ᓄᓇᓖᑦ ‘ᖁᕕᐊᓲᑎᖃᑦᑎᐊᖅᑐᑦ’ ᑭᕙᓪᓕᖅᒥ ᐊᖅᑯᑎᒃᓴᒥᒃ: ᒥᓂᔅᑕ

For the English version of this story, see Community members ‘excited’ about Kivalliq road: Minister.

ᐃᓄᐃᑦ ᑭᕙᓪᓕᖅᒥᐅᑕ ᑕᑯᔪᒪᔪᑦ ᐊᖅᑯᑎᒥ ᓄᓇᖏᓐᓄᙵᐅᔪᓂᒃ, ᐅᖃᕐᑐᖅ ᑕᐃᕕᑦ ᐊᕿᐊᕈ, ᓄᓇᕗᒥᑦ ᒥᓂᔅᑕ ᐱᕙᓪᓕᐊᔪᓕᕆᓂᕐᒧᑦ ᐊᒻᒪ ᐃᖏᕐᕋᔾᔪᑎᓕᕆᓂᕐᒧᑦ.

“ᑭᕙᓪᓕᕐᒥᐅᑦ ᖁᕕᐊᓲᑎᖃᑦᑎᐊᖅᑐᑦ ᐃᖕᒥᖕᓄᑦ ᐊᒃᑐᐊᖃᑎᒌᑐᐃᓐᓇᕆᐊᖃᕐᓂᖏᓐᓂᒃ ᐊᒻᒪᓗ ᐊᑭᒃᖠᕚᓪᓕᕋᔭᕐᓂᖏᑦ ᐱᖁᑎᑦ ᐊᒻᒪ ᐱᔨᑦᑎᕋᐅᑎᑦ,” ᐅᖃᓚᐅᕐᑐᖅ ᕕᕝᕗᐊᕆ 23ᒥ ᒪᓕᒐᓕᕆᕕᒡᔪᐊᕐᒥ.

ᓇᖏᕐᓯᓪᓗᓂ ᐅᖃᓚᐅᕐᑐᖅ ᑕᒪᑐᒥᖓ ᖃᐅᔨᓇᓱᒃᑐᑦ 725 ᑭᓚᒥᑕᓂ ᑕᑭᓂᓕᖕᒥ ᖃᖓᑐᐃᓐᓇᖅ ᐊᑐᖅᑕᐅᔪᓐᓇᖅᑐᒥᒃ ᐊᖅᑯᑎᓕᐅᕈᓐᓇᕋᔭᕆᐊᒃᓴᖏᓐᓂ ᐅᑯᓂᖓ ᐊᑦᑕᑕᖃᑦᑕᐅᑎᓇᔭᖅᖢᓂ ᐃᒡᓗᓕᒑᕐᔪᒃ, ᑲᖏᖅᖠᓂᖅ, ᑎᑭᕋᕐᔪᐊᖅ ᐊᒻᒪ ᐊᕐᕕᐊᑦ ᐊᒻᒪᓗ 320-ᒥ ᑕᒃᖠᒋᐊᖅᑕᐅᒃᑲᓐᓂᕐᓗᓂ ᖃᒪᓂᑦᑐᐊᕐᒧᑦ.

ᓄᓇᕗᒥᑦ ᒐᕙᒪᒃᑯᓐᓄᑦ ᑭᒡᒐᖅᑐᐃᔪᑦ ᑕᒫᓃᓚᐅᕐᓯᒪᖕᒪᑕ ᐊᕐᕌᒍ ᐱᒋᐊᕐᓯᒪᓕᖅᑎᓪᓗᒍ ᐊᐱᖅᑯᑎᒋᔭᐅᔪᓂᒃ ᑭᐅᑲᑕᒃᖢᑎᒃ ᐊᒻᒪᓗ ᑐᓴᖅᑎᑦᑎᓇᓱᒃᖢᑎᒃ ᑕᒪᑐᒥᖓ ᐃᓱᒪᒋᔭᐅᓂᖓᓂᒃ.

ᒐᕙᒪᒃᑯ ᑕᒪᑐᒥᖓ ᐃᓱᒪᒋᔭᖃᕐᓯᒪᖕᒪᑕ ᐊᖅᑯᑎᒥ ᑕᒫᓂ ᐊᕐᕌᒍᒐᓴᐅᓕᕐᑐᓂᒃ.

ᐃᓄᐃᑦᑕᐅᖅ ᑕᒪᑐᒥᖓ ᐃᓱᒪᒋᔭᖃᖃᑦᑕᓚᐅᕐᒥᔪᑦ, ᐊᕿᐊᕈᖅ ᐅᖃᕐᑐᖅ.

“ᐅᓇ ᐃᓱᒪᒋᔭᐅᓗᐊᖅᖢᓂ ᑐᒃᑐᐃ ᑕᒪᐅᓈᖃᑦᑕᖕᓂᖏ ᐊᒻᒪᓗ ᐃᓅᖃᑎᒌᖕᓂᒃᑯᑦ-ᑮᓇᐅᔭᓕᐅᕋᓱᖕᓂᒃᑯ ᐊᒃᑐᐃᓇᔭᖅᑐᓂ ᑖᓐᓇ ᐊᖅᑯᑎ ᓴᓇᔭᐅᓯᒪᓕᕐᐸᑦ,” ᐅᖃᕐᑐᖅ.

ᐅᖃᓚᐅᕐᑐᖅ ᐱᓕᕆᕝᕕᖓ ᓱᓕ ᑲᑎᕐᓱᐃᓂᖏᓐᓂᒃ ᑕᒪᑐᒧᖓ ᐅᖃᐅᓯᐅᑲᑕᒃᑐᓂᒃ ᐊᒻᒪᓗ ᖃᕋᓴᐅᔭᒃᑯᑦ ᖃᐅᔨᓴᕈᑎ ᓄᓇᕗᒥᑦ ᒐᕙᒪᒃᑯᑦ ᖃᕋᓴᐅᔭᒃᑯ ᓴᖅᑭᔮᒐᖓᓂ ᑭᐅᔭᐅᑲᑕᒍᓐᓇᖅᖢᓂ.

“ᐅᓇ ᐱᒻᒪᕆᐊᓗᒃ ᓂᐲᑦ ᑐᓴᖅᑕᐅᖃᑕᐅᖁᒍᕕᐅᒃ ᐊᒻᒪ ᐅᓂᒃᑳᓄᑦ ᐃᓚᐅᓗᓂ, ᑖᓐᓇᓗ ᐊᑐᐃᓐᓇᐅᓕᓛᖅᖢᓂ ᐊᕐᕌᒎᑉ ᐃᓗᐊᓂ,” ᐊᕿᐊᕈᖅ ᐅᖃᕐᑐᖅ.