕐᓂᓪᓘᓐᓃᑦ 90 ᐅᖓᑖᓂ ᐱᓕᕆᐊᖑᓯᒪᙱᓐᓂᖏᑦ ᑎᑎᕋᐅᓯᐅᖃᑦᑕᕆᐊᖃᖅᖢᑎᒃ ᑕᖅᑭᑕᒫᑦ;
• ᒪᑯᓇᙵᑦ ᓲᕐᓗ ᐱᖓᓱᓂ ᒫᕐᕉᒃ ᕿᐱᓘᑏᒃ ᐊᑐᕈᓐᓃᖅᑎᑕᐅᓯᒪᓚᐅᕐᑐᑦ ᐅᕝᕙᓘᓐᓃᑦ ᑲᒪᒋᔭᐅᓂᑰᓪᓗᑎ ᑕᐃᒪᓐᓇᒥᐊᖅ — ᐳᓴᓐᑎᑎᒍᑦ ᖁᑦᑎᖕᓂᕐᓴᖅ ᑲᓇᑕᒥ ᐊᓯᐊᓃᑦᑐᓂᒃ: ᓄᓇᕗᒥᑦ ᕿᐱᓘᑎᓂ ᐊᑐᕈᓐᓃᖅᑎᑦᑎᓂᖅ ᒫᓃᒻᒪ 27 ᐳᓴᓐᑎᒥ; ᑲᓇᑕᒥᓪᓕ ᒫᓃᓐᓂᕐᓴᐅᕙᒃᖢᑎ 11 ᐳᓴᓐᑎᒥ;
• ᖃᓄᐃᓕᐅᕈᑎᐅᓂᑰᓂᕋᖅᑕᐅᔪᑦ ᖃᐅᔨᓴᖅᑕᐅᖃᑦᑕᓚᐅᙱᑦᑐᑦ ᐅᕝᕙᓘᓐᓃᑦ ᕿᒥᕐᕈᐊᖅᑕᐅᙱᖢᑎᒃ ᕿᐱᓘᑎᒋᔭᐅᔪᖅ ᕿᐱᓘᑎᖃᕐᑐᒧ ᐲᖅᑕᐅᖁᔭᐅᑐᐃᓐᓇᕌᖓᑕ.

ᐅᓂᒃᑳᓕᐊᕆᔭᐅᔪᖅ ᖃᐅᔨᓴᕈᑎᐅᓚᐅᕐᑐᖅ 75-ᓂ ᕿᐱᓘᑎᓂᒃ ᐅᖃᐅᓯᐅᓯᒪᔪᓂᒃ ᐊᐃᕆᓕ 1, 2018-ᒥ ᑎᑭᖢᒍ ᒫᔅᓯ 31, 2022 — ᑖᓐᓇᓗ ᖃᔅᓯᐅᓂᖓ ᐊᑦᑎᖕᓂᕐᓴᐅᓪᓗᓂ ᐃᓱᒪᒋᔭᐅᓚᐅᕐᑐᒥ. ᐅᓇ ᐱᔾᔪᑎᖃᓗᐊᓚᐅᕐᑐᖅ ᐃᓄᐃᑦ ᑕᒪᑐᒧᖓ ᐅᒃᐱᕈᓱᓗᐊᙱᓐᓂᖏᓐᓂ ᐊᒻᒪ ᖃᐅᔨᒪᙱᓗᐊᕐᓂᖏᓐᓄᑦ ᕿᐱᓘᑎᓂ ᐱᓕᕆᔾᔪᓯᐅᕙᒃᑐᒥ.

ᑕᒪᑐᒥᖓ ᐅᒃᐱᕈᓱᒍᓐᓇᖅᓯᑎᑦᑎᓇᓱᒡᓗᓂ ᐱᓕᕆᔾᔪᓯᕐᒥ ᐅᑯᐊ ᑲᒥᓴᓐᑯᑦ ᐃᓱᒪᓕᐅᕆᓚᐅᕐᑐᑦ ᐊᑐᖁᔨᓪᓗᑎ ᐃᓄᖕᓂ ᐸᓖᓯᓂ ᕿᐱᓘᑎᓂ ᖃᐅᔨᓴᖃᑦᑕᕐᓂᐊᖅᑐᓂᒃ ᐃᓄᖕᓂᙶᖅᑐᓂᒃ.

ᐸᓖᓯᒃᑯᑦ ᐱᓕᕆᓂᕐᓴᐅᔭᕆᐊᖃᕐᑐᑦ ᕿᐱᓘᑎᒋᔭᐅᕙᒃᑐᓂᒃ ᐱᓕᕆᐊᖃᖃᑦᑕᕐᓂᕐᒥ ᐃᓄᓅᖓᓗᐊᕐᑐᓂᒃ, ᑲᒥᓴᓐ ᐅᖃᕐᓯᒪᔪᖅ.

“ᒫᓐᓇ ᐱᓕᕆᔾᔪᓯ ᐅᑭᐅᕐᑕᖅᑐᕐᒥ ᐊᔾᔨᖃᑐᐃᓐᓇᕐᒪᑦ ᖃᓪᓗᓈᓃᑦᑐᑎᑐᑦ, ᐃᓱᒪᒋᔭᖃᖅᖢᑎᒡᓗ ᓄᓇᓖᑦ ᐱᓕᕆᔾᔪᓯᕐᒥ ᒪᓕᒐᔭᕐᓂᖏᓐᓂᒃ,” ᐅᖃᕐᓯᒪᔪᖅ.

ᑲᒥᓴᓐ ᖃᐅᔨᓕᓚᐅᕐᙵᒧᑦ ᑎᑎᖃᑦ ᓇᒡᓯᐅᔾᔭᐅᕙᒃᑐᑦ ᕿᐱᓘᑎᖃᖅᑐᕕᓂᕐᓄ ᖃᓄᐃᓕᐅᕈᑎᖃᕈᑎᐅᓂᖏᓐᓂ “ᐅᖃᐅᓯᖃᑦᑎᐊᖃᑦᑕᓚᐅᙱᑦᑐᑦ ᖃᓄᐃᓕᐅᕈᑎᐅᓕᕐᑐᓂᒃ ᐊᒻᒪᓗ ᑐᓴᒐᒃᓴᖃᓗᐊᖅᐸᙱᖢᑎᒃ.”

ᐅᓂᒃᑳᓕᐊᖑᓯᒪᔪᖅ ᐅᖃᕐᓯᒪᓚᐅᕐᒥᔪᖅ ᐃᓄᐃᑦ ᖃᐅᔨᒪᙱᓗᐊᕐᓂᖏᓐᓂᒃ ᕿᐱᓘᑎᓕᕆᔾᔪᓯᕐᒥ, ᑕᒪᓐᓇᓗ ᑐᓴᐅᒪᔾᔪᑎᐅᓇᓱᒃᓯᒪᒐᓗᐊᖅᖢᓂ ᐅᖃᓕᒫᒐᕋᓚᑎᒍᑦ ᐊᒻᒪ ᐊᑭᓐᓇᕐᒥᐅᑕᑎᒍᑦ ᐃᓄᒃᑎᑑᖓᔪᓂᒃ.

ᐅᓂᒃᑳᖅ ᐅᖃᕐᓯᒪᔪᖅ ᐊᑐᐊᒐᖅᑕᖃᕆᐊᖃᕐᓂᖓᓂ ᖃᓄᖅ ᓄᓇᕗᒥᑦ ᐸᓖᓯᒃᑯᑦ ᐊᔾᔨᒋᔭᐅᙱᓐᓂᖏᓐᓂᒃ ᐊᓯᖏᓐᓂ ᐸᓕᓯᖃᕐᕕᐅᔪᓂᒃ, ᐃᓚᖃᖅᖢᓂ ᐊᖏᓂᖓ ᓄᓇᕗᑦ ᐊᒻᒪᓗ ᐃᓄᐃᑦ ᐅᓄᓛᖑᕙᒃᖢᑎᒃ ᓄᓇᓕᖕᓂ.

ᓄᑖᑦ ᐸᓖᓯᑦ “ᐊᔪᕈᓐᓃᖅᓴᖅᑎᑕᐅᕙᙱᒻᒪᑕ ᐃᓕᖅᑯᓯᕐᒥ, ᓄᓇᓕᖕᓂ ᖃᐅᔨᒪᔭᐅᔭᕆᐊᓕᖕᓂ ᐊᒻᒪᓗ ᐸᓖᓯᒃᑯᑦ ᖃᓄᐃᓕᐅᖃᑦᑕᕐᓯᒪᖕᒪᖔᑕ ᓄᓇᕗᒥᑦ,” ᐅᖃᕐᓯᒪᔪᖅ.

“ᐊᔪᕈᓐᓃᓴᕈᑎᐅᖃᑦᑕᕆᐊᖃᕐᑐᖅ ᐊᔪᕈᓐᓃᕐᓴᕈᑎᐅᔪᓐᓇᕐᓯᑐᐊᕌᖓᑦ.”

ᖃᐅᔨᓚᐅᕐᒥᔪᑦ ᓄᓇᕗᒥᑦ ᐸᓖᓯᒃᑯᑦ ᕿᐱᓘᑎᓂ ᑐᓵᔪᓐᓇᙱᓐᓂᖏᓐᓂ ᑭᓯᐊᓂ ᖃᓪᓗᓈᑎᑑᖓᒃᐸᑕ ᐊᒻᒪᓗ ᓄᓇᖃᖅᑐᑦ ᕿᐱᓘᑎᖏᓐᓂᒃ ᑎᑎᕋᕆᐊᖃᙱᖢᑎᒃ ᐃᓄᒃᑐᑦ.

ᐅᖃᕐᓯᒪᓚᐅᕐᑐᖅ ᑐᓵᔨᓪᓚᕆᐅᙱᑦᑐᓂᒃ ᑐᓵᔨᖃᖃᑦᑕᕐᓂᖏᓐᓂᒃ ᒪᑯᑎᑐᓇ ᐃᓚᒋᔭᐅᔪᓂᒃ ᐃᑲᔪᖅᑕᐅᕙᒃᖢᑎᒃ ᕿᐱᓘᑎᓂᒃ ᑎᑎᕋᐅᓯᖃᓕᕌᖓᑕ.

ᖃᐅᔨᓚᐅᕐᒥᔪᖅ ᐃᓄᐃᑦ ᑭᒡᒐᖅᑐᖅᑕᐅᙱᓗᐊᕐᓂᖏᓐᓂᒃ ᐸᓖᓯᓂ.

“ᐸᓖᓯᑖᕋᓱᒋᐊᖃᕐᓂᖅ ᐊᒻᒪ ᐸᓖᓯᖃᐃᓐᓇᕐᓂᖅ ᐃᓄᒃᑐᑦ ᐅᖃᕈᓐᓇᖅᑐᓂᒃ ᓯᕗᓪᓕᐅᑎᑕᐅᔭᕆᐊᓕᒃ,” ᐅᓂᒃᑳᑦ ᐅᖃᕐᓯᒪᔪᑦ.

ᖃᕋᓴᐅᔭᒃᑯᑦ ᑎᑎᕋᖅᑕᐅᔪᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓄᕕᐱᕆ 29-ᖑᑎᓪᓗᒍ ᐆᒧᖓ ᐸᓖᓯᓄᑦ ᐅᖃᖅᑎᒋᔭᐅᔪᒧᑦ ᑰᐳᕈᓪ ᔪᐊᔾ ᕼᐋᓐᕆ ᐅᖃᓚᐅᕐᑐᖅ, “ᓄᓇᕗᒥᑦ ᐸᓖᓯᒃᑯᑦ ᐅᓂᒃᑳᓕᐊᓂ ᐃᓱᒪᒋᔭᖃᑦᑎᐊᕐᓯᒪᔪᖅ ᐊᒻᒪᓗ ᐱᐅᓯᕚᓪᓕᖅᑎᑦᑎᓯᒪᓪᓗᑎᒃ ᑭᒃᑯᑐᐃᓐᓇᐃᑦ ᕿᐱᓘᑎᖏᓐᓂ ᐱᓕᕆᔾᔪᓯᕐᒥᑦ.”

ᕼᐋᕆ ᐅᖃᓚᐅᕐᑐᖅ ᐸᓖᓯᒃᑯᑦ ᐃᖅᑲᓇᐃᔭᖅᑎᖃᓕᕐᓂᖏᓐᓂᒃ ᖃᐅᔨᓴᖃᑦᑕᕐᓂᐊᖅᑐᒥ ᑭᒃᑯᑐᐃᓐᓇᕐᓄᑦ ᕿᐱᓘᑎᒋᔭᐅᔪᓂᒃ ᐊᒻᒪᓗ ᐱᐅᓯᕚᓪᓕᕈᑎᐅᓇᔭᕐᑐᓂᒃ ᐱᓕᕆᐊᖃᕐᓂᐊᕐᓗᓂ ᕿᐱᓘᑎᒋᔭᐅᔪᓄᑦ ᐱᓕᕆᔾᔪᓯᕐᓂ ᓄᓇᕗᒥᑦ.