ᐃᓄᐃᑦ ᑲᑐᔾᔨᖃᑎᒌᖏᑦ ᓄᓇᕗᒥᑦ ᓄᓇᓕᖕᓂᒃ ᓄᕙᒡᔪᐊᕐᓇᖅ-19-ᒧᑦ ᐃᑲᔪᕈᑎᑖᖅᑎᑦᑎᕗᑦ
ᐱᓕᕆᐊᖑᔪᑦ ᒪᑯᓇᙵᑦ ᓂᖀᑦ ᑲᑎᓯᒪᐅᕐᑐᓂᒃ ᐊᒻᒪᓕ ᓂᐅᕕᕈᓐᓇᐅᑎᓂᒃ ᒪᐅᖓ ᑮᓇᐅᔭᓄᑦ ᐃᓐᓇᑐᖃᕐᓄᑦ ᐊᒻᒪ ᐊᖑᓇᓱᒃᑎᓄᑦ
ᐃᓄᐃᑦ ᓄᓇᖃᖅᑐᑦ ᐃᖃᓗᖕᓂᓐ ᐊᒻᒪ ᑭᙵᓂᒃ ᐃᑲᔪᖅᑕᐅᒃᑲᓐᓂᓯᕗᖅ ᓂᕿᑖᕈᑎᒃᓴᑎᒍᑦ ᐊᒻᒪ ᐊᓯᖏᑦᑎᒍᑦ. (ᐊᔾᔨᙳᐊᖁᑎᒋᔭᐅᔪᖅ)
For an English version of this story, see Inuit organizations roll out COVID-19 support for Nunavut communities
ᓂᕆᔭᒃᓴᐃᑦ ᑲᑎᓯᒪᔪᑦ, ᓂᕿᑖᕈᓐᓇᐅᑏᑦ ᐊᒻᒪᓗ ᐃᑲᔪᕈᑎᒃᓴᑦ ᐊᖑᓇᓱᖕᓂᖅᒧᑦ — ᐅᑯᐊ ᐃᓚᖏ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᒐᕙᒪᑐᖃᒃᑯᓐᓂᒃ ᐃᑲᔫᑎᓂᒃ ᐃᑲᔪᕈᑎᖃᖅᑐᑦ ᐋᓐᓂᐊᕕᒡᔪᐊᕐᓇᖅᒧᑦ ᑭᙵᓄᑦ ᐊᒻᒪ ᐃᖃᓗᖕᓄᑦ.
ᐱᒋᐊᖅᖢᓂ ᒪᐃ 24, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪ ᑯᐊᐸᒃᑯᑦ ᐋᖅᑭᒃᓯᓚᐅᕐᒪᑕ $250.00-ᓂ ᓂᕿᑖᕈᓐᓇᐅᑎᒃᓴᓂᒃ ᐊᑐᓂ ᐃᒡᓗᖃᖅᑐᓂᒃ ᑭᙵᓂᒃ, ᓄᓇᓖᑦ ᐋᓐᓂᐊᕕᒡᔪᐊᕐᓇᒥ ᐋᓐᓂᐊᖅᑕᖅᑐᖃᕐᓯᒪᓕᕐᑐᖅ ᓄᕙᒡᔪᐊᕐᓇᖅ-19-ᒥᒃ.
ᐊᒻᒪᓗ ᒪᐃ 31-ᓗ ᔫᓂ 28-ᓗ ᐊᑯᓐᓂᖓᓂ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓂᕿᓂᒃ ᑐᓂᐅᖃᐃᖃᑦᑕᕐᓂᐊᕐᒪᑕ ᐊᒻᒪᓗ ᑐᓂᓯᕙᒡᓗᑎᒃ $250.00-ᒧᑦ ᓂᕿᑖᕈᓐᓇᐅᑎᓂᒃ ᐃᒡᓗᖃᖅᑐᓂᒃ ᑭᙵᓂᒃ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓂᕿᑖᕈᓐᓇᐅᑎᒃᓴᓂᒃ ᐃᖃᓗᖕᓄᑦ ᐱᓕᕆᐊᖃᕋᓱᖕᒥᔪᑦ.
ᐃᓄᐃᑦ ᐃᖃᓗᖕᓃᑦᑐᑦ 16-ᓂ ᐊᕐᕌᒍᓖᑦ ᐅᖓᑖᓄᑦ ᔫᓂ 30ᒡᒥᑦ ᓂᕿᑖᕈᓐᓇᐅᑎᑖᕐᓂᐊᖅᑐᑦ ᐊᑭᖃᓪᓗᐊᖅᑐᒥᓐ $275.00-ᓂᒃ, ᑖᓐᓇᓗ ᐊᕕᒍᓐᓇᖅᑎᑕᐅᓂᐊᖅᖢᓂ ᐋᑎᒃ ᕙᓐᓱᔅ ᐃᓚᖓᓂ ᐱᔪᓐᓇᕐᓗᑎᒃ ᐊᒻᒪ ᐃᓚᖓᓄᑦ ᓄᐊᑦᒫᑦᒥ ᓂᐅᕕᕈᓐᓇᕐᓂᐊᕐᓗᑎᒃ.
ᓯᕗᓪᓕᖅᐹᒥᑦ ᑐᓂᐅᖃᐃᓕᕐᓂᐊᖅᑐᑦ ᒪᐃ 31-ᒥᑦ ᔫᓂ 4-ᒧᑦ. ᐊᐃᑉᐸᖓᓂᓪᓕ ᑐᓂᐅᖃᐃᓛᖅᖢᑎᒃ ᔫᓂᐅᑉ ᓄᙳᐊᓂᒃ, ᐅᖃᓚᐅᖅᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᑖᒃᑯᐊᓗ ᐊᔮᔮᒥᑦ ᑐᓂᐅᖃᐃᖃᑎᖃᕐᓂᐊᖅᖢᑎᒃ.
ᓄᐊᑦ ᕕᐊᔅᑦ ᑲᒻᐸᓂᒃᑯᑦ ᐊᒻᒪᓗ ᑯᐊᐸᒃᑯᑦ ᐃᑲᔫᑎᒃᓴᖅᑖᕈᑎᖃᕐᒪᑕ ᐋᓐᓂᐊᕕᒡᔪᐊᕐᓇᖅᒧᑦ ᓂᕿᑖᕈᓐᓇᐅᑎᒃᓴᓂᒃ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᓚᐅᖅᑐᑦ.
“ᐅᓇ ᓄᕙᒡᔪᐊᕐᓇᖅ-19 ᐋᓐᓂᐊᕕᓄᒡᔪᐊᕐᓇᖅ ᓂᕿᖃᑲᑕᖕᓂᖅᒥᒃ ᐊᔪᕐᓇᖅᓯᔾᔪᑎᒃᑲᓐᓂᐅᖕᒪᑦ ᕿᑭᖅᑕᓂ,” ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓ ᐸᐅᓗᓯ ᐊᕿᐊᕈᖅ ᐅᖃᓚᐅᖅᑐᖅ ᑐᓴᒐᒃᓴᓕᐊᑎᒍᑦ.
“ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᔭᓕᒻᒪᕆᒃᑐᑦ ᒐᕙᒪᑐᖃᒃᑯᑦ ᐃᑲᔪᑲᑕᒍᓐᓇᕐᒪᑕ ᓄᓇᓕᖕᓂᒃ ᐊᒃᑐᖅᑕᐅᓯᒪᔪᓂᒃ ᓄᕙᒡᔪᐊᕐᓇᖅ-19-ᒧᑦ, ᐊᒻᒪᓗ ᐃᓚᒌᓴᒃᑯᓐᓂᒃ ᑕᒪᑐᒥᖓ ᐱᓕᕆᐊᖃᐃᓐᓇᕈᓐᓇᕐᓂᖏᓐᓂᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑯᓐᓂᒃ ᐃᓄᖕᓄᑦ ᕿᑭᖅᑖᓗᖕᒥᐅᓄᑦ.”
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᒪᑐᐃᕐᓯᒃᑲᓐᓂᕐᓂᐊᓕᖅᑐᑦ ᑐᐊᕕᕐᓇᖅᑐᓄᑦ ᐃᑲᔫᑎᒃᓴᓕᕆᓂᕐᒥᒃ ᕿᑭᖅᑕᓂ ᐃᓄᖕᓄᑦ ᐃᖃᓗᖕᓂᑦ ᐊᒻᒪ ᑭᙵᓂᑦ, ᑖᓐᓇᓕ ᐊᑕᐅᓰᖅᖢᓂ $1,500-ᓂ ᐱᑖᕈᑎᐅᓇᔭᖅᖢᓂ ᐊᔪᙱᑎᑕᐅᔪᓄᑦ ᐃᒡᓗᖃᑎᒌᓄᑦ.
ᑖᓐᓇ ᑮᓇᐅᔭᖅ ᐊᑐᖅᑕᐅᔪᓐᓇᕋᔭᖅᑐᖅ ᓄᓇᐃᓐᓇᖅᒥᑦ ᐊᐅᓪᓚᖅᓯᒪᓚᐅᑲᒍᒪᔪᓂᑦ ᐋᓐᓂᐊᕕᒡᔪᐊᕐᓇᖅᑕᖃᕐᓂᖓᓂᒃ ᐃᖃᓗᖕᓂᑦ ᐅᕝᕙᓘᓐᓃᑦ ᑭᙵᓂ.
“ᐊᑐᖅᑕᐅᔪᓐᓇᕋᔭᖅᑐᖅ ᐅᖅᓱᐊᓗᒃᑖᕈᑎᐅᓗᓂ, ᓱᓇᒐᖅᑖᕈᑎᐅᓗᓂ, ᓂᕿᑖᕈᑎᐅᓗᓂ ᐅᕝᕙᓘᓐᓃᑦ ᐊᓯᖏᓐᓂᒃ ᐱᖁᑎᓂᒃ ᐊᐅᓪᓚᖅᓯᒪᓂᐊᕐᓗᓂ ᐊᑐᖅᑕᐅᔭᕆᐊᓕᖕᓂᒃ,” ᐅᖃᖅᑐᖅᒪᔪᖅ ᑐᓴᒐᒃᓴᓕᐊᕆᔭᐅᔪᖅ. “ᐅᐱᕐᖔᙳᖅᐸᓪᓕᐊᓕᖅᑎᓪᓗᒍ ᐃᖃᓗᖕᓂ ᑕᐃᒪᓕ ᐊᑐᖅᑕᐅᔪᓐᓇᕋᔭᕐᒥᔪᖅ ᐅᒥᐊᖅᑐᕐᓇᒃᓯᒃᐸᑦ.”
ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓴᖅᑎᑦᑎᓚᐅᕐᒥᔪᑦ ᑐᓂᐅᖅᑲᐃᓂᐊᕐᓂᖏᓐᓂᒃ $900,000 ᖃᓂᒋᔭᖓᓂᒃ ᒐᕙᒪᑐᖃᒃᑯᓐᓂᙶᖅᑐᓂᒃ ᐃᑲᔫᑎᒃᓴᓂᒃ.
ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᓚᐅᕐᒥᔪᑦ ᐃᓐᓇᑐᖃᕐᓂᒃ ᐃᑲᔫᑎᒃᓴᓕᕆᓂᕐᐊᕐᓂᕋᖅᖢᑎᒃ ᑕᕝᕘᓇᓗ ᐊᔪᙱᑦᑐᑦ ᑐᓂᔭᐅᖃᑦᑕᕋᔭᖅᖢᑎᒃ $300-ᓂᑦ ᑕᖅᑭᕐᒥ ᔫᓂᒥᑦ ᐅᒃᑑᐱᕆ 2021 ᑎᑭᓪᓗᒍ..
ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ $20,000 ᐃᑲᔫᑎᒃᓴᖃᕐᓂᐊᕐᓂᕋᖅᖢᑎᒃ ᐊᖑᓇᓱᒃᑐᓕᕆᔨᓄᑦ ᑕᓪᓕᒪᓂᒃ ᓄᓇᓕᖕᓂ ᑲᒪᒋᔭᖏᓐᓃᑦᑐᓂᒃ ᐃᓄᒃᓯᐅᑎᓂᒃ ᓂᕿᖃᕈᓐᓇᕐᓂᐊᕐᒪᑕ ᕿᑎᕐᒥᐅᑦ ᐃᓄᖏᑦ.
ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ ᓱᓕ ᑐᓴᖅᑎᑦᑎᓚᐅᙱᑦᑐᑦ ᓄᕙᒡᔪᐊᕐᓇᖅ-19-ᒧᑦ ᐃᑲᔫᑎᓕᕆᓂᐊᕆᐊᒃᓴᖏᓐᓂᒃ.
ᓄᓇᖃᖅᑳᖅᑐᓕᕆᔨᒃᑯᑦ ᑲᓇᑕᒥ ᑐᓴᖅᑎᑦᑎᓵᓚᐅᖅᓯᒪᖕᒪᑕ ᑐᓂᓯᓂᐊᕐᓂᕋᖅᖢᑎᒃ $19 ᒥᓕᐊᓐ ᑖᓚᐃᑦ ᐅᖓᑖᓂᒃ ᐃᑲᔪᕈᑎᐅᓂᐊᖅᑐᓂᒃ ᓄᓇᕗᒥᑦ ᓄᓇᓖᑦ ᓂᕿᖃᕈᓐᓇᑦᑎᐊᖅᑯᓪᓗᒋᑦ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᐅᓂᖓᓂᒃ.
ᑕᐃᒪᙵᑦ ᐋᓐᓂᐊᕕᒡᔪᐊᕐᓇᖅᑕᖃᓕᓚᐅᖅᓯᒪᖕᒪᑦ, ᑖᒃᑯᐊ ᐱᓕᕆᕝᕕᐅᔪᑦ ᐊᑐᐃᓐᓇᖃᖅᑎᑦᑎᓯᒪᔪᑦ $137.8 ᒥᓕᐊᓐ ᐅᖓᑖᓂ ᐃᓚᒋᔭᐅᓪᓗᓂ ᓄᕙᒡᔪᐊᕐᓇᖅ-19-ᒧᑦ ᐃᑲᔫᑎᓂᒃ ᓄᓇᕗᒥᑦ ᓄᓇᓕᖕᓄᑦ, ᒐᕙᒪᑐᖃᒃᑯᑦ ᐅᖃᖅᓯᒪᓚᐅᕐᑐᑦ.
(0) Comments