ᒦᐊ ᔪᐊᐃ ᓇᐅᓪᓚᖅ−ᕗᕋᐃᓱᕐ ᐅᕙᓂ ᐊᔾᔨᖃᖅᐳᖅ, ᓯᕗᓂᐊᓂ ᕿᒻᒥᒥᒃ ᐹᔭᐅᓚᐅᖅᑎᓪᓗᒍ ᐃᖃᓗᖕᓂ ᐋᒍᔅᑎ 24−ᒥ. 11-ᓂ−ᐅᑭᐅᓕᒃ ᑐᐊᕕᕐᓇᖅᑐᒃᑯᑦ ᖃᖓᑕᓲᒃᑯᑦ ᐊᐅᓪᓚᖅᑎᑕᐅᓚᐅᖅᐳᖅ ᐋᑐᕚᒧᑦ ᐃᓅᓕᓴᖅᑕᐅᔭᖅᑐᖅᖢᓂ ᐋᒍᔅᑎ 25−ᒥ ᑮᓇᖓᒍᑦ ᐋᓐᓂᕐᓂᐅᔪᓂ ᐱᓕᕆᐊᖑᔭᖅᑐᖅᖢᓂ. (ᑲᓕ ᓇᐅᓪᓚᖅ ᐊᔾᔨᖁᑎᖓ)
ᓱᕈᓯᖅ ᑐᐊᕕᕐᓇᖅᑐᒃᑯᑦ ᖃᖓᑕᓲᒃᑯᑦ ᐊᐅᓪᓚᖅᑎᑕᐅᓚᐅᖅᐳᖅ ᕿᒻᒥᒧᑦ ᐹᔭᐅᓚᐅᖅᑎᓪᓗᒍ ᐃᖃᓗᖕᓂ
11-ᓂ−ᐅᑭᐅᓕᒃ ᓵᙵᕗᖅ ᐋᖅᑭᒃᓱᖅᑕᐅᒃᑲᓐᓂᕆᐊᖃᕐᓂᕐᒥ ᐱᓚᒃᑕᐅᓂᖓᓂ; ᒪᓕᒐᕋᓛᓕᕆᔩᑦ ᖃᐅᔨᓴᖅᐳᑦ ᖃᓄᐃᓐᓂᐅᔪᒥ
For the English version of this story, please see Child medevaced after dog attack in Iqaluit.
ᓄᓇᓕᐸᐅᔭᖅ ᐃᖃᓗᖕᓂ ᖃᐅᔨᓴᖅᐳᖅ ᕿᒻᒥᒧᑦ ᐹᔭᐅᓂᐅᔪᒥ ᐋᒍᔅᑎ 24−ᒥ ᕿᒪᐃᓚᐅᖅᑐᒥ 11-ᓂ−ᐅᑭᐅᓕᖕᒥ ᓂᕕᐊᖅᓵᒥᒃ ᐋᓐᓂᕐᓂᕐᔪᐊᖑᔪᓂ ᓂᐊᖁᖓᒍᑦ ᐊᒻᒪ ᑮᓇᖓᒍᑦ.
ᒦᐊ ᔪᐊᐃ ᓇᐅᓪᓚᖅ−ᕗᕋᐃᓱᕐ ᐹᖅᓯᓚᐅᖅᐳᖅ ᕿᒻᒥᒥᒃ ᐃᒡᓗᐃᑦ ᕿᑎᐊᒎᖅᑎᓪᓗᒍ ᑕᐅᓇᓂ ᓄᓇᓕᖕᓂ ᓄᓇᓕᐸᐅᔭᒥ, ᐅᖃᓚᐅᖅᐳᖅ ᐊᓈᓇᖓ ᑲᓕ ᓇᐅᓪᓚᖅ.
ᐸᖅᑭᔭᐅᓂᖃᓚᐅᖅᑎᓪᓗᒍ ᐃᖃᓗᖕᓂ, ᓇᐅᓪᓚᖅ ᐊᒻᒪ ᐸᓂᖓ ᑐᐊᕕᕐᓇᖅᑐᒃᑯᑦ ᖃᖓᑕᓲᒃᑯᑦ ᐊᐅᓪᓚᖅᑎᑕᐅᓚᐅᖅᐳᖅ ᐋᑐᕚᒧᑦ 8 ᐅᓐᓄᒃᑯᑦ ᐅᖓᑎᑦᑎᐊᖓᓂ ᐋᒍᔅᑎ 25−ᒥ.
“ᖃᐅᔨᓴᖅᑕᐅᔭᕆᐊᖃᕐᒪᑦ ᐊᒻᒪ ᐱᓕᕆᐊᖑᓗᓂ ᐱᓚᒃᑐᐃᔨᒧᑦ ᐋᓐᓂᕐᓂᐅᔪᓄᑦ ᐃᔨᐅᑉ ᖄᖓᓄᑦ ᐊᒻᒪ ᐃᓂᐅᔪᒥ ᐅᕕᓂᖃᙱᓐᓂᐅᔪᒥ,” ᓇᐅᓪᓚᖅ ᐅᖃᓚᐅᖅᐳᖅ ᕙᐃᔅᐳᒃᑯᑦ ᐅᖃᖃᑎᖃᕐᓂᐅᔪᒥ, ᒪᕐᕉᒃ ᐃᑭᑎᓪᓗᒋᑦ ᖃᖓᑕᓲᒧᑦ. “ᐱᓚᒃᑐᐃᔨ ᐃᓱᒪᓕᐅᕆᓂᐊᖅᐳᖅ ᐋᖅᑭᒃᓱᖅᑕᐅᒃᑲᓐᓂᕐᓂᐅᔪᒥ ᐃᓅᓕᓴᖅᑕᐅᔭᕆᐊᖃᕐᓂᐅᔪᒥ, ᐃᓚᖃᖅᑐᒥ ᐅᕕᓂᖓᓂ ᑲᑎᑕᐅᔪᒥ ᐊᒻᒪ ᐃᔨᖓᑕ ᖄᖓᓂ ᐋᖅᑭᒃᑕᐅᓂᖓᓄᑦ.”
ᕿᒻᒥᖅ ᐃᒡᓘᑉ ᑐᓄᐊᓃᓚᐅᖅᐳᖅ ᑕᐃᔅᓱᒪᓂ ᐹᔭᐅᓂᐅᓂᐊᖅᑐᒥ, ᓇᐅᓪᓚᖅ ᐅᖃᓚᐅᖅᐳᖅ.
ᓇᐅᓪᓚᖅ ᑎᑎᕋᖅᓯᒪᕗᖅ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᕝᕕᐅᔪᒥ ᖃᓄᐃᓐᓂᐅᓚᐅᖅᑐᒥ, ᐅᖃᐅᓯᐅᕈᓘᔭᖅᓯᒪᔪᒥ ᓄᓇᕗᓕᒫᒥ ᐅᖃᐅᓯᖃᕐᓂᐅᔪᒥ ᐃᓱᒫᓘᑕᐅᔪᓂ ᕿᒻᒥᓂᒃ ᐊᐅᓚᑦᑎᓂᕐᒥ ᐊᒻᒪ ᐃᓄᓕᒫᓂᒃ ᐊᑦᑕᓇᔾᔭᐃᖅᓯᓯᒪᓂᕐᒥ.
“ᐊᖏᓛᖑᔪᒥ ᐃᓱᒫᓘᑎᒋᔭᕋ ᓇᓗᓇᐃᖅᓯᓂᕐᒥ ᖃᓄᐃᓐᓂᐅᓚᐅᖅᑐᒥ ᐸᓂᓐᓄᑦ ᐃᓱᒪᒋᔭᐅᑦᑎᐊᕐᓂᖓᓂ ᐊᒻᒪ ᐊᓯᐊᓂ ᐃᓄᖕᒥ ᓱᕈᓯᕐᒥᓪᓘᓐᓃᑦ ᐋᓐᓂᖅᑐᖃᒃᑲᓐᓂᙱᒃᑯᓂ,” ᓇᐅᓪᓚᖅ ᐅᖃᓚᐅᖅᐳᖅ.
ᓄᓇᓕᐸᐅᔭᖅ ᐃᖃᓗᖕᓂ ᐃᓄᓕᒫᓄᑦ ᐱᔨᑦᑎᕋᕐᓂᕐᒧᑦ ᐅᖃᐅᓯᒃᓴᓕᐅᓚᐅᖅᐳᑦ ᐋᒍᔅᑎ 25−ᒥ ᖃᓄᐃᓐᓂᐅᔪᒥ, ᐅᖃᖅᖢᑎᒃ ᓄᓇᓕᐸᐅᔭᖅ ᐃᓕᓴᖅᓯᓂᖓᓂ “ᐱᓪᓚᕆᐅᔪᒥ ᐃᓱᒫᓘᑕᐅᔪᒥ” ᓄᓇᓕᐅᑉ ᐃᓗᐊᓂ ᒪᓕᒃᑐᒥ ᐹᔭᐅᓂᐅᔪᒥ.
ᕿᒻᒥᖃᖅᑎᐅᔪᑦ ᑲᒪᒋᔭᖃᖅᐳᑦ ᓇᓗᓇᐃᖅᓯᓂᕐᒥ ᑎᒍᐊᖏᑦ ᐅᒋᐊᖅᓯᙱᓐᓂᖏᓐᓂ ᐅᕝᕙᓘᓐᓃᑦ ᐋᓐᓂᖅᓯᓗᑎᒃ ᐊᓯᖏᓐᓂ, ᐅᕝᕙᓘᓐᓃᑦ ᓱᔪᐃᓗᑎᒃ ᐱᖁᑎᒋᔭᐅᔪᓂ, ᐅᖃᐅᓯᐅᓪᓗᓂ ᓄᓇᓕᐸᐅᔭᖅ ᐃᖃᓗᖕᓂ ᐆᒪᔪᓄᑦ ᐊᐅᒪᑕᐅᓂᖏᓐᓄᑦ ᒪᓕᒐᕋᓛᖑᔪᒥ. ᐸᖅᑭᔭᐅᑦᑎᐊᕋᓗᐊᖅᐸᑕ ᐊᒻᒪ ᐊᐅᓚᑕᐅᑦᑎᐊᕐᒪᖔᑕ ᕿᒻᒥᖓᓂ, ᕿᒻᒥᖃᖅᑎᐅᔪᑦ “ᐸᓯᔭᒃᓴᐅᕗᑦ ᐱᕋᔭᖕᓂᐅᔪᒥ” ᕿᒻᒥᖅ “ᐹᒋᐊᕈᓂ, ᑲᑉᐱᐊᓵᕆᓗᓂ ᐅᕝᕙᓘᓐᓃᑦ ᐋᓐᓂᖅᓯᒍᓂ ᐃᓄᖕᒥ.”
ᒪᐃᔭᐅᑉ ᑐᖓᓕᖓ ᑭᒻᐳᓕ ᓯᒥᑦ ᐅᖃᐅᓯᖃᓚᐅᖅᐳᖅ ᖃᓄᐃᓐᓂᐅᔪᒥ ᑕᐃᑲᓂ ᐋᒍᔅᑎ 25−ᒥ ᓄᓇᓕᐸᐅᔭᒃᑯᑦ ᑲᑎᒪᔨᓄᑦ ᑲᑎᒪᓂᐅᔪᒥ, ᐅᖃᖅᖢᓂ ᑲᓇᑕᒥ ᐸᓖᓯᒃᑯᑦ ᐅᖃᑎᖃᖅᓯᒪᕗᑦ ᐃᓚᒌᖑᔪᓄᑦ.
ᓯᕗᓪᓕᕐᒥ, ᑲᓇᑕᒥ ᐸᓖᓯᒃᑯᑦ ᐱᓕᕆᐊᖃᓚᐅᖅᐳᑦ ᓯᕗᓪᓕᐅᓪᓗᑎᒃ ᖃᐅᔨᓴᖅᑎᐅᓂᕐᒥ, ᓄᓇᓕᖕᓂ ᒪᓕᒐᕋᓛᓕᕆᔨᓂ ᑐᓂᓯᓪᓗᑎᒃ ᐃᑲᔪᖅᓱᐃᓂᕐᒥᑦ.
ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᐃᓴᒃᓯᒪᕗᑦ ᑲᓇᑕᒥ ᐸᓖᓯᒃᑯᓐᓄᑦ ᐊᐱᕆᓂᕐᒧᑦ ᖃᓄᐃᒻᒪᑦ ᐃᓇᖏᖅᓯᓚᐅᕐᓂᖏᓐᓂ ᖃᐅᔨᓴᕐᓂᐅᔪᒥ ᑭᓯᐊᓂ ᑭᐅᔭᐅᓂᖃᓚᐅᙱᓚᑦ ᐆᒧᖓ ᐊᐱᖅᑯᑕᐅᔪᒧᑦ.
ᑭᓯᐊᓂ, ᑲᓇᑕᒥ ᐸᓖᓯᒃᑯᑦ ᐅᖃᖅᑎᖓ Cpl. ᐋᔅᓕ ᑕᐃᓕ ᐅᖃᓚᐅᖅᐳᖅ ᐸᓖᓯᒃᑯᑦ ᓇᓗᓇᐃᖅᓯᓯᒪᕗᑦ ᕿᒻᒥᒥᒃ ᐊᒻᒪ ᕿᒻᒥᖃᖅᑎᐅᔪᒥ.
ᐋᒍᔅᑎ 26−ᒥ, ᓄᓇᓕᐸᐅᔭᖅ ᐅᖃᖅᑎᖓ ᔨᐊᕝ ᐱᐅᓐ ᐅᖃᓚᐅᖅᐳᖅ ᑐᓴᒐᒃᓴᓕᐊᖑᔪᒥ ᖃᐅᔨᓴᖅᑕᐅᓂᖓ ᐅᑎᖅᑎᑕᐅᕗᖅ ᓄᓇᓕᐸᐅᔭᒃᑯᓐᓄᑦ ᐃᓚᖃᙱᒻᒪᑦ ᐱᕋᔭᖕᓂ ᖃᓄᐃᓕᐅᕐᓂᐅᔪᒥ.
“ᑐᙵᕕᖃᖅᑐᒥ ᑐᓴᒐᒃᓴᓕᐊᓂ ᑲᑎᖅᓱᖅᑕᐅᔪᓂ ᑕᐃᑲᓂ [ᑲᓇᑕᒥ ᐸᓖᓯᒃᑯᑦ] ᖃᐅᔨᓴᖅᑕᐅᓂᖓᓂ, ᕿᒻᒥᖅ ᐃᐲᙶᓚᐅᙱᓚᖅ ᑕᐃᔅᓱᒪᓂ ᖃᓄᐃᓐᓂᐅᔪᒥ ᐊᒻᒪ ᐅᖃᐅᓯᐅᓚᐅᖅᐳᖅ ᐃᐱᖅᓯᒪᓂᖓᓂ,” ᐱᐅᓐ ᑎᑎᕋᓚᐅᖅᐳᖅ.
ᑲᓇᑕᒥ ᐸᓖᓯᒃᑯᑦ ᓱᓕ ᑐᓂᓯᔭᕆᐊᖃᖅᐳᑦ ᑎᑎᖅᑲᖁᑎᖏᓐᓂ ᓄᓇᓕᐸᐅᔭᐅᑉ ᒪᓕᒐᕋᓛᓕᕆᔨᒃᑯᓐᓄᑦ ᐱᓕᕆᕝᕕᖓᓄᑦ. ᐱᓕᕆᕝᕕᐅᑉ ᕿᒥᕐᕈᔭᐅᓂᖓ ᐱᔭᕇᖅᐸᑦ, ᓄᓇᓕᐸᐅᔭᖅ ᑐᓂᓯᓂᐊᖅᐳᖅ ᖃᓄᐃᓕᖓᓕᕐᓂᖓᓂ, ᐅᖃᓚᐅᖅᐳᖅ.
“ᓄᓇᓕᐸᐅᔭᖅ ᐃᓕᓴᖅᓯᕗᖅ ᐱᓪᓚᕆᐅᓂᖓᓂ ᐆᒪᙵᑦ ᖃᓄᐃᓐᓂᐅᔪᒥ ᐊᒻᒪ ᐃᓱᒫᓘᑕᐅᔪᒥ ᐱᑎᑦᑎᓂᖓᓂ,” ᐱᐅᓐ ᐅᖃᓚᐅᖅᐳᖅ.
ᒪᓐᓇᒧᑦ ᑎᑭᖦᖢᒍ ᒪᓕᒐᕋᓛᓕᕆᔨᒃᑯᑦ ᑭᐅᓯᒪᕗᑦ 17−ᓄᑦ ᕿᒻᒥᓄᑦ ᖃᓄᐃᓐᓂᐅᔪᓂ ᐊᒻᒪ 7−ᓂ ᐆᒪᔪᓂ ᐱᑦᑎᐊᙱᕐᔪᐊᕐᓂᐅᔪᓂ ᐅᖃᐱᓘᑕᐅᔪᓂ. ᓄᓇᓕᐸᐅᔭᖅ 9−ᓂ ᕿᒻᒥᓂᑦ ᑐᖂᑦᑎᓯᒪᕗᑦ.
(0) Comments