ᐅᖃᓪᓚᑲᑕᕈᓘᔭᕐᓂᖅ, ᐊᖏᖃᑎᒌᖕᓂᖃᙱᑦᑐᑦ ᖃᓄᖅ ᓄᖅᑲᖅᑎᑕᐅᓂᕐᓴᐅᔪᓐᓇᕆᐊᒃᓴᖏᑦ ᐃᓄᒋᐊᓂ ᐃᒥᐊᓗᖃᑦᑕᓗᐊᖅᑐᑦ

For the English version of this story, please see Debates, no consensus on curbing public drinking in Iqaluit.

ᑲᑎᒪᔨᒋᔭᐅᔪᑦ ᐃᖃᓗᐃᑦ ᐊᑦᑕᓇᖅᑐᒦᑦᑕᐃᓕᑎᑦᑎᓂᕐᒧᑦ ᑲᑎᒪᔨᕋᓛᖏᑦ ᐃᒥᐊᓗᒃᑖᕆᔭᐅᕙᒃᑐᓂ ᖃᐅᑕᒫᓐ ᐊᐅᓚᑕᐅᓂᕐᓴᐅᔪᒪᕗᑦ ᑐᓴᐅᒪᓕᕐᓂᖏᓐᓄ ᐱᑦᑎᐊᖃᑦᑕᐅᑎᙱᓗᐊᓕᕐᓂᖏᓐᓂᒃ ᐱᐊᒥ ᐊᒻᒪ ᕗᐊᐃᓂᒥ ᓂᐅᕕᕐᕕᐅᑉ ᖃᓂᒋᔭᖓᓂ, ᑭᓯᐊᓂᓕ ᐊᖏᖃᑎᒌᒍᓐᓇᓚᐅᙱᑦᑐᑦ ᑕᒪᓐᓇ ᓈᒻᒪᒃᑲᓗᐊᕐᒪᖔᑦ.

ᑲᑎᒪᔨᕋᓛᑦ — ᐅᑯᓇᙶᕐᓯᒪᓪᓗᑎᒃ ᓄᓇᓕᐸᐅᔭᐃᑦ ᐃᖅᑲᓇᐃᔭᖅᑎᖏᓐᓂᒃ, ᑲᑎᒪᔨᓂᒃ ᐊᒻᒪ ᑭᒡᒐᖅᑐᐃᔨᓂ ᓄᓇᕗᒥᑦ ᒐᕙᒪᒃᑯᓐᓄᑦ, ᐸᓖᓯᓄᑦ ᐊᒻᒪ ᐊᔾᔨᒌᙱᑦᑐᓂᒃ ᑲᑐᔾᔨᖃᑎᒌᓂᒃ — ᑲᑎᓚᐅᕐᓯᒪᖕᒪᑕ ᐊᐃᕆᓕ 3-ᒥ ᓯᕗᓪᓕᖅᐹᖑᓪᓗᓂ ᑕᒪᑐᒪᓂ ᐊᕐᕌᒍᒥ.

ᐱᐊ ᐊᒻᒪ ᐅᐊᐃᓂᒥ ᓂᐅᕕᕐᕕᒃ “ᑐᕌᒐᕆᔭᐅᓕᕐᒪᑦ” ᐃᓄᒋᐊᓄᑦ ᐊᑦᑕᓇᖅᑐᒦᑦᑕᐃᓕᑎᑦᑎᓂᕐᒧᑦ, ᐅᖃᕐᑐᖅ ᑲᑎᒪᔨ ᐋᒻᐳ ᐊᒡᓘᒃᑲᖅ, ᐃᒃᓯᕙᐅᑕᕆᔭᐅᔪᖅ ᑲᑎᒪᔨᕋᓛᓄᑦ.

ᐅᖃᓚᐅᕐᑐᖅ ᓂᐅᕕᕐᕕᒃ ᓂᐅᕕᖅᑕᐅᔪᓐᓇᖅᑐᓂ ᐅᓪᓗᕐᒥ ᐅᓄᕈᓐᓃᖅᐹᓪᓕᖅᓗᒋᑦ — ᑕᐃᒪᓐᓇ ᐋᖅᑭᒃᓯᓚᐅᕐᓯᒪᓪᓗᑎ ᑲᖏᖅᖠᓂᖅᒥ.

ᐊᒡᓘᒃᑲᐅᑉ ᐃᓱᒪᒋᔭᖓ ᐃᓚᖃᓚᐅᕐᒥᔪᖅ ᐅᔾᔨᕈᓱᒍᑎᖃᒃᑲᓐᓂᖁᔨᓪᓗᓂ “ᐱᖁᔨᙱᓪᓚᕆᖕᓂᕐᒥᒃ” ᐃᓄᒋᐊᓂ ᐃᒥᐊᓗᖕᓂᕐᒥᒃ ᐊᒻᒪᓗ ᐸᓖᓯᑕᖃᐅᒃᑲᓐᓂᕐᓗᓂ ᓂᐅᕕᕐᕕᐅᑉ ᒥᒃᓵᓂᑦ ᐊᒻᒪᓗ ᐃᑲᔫᑎᑕᖃᒃᑲᓐᓂᕐᓗᓂ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪ ᐊᑐᓗᐊᖃᑦᑕᕐᓂᕐᒧᑦ ᐱᔨᑦᑎᕋᐅᑎᓄᑦ. ᐅᖃᒃᑲᓐᓂᕆᓪᓗᓂ ᑲᑎᒪᔨ ᑲᐃᐅᓪ ᓴᐳᑦ ᐊᕐᕌᓂ ᐅᖃᐅᓯᕆᓚᐅᕐᓯᒪᔭᖓᓂ ᐃᒥᐊᓗᖕᒥ ᓄᖅᑲᖓᑎᑦᑎᑦᑎᐊᒻᒪᕆᓚᐅᑲᒃᑎᑦᑎᓂᕐᒥᒃ.

ᒪᐃᔭᐅ ᑐᒡᓕᖓ ᑭᒻ ᓯᒥᑦ ᐊᐱᖅᑯᑎᖃᓚᐅᕐᑐᖅ ᖃᓄᐃᓕᕈᑎᐅᔪᓐᓇᕐᑐᓂᒃ ᐃᒥᐊᓗᖕᒥ ᓂᐅᕕᖃᑦᑕᖅᑐᑦ ᐃᓱᖃᓕᖅᑎᑕᐅᓗᑎ ᖃᔅᓯᓂ ᓂᐅᕕᕈᓐᓇᕐᓂᖏᓐᓂᒃ ᐅᓪᓗᕐᒥ.

“ᑲᓇᑕᓕᒫᒥᑦ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᖅ ᓈᒻᒪᙱᓕᐅᕈᑎᐅᓗᐊᖅᑐᐊᓘᓕᕐᒪᑦ ᒪᑯᓄᖓ ᐃᒥᐊᓗᓗᐊᑲᑕᖕᓂᕐᒧᑦ, ᐋᖓᔮᕐᓇᓯᖅᑐᓂ ᐊᑐᓗᐊᕐᓂᕐᒧᑦ,” ᓯᒥᑦ ᐅᖃᕐᑐᖅ.

“ᖃᐅᔨᒪᓗᐊᙱᑦᑐᖓ ᖃᓄᐃᓕᐅᒍᑎᐅᓇᔭᙱᓐᓂᖓᓂ, ᑭᓯᐊᓂᓕ ᐃᓱᒪᔪᖓ ᑭᒃᑯᓕᒫᓂ ᐅᔾᔨᕈᓱᓕᖅᑎᑦᑎᒃᑲᓐᓂᕐᓂᕐᒥ ᐊᒻᒪ ᐱᐅᓯᕚᓪᓕᖅᑎᓪᓗᒍ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᑎᑦᑎᓂᖅ ᓄᓇᑦᑎᓐᓂ ᒪᐅᓇ ᐱᙳᐊᖅᑐᓕᕆᓂᒃᑯᑦ, ᖃᓄᐃᓕᐅᕈᑎᒃᓴᓄᑦ, ᐃᓂᖃᕈᓐᓇᖅᑎᑦᑎᓂᒃᑯᑦ — ᐃᓱᒪᔪᖓ ᑕᒪᒃᑯᐊ ᐃᑲᔫᑎᐅᔪᓐᓇᕐᓂᖏᑦ ᓈᒻᒪᙱᓕᐅᕈᑎᐅᔭᑦᑐᑦ ᐱᒋᐊᕈᑎᖏᓐᓄᑦ ᖃᓄᐃᓕᒍᑎᐅᔪᓐᓇᕐᓂᑐᐊᙳᙱᑦᑐᒥ.”

ᐅᓄᕐᓯᑎᑦᑎᒃᑲᓐᓂᕐᓂ ᐸᓖᓯᓂ ᓄᖅᑲᖅᑎᑦᑎᓇᓱᖕᓂᕐᒧᑦ ᐃᓄᒋᐊᓂ ᐃᒥᐊᓗᖃᑦᑕᕐᓂᕐᒥᒃ ᐃᖃᓗᖕᓂᑦ ᐊᒻᒪ ᑲᖏᖅᖠᓂᖅᒥ “ᐅᔾᔨᕐᓇᒻᒪᕆᒃᑐᒥ ᐅᓄᕈᓐᓃᖅᐹᓪᓕᕈᑎᐅᓚᐅᕐᑐᖅ” ᖃᓄᐃᓕᐅᕈᑎᐅᔭᑦᑐᓂᒃ ᑕᒪᐃᓐᓂ ᓄᓇᓕᖕᓂᑦ, ᐅᖃᓚᐅᕐᑐᖅ ᑲᑎᒪᔨᕋᓛᓄᑦ ᐃᓚᒋᔭᐅᔪᖅ ᓵᔾᔭᓐᑦ ᕌᑉ ᑕᐃᓕ ᐸᓖᓯᒃᑯᓐᓂ.

ᑭᓯᐊᓂᓕ, ᐊᐱᖅᑯᑎᖃᓚᐅᕐᑐᖅ ᐅᓪᓗᕐᒧᑦ ᓂᐅᕕᖅᑕᐅᔪᓐᓇᖅᑐᓂ, ᐃᓱᒪᓪᓗᓂ ᐃᓄᐃᑦ “ᓂᐅᕕᕐᕕᓕᐊᕐᓂᕐᓴᐅᖃᑦᑕᕋᔭᕐᓂᖏᓐᓂ.”

“ᐃᓄᒋᐊᓂ ᐃᒥᐊᓗᒃᑐᖃᐃᓐᓇᐅᔭᕐᓂᐊᖅᑐᖅ. ᑕᒪᓐᓇ ᑕᐃᒪᐃᓕᕐᒪᑦ,” ᑕᐃᓕ ᐅᖃᕐᑐᖅ.

ᑲᑎᒪᔨᕋᓛᓄᑦ ᐃᓚᒋᔭᐅᔪᖅ ᓯᐅᕆ ᕌᐳᑦᓴᓐ, YWCA ᐊᒡᕕᒃᑯᑦ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᖓ, ᐅᖃᓚᐅᕐᑐᖅ ᓂᐅᕕᕐᕕᒃ ᓂᐅᕕᕆᐊᖅᐸᒃᑐᑦ ᐊᑎᖏᓐᓂ ᓂᐅᕕᕈᓐᓇᙱᑎᑕᐅᔪᑦ ᐱᑦᑎᐊᙱᓗᐊᖅᓯᒪᓂᑰᓂᕐᒧᑦ.

ᐃᖅᑲᐅᒪᔪᖅ ᐃᖅᑲᓇᐃᔭᖅᐸᒃᑎᓪᓗᒍ ᓂᕆᔭᖅᑐᕐᕕᒃᒥ 1990-ᖏᓐᓂ ᐱᓯᒪᖃᑦᑕᓚᐅᕐᓯᒪᓂᖏᓐᓂ ᐃᓄᐃᑦ ᐊᑎᖏᓐᓂ ᐱᔨᑦᑎᕋᖅᑕᐅᔭᕆᐊᖃᙱᑦᑐᓂᒃ.

ᐃᑲᕐᕋᕐᒥ ᑲᑎᒪᓂᐅᔪᖅ ᐊᒻᒪ ᐅᖃᐅᓯᖃᑲᑕᒍᑎᐅᓚᐅᕐᒥᔪᖅ ᓄᓇᓕᐸᐅᔭᐃᑦ ᓂᕿᑖᕐᕕᖕᓂ ᓂᐅᕕᕐᕕᖕᓂ ᓴᓂᑦᑎᐊᖓᓃᑐᐃᓐᓇᓗᐊᖃᑦᑕᕐᓂᖏᓐᓂ ᐊᒻᒪᓗ ᕿᒻᒦᑦ ᐃᐱᕐᓯᒪᙱᑦᑐᑦ ᑲᒪᒋᔭᐅᑦᑎᐊᒃᑲᓐᓂᕆᐊᖃᕐᓂᖏᓐᓂᒃ.

ᐊᑦᑕᓇᖅᑐᒦᑦᑕᐃᓕᑎᑦᑎᓂᕐᒧᑦ ᑲᑎᒪᔨᕋᓛᑦ ᑲᑎᒪᒃᑲᓐᓂᓛᕐᑐᑦ ᐅᒃᑑᐱᕆ 7.