ᓄᓇᕗᒻᒥ ᐳᓚᕋᕐᓂᐅᔪᖅ ᐃᓚᒋᔭᐅᕗᖅ ᐊᔭᐅᕆᓂᐅᔪᒥ ᓄᓇᕗᑦ 3000−ᒧᑦ

For an English version of this story, please see: Community tour part of effort to push forward Nunavut 3000.

ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐳᓚᕋᕐᓂᐊᖅᐳᑦ 10−ᓂ ᕼᐋᒻᓚᐅᔪᓄᑦ ᐃᓚᒋᔭᐅᔪᒥ ᓄᓇᕗᒻᒥ ᒐᕙᒪᒃᑯᓐᓂ ᐊᒃᓱᕈᕐᓂᖏᓐᓂ ᓴᓇᓂᕐᒥ 3,000−ᓂ ᐃᒡᓗᒃᓴᓂ ᓄᓇᕗᓕᒫᒥ 2030−ᖑᕋᓱᖕᓂᖓᓂ.

ᐊᐅᓪᓛᕐᓂᐅᔪᖅ, ᔪᓚᐃ 2−ᒥ 19−ᒧᑦ, ᑐᕌᖓᓇᓱᐊᖅᐳᖅ ᐃᑲᔪᕐᓂᕐᒥ ᐃᒡᓗᓕᕆᔨᕐᔪᐊᒃᑯᓐᓂ ᓇᓗᓇᐃᖅᓯᓂᖏᓐᓂ “ᐊᑑᑎᖃᑦᑎᐊᓛᖑᔪᒥ” ᐃᑲᔪᕈᑎᒃᓴᓂ ᐱᓕᕆᓂᐅᔪᒥ ᑕᐃᑯᖓ ᑐᕌᒐᒃᓴᐅᔪᒧᑦ, ᐅᖃᓚᐅᖅᐳᖅ ᔪᐊᓂ ᐸᓪᓗᖅ, ᐃᓚᒋᔭᐅᔪᒥ ᐊᖓᔪᖅᑳᖑᔪᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ, ᐊᐱᖅᓱᖅᑕᐅᓂᐅᔪᒥ ᔫᓂ 19−ᒥ.

ᐸᕐᓇᐅᑎ ᐱᓂᕐᒥ ᐃᒡᓗᖃᕐᕕᐅᔫᑉ ᐊᕙᑖᓂ ᓄᓇᖓᓂ 2025−ᒧᑦ ᓇᑉᐸᖅᑎᕆᓂᐅᔪᒥ ᐊᕐᕌᒍᖓᓂ, ᓇᓗᓇᐃᖅᓯᓂᕐᒥ ᓈᒻᒪᖕᓂᖏᓐᓂ ᐱᕙᓪᓕᐊᑎᑕᐅᓂᖏᓐᓄᑦ, ᐊᒻᒪ ᐅᖃᐅᓯᒃᓴᖅᑖᕐᓗᑎᒃ ᐃᓄᖕᓂ ᓄᓇᓕᐅᔪᓂ, ᐅᖃᓚᐅᖅᐳᖅ.

ᐃᒡᓗᖃᕐᕕᐅᔫᑉ ᐊᕙᑖᓂ ᓄᓇᖓᓂ ᓂᕈᐊᖅᑕᐅᒃᐸᑕ, ᑎᒥᖁᑕᐅᔪᑦ ᐱᔭᕆᐊᖃᕐᓂᐊᖅᐳᑦ ᐱᕙᓪᓕᐊᑎᑦᑎᓂᕐᒥ ᐊᒻᒪ ᓴᓇᓂᕐᒧᑦ ᐱᔪᓐᓇᐅᑎᐅᔪᓂ ᓄᓇᓕᖕᓂ ᒪᓕᒐᕋᓛᖏᓐᓂ.

ᐅᓇ ᐃᒡᓗᓕᕆᔨᕐᔪᐊᒃᑯᑦ ᒪᕐᕈᖓᓂ ᐳᓚᕋᕐᓂᐅᕗᖅ. ᓯᕗᓂᐊᓂ ᐋᖅᑭᒃᓱᖅᑕᐅᓚᐅᖅᐳᖅ ᓯᑎᐱᕆᒥ ᐊᒻᒪ ᐃᓚᖃᓚᐅᖅᐳᖅ 17−ᓂ ᓄᓇᓕᖕᓂ.

ᓄᓇᕗᒻᒥ ᒐᕙᒪᒃᑯᑦ ᐊᒻᒪ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐅᖃᐅᓯᖃᓚᐅᖅᐳᑦ ᓄᓇᕗᑦ 3000−ᒥ 2022−ᒥ.

ᐆᒃᑑᑎᐅᔪᒥ ᐱᔭᕆᐊᖃᕐᓂᐅᔪᒥ ᐃᒡᓗᒃᓴᖅᑖᒃᑲᓐᓂᕆᐊᖃᕐᓂᕐᒥ ᓄᓇᕗᒻᒥ, 35 ᐳᓴᓐᑎᒥ ᓄᓇᕗᒻᒥ ᐊᖏᕐᕋᐅᔪᓂ ᐃᒡᓗᕈᓯᑭᒃᓴᓗᐊᖅᐳᑦ ᐃᓄᖃᕐᓂᖏᓐᓄᑦ, ᑕᐅᑐᒃᖢᒍ 5 ᐳᓴᓐᑎᒥ ᑲᓇᑕᓕᒫᒥ, ᐅᖃᐅᓯᐅᓪᓗᓂ 2020−ᒥ ᐅᓂᒃᑳᓕᐊᒥ ᓄᓇᕗᒻᒥ ᑐᙵᕕᒃᑯᓐᓂ.

ᓄᓇᓕᖕᓂ ᐳᓚᕋᕐᓂᐅᔪᒥ ᔪᓚᐃᒥ, ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᓯᕗᒻᒧᑦ ᐊᔭᐅᕆᓇᓱᐊᖅᐳᑦ ᐱᕙᓪᓕᐊᑎᑦᑎᓂᐅᔪᒥ ᐃᒡᓗᒃᓴᓂ “ᒥᒃᖠᒋᐊᖅᑎᑦᑎᓂᕐᒥ ᐃᒡᓗᖃᖅᑎᑦᑎᓂᕐᒥ ᑐᐊᕕᕐᓇᕐᓂᐅᔪᒥ,” ᐅᖃᓚᐅᖅᐳᖅ ᐃᓚᒋᔭᐅᔪᒥ ᐊᖓᔪᖅᑳᖅ ᔪᐊᓂ ᐸᓪᓗᖅ. (ᐋᑎ ᓵᑭᓯᐊᓐ ᐊᔾᔨᓕᐅᖅᑕᖓ)

ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᒻᒪ NCC ᐱᕙᓪᓕᐊᑎᑦᑎᓂᕐᒧᑦ ᑎᒥᖓᑦ ᑐᕌᖓᓪᓗᑎᒃ ᑲᒪᒋᔭᖃᖅᐳᑦ ᓇᑉᐸᖅᑎᕆᓂᕐᒥ ᓇᑉᐸᑲᓴᓪᓗᐊᖓᓂ ᑕᒪᒃᑭᓂ ᐸᕐᓇᒃᑕᐅᓯᒪᔪᓂ ᐃᒡᓗᒃᓴᓂ. 1,400−ᐸᓗᖕᓂ ᓇᓗᓇᐃᖅᑕᐅᓯᒪᕗᑦ ᐃᓄᓕᒫᓄᑦ ᐃᒡᓗᒃᓴᐅᔪᓄᑦ.

900−ᐸᓗᖕᓂ ᑲᑐᔾᔭᐅᓗᑎᒃ-ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐅᑯᓇᓂ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂᑦ ᐊᒻᒪ ᐱᓕᕆᖃᑕᐅᔪᓂ ᓲᕐᓗ ᐃᓄᖕᓄᑦ ᑲᑐᔾᔨᖃᑎᒌᖑᔪᓂ, ᑮᓇᐅᔾᔭᒃᓴᕈᑕᐅᙱᑦᑐᓂ, ᓄᓇᓕᖕᓂ ᑲᑐᔾᔨᖃᑎᒌᖑᔪᓂ ᐊᒻᒪ ᓴᖕᒥᓂᕆᔭᐅᔪᓂ−ᐱᓕᕆᕝᕕᓂ ᑲᒻᐸᓂᐅᔪᓂ.

ᐊᒻᒪᓗ 400−ᐸᓗᖕᓂ ᑐᓂᔭᐅᓂᐊᖅᐳᑦ “ᑭᒡᓕᖃᖅᑐᒥ ᐱᑕᖃᕈᓂ, ᐃᓄᓕᒫᓄᑦ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ,” ᐅᖃᐅᓯᐅᓪᓗᓂ ᓄᓇᕗᑦ 3000 ᐃᓄᓕᒫᓄᑦ ᐸᕐᓇᐅᑎᖓᓂ.

ᑕᒪᒃᑭᖅᑐᒥ ᐱᓕᕆᐊᒃᓴᐅᔪᖅ ᓇᓚᐅᑦᑖᕆᔭᐅᕗᖅ ᐊᑭᖃᕐᓂᐊᕐᓂᖓᓂ $2.6 ᐱᓕᐊᓐᓂ, $900 ᒥᓕᐊᓐᓂ ᓇᖕᒥᓂᕆᔭᐅᔪᓂ ᐱᓕᕆᕝᕕᐅᔪᓂ ᐊᒻᒪ ᐊᒥᐊᒃᑯᖓ ᐊᑭᓕᖅᑕᐅᓗᓂ ᒐᕙᒪᐅᔪᓂ ᐊᒻᒪ ᐃᓄᖕᓄᑦ ᑲᑐᔾᔨᖃᑎᒌᖑᔪᓄᑦ.

ᐸᓪᓗᖅ ᐅᖃᓚᐅᖅᐳᖅ ᐃᒡᓗᓕᕆᔨᕐᔪᐊᒃᑯᑦ ᐊᔪᕐᓇᙱᑎᑦᑎᒃᑲᓐᓂᕋᓱᐊᖅᐳᑦ ᐱᕙᓪᓕᐊᑎᑦᑎᔨᐅᔪᓄᑦ ᓴᓇᓂᕐᒥ ᐃᒡᓗᒃᓴᓂ ᓄᓇᕗᑦ ᐱᔭᕆᐊᖃᓪᓚᕆᖕᓂᖏᓐᓂ.

ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᔭᐅᕆᕗᑦ ᕼᐋᒻᓚᐅᔪᓂ ᐱᓕᕆᓂᕐᒥ “ᓱᒃᑲᓂᖅᓴᐅᔪᒥ ᑕᐃᒪᐃᒐᔪᖕᓂᖏᓐᓂ” ᐸᕐᓇᐃᓂᕐᒥ ᓄᓇᓂ ᑐᕌᒐᕆᔭᐅᔪᓂ ᐅᓄᕐᓂᐅᔪᓂ ᐃᒡᓗᒃᓴᓄᑦ ᐊᑐᖅᑕᐅᓂᐊᖅᑐᓂ ᑕᒪᒃᑭᓄᑦ ᐃᓄᓕᒫᓄᑦ ᐊᒻᒪ ᓇᖕᒥᓂᖃᖅᑎᐅᔪᓄᑦ ᐱᕙᓪᓕᐊᑎᑕᐅᓂᐅᔪᓂ, ᐅᖃᓚᐅᖅᐳᖅ ᑯᕆᔅᑐᓪ ᕗᓗᕐ, ᓇᖕᒥᓂᖃᖅᑎᐅᔪᖅ ᐊᒻᒪ ᑐᙵᕕᐅᔪᖅ ᐸᕐᓇᐃᓂᕐᒥ ᐊᒻᒪ ᐅᖃᖃᑎᖃᕐᓂᕐᒥ ᑲᒻᐸᓂᐅᔪᒥ ᖃᐅᒪᓂᖅᓴᒥ ᓄᓇᓕᐅᔪᒥ, ᐃᖅᑲᓇᐃᔭᖅᑎᑕᐅᔪᓂ ᐆᒧᖓ ᐱᓕᕆᐊᒃᓴᐅᔪᒧᑦ.

ᕗᓗᕐ ᐃᓚᐅᖃᑕᐅᓚᐅᖅᐳᖅ ᓯᑎᐱᕆᒥ ᐳᓚᕋᕐᓂᐅᔪᒥ ᐊᒻᒪ ᐊᐅᓚᑦᑎᕗᖅ ᑎᑭᑉᐸᓪᓕᐊᔪᒥ ᐳᓚᕋᕐᓂᐅᓂᐊᖅᑐᒥᑦᑕᐅᖅ.

ᐅᖃᓚᐅᖅᐳᖅ ᐳᓚᕋᕐᓂᖅ ᐊᖏᐸᓗᒃᖢᓂ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐊᑯᓂᐅᓂᖓᓂ ᐊᒻᒪ ᐃᑲᔪᕈᑎᒃᓴᓂ, ᐊᑭᖓ ᑕᒻᒪᕐᓂᕐᒥ ᓄᓇᖓᓂ ᖁᑦᑎᖕᓂᖅᓴᒻᒪᕆᐅᓇᔭᖅᐳᖅ.

“ᓂᕈᐊᕈᒪᙱᓚᖑᑦ ᐃᒡᓗᖃᕐᕕᐅᔫᑉ ᐊᕙᑖᓂ ᓄᓇᖓᓂ ᐸᐃᑉᐹᖑᔪᒥ ᐊᒻᒪ ᐊᓱᐃᓛᒃ ᑕᐃᑯᙵᕐᓗᑕ ᐊᒻᒪ ᑕᑯᓗᒍ $600,000−ᑐᕐᓂᐊᕐᓂᖓᓂ ᐅᕝᕙᓘᓐᓃᑦ ᐊᖏᐸᓗᒃᑐᒥ ᐱᓕᕆᓂᐅᔪᒥ ᓴᓇᓂᕐᒥ ᐃᓂᐅᔪᒥ,” ᐅᖃᓚᐅᖅᐳᖅ.

“ᐅᕝᕙᓘᓐᓃᑦ ᑕᒻᒪᖅᓯᒪᔪᒥ ᐃᓂᐅᒍᓂ, ᐅᕝᕙᓘᓐᓃᑦ ᕿᒧᒃᓰᑦ ᐃᓂᒋᔭᖓᓃᓪᓗᑎᒃ ᓄᓇᓕᖕᓄᑦ. ᐱᒻᒪᕆᐅᕗᖅ ᐋᖅᑭᒃᓱᐃᓂᕐᒥ ᑕᐃᒃᑯᓂᖓ ᑲᑎᖃᑎᖃᕐᓂᐅᔪᓂ ᕼᐋᒻᓚᐅᔪᓂ, ᐱᓪᓚᕆᐅᖕᒪᑕ ᐱᓕᕆᖃᑎᒋᔭᐅᔪᓂ.”

ᐃᓄᓕᒫᓂ ᑲᑎᒪᓂᖃᔾᔮᙱᓚᖅ ᓄᓇᓕᖕᓂ, ᑭᓯᐊᓂ ᕗᓗᕐ ᐅᖃᓚᐅᖅᐳᖅ ᑲᑎᙵᓂᐅᔪᑦ ᑐᙵᓱᒃᑎᑦᑎᕗᑦ “ᐱᕐᕈᓗᐊᕿᓂᐅᔪᓂ ᐅᖃᓪᓚᖃᑎᖃᕐᓂᕐᓂ” ᐊᖅᑯᑎᓂ.

“ᖃᖓ ᓅᑦᑐᓐᓇᓛᖅᐱᑕ?” ᐊᑕᐅᓯᐅᔪᒥ ᐊᐱᖅᑯᑕᐅᒐᔪᒃᑐᒥ ᐱᕙᖕᓂᖓᓂ ᐊᖅᑯᒻᒥ.

“ᑐᓴᒐᔪᒃᑕᕋ, ‘ᐅᑯᐊ ᐃᒡᓗᒃᓴᐃᑦ ᐱᔪᒪᕐᔪᐊᖅᐸᕗᑦ, ᐱᔪᒪᕙᕗᑦ, ᐱᔭᕆᐊᖃᓪᓚᕆᒃᐸᕗᑦ, ᐱᔭᕆᐊᖃᓪᓚᕆᒃᐳᒍᑦ ᐃᒡᓗᒃᓴᓂ.'”

ᓇᓗᓇᐃᖅᑕᐅᓯᒪᓂᐅᔪᒥ ᐅᖃᐅᓯᒃᓴᓕᐊᓂ, ᕗᓗᕐ ᐅᖃᓚᐅᖅᐳᖅ ᐃᓄᐃᑦ ᐅᖃᖃᑎᖃᓪᓗᐊᖅᐳᑦ ᓄᓇᓕᖕᓂ ᕼᐋᒻᓚᐅᔪᓄᑦ ᐃᖅᑲᓇᐃᔭᖅᑎᖏᓐᓄᑦ.

ᑭᒡᒐᖅᑐᐃᔨᐅᔪᓂ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ, NCC ᐱᕙᓪᓕᐊᑎᑦᑎᓂᕐᒧᑦ ᑎᒥᖓᑦ, ᐊᒻᒪ ᓄᓇᓕᖕᓂ ᐊᒻᒪ ᒐᕙᒪᒃᑯᓐᓂ ᐱᔨᑦᑎᕋᕐᓂᐅᔪᒥ ᐊᐅᓪᓛᕐᓂᐊᖅᐳᑦ, ᐃᓚᖃᕐᓗᑎᒃ ᑭᒡᒐᖅᑐᐃᔨᐅᔪᒥ ᐱᓕᕆᖃᑎᒋᔭᐅᔪᒥ ᑲᑐᔾᔨᖃᑎᒌᖑᔪᓂ ᓄᓇᕗᒻᒥ ᑐᙵᕕᒃᑯᓐᓂ ᐊᒻᒪ ᓄᓇᕗᒻᒥ ᑲᑐᔾᔨᖃᑎᒌᖑᔪᓂ ᕼᐋᒻᓚᐅᔪᓂ.

ᑕᒪᒃᑭᐅᒪᔪᒥ ᑎᑎᕋᖅᓯᒪᓂᐅᔪᒥ ᕼᐋᒻᓚᐅᔪᓂ ᐃᓚᖃᖅᐳᖅ:

• ᑲᖏᖅᖠᓂᖅ, ᔪᓚᐃ 2-5
• ᐊᕐᕕᐊᑦ, ᔪᓚᐃ 5-8
• ᖃᒪᓂᑦᑐᐊᖅ, ᔪᓚᐃ 8-10
• ᖁᕐᓗᖅᑐᖅ, ᔪᓚᐃ 11-12
• ᐃᖃᓗᒃᑑᑦᑎᐊᖅ, ᔪᓚᐃ 11-12
• ᐅᖅᓱᖅᑑᖅ, ᔪᓚᐃ 12-13
• ᑕᓗᕐᔪᐊᖅ, ᔪᓚᐃ 13-15
• ᐃᒃᐱᐊᕐᔪᒃ, ᔪᓚᐃ 15-17
• ᐸᖕᓂᖅᑑᖅ, ᔪᓚᐃ 17-18
• ᑭᙵᐃᑦ, ᔪᓚᐃ 18-19