ᑲᓇᑕᒥ ᓈᓚᐅᓯᕆᔨᒃᑯᑦ ᑕᓚᕖᓴᓕᕆᔨᒃᑯᓪᓗᑦ CRTC ᐃᑲᔫᑎᖃᖅᑐᑦ $80 ᒥᓕᐊᓐᓂ ᕙᐃᐳ ᐋᑉᑎᒃᑯᑦ ᐊᑦᑕᑕᕈᓐᓇᐅᑎᓄᑦ

For English version, see CRTC pitches in $80M for Nunavik’s fibre optic connection

ᑲᑎᕕᒃ ᓄᓇᓕᓕᒫᑦ ᒐᕙᒪᖓ $80 ᒥᓕᐊᓐ ᑖᓚᓂ ᑐᓂᔭᐅᒃᑲᓐᓂᓚᐅᕐᒪᑕ ᐊᑦᑕᑕᖅᑎᑦᑎᔾᔪᑎᒃᓴᓂ ᑕᓪᓕᒪᓂ ᓄᓇᕕᒃᒥ ᓄᓇᓕᖕᓂ ᕙᐃᐳ ᐋᑉᑎᕐᒧᑦ ᐃᑭᐊᕿᕕᒃᒧᑦ.

ᑲᓇᑕᒥ ᓈᓚᐅᓯᕆᔨᒃᑯᑦ ᑕᓚᕖᓴᓕᕆᔨᒃᑯᓪᓗ (CRTC) ᑐᓴᖅᑎᑦᑎᓚᐅᕐᒪᑕ ᐃᑲᔫᑎᒃᓴᓂ ᔪᓚᐃ 22-ᒥ ᑐᓴᒐᒃᓴᑎᒍᑦ.

ᑮᓇᐅᔭᐃᑦ ᐊᑐᕐᑕᐅᓂᐊᖅᑐᑦ ᐊᑭᓕᐅᑎᐅᓗᑎᒃ ᐋᖅᑭᒃᓱᖅᑕᐅᓂᐊᖅᑐᓄᑦ 933 ᑭᓛᒥᑕᓂ ᑕᑭᓂᓕᖕᒥ ᕙᐃᐳ ᐋᑉᑎᒃᒥ ᐊᑦᑕᑕᕈᑎᐅᓂᐊᖅᖢᓂ ᐅᖓᕙᒥ ᓄᓇᓕᖕᓂ ᐅᑯᓂᖓ ᑲᖏᖅᓱᐊᓗᔾᔪᐊᖅ, ᐊᐅᐸᓗᒃ, ᑕᓯᐅᔭᖅ, ᖁᐊᖅᑕᖅ ᐊᒻᒪ ᑲᖏᕐᓱᒃ, ᐅᑯᑎᒎᓇᕐᓕ ᑐᓴᒐᒃᓴᓕᐊᕆᔭᐅᓂᑯᓂ.

ᐅᓇ ᐃᑲᔪᕈᑎᐅᓂᐊᖅᑐᖅ ᐱᓕᕆᓂᖅ 3-ᒥ ᓄᓇᓕᓕᒫᑦ ᒐᕙᒪᒃᑯᑦ ᕙᐃᐳ ᐋᑉᑎᒃᒥ ᐱᓕᕆᐊᖓᓄᑦ, ᐅᖃᓚᐅᕐᑐᖅ ᑖᓐ ᐸᓗᕆᓐ, ᐅᖃᖅᑎᒋᔭᐅᔪᖅ ᑲᑎᕕᒃ ᓄᓇᓕᓕᒫᑦ ᒐᕙᒪᖓᓄᑦ, ᐊᐱᖅᓱᖅᑕᐅᑎᓪᓗᒍ.

“ᑕᐃᒪᓕ ᑖᔅᓱᒥᖓ ᓇᓗᓇᐃᕐᓯᕋᑦᑕ, ᑕᒪᑐᒧᖓ ᐸᕐᓇᐅᓯᐊᖑᓯᒪᔪᑦ ᐊᒻᒪ ᐊᖏᕈᑎᐅᔪᑦ ᐊᑐᓕᖅᑎᑕᐅᔪᓐᓇᕐᓂᐊᓯᕗᑦ,” ᐅᖃᕐᑐᖅ.

ᐅᓇ ᐃᑲᔫᑎᒃᓴᓂ ᑐᓴᖅᑎᑦᑎᔾᔪᑎ ᐅᖃᐅᓯᐅᓚᐅᕐᑐᖅ ᐱᓇᓱᐊᕈᓯᐅᓚᐅᕐᑐᒥ ᓯᕗᓂᐊᓂ ᐅᑯᐊ ᑲᓇᑕᒥ ᓈᓚᐅᓯᕆᔨᒃᑯᑦ ᐊᒻᒪ ᑕᓚᕖᓴᓕᕆᔨᒃᑯᑦ ᑐᓴᖅᑎᑦᑎᓚᐅᖅᑎᓪᓗᒋᑦ $271.9 ᒥᓕᐊᓐ ᑖᓚᓂ ᐊᑦᑕᑕᐅᑎᐅᓂᐊᖅᑐᓂᒃ ᓄᓇᕗᒥᑦ ᑎᓴᒪᓂ ᓄᓇᓕᖕᓂ ᐅᕗᖓ ᓄᓇᕕᒃᒥ ᕙᐅᐳ ᐋᑉᑎᒃᒧᑦ ᐊᑦᑕᑕᐅᑎᖓᓄᑦ.

ᑕᒪᐃᓐᓂ ᓄᓇᕕᒃᒥ ᐊᒻᒪ ᓄᓇᕗᑦ ᐃᑲᔫᑎᒃᓴᖏ ᑐᓴᖅᑎᑦᑎᔾᔪᑎᑦ ᐅᑯᓇᙶᖅᖢᑎᒃ ᑲᓇᑕᒥ ᓈᓚᐅᓯᕆᔨᒃᑯᓐᓂ ᐊᒻᒪ ᑕᓚᕖᓴᓕᕆᔨᒃᑯᓐᓂ ᐊᑦᑕᑕᐅᑎᓄᑦ ᐃᑲᔫᑎᒃᓴᓂ, $675 ᒥᓕᐊᓐ ᑖᓚᓂ, ᑕᓪᓕᒪᓂ ᐊᕐᕌᒍᓂ ᐃᑲᔫᑎᐅᓂᐊᖅᑐᒥ ᐱᐅᓯᕚᓪᓕᖅᑎᑦᑎᓂᕐᒥ ᐃᓄᑭᑦᑐᓂ ᐊᒻᒪ ᐃᓄᒋᐊᓃᑦᑐᓄᑦ ᑲᓇᑕᒥ.

ᑲᓇᑕᒥ ᓈᓚᐅᓯᕆᔨᒃᑯᑦ ᐊᒻᒪ ᑕᓚᕖᓴᓕᕆᔨᒃᑯᑦ ᐃᒻᒥᒃᑰᖓᓪᓗᑎᒃ ᒪᓕᒐᓕᕆᔨᐅᕗᑦ ᑐᓴᐅᒪᔾᔪᑎᓕᕆᓂᕐᒥᒃ ᐊᒻᒪ ᐅᖄᓚᐅᓯᕆᓂᕐᒥ ᑲᓇᑕᒥ. ᐃᑲᑎᖃᖅᑎᑕᐅᕙᒃᑐᖅ ᐊᑭᓕᐅᑎᓂ ᐱᓕᕆᕝᕕᖕᓂ ᐱᖁᔭᑎᒍᑦ ᐋᖅᑭᒃᓯᒪᔭᖏᓐᓂᒃ.

“ᐱᐅᔪᐊᓗᖕᒥ ᑐᓴᐅᒪᔾᔪᑎᓄᑦ ᐱᔨᑦᑎᕋᐅᑎᑕᖃᕐᓂᖅ ᐱᒻᒪᕆᐊᓘᖕᒪᑦ ᖃᐅᑕᒫᑦ ᐊᑐᖅᑕᕐᑎᒍᑦ,” ᐅᖃᓚᐅᕐᑐᖅ ᕕᑭ ᐄᐅᕋᐃᑦᔅ, ᓈᓚᐅᓯᕆᔨᒃᑯᓐᓄᑦ ᐊᐅᓚᑦᑎᔨ, ᑐᓴᒐᒃᓴᓕᐅᖅᑎᓪᓗᒋᑦ.

“ᐅᓇ ᐱᓕᕆᐊᒃᓴᖅ ᐊᒃᑐᐃᓂᖃᓪᓚᕆᖕᓂᐊᖅᑐᖅ ᑖᒃᑯᓂᖓ ᓄᓇᓕᖕᓂ, ᐊᑦᑕᑕᖅᑎᑦᑎᓗᑎᒃ 40 ᐅᖓᑖᓂ ᐱᓕᕆᕝᕕᐅᖃᑦᑕᖅᑐᓂᒃ ᐃᓚᒋᓗᒋᑦ ᐃᓕᓐᓂᐊᕐᕖᑦ ᐊᒻᒪ ᐋᓐᓂᐊᕕᒐᓚᐃᑦ.”

ᐅᑯᐊᓕ ᑲᓇᑕᒥ ᓈᓚᐅᓯᕆᔨᒃᑯᑦ ᐃᓱᒪᔪᑦ ᐱᓕᕆᓂᖅ ᐊᑦᑕᑕᖅᑎᑦᑎᓂᕐᒥ ᓄᓇᕕᒃᒥ ᓄᓇᓕᖕᓂ ᐱᐊᓂᒃᑕᐅᓇᔭᕐᓂᖓᓂ ᐊᕐᕌᒍᓂ ᐱᖓᓱᓂ ᐃᑲᔫᑎᒃᓴᓂ ᐅᖃᐅᓯᐅᓚᐅᖅᑎᓪᓗᒍ, ᑖᒃᑯᐊ ᑲᒥᓴ ᑐᓴᒐᒃᓴᖏ ᐅᖃᕐᓯᒪᓚᐅᕐᑐᑦ.

ᐊᕕᒃᑐᖅᓯᒪᓂᒃᑯᑦ ᑲᑎᒪᑎᓪᓗᒋᑦ ᒪᐃ 2024-ᒥ ᐸᓗᕆᓐ ᐅᖃᓚᐅᕐᑐᖅ ᑖᓐᓇ ᐱᓕᕆᐊᒃᓴᖅ, ᐊᑦᑕᑕᖅᑎᑦᑎᔾᔪᑎᐅᓇᓱᒃᑐ ᑕᒪᐃᓐᓂ ᓄᓇᕕᒃᒥ ᐅᖓᕙᒥᑦ ᓄᓇᓕᖕᓂ ᐃᓱᒪᒋᔭᐅᓚᐊᕐᑐᖅ ᐊᑭᖃᕆᐊᒃᓴᖓᓂ ᒫᓂ $158 ᒥᓕᐊᓐᓂ. ᐅᓂᒃᑳᑦ ᐅᖃᕐᓯᒪᓚᐅᕐᒥᔪᑦ ᐱᓕᕆᐊᒃᓴᖅ 2026 ᐊᐅᔭᖓᓂ ᐱᐊᓂᒃᑕᐅᓂᐊᕋᓱᒋᔭᐅᓪᓗᓂ.

ᒫᓐᓇᓕ ᐅᑯᐊ ᑕᓯᐅᔭᕐᔪᐊᑉ ᓯᒡᔭᖓᓂ ᓄᓇᓕᑦ ᑰᔾᔪᐊᕌᐱᒃ, ᐅᒥᐅᔭᖅ, ᐃᓄᒃᔪᐊᒃ, ᐳᕕᕐᓂᕐᑐᖅ, ᐊᑯᓕᕕᒃ, ᐃᕗᔨᕕᒃ ᐊᒻᒪ ᓴᓪᓗᐃᑦ ᐊᑦᑕᑕᖅᑕᐅᓯᒪᔪᑑᒋᐊᒃᓴᖏᓐᓂ ᓄᓇᕕᒃᒥ ᓄᓇᓕᖕᓂ.

ᑰᔾᔪᐊᖅ ᐋᖅᑭᒃᓯᔪᒪᔪᑦ ᐸᐃᐳ ᐋᑉᑎᒃᓂ ᐊᑦᑕᑕᖅᑎᑦᑎᔪᒪᓪᓗᑎᒃ ᑲᕙᕙᓯᑲᒪᒃᑯᑦ ᐊᑦᑕᑕᕈᓐᓇᐅᑎᖓᓄ ᓱᓕ ᐱᐊᓂᒃᓯᒪᙱᑦᑐᒧᑦ.