ᐃᒃᓯᕋᕐᔪᐊᕕᓂᖅ ᐃᖅᑲᖅᑐᖅᑕᐅᕗᖅ ᐊᕐᕌᒍᓄᑦ 6−ᓄᑦ ᐊᓄᓪᓚᒃᓰᕕᖕᒥ ᓱᕈᓯᕐᓂ ᖁᓄᔪᓐᓂᐊᖅᓯᓂᕐᒥ

For English version, see Ex-priest sentenced to six years in prison for assaulting children

ᐃᒃᓯᕋᕐᔪᐊᒃᑯᓐᓂ ᐃᒃᓯᕋᕐᔪᐊᖑᓚᐅᖅᑐᖅ ᐃᐊᕆᒃ ᑎᔭᐃᒍᕐ ᐃᖅᑲᖅᑐᖅᑕᐅᓚᐅᖅᐳᖅ ᐊᕐᕌᒍᓄᑦ 6−ᓄᑦ ᖃᓪᓗᓈᑦ ᓄᓇᖓᓐᓂ ᐊᓄᓪᓚᒃᓰᕕᖓᓄᑦ ᔭᓄᐊᕆ 30−ᒥ ᐃᖅᑲᖅᑐᒐᒃᓴᐅᔾᔪᑎᓄᑦ ᑭᐅᓚᐅᖅᑎᓪᓗᒍ ᐸᓯᔭᒃᓴᐅᓂᖓᓂ ᖁᓄᔪᓐᓂᐊᕐᓂᕐᒧᑦ 7−ᓂ ᓱᕈᓯᕐᓂ ᐃᒡᓗᓕᖕᒥ ᐅᓄᕐᓂᖅᓴᐅᔪᓂ ᐊᕐᕌᒍᑦ 40−ᓂ ᖄᖏᖅᓯᒪᓕᖅᑐᓂ.

ᑎᔭᐃᒍᕐ, 77, “ᖃᐅᔨᓴᖅᐸᒃᖢᓂ ᖁᓄᔪᓐᓂᐊᖅᑎᐅᕗᖅ” “ᓱᕋᑦᑎᕆᓚᐅᖅᑐᒥ ᓱᕈᓯᐅᓂᖏᓐᓂ,” ᐃᖅᑲᖅᑐᐃᔨ ᕙᐃᔭᔅ ᐊᓕᐸᐃ ᐅᖃᓚᐅᖅᐳᖅ ᐃᖅᑲᖅᑐᐃᑎᓪᓗᒍ ᐃᖃᓗᖕᓂ ᐃᖅᑲᖅᑐᐃᕕᖕᒥ.

ᐅᖃᓕᒫᓚᐅᙱᓐᓂᖓᓂ ᐃᖅᑲᖅᑐᐃᔨᒧᑦ ᖃᓄᐃᓕᔭᐅᓂᖓᓄᑦ, ᐊᓕᐸᐃ ᐊᑐᐃᓐᓇᖃᖅᑎᑦᑎᓚᐅᖅᐳᖅ ᑎᔭᐃᒍᕐᒥ ᐱᕕᖃᕐᓂᖓᓂ ᑭᖑᓪᓕᖅᐹᒥ ᐅᖃᐅᓯᒃᓴᓕᐅᕐᓂᕐᒧᑦ.

20−ᒐᓚᖕᓂ ᐃᓄᖕᓂ — ᐃᓚᖃᖅᑐᒥ ᐆᒪᐃᓐᓇᕈᓐᓇᖅᓯᒪᔪᓂ ᐱᕋᔭᒃᑕᐅᓂᑯᓂ ᐊᒻᒪ ᐃᓚᖏᓐᓂ−ᖁᙱᐊᓚᐅᖅᐳᑦ ᐃᒃᓯᕚᒃᕕᖓᓂ ᑎᔭᐃᒍᕐ ᐊᐱᕆᑎᓪᓗᒍ ᐃᓱᒪᒋᔪᓐᓇᐃᕐᕕᐅᔪᒪᓪᓗᓂ.

ᐃᓚᖏᑦ ᐱᕋᔭᒃᑕᐅᓂᑯᑦ ᕿᐊᓯᓚᐅᖅᐳᑦ.

“ᐊᑑᑎᖃᕈᓐᓇᕈᓂ, ᐊᓯᔾᔨᖅᓯᒪᓕᖅᐳᖓ,” ᑎᔭᐃᒍᕐ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐊᓄᓪᓚᒃᓯᕐᓂᖓᓂ ᐱᕕᖃᓚᐅᖅᐳᖅ ᐃᖅᑲᐅᒪᓂᕐᒥ.

“ᐊᒻᒪᓗᑦᑕᐅᖅ, ᖄᖏᖅᓯᒪᔪᓂ ᐊᕐᕌᒍᓄᑦ 40−ᓄᑦ ᐱᕋᔭᒃᑲᓐᓂᖅᓯᒪᙱᓚᖓ.”

ᐊᓕᐸᐃ ᑕᐃᓯᓚᐅᖅᐳᖅ 15-ᒥᓂᑦᒥ ᓄᖅᑲᖓᓚᐅᑲᖕᓂᕐᒥ ᐃᓱᒪᒃᓴᖅᓯᐅᕆᓂᕐᒥ ᑎᔭᐃᒍᕐ ᐅᖃᐅᓯᖏᓐᓂ.

ᐅᑎᕋᒥ, ᐅᖃᓚᐅᖅᐳᖅ ᑎᔭᐃᒍᕐ “ᒪᒥᐊᓯᒪᕐᔪᐊᕐᓂᖓᓂ ᖃᓄᐃᓕᐅᕐᓂᕆᓚᐅᖅᑕᖏᓐᓄᑦ,” ᐃᓚᒋᐊᖅᓯᓪᓗᓂ ᐸᓯᔭᒃᓴᐅᓂᖓᓂ ᑭᐅᔾᔪᑎᖓ ᐃᖅᑲᖅᑐᒐᒃᓴᐅᔾᔪᑎᓄᑦ “ᐊᖏᐸᓗᒃᑐᒥ” ᒥᒃᖠᒋᐊᖅᑎᑦᑎᓪᓗᓂ ᐱᔾᔪᑕᐅᕗᖅ ᐃᖅᑲᖅᑐᐃᔨᒧᑦ ᖃᓄᐃᓕᔭᐅᓂᖓᓄᑦ ᓴᐳᔾᔨᓂᖃᓚᐅᕐᒪᑦ ᐱᕋᔭᒃᑕᐅᓂᑯᓂ ᐅᓂᒃᑳᕆᐊᖃᕐᓂᕐᒥ ᐃᖅᑲᖅᑐᐃᕕᖕᒥ.

ᐃᖅᑲᖅᑐᒐᒃᓴᐅᔪᓄᑦ ᑎᔭᐃᒍᕐᒧᑦ ᐱᔾᔪᑎᖃᖅᐳᖅ ᐃᖅᑲᓇᐃᔭᓚᐅᕐᓂᖓᓂ ᐃᒃᓯᕋᕐᔪᐊᖑᓂᕐᒥ ᐃᒡᓗᓕᖕᒥ ᕿᑎᐊᓂ 1978−ᒥ ᐊᒻᒪ 1982−ᒧᑦ. ᐊᑕᐅᓯᐅᔪᒥ ᖁᓄᔪᓐᓂᐊᕐᓂᐅᔪᖅ ᐱᓕᕆᓂᖃᓚᐅᖅᐳᖅ ᐱᐅᙱᓐᓃᔭᖅᑐᒥ, ᐊᓕᐸᐃ ᑐᓴᓚᐅᖅᐳᖅ.

ᐃᖅᑲᖅᑐᐃᕕᖕᒥ ᑎᑎᖅᑲᖁᑕᐅᔪᑦ ᑎᑎᕋᖅᓯᒪᑎᓪᓗᒍ 6−ᖑᔪᓂ ᐱᕋᔭᒃᑕᐅᓂᑯᓂ, ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᐊᑎᖏᓐᓂ ᐅᖃᐅᓯᖃᕆᐊᖃᙱᖦᖢᑎᒃ ᐱᔾᔪᑎᖃᖅᑐᒥ ᐃᖅᑲᖅᑐᐃᕕᖕᒥ−ᑎᓕᔭᐅᔪᒥ ᑎᑎᕋᖅᑕᐅᓂᖓᓂ ᐱᔪᓐᓇᖅᑎᑕᐅᙱᓐᓂᖓᓂ, ᐊᓕᐸᐃ ᐅᖃᓕᒫᓚᐅᖅᐳᖅ ᓇᐃᒡᓕᒋᐊᖅᓯᒪᔪᓂ ᐃᖅᑲᐅᒪᓂᐅᔪᓂ 7−ᖑᔪᓂ ᐱᕋᔭᒃᑕᐅᓂᑯᓂ. ᐃᖅᑲᖅᑐᐃᑎᑦᑎᔨᑦ ᐅᖃᐅᔾᔪᐃᒋᐊᖅᑎᐊ ᐃᐊᒪ ᐹᔅ ᓇᓗᓇᐃᖅᓯᓚᐅᖅᐳᖅ ᑎᔭᐃᒍᕐ ᐃᖅᑲᖅᑐᒐᒃᓴᙳᖅᑎᑕᐅᓚᐅᖅᐳᖅ ᖁᓄᔪᓐᓂᐊᕐᓂᕐᒥ 7−ᖑᔪᓂ ᐱᕋᔭᒃᑕᐅᔪᓂ, 6−ᖑᖏᑦᑐᓂ, ᐊᒻᒪ ᑐᓂᓯᒃᑲᓐᓂᓚᐅᙱᓚᖅ ᐊᓯᖏᓐᓂ ᐅᓂᒃᑳᕆᓯᒪᓂᐅᔪᓂ.

ᑕᒪᒃᑭᒐᓚᑦ ᑎᔭᐃᒍᕐ ᐱᕋᔭᒃᑕᐅᓂᑯᓂ ᐅᑭᐅᖃᓚᐅᖅᐳᖅ ᕿᑎᐊᓂ 4−ᓂ 9−ᒧᑦ. ᒪᕐᕉᒃ ᐆᒪᓚᐅᙱᓚᑦ ᑕᑯᓂᕐᒥ ᐃᒃᓯᕋᕐᔪᐊᕕᓂᖅ ᐃᖅᑲᖅᑐᖅᑕᐅᓂᖓᓂ, ᐊᓕᐸᐃ ᐅᖃᓚᐅᖅᐳᖅ.

ᑎᔭᐃᒍᕐ ᐅᖃᐅᔾᔨᕙᓚᐅᖅᐳᖅ ᓱᕈᓯᕐᓂ “ᐃᑯᒫᓗᖕᒧᐊᕋᔭᕐᓂᖏᓐᓂ” ᐅᕝᕙᓘᓐᓃᑦ “ᔩᓱᓯᐅᑉ ᓈᒻᒪᒋᓇᔭᙱᓚᖏᑦ” ᑭᓇᑐᐃᓐᓇᕐᒧᑦ ᐅᖃᐅᔾᔨᓐᓂᕈᑎᒃ ᖃᓄᐃᓕᐅᕐᓂᕆᓚᐅᖅᑕᖏᓐᓂ.

ᑕᐃᒪᙵᓂ ᐱᒋᐊᓂᖓᓂ ᐃᖅᑲᖅᑐᖅᑕᐅᓂᖓᓂ ᔭᓄᐊᕆᐅᑉ-ᕿᑎᖅᐸᓯᐊᓂ, ᐆᒪᔪᓐᓇᖅᓯᒪᔪᑦ ᐱᕋᔭᒃᑕᐅᓂᑯᑦ ᐃᖅᑲᖅᑐᐃᕕᖕᒦᒐᓚᐃᓐᓇᓚᐅᖅᐳᑦ ᓵᙵᓪᓗᑎᒃ ᖁᓄᔪᓐᓂᐊᖅᑎᖓᓂ ᖃᔅᓯᒐᓚᖕᓂ ᓴᖅᑭᔮᕐᓂᕆᔭᖓᓂ.

ᐃᕿᖃᑦᑕᐅᑎᓚᐅᖅᐳᑦ ᐊᒻᒪ ᕿᐊᓪᓗᑎᒃ ᐃᖅᑲᖅᑐᐃᔨᒧᑦ ᖃᓄᐃᓕᔭᐅᓂᖃᓚᐅᖅᑎᓪᓗᒍ.

ᐊᒃᑐᖅᑕᐅᓂᖏᓐᓂ ᐅᖃᐅᓯᒃᓴᓕᐊᒥᓂ ᐅᖃᓕᒫᖅᑕᐅᔪᓂ ᐃᖅᑲᖅᑐᐃᕕᖕᒥ ᔭᓄᐊᕆ 23−ᒥ, ᑕᒪᒃᑭᑦ ᐆᒪᐃᓐᓇᕈᓐᓇᖅᓯᒪᔪᓂ ᐱᕋᔭᒃᑕᐅᓂᑯᓂ, ᒫᓐᓇ ᑕᒪᒃᑭᑦ 50−ᖏᓐᓃᓕᖅᑐᓂ, ᐊᒻᒪ ᐃᓚᒋᔭᐅᔪᑦ ᐱᕋᔭᒃᑕᐅᓂᑯᓂ, ᐅᖃᓚᐅᖅᐳᖅ ᑎᔭᐃᒍᕐ ᐱᕋᔭᖕᓂᖏᑦ ᐊᒃᑐᐃᓂᖃᓚᐅᖅᐳᖅ ᐃᓅᓯᓕᒫᖏᓐᓂ.

“ᑕᐃᒪᑐᖅ ᐅᖁᖕᓂᐊᖅᐳᑎᑦ ᐃᑯᒫᓗᖕᒥ,” ᐊᑕᐅᓯᐅᔪᒥ ᐱᕋᔭᒃᑕᐅᓂᑯᒥ ᐅᖃᓚᐅᖅᐳᖅ. “ᐊᓯᖏᓐᓂ ᐃᓱᒪᔪᓐᓇᕐᓇᑎᑦ ᓵᑖᓇᓯᐅᕗᑎᑦ.”

ᑕᐃᔅᓱᒪᓂ, ᐱᕋᔭᒃᑕᐅᔪᑦ ᐃᓱᒪᓚᐅᖅᐳᑦ ᑎᔭᐃᒍᕐ ᐃᓕᖅᑯᓯᖓ ᑕᐃᒪᓐᓇᐅᑐᐃᓐᓇᓲᖑᓂᖓᓂ ᐃᒃᓯᕋᕐᔪᐊᕐᒧᑦ. ᑭᓯᐊᓂ ᒫᓐᓇ, ᑕᒪᒃᑭᑦ ᐱᕋᔭᒃᑕᐅᓯᒪᔪᑦ ᐅᖃᖅᐳᑦ ᑎᔭᐃᒍᕐ ᖁᓄᔪᓐᓂᐊᕐᓂᖓ ᐊᓯᔾᔨᖅᓯᓯᒪᕗᖅ ᐱᓕᕆᖃᑎᒋᓂᕐᒥ ᑐᒃᓯᐊᕐᕕᖕᒥ. ᐃᓚᖏᑦ ᐸᓯᒃᖠᓚᐅᖅᐳᑦ ᖁᑦᑎᖕᓂᖅᓴᒥ-ᐊᖓᔪᖅᑳᕆᔭᐅᔪᓂ ᐃᒃᓯᕋᕐᔪᐊᕐᓂ ᓈᓚᓚᐅᙱᓐᓂᖏᓐᓂ ᐃᒻᒥᖕᓄᑦ ᐅᕝᕙᓘᓐᓃᑦ ᓄᖅᑲᖅᑎᑦᑎᙱᓐᓂᖓᓂ ᐱᕋᔭᒃᓯᔪᒥ.

ᑎᔭᐃᒍᕐ ᐃᖅᑲᖅᑐᒐᒃᓴᙳᓚᐅᖅᐳᖅ ᔫᓂ 2023−ᒥ ᑎᒍᔭᐅᓚᐅᖅᑎᓪᓗᒍ ᐸᓖᓯᒃᑯᓐᓂ ᑭᖕᔅᑎᓐ, ᐋᓐᑎᐊᕆᐅᒥ ᑲᓇᑕᓕᒫᒥ ᑎᒍᓯᔾᔪᒻᒥ.

ᓯᕗᓂᐊᓂ, 2015−ᒥ, ᑎᔭᐃᒍᕐ ᐃᖅᑲᖅᑐᐃᔨᒧᑦ ᖃᓄᐃᓕᔭᐅᓂᖃᓚᐅᖅᐳᖅ ᐊᕐᕌᒍᓄᑦ 11−ᓄᑦ ᐸᓯᔭᐅᓚᐅᖅᑎᓪᓗᒍ 32−ᓄᑦ ᐃᖅᑲᖅᑐᒐᒃᓴᐅᔪᓄᑦ, ᑕᒪᒃᑭᒐᓚᑦ ᑯᔭᖕᓂᐅᔪᒥ ᓱᕈᓯᕐᓂ ᐃᒡᓗᓕᖕᒥ, ᐃᓚᖃᖅᑐᒥ ᐱᒋᐊᖅᓯᔪᒥ ᑯᔭᒐᓱᖕᓂᐅᔪᒥ, ᐊᑦᑐᖏᖅᓯᓯᒪᓂᖓᓂ ᐊᒻᒪ ᓂᕐᔪᑎᒥᒃ ᑯᔭᖕᓂᐅᔪᒥ.

ᑎᔭᐃᒍᕐ ᐊᓂᑎᑕᐅᓚᐅᖅᐳᖅ ᐊᓄᓪᓚᒃᓰᕕᖕᒥ 2022−ᒥ ᐊᓂᓴᕋᐃᑎᑕᐅᕙᒃᑐᓄᑦ ᑲᑎᒪᔨᐅᔪᓄᑦ ᑲᓇᑕᒥ.

ᐊᕐᕌᒍᒐᓴᓂ, ᑎᑎᕋᖅᑕᐅᓯᒪᓪᓚᕆᒃᑐᓂ ᑎᔭᐃᒍᕐ ᐱᕋᔭᖕᓂᑯᖏᓐᓂ ᐅᓄᕐᓂᖅᓴᐅᕗᑦ 30−ᓂ ᒪᒃᑯᒃᑐᓂ.

ᒫᓐᓇᓕᓴᐅᓛᖑᔪᒥ ᐸᓯᔭᐅᔾᔪᑎᖓᓂ, ᐃᖅᑲᖅᑐᐃᑎᑦᑎᔨᑦ ᐅᖃᐅᔾᔪᐃᒋᐊᖅᑎᖓ ᐃᐊᒪ ᐹᔅ ᐊᒻᒪ ᑎᔭᐃᒍᕐ ᓴᐳᓐᓂᐊᖅᑎᖓ, ᔅᑳᑦ ᑲᐅᕙᓐ, ᐃᒪᐃᖁᔨᓚᐅᖅᐳᖅ ᐊᕐᕌᒍᓄᑦ−6−ᓄᑦ ᐊᓄᓪᓚᒃᓯᖅᑕᐅᓂᖓᓂ ᑲᑐᔾᔭᐅᔪᒥ ᑐᓂᔭᐅᓂᐅᔪᒥ, ᐊᓕᐸᐃ ᐊᖏᖃᑎᒋᓚᐅᖅᑕᖓᓂ.

ᐃᖅᑲᖅᑐᐃᔨᒧᑦ ᖃᓄᐃᓕᔭᐅᓂᖓᓄᑦ ᐊᑯᓂᐅᓂᖃᕐᓂᐊᖅᐳᖅ ᑭᓯᐊᓂ ᑎᔭᐃᒍᕐ “ᖃᓂᒡᓕᒍᓂ ᐃᓱᐊᓂ ᐃᓅᓯᕆᓇᔭᖅᑕᖓᓂ,” ᐊᓕᐸᐃ ᐅᖃᓚᐅᖅᐳᖅ. ᑕᐃᑯᖓ ᑎᑭᓪᓗᒍ. ᐃᒃᓯᕋᕐᔪᐊᕕᓂᖅ ᐅᑭᐅᖃᓕᕋᔭᖅᐳᖅ 83−ᓂ.