ᐃᒃᓯᖕᓇᑯᐃᑦ ᐃᒡᓗᐃᑦ ᓄᑖᓂ ᐃᒡᓗᒃᓴᓂ ᐃᓇᖏᖅᑕᐅᑐᐃᓐᓇᕆᐊᓖᑦ

ᐸᕐᓇᐅᑎ ᐱᕙᓪᓕᐊᑎᑦᑎᔾᔪᑎᐅᓕᕋᔭᕐᑐᖅ 99-ᓂ ᐃᒡᓗᓕᐅᕐᕕᐅᓗᓂ

ᐃᖃᓗᖕᓂ ᐸᕐᓇᐃᔩᑦ ᑲᑎᒪᔨᕋᓛᖏᑦ ᐃᑲᔪᖅᑐᐃᔪᑦ ᐱᓕᕆᐊᖑᓇᓱᒃᑐᒥᒃ ᑲᑎᑦᑎᓂᕐᒥᒃ ᓄᓇᒐᓚᖕᓂ ᐃᖃᓗᐃᑦ ᕿᑎᐊᓂᒃ ᐃᒡᓗᓕᐅᕐᕕᐅᓛᕈᒪᔪᓂᒃ. ᐅᑯᐊ ᓄᓇᐃᑦ ᒫᓐᓇ ᐃᓂᒋᔭᐅᔪᖅ ᐃᒃᓯᖕᓇᑰᓕᕐᑐᓂᒃ ᐃᒡᓗᕕᓂᕐᓂ. (ᐊᔾᔨᓕᐅᕆᔨ ᔨᐊᕝ ᐱᐊᑦᓯᐄ)

By ᔨᐊᕝ ᐱᐊᑦᓯᐄ – ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For an English version of this story, please see Derelict homes in downtown Iqaluit could be replaced with new housing.

ᑐᑭᓕᕇᒃᑐᑦ ᐃᒡᓗᕕᓃᑦ ᐃᖃᓗᐃᑦ ᕿᑎᐊᓂ ᓄᑖᓂ ᐃᒡᓕᐅᕐᕕᐅᑐᐃᓐᓇᕆᐊᓕᒃ ᓄᓇᓕᐸᐅᔭᐃᑦ ᑲᑎᒪᔨᖏᑦ ᓂᕈᐊᓚᐅᕐᑎᓪᓗᒋ ᐃᒡᓗᓕᐅᕐᓂᕐᒧᑦ ᐸᕐᓇᐅᑎᓂᒃ ᑖᒃᑯᐊ ᐃᓂᖏᓐᓄᑦ.

6 ᐃᒡᓗᕕᓃᑦ ᒪᑐᐊᖅᑕᐅᓯᒪᔪᑦ ᒫᓃᑦᑐᑦ ᑯᐃᓐ ᐃᓕᓴᐱ ᕗᐃᒥ ᓄᐊᑦᒫᑦᓗ ᐋᑎᒃ ᕙᓐᓱᔅᓗ ᐊᑯᓐᓂᖓᓂᒃ.

ᓄᓇᓕᐸᐅᔭᐃᑦ ᐸᕐᓇᐃᔨᖓ ᒥᓯᐊᓪ ᐋᒻᓯᑐᕌᖕ ᓴᖅᑭᑎᑦᑎᓚᐅᕐᑐᖅ ᒪᕐᕉᖕᓂ ᖃᓄᐃᓕᐅᕈᑎᐅᔪᓐᓇᕋᔭᖅᑐᓂᒃ ᓄᕕᐱᕆ 21-ᖑᑎᓪᓗᒍ ᓄᓇᓕᐸᐅᔭᐃᑦ ᐸᕐᓇᐃᔨᖏᑦ ᐊᖅᓴ ᐱᕙᓪᓕᐊᔪᓕᕆᔨᓪᓗ ᑲᑎᒪᔨᕋᓛᖏᓐᓄᑦ ᐋᖅᑭᒃᓯᓯᒪᔪᓂᒃ ᖁᓕᓂᒃ ᓄᓇᓂ ᐊᕕᒃᑐᕐᓯᒪᓂᒃᑯᑦ ᑕᒫᓃᑦᑐᓂᒃ, ᐃᓚᖓᓗ ᐃᒡᓗᒋᔭᐅᔪᓂᒃ ᐃᓂᒋᔭᐅᓪᓗᑎᒃ, ᐱᖓᓲᓕᖅᑎᑦᑎᔪᒪᔾᔪᑎᓂᒃ.

“ᓱᖏᐅᓐᓇᔾᔮᙱᑦᑐᖅ ᑕᑯᑲᑕᒍᓐᓃᕐᓗᓂ ᐃᒡᓗᕕᓂᕐᓂ ᒪᑐᐊᕐᑎᖅᓯᒪᔪᓂᒃ,” ᐅᖃᕐᑐᖅ ᒪᐃᔭᐅᑉ ᑐᒡᓕᖓ ᑭᒻ ᓯᒥᑦ, ᑖᓐᓇ ᐃᒃᓯᕙᐅᑕᕆᔭᐅᖕᒥᔪᖅ ᐸᕐᓇᐃᔨᒃᑯᑦ ᑲᑎᒪᔨᕋᓛᖏᓐᓄᑦ.

ᐅᓇ ᐸᕐᓇᐅᑎ ᐅᑯᓂᖓ TBG ᐃᒡᓗᓕᐅᕐᑎᑦ ᓕᒥᑎᑦᑯᓐᓂᒃ ᓴᓇᑎᑦᑎᓗᑎᒃ ᑎᓴᒪᓂᒃ ᓇᑎᓕᖕᓂ ᐃᒡᓗᕐᔪᐊᕐᒥ ᑖᒃᑯᐊ ᓄᓇᐃᑦ ᐅᐊᖕᓇᖓᑕ ᐱᖓᖕᓇᖅᐸᓯᐊᓂᒃ. ᑐᒃᓯᕋᐅᑎᒋᔭᐅᔪᖅ ᐃᒡᓗᕐᔪᐊᒃᓴᖅ 24-ᓂ ᐊᕕᒃᑐᕐᓯᒪᐅᖅᑐᓂᒃ ᐃᒡᓗᒃᓴᐅᓇᔭᕐᑐᑦ.

ᑮᓇᐅᔭᓕᐅᕋᓱᒐᑎᒃ ᐱᕙᓪᓕᐊᑎᑦᑎᓂᖅ ᐱᓕᕆᕝᕕᖃᕋᔭᕐᑐᑦ ᐅᐊᖕᓇᖓᑕ ᐱᖓᖕᓇᖅᐸᓯᖓᓃᓐᓇᔭᕐᑐᖅ ᑎᕆᖅᑯᐊᓂ ᓄᓇᐅᑉ ᐊᒻᒪᓗ ᐃᐅᕆᒃ ᑯᐃᐊᑦ ᐊᒻᒪ NCC ᐱᕙᓪᓕᐊᔪᓕᕆᔨᒃ ᓕᒥᑎᑦᑯᑦ ᑐᒃᓯᕋᐅᓯᕐᓯᒪᓪᓗᓂᒃ 75-ᓂ ᐊᕕᒃᑐᖅᓯᒪᐅᖅᑐᓂ ᐊᑕᐅᓯᕐᒥ ᐃᒡᓗᒃᓴᓕᐅᕈᒪᓪᓗᑎᒃ ᓂᒋᖅᐸᓯᐊᓂ ᓄᓇᐅᑉ ᐊᕕᒃᑐᖅᓯᒪᓂᒃᑰᖓᔪᒥᑦ.

ᐅᓇ ᓄᓇᙳᐊᖅ ᓴᖅᑭᑎᑦᑎᓯᒪᔪᖅ ᖁᓕᑦ ᓄᓇᐃᑦ ᐊᕕᒃᑐᕐᓯᒪᔪᑦ ᐃᖃᓗᐃᑦ ᕿᑎᐊᓂ ᐋᖅᑭᒃᑕᐅᔪᓐᓇᕐᓂᖏᓐᓂᒃ ᐱᖓᓱᓄᑦ ᐊᕕᒃᑐᕐᓯᒪᔪᓄᑦ ᓄᓇᓄᑦ, ᑕᕝᕙᓂ ᓄᑖᓂᒃ ᐃᒡᓗᓕᐅᕐᕕᐅᔪᒪᓪᓗᓂ. (ᐊᔾᔨᙳᐊᖅ ᐃᖃᓗᐃᑦ ᓄᓇᓕᐸᐅᔭᖓᓂᒃ)

ᑲᑎᒪᔩᑦ ᓂᕈᐊᕐᓂᕐᓴᐅᓚᐅᕐᑐᑦ ᐱᖓᓱᐃᓕᖓᔪᒥ ᐊᕕᒃᑐᖅᓯᒪᔪᒥ ᐸᕐᓇᐅᑎᓂᒃ ᐆᒪᙵᓪᓕ ᑎᓴᒪᐅᓕᖓᔪᖅ ᐊᕕᒃᑐᖅᓯᒪᔪᓂᒃ ᐋᖅᑭᒃᓱᐃᓂᕐᒥᒃ, ᑖᓐᓇᓗ ᑯᐃᐊᑦ ᑐᒃᓯᕋᐅᑎᖓᓄᑦ ᐊᑐᕐᑕᐅᓇᔭᖅᑐᒥᒃ ᐃᓂᖃᕐᕕᐅᓂᕐᓴᐅᓇᔭᖅᖢᓂ. ᑎᓴᒪᖓᓪᓕ ᐊᕕᒃᑐᖅᓯᒪᓂᒃᑯᑦ ᒪᓂᒪᔭᐅᓇᔭᖅᖢᓂ ᑮᓇᐅᔭᓕᐅᕋᓱᖕᓂᕐᒨᙱᑦᑐᖅ ᐱᕙᓪᓕᐊᔪᓕᕆᓂᕐᒧᑦ.

ᐅᑯᐊᓕ ᐋᑎᒃ ᐊᖑᓇᓱᒃᑐᕐᓯᐅᑎᓄᑦ ᓂᐅᕕᕐᕕᒃ ᐊᒻᒪᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᑎᕋᕐᕕᖏᑦ ᑕᒫᓃᖢᑎᒃ ᓄᓇᒥ ᐊᕕᒃᑐᖅᓯᒪᓂᒃᑰᖓᔪᒥ, ᓯᓚᑖᓃᑦᑑᒃ ᑲᑎᑕᐅᔪᒪᔪᓂᒃ ᓄᓇᓂ ᐊᕕᒃᑐᖅᓯᒪᓂᒃᑯᑦ.

ᐊᐱᕆᔭᐅᑎᓪᓗᒍ ᑲᑎᒪᔨ ᕈᒦᓐ ᓯᑏᕙᓐᓴᓐ, ᐋᒻᓯᑐᕌᖕ ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᐃᖅᑲᓇᐃᔭᖅᑎᖏ ᐃᓱᒪᓕᐅᕆᓚᐅᕐᓂᖏᓐᓂᒃ ᐱᖓᓲᓕᖓᔪᒥ ᓄᓇᒥ ᑐᒃᓯᕋᐅᑎᐅᔪᒥᒃ ᓲᖃᐃᒻᒪ ᐅᓄᕐᓂᕐᓴᓂᒃ ᐃᒡᓗᓕᐅᕐᕕᐅᔪᓐᓇᕋᔭᕐᒪᑦ.

“ᐅᓇ ᓈᒻᒪᖕᓂᕐᓴᓂ ᐋᖅᑭᒃᓱᐃᕝᕕᒃᓴᓕᐅᖅᑕᐅᔪᓐᓇᕋᔭᕐᒪᑦ ᐊᒻᒪᓗ ᓴᓇᕝᕕᐅᔪᓐᓇᕐᓗᓂ ᓄᓇᒋᔭᐅᔪᒪᔪᖅ,” ᐅᖃᕐᑐᖅ.

ᒪᐃᔭ ᓵᓚᒪᓐ ᐊᕙ ᐅᖃᓚᐅᕐᑐᖅ ᑖᒃᑯᐊ ᐃᒡᓗᒃᓴᐃᑦ ᓴᓇᔭᐅᓇᔭᕐᑐᑦ ᐊᖏᓂᕐᓴᖅᑕᖃᖅᑐᓂ ᐱᑕᖃᕈᓐᓇᕐᓗᑎᒃ ᒪᑯᓂᖓᑐᐊᙳᙱᑦᑐᖅ ᐊᑕᐅᓯᕐᒥ ᐃᒡᓗᕈᓯᓕᖕᓂ.

ᐅᓇ ᐸᕐᓇᐅᑎ ᑲᑎᒪᔨᓄᑦ ᐅᖃᐅᓯᐅᓛᕐᑐᖅ ᑎᓯᐱᕆ 12-ᒥ ᐊᑐᖅᑕᐅᔪᒪᖕᒪᖔᑕ ᓂᕈᐊᓚᐅᕐᓗᑎᒃ.

“ᐃᓱᒪᔪᖓᓕ ᑕᒪᑦᑕ ᑕᑯᙳᕐᓯᒪᓕᕐᓂᑦᑎᓐᓂ ᑖᒃᑯᓂᖓ ᐃᒡᓗᕕᓂᕐᓂ,” ᓯᒥᑦ ᐅᖃᓚᐅᕐᑐᖅ ᑲᑎᒫᓂᒃᑎᓪᓗᒋᑦ.

“ᑐᕌᒐᐅᔪᕐᓕ ᐱᓱᒡᕕᖃᕈᓐᓇᓕᓛᕐᓗᑎᒃ ᓄᓇᓖᓪᓗ ᐊᑐᐃᓐᓇᐅᓕᕐᓗᓂ ᑕᐃᒪᓐᓇᓗ ᐱᒋᐊᑦᑎᐊᕐᓇᖅᖢᓂ.”

Share This Story

(0) Comments