ᐱᑕᖃᙱᓗᐊᕐᓂᖓ ᓄᓇᕕᒃᒥ ᑎᒥᒧᑦ ᖃᐅᔨᓴᕈᑎᓂ ᑕᐃᔭᐅᔪᓂᒃ CT scans ‘ᓈᒻᒪᙱᓗᐊᖅᑐᖅ’: MNA

For English version, see Forcing northerners to travel for CT scans ‘unacceptable,’ Quebec leader charges

ᒪᓕᒐᓕᐅᖅᑎᑦ ᐊᑭᐊᓃᙶᖅᐸᒃᑐᑦ ᐱᖁᔨᕗᖔᕈᑎᖓ ᖃᐅᔨᓴᕈᑎᒥᒃ CT scanner-ᒥ ᐋᖅᑭᒃᓯᖁᔨᓪᓗᑎᒃ ᓄᓇᕕᒃᒥ ᐊᖏᖅᑕᐅᓚᐅᕐᑐᖅ ᑕᒪᐃᓐᓄᑦ ᒪᐃ 21-ᖑᑎᓪᓗᒍ ᑯᐸᐃᒃᒥ ᐊᖓᔪᖅᑳᕆᔭᐅᔪᑦ ᑲᑎᒪᑎᓪᓗᒋᑦ.

ᐊᑮᑎᐊᒧᑦ ᒪᓕᒐᓕᐅᖅᑎ (Acadia MNA) ᐋᓐᑕᕇ ᒨᕆᓐ, ᓕᐳᕈᓪᑯᓐᓄᑦ ᐅᖃᓪᓚᒃᑎᒋᔭᐅᔪᖅ ᓄᓇᖃᖅᑳᖅᑐᓕᕆᓂᕐᒧᑦ ᐊᒻᒪ ᐃᓄᖕᓄᑦ, CAQ ᒐᕙᒪᓄᑦ ᐋᓐᓂᐊᕕᖕᒥ ᖃᐅᔨᓴᕈᑎᒃᓴᓂ ᐊᔾᔨᓕᐅᕆᑲᑕᖕᓂᒃᑯᑦ ᐱᔨᑦᑎᕋᐅᑎᖃᖁᓪᓗᓂᒋᑦ ᓄᓇᕕᒃᒥ ᐋᖅᑭᒃᓯᓗᑎᒃ ᖃᐅᔨᓴᕈᑎᓂᒃ CT scans “ᖃᓂᑦᑐᒃᑯᑦ.”

“ᐅᑯᐊᓕ CAQ ᒐᕙᒪᒃᑯᑦ ᐅᑯᓇᓂ ᓄᓇᖃᖅᑐᓂ ᓚᕚᓪᒥ ᐅᕝᕙᓘᓐᓃᑦ ᑐᕆ-ᕆᕗᔅᒥ ᐊᐅᓪᓚᖅᑎᑦᑎᖃᑦᑕᕋᔭᕐᒪᑖ 1,500 ᑭᓛᒥᑕᓂ ᐅᖓᓯᖕᓂᓕᖕᒥ ᖃᐅᔨᓴᖅᑕᐅᔭᖅᑐᕐᓗᓃ?” ᒨᕆᓐ ᐅᖃᓚᐅᕐᑐᖅ ᐅᓪᓘ ᐃᓚᖓᓂ ᑐᓴᒐᒃᓴᓕᐅᖅᑎᓪᓗᒋᑦ, ᐅᖃᖅᖢᓂ ᑕᒪᓐᓇ “ᓇᒻᒪᙱᓗᐊᖅᑐᖅ” ᐅᑭᐅᕐᑕᖅᑐᕐᒥᐅᑕᑦ ᑕᐃᒪᐃᖃᑦᑕᕆᐊᖃᖅᑎᓪᓗᒋᑦ.

“ᐅᓇ ᑲᒪᒋᔭᐅᔭᕆᐊᓕᒃ ᒐᕙᒪᐅᔪᓂᒃ ᐱᔨᑦᑎᕋᐅᑎᖃᖅᑎᑦᑎᓗᑎ ᑕᒪᐃᓐᓂᓕᒫᖅ ᓄᓇᖃᖅᑐᓂᒃ ᑯᐸᐃᒃᒥ ᐅᓇᓗ ᐱᓗᐊᖅᑐᒥ ᐋᓐᓂᐊᖃᖅᑕᐃᓕᓂᕐᒧᑦ ᐱᔨᑦᑎᕋᐅᑎᓕᕆᓂᖅ.”

ᐋᑐᕆ ᓄᐃᓲ, ᑐᓴᒐᒃᓴᓕᕆᔨ ᑯᐸᐃᒃᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓᓄᑦ ᑯᕆᔅᑎᐊᓐ ᑐᐱ, ᐅᖃᓚᐅᕐᑐᖅ ᖃᕋᓴᐅᔭᒃᑯ ᑎᑎᕋᖅᑕᖓᒍᑦ ᓄᓇᑦᓯᐊᒥ ᐱᕙᓪᓕᐊᔪᓄᑦ ᑖᓐᓇ ᒥᓂᔅᑕ “ᖃᖁᐅᔨᒪᓂᕋᖅᖢᓂᐅᒃ ᐱᔭᐅᔭᕆᐊᖃᒻᒪᕆᒃᑐᓂᒃ ᓄᓇᕕᒃᒦᑦᑐᓂᒃ.”

“ᐱᓕᕆᖃᑎᖃᐃᓐᓇᕐᓂᐊᖅᑐᒍ ᐱᓕᕆᖃᑎᒋᕙᒃᑕᑦᑎᓐᓂᒃ, ᐱᓗᐊᖅᑐᒥ ᓄᓇᕕᒃᒥ ᓄᓇᓕᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᒻᒪ ᐃᓄᓕᕆᔨᒃᑯᓐᓂᑦ, ᒪᑯᐊ ᐱᓕᕆᐊᒃᓴᐃᑦ ᐱᔭᐅᔭᕆᐊᓕᖕᓄᑦ ᑕᒫᓂᕐᒥᐅᑕᓄᑦ ᐱᓕᕆᐊᕆᔭᐅᑎᒃᑲᓐᓂᕐᓗᑎᒃ, ᐱᓗᐊᖅᑐᒥᓐ ᐋᖅᑭᒃᓯᓗᑎᒃ ᖃᐅᔨᓴᕈᑎᒃᓴᒥ CT scans-ᓂ, ᑖᓐᓇᓗ ᑕᒪᑦᑕ ᑕᐃᒪᐃᖁᓪᓗᑎᒍ.”

ᐅᓇ CT scan, ᐅᕝᕙᓘᓐᓃᑦ ᖃᕋᓴᐅᔭᒃᑯᑦ ᓴᖅᑭᑎᑦᑎᔾᔪᑎ ᑎᒥᐅᑉ ᖃᓄᐃᓕᖓᓂᖓᓂᒃ, ᐊᔾᔨᓕᐅᕆᕙᒃᖢᑎᒃ ᒪᑯᐊ ᐳᖓᖕᓄᑦ ᓴᐅᓂᕐᓄᓪᓗ ᐊᑐᖅᑕᐅᕙᒃᑐᑎᑐᑦ.

ᓘᒃᑖᖅ ᓈᑕᓕ ᐳᓛᓐᔪ, ᑐᑭᒧᐊᖅᑎᑦᑎᔨ ᐱᔨᑦᑎᕋᐅᑎᓕᕆᓂᕐᒥᒃ ᐋᓐᓂᐊᕕᖕᓄᑦ ᒪᕐᕉᖕᓄᑦ ᓄᓇᕕᒃᒥ, ᐅᖃᓚᐅᕐᑐᖅ ᑕᖅᑭᐅᓚᐅᖅᑐᒥᓐ ᑕᑯᔪᒪᓂᕋᖅᖢᓂ ᖃᐅᔨᓴᕈᑎᒃᓴᓂ CT scans ᐊᑐᐃᓐᓇᐅᓂᐊᖅᑐᓂᒃ ᑰᔾᔪᐊᖅᒥᓐ ᐊᒻᒪ ᐳᕕᕐᓂᑐᖅᒥ ᐋᓐᓂᐊᕕᐊᓗᖕᓂ.

ᐅᖃᓚᐅᕐᑐᖅ ᖃᐅᔨᔭᐅᓴᓕᓂᖅ ᐱᐅᓯᕚᓪᓕᕈᑎᐅᓇᔭᖅᑐᖅ ᐋᓐᓂᐊᖅᑐᑦ ᑲᒪᒋᔭᐅᖃᑦᑕᕐᓂᖏᑦ.

ᐳᓛᓐᔪᒧᓪᓕ, ᖃᐅᔨᓴᕈᑎ ᐊᔾᔨᓕᐅᕈᑎ scan ᐃᑲᕐᕋᒥ ᓇᑉᐸᕐᒥᓪᓗ ᖃᐅᔨᓴᖅᑕᐅᔾᔪᑎᐅᖃᑦᑕᕋᔭᕐᑐᑦ, ᑭᓯᐊᓂᓕ ᓱᓕ ᒫᓐᓇ ᓄᓇᕕᒻᒥᐅᑦ ᐊᐅᓪᓚᖅᑎᑕᐅᔭᕆᐊᖃᖅᐸᒃᑐᑦ ᐅᓪᓗᒐᓴᖕᓄᑦ ᖃᐅᔨᓴᖅᑕᐅᔭᕐᑐᕐᓗᑎᒃ ᑕᐃᒪᐃᑦᑐᒧᑦ.