ᓴᓇᕝᕖᑦ ᓴᓇᔪᑦ ᐊᕐᕋᒍᒐᓴᐅᓕᕐᑐᓂ ᐃᓄᐃᑦ ᖃᔭᕕᓂᖏᓐᓂᒃ

For an English version of this story, please see Community workshop builds replicas of decades-old Inuit kayak.

ᒪᕐᕉᒃ ᖃᔮᒃ ᐊᔾᔨᖃᖅᖢᑎᒃ 60-ᓂ ᐊᕐᕌᒍᖃᓕᖅᑐᒥ ᖃᔭᕕᓂᖕᒥ ᓴᓇᔭᐅᓂᑯ ᐃᓐᓇᕐᓄᑦ ᓴᓇᔭᐅᒃᑲᓐᓂᕐᓂᐊᕐᒪᑕ ᓄᓇᓕᖕᓂ ᓴᓇᕝᕕᒃᒥᑦ ᑰᔾᔪᐊᖅᒥ.

ᐅᓇ ᖃᓄᐃᓕᐅᕐᓇᖅ, ᐱᒋᐊᕐᓂᑯ ᐊᐃᕆᓕ 20-ᒥ ᒪᐃ 1-ᒧ, ᐋᖅᑭᒃᑕᐅᓯᒪᓚᐅᕐᓯᒪᔪᖅ 8-ᓂ ᐃᓅᓱᒃᑐᓄᑦ ᐊᕐᕌᒍᖃᖅᑐᓂᒃ 17-ᓂ 30-ᒧ. ᑭᓯᐊᓂᓕ ᐅᓄᕐᓂᕐᓴᐃᑦ ᑖᔅᓱᒥᖓ ᐱᓕᕆᐊᒥ ᐱᓕᕆᔪᒪᓂᖏᓐᓄᑦ ᑭᒃᑯᑐᐃᓐᓇᕐᓅᖓᓕᓚᐅᕐᑐᖅ ᐃᓄᖕᓄᑦ, ᐅᖃᕐᑐᖅ ᐋᓚᓯ ᕈᐊᐃ, ᐃᓱᒪᓕᕆᓂᕐᒧᑦ ᐃᓅᓯᓕᕆᔨ ᓄᕐᕋᐃᑦᑯᓐᓄᑦ — ᔨᐅᓂᔅ ᑲᕆᐸᔅ, ᑖᒃᑯᐊᓗ ᓄᓇᐃᓐᓇᕐᒥ ᐊᔪᕈᓐᓃᖅᓴᖅᑎᑦᑎᔨᐅᕙᒃᖢᑎᒃ ᐃᓅᓱᒃᑐᓂ.

“ᐅᓇ ᓴᓇᕝᕕᒃ ᐃᓄᖕᓄᑦ ᑲᑎᕝᕕᐅᖃᑦᑕᕐᑐᖅ, ᐅᖃᐅᓯᖃᖅᖢᑎᒃ ᖃᔭᕐᓂ ᐊᒻᒪᓗ ᑖᒃᑯᐊ ᑲᑐᔾᔨᖃᑎᒌᑦ ᖃᓄᖅ ᐅᖃᕐᕕᐅᔪᓐᓇᕐᒪᖔᑕ ᓄᓇᓕᖕᓄᑦ,” ᕈᐊᐃ ᐅᖃᕐᑐᖅ.

1968-ᒥ ᑲᓇᑕᒥ ᑕᑯᔭᒐᖃᕐᕕᒃ ᐃᑦᑕᕐᓂᓴᕐᓄᑦ ᐱᓕᕆᑎᑦᑎᓚᐅᕐᓯᒪᖕᒪᑕ ᑑᒪᓯᑲᓪᓚᒃᒥ, ᐃᓐᓇᑐᖃ ᑲᖏᕐᓱᒃᒥᐅᑕᖅ ᖃᔭᓕᐅᖁᔭᐅᓪᓗᓂ.

ᓴᓇᔭᐅᓂᖓ ᑎᑎᕋᐅᓯᐅᕙᓪᓕᐊᓚᐅᕐᓯᒪᔪᖅ ᐱᕐᓇ ᓴᓚᑎᓐ ᑖᖕᓘᒧᑦ, ᐃᑦᑕᕐᓂᓴᓕᕆᔨ ᐃᓅᔪᓐᓃᕐᓂᑯ ᕕᕝᕗᐊᕆ 2025-ᒥ. ᐅᑯᐊ ᑎᑎᕋᐅᓯᐅᖅᓯᒪᔪᑦ ᐊᑐᕐᑕᐅᓪᓗᑎᒃ ᖃᔭᓕᐅᓚᐅᕐᑐᑦ ᕿᔪᓕᕆᓚᐅᖅᖢᑎᒃ, ᐅᖃᕐᑐᖅ ᕼᐋᕕ ᒎᑕᓐ, ᖃᐅᔨᓴᖅᑎ ᓴᓇᕝᕕᒃᒥ ᐊᐅᓚᑦᑎᔨᒋᔭᐅᔪᖅ ᐊᐱᕐᓱᖅᑕᐅᑎᓪᓗᒍ.

“ᐅᓇ ᑐᒃᑐᓕᐊᖅᑐᓄᑦ ᖃᔭᕆᔭᐅᕙᒃᑐᓂ ᐊᔾᔨᖃᖅᑐᖅ ᐃᒻᒪᑲᓪᓚᐅᓚᐅᕐᑐᖅ ᐸᐃᓐ ᑰᖕᒥᑦ,” ᐅᖃᕐᑐᖅ.

ᐅᓇ ᓴᓇᕝᕕᒃ ᐱᓕᕆᐊᖑᔪᖅ ᐱᓕᕆᖃᑎᒌᒃᖢᑎᒃ ᓄᕐᕋᐃᑦ, ᓄᓇᕕᒃᒥ ᒥᕐᖑᐃᕐᓯᖅᕕᓕᕆᔨᒃᑯᓐᓂ ᐊᒻᒪ ᖃᔭᒃᑯᑦ ᑲᑐᔾᔨᖃᑎᒌᓄᑦ, ᐱᓕᕆᔨᐅᕙᒃᑯᑦ ᖃᔭᕐᓂ ᐃᖃᓗᖕᓂᑦ.

ᒎᑕᓐ ᐊᒻᒪ ᑲᑐᔾᔨᖃᑎᒌᓄᑦ ᐃᓚᒋᔭᐅᔪᑦ ᕌᐳᑦ ᑰᒧ, ᐊᐃᓴᒃ ᕕᐊᒪᓐ ᐊᒻᒪ ᐋᓯᕙᒃ ᐊᕐᓇᖅᑯᖅ-ᐳᕆᐊᓪ ᐊᐅᓚᑦᑎᔨᐅᔪᑦ ᑖᔅᓱᒥᖓ ᐱᓕᕆᐊᒃᓴᒥᒃ.

ᐅᑯᐊ ᖃᔭᐃᑦ ᐋᖅᑭᓯᒪᐃᓐᓇᙱᑦᑐᑦ ᑕᐃᒪᓐᓇ ᓲᖃᐃᒻᒪ ᐊᒥᖏᑦ ᐊᓯᔾᔨᖅᑕᐅᖕᒪᑕ ᑐᒃᑐ ᐊᒥᖏᓐᓄᑦ ᓴᓇᓯᒪᔪᕕᓃᑦ, ᖄᓕᐅᖅᑕᐅᖔᖅᖢᑎᒃ ᓇᐃᓛᓐᒥ (ᐊᐅᔭᑦᑐᒥ), ᒎᑕᓐ ᐅᖃᕐᑐᖅ.

“ᐅᓇ ‘ᐃᔾᔪᐊᖅᓯᒪᓂᕐᒧᑦ’ ᐅᖃᐅᓯᖅ ᖃᓄᐃᓕᖓᓂᖓᓄᑦ ᐊᒻᒪᓗ ᐊᖏᓂᖓᓄᑦ ᖃᔭᐃᑦ ᐊᒻᒪᓗ ᖃᓄᖅ ᐋᖅᑭᒃᓱᖅᑕᐅᕙᓪᓕᐊᓂᖓᒍᑦ,” ᐅᖃᕐᑐᖅ.

ᖃᔭᐃᑦ ᓴᓇᔭᐅᕙᓚᐅᕐᑐᑦ ᐊᖑᓇᓱᒃᑎᐅᑉ ᑎᒥᖓᑕ ᖃᓄᐃᓕᖓᓂᖓᒍᑦ, ᑰᒧ ᐅᖃᕐᑐᖅ.

ᐃᓕᖁᓯᐅᓚᐅᕐᓯᒪᔪᕐᓕ ᐊᖑᓇᓱᒃᑎᐅ ᕿᑎᖓ ᓈᒻᒪᒃᓯᓕᖅᑕᐅᓯᒪᓪᓗᓂ ᐃᒃᓯᕚᕐᓯᒋᔭᖓᓄᑦ, ᓂᐅᖏᓪᓗ ᐃᕿᓯᒪᕈᔪᒃᖢᑎᒃ ᑕᐃᒪᓐᓇᓗ ᖃᔭᖅᑎ ᐊᐅᓚᑲᑕᒍᓐᓇᐃᓪᓕᖅᓯᒪᓪᓗᓂ.

“ᐅᓇ ᖃᔭᖅ ᑎᒥᖕᓄᑦ ᐋᖅᑭᒋᐊᕐᓯᒪᔪᖅ. ᑕᐃᒪᓐᓇ ᐃᒃᓯᕚᕐᕕᐅᔪᖅ ᐃᖢᐊᖑᓇᓱᒃᖢᓂ,” ᐅᖃᕐᑐᖅ. “ᓇᐅᓕᒃᓯᔪᓐᓇᕐᓗᓂ ᐃᒃᓯᕚᕐᕕᒋᔭᒥᒃ. ᐊᒻᒪᓗ ᐊᒃᓴᑲᔪᓐᓇᕐᓯᓯᒪᓗᓂ ᐊᒻᒪ ᓴᖑᑎᑦᑎᑲᑕᒍᓐᓇᕐᓗᓂ.”

“ᑐᓴᖃᑦᑕᕐᓯᒪᒐᒪ ᐊᓯᑦᑕ ᖃᔭᖏᓐᓂ ᐊᑐᕐᓗᓂ ᓈᒻᒪᙱᓕᐅᕈᑎᐅᔪᓐᓇᓚᐅᕐᓂᖓᓂ,” ᐅᖃᕐᑐᖅ.

ᑰᕋᑕᓐ ᓴᐃᓛᓐ, ᓴᐳᓐᓂᐊᖅᑎ ᐊᕙᓗᒋᔭᐅᔪᓂᒃ ᓄᓇᕕᒃᒥ ᒥᕐᖑᐃᕐᓯᕕᖕᓂ, ᐃᑲᔪᕐᓯᒪᔪᖅ ᐃᑲᔫᑎᒃᓴᓂ ᐱᓕᕆᐊᒧᑦ ᐅᖃᓚᐅᕐᑐᖅ ᑖᓐᓇ ᖃᓄᐃᓕᐅᕐᓂᖅ ᒪᓕᒃᓯᒪᓂᖓᓂ ᑲᑐᔾᔨᖃᑎᒌᑦ ᐱᓇᓱᐊᖅᑕᖏᓐᓂ.

“ᓴᐳᔾᔨᓯᒪᖃᑦᑕᕋᑦᑕ ᐃᑦᑕᕐᓂᓴᕕᓂᕐᓂ ᐊᒻᒪᓗ ᐱᓇᓱᐊᒐᕆᓪᓗᑎᒋᑦ ᐃᓕᖅᑯᓯᒃᑯᑦ ᐃᑦᑕᕐᓂᓴᓕᕆᓂᒃᑯᑦ,” ᓴᐃᓚᓐ ᐅᐃᕖᑐᑦ ᐅᖃᓚᐅᕐᑐᖅ ᐊᐱᕐᓱᖅᑕᐅᑎᓪᓗᒍ.

ᐃᓱᒪᔪᓪᓗ ᖃᔭᐃᑦ ᐊᑐᕐᑕᐅᓂᐊᕐᓗᑎ ᐅᓪᓗᕐᓂ ᖁᓕᓂ ᐋᖅᑭᒃᑕᐅᓯᒪᓪᓗᓂ ᓄᕐᕋᐃᑦᓄᑦ.