ᑐᓂᔭᐅᔪᖅ ᑐᐊᕕᕐᓇᖅᑐᖅᓯᐅᑎ ᓇᓂᓯᕗᖅ ᐊᑐᖅᑕᐅᒃᑲᓐᓂᕈᓐᓇᕐᓂᖓᓂ ᐃᖃᓗᒃᑑᑦᑎᐊᖅ, ᑰᒑᕐᔪᖕᒥ

ᐃᖅᑲᓇᐃᔮᒥᓂᒃ ᓄᖅᑲᖅᓯᒪᓕᖅᑐᖅ ᑐᐊᕕᕐᓇᖅᑐᓕᕆᔨᓄᑦ ᐊᖓᔪᖅᑳᖅ ᔮᓐ ᐳᕐᓄ ᐃᑲᔪᖅᓯᒪᕗᖅ ᓇᒃᓯᐅᔾᔨᓂᕐᒥ ᐊᑐᕈᓐᓃᖅᑎᑕᐅᓯᒪᔪᓂ ᑐᐊᕕᕐᓇᖅᑐᖅᓯᐅᑎᓂ ᓂᒋᕐᒥ ᐋᓐᑎᐊᕆᐅᒥ ᓄᓇᐅᔪᓄᑦ ᐱᔭᕆᐊᖃᖅᑐᓄᑦ ᓄᓇᕐᔪᐊᓕᒫᒥ.

ᑭᓯᐊᓂ ᐃᓕᑦᑎᓚᐅᖅᐳᖅ ᐱᔭᕆᐊᖃᕐᓂᐅᔪᒥ ᑐᐊᕕᕐᓇᖅᑐᖅᓯᐅᑎᓂ ᐊᖏᕐᕋᒥ ᖃᓂᓐᓂᖅᓴᐅᔪᒥ.

ᐳᕐᓄ ᐃᕐᓂᖓ, ᐅᔭᕋᖕᓂᐊᕐᓂᕐᒥ ᐅᖃᐅᔾᔨᔨᐅᔪᖅ ᓄᓇᕗᒻᒥ, ᐅᖃᐅᔾᔨᓚᐅᖅᐳᖅ ᐅᓂᒃᑳᖅᑐᐊᓂ “ᑕᑯᕙᖕᓂᖓᓂ ᐃᓄᖕᓂ ᓅᑕᐅᔪᓂ ᐅᑭᐅᒃᑯᑦ ᑐᓄᐊᓂ ᐊᐃᒃᓯᐅᑎᓂ ᓄᓇᓯᐅᑎᓂ ᐊᒻᒪ ᑐᓄᐊᓂ ᑲᓇᑕᒥ ᐸᓖᓯᒃᑯᑦ ᓄᓇᓯᐅᑎᖏᓐᓂ,” ᐅᖃᓚᐅᖅᐳᖅ.

“ᖃᓄᐃᓕᐅᕈᓐᓇᕆᐊᖃᖅᐳᒍᑦ ᐱᓪᓚᕆᐅᓂᖅᓴᒥ ᐊᒻᒪ ᓇᒡᓕᒍᓱᖕᓂᖅᓴᐅᓂᖃᖅᑐᒥ ᑖᔅᓱᒥᖓ.”

ᐳᕐᓄ ᒫᓐᓇ ᓴᖑᑎᑦᑎᓯᒪᕗᖅ ᑕᐅᑐᒃᑕᑐᐊᖃᑲᐃᓐᓇᕐᓂᕐᒥ ᐅᑭᐅᖅᑕᖅᑐᒧᑦ, ᒪᕐᕉᒃ ᓄᑖᙳᕆᐊᖅᑎᑕᐅᓯᒪᔪᓂ ᑐᐊᕕᕐᓇᖅᑐᖅᓯᐅᑎᓂ ᓂᒋᕐᒥ ᐋᓐᑎᐊᕆᐅᒥ ᐊᐅᓪᓚᖅᐸᓪᓕᐊᕗᑦ ᓄᓇᓕᖕᓄᑦ ᓄᓇᕗᒻᒥ ᐊᐅᔭᐅᓂᐊᖅᑐᒥ.

2017−ᒥ ᑐᐊᕕᕐᓇᖅᑐᖅᓯᐅᑎ ᑐᓂᔭᐅᔪᒥ York ᐊᕕᒃᑐᖅᓯᒪᓂᐅᔪᒥ ᑐᐊᕕᕐᓇᖅᑐᓕᕆᔨᓄᑦ ᐱᔨᑦᑎᕋᕐᓂᐅᔪᒥ ᑎᑭᑦᑐᒃᓴᐅᑕᐅᕗᖅ ᐃᖃᓗᒃᑑᑦᑎᐊᕐᒧᑦ ᐅᒥᐊᕐᔪᐊᒃᑯᑦ ᐋᒍᔅᑎᒥ, ᐊᒻᒪᓗᑦᑕᐅᖅ 2015 ᑐᐊᕕᕐᓇᖅᑐᖅᓯᐅᑎ Guelph-Wellington ᑐᐊᕕᕐᓇᖅᑐᓕᕆᔨᓂ ᐱᔨᑦᑎᕋᕐᓂᐅᔪᒥ ᑐᕌᖅᑐᒥ ᑰᒑᕐᔪᖕᒧᑦ.

“ᑐᓂᓯᕗᖅ ᑐᐊᕕᕐᓇᖅᑐᖅᓯᐅᑎᒥᒃ ᒪᕐᕈᐃᖅᑐᒥ ᐊᑐᖅᑕᐅᒃᑲᓐᓂᕈᓐᓇᕐᓂᖓᓂ ᓴᓇᓯᒪᓂᖓᓄᑦ ᐱᓕᕆᓂᕐᒥ ᐃᓂᐅᔪᒥ ᐱᔭᕆᐊᖃᓪᓚᕆᒃᑐᒥ,” ᐅᖃᓚᐅᖅᐳᖅ.

ᓄᓇᓯᐅᑏᑦ ᑐᕌᖅᐸᓪᓕᐊᔪᑦ ᓄᓇᕗᒻᒧᑦ ᑕᒪᑐᒪᓂ ᐊᐅᔭᐅᔪᒥ 11−ᒋᔭᐅᕗᑦ ᐊᒻᒪ 12−ᒋᔭᐅᕗᑦ ᑐᐊᕕᕐᓇᖅᑐᖅᓯᐅᑎ ᐳᕐᓄ ᐃᑲᔪᖅᓯᒪᕗᖅ ᐅᑭᐅᖅᑕᖅᑐᒧᑦ ᓇᒃᓯᐅᔾᔨᓂᖓᓂ ᖄᖏᖅᓯᒪᔪᓄᑦ ᐊᕐᕌᒍᓄᑦ 6−ᓄᑦ.

ᑐᐊᕕᕐᓇᖅᑐᖅᓯᐅᑎ ᑐᕌᖅᑐᖅ ᐃᖃᓗᒃᑑᑦᑎᐊᕐᒧᑦ ᐃᓇᖏᖅᓯᓂᐊᖅᐳᖅ ᕼᐋᒻᓚᒃᑯᑦ ᒫᓐᓇᐅᔪᒥ ᐃᓅᓕᓴᖅᑕᐅᓂᕐᒧᑦ ᐅᓯᑲᑦᑕᐅᑎᖓᓂ ᐱᔨᑦᑎᕋᖅᓯᒪᔪᒥ ᖃᓂᒋᔭᖓᓂ ᐊᕐᕌᒍᓄᑦ 23−ᓄᑦ.

“ᑭᒡᒐᖅᑐᐃᓪᓗᖓ ᒪᐃᔭᒥ, ᑲᑎᒪᔨᓂ ᐊᒻᒪ ᐊᓪᓚᕝᕕᓕᕆᔨᐅᔪᓂ, ᖁᔭᓕᒃᑲᓐᓂᕈᓐᓇᙱᓚᒍᑦ ᐆᒧᖓ ᑐᓂᔭᐅᓂᐅᔪᒥ,” ᐅᖃᓕᒫᕐᓂᖃᖅᐳᖅ ᑎᑎᕋᖅᑕᐅᓂᐅᔪᒥ ᕼᐋᒻᓚᒃᑯᑦ ᐃᖃᓗᒃᑑᑦᑎᐊᕐᒥ ᕙᐃᔅᐳᒃᑯᑦ ᒪᒃᐱᒐᖓᓂ ᐅᓐᓄᕐᔪᐊᒃᑯᑦ ᓇᒡᒐᔾᔭᐅᒥ.

ᑕᒪᒃᑭᑦ ᑐᓐᓂᖅᑯᑕᐅᓂᐅᔪᑦ ᐊᐅᓚᑕᐅᓚᐅᖅᐳᑦ ᐳᕐᓄᒧᑦ, ᑐᐊᕕᕐᓇᖅᑐᓕᕆᔨ ᐊᖓᔪᖅᑳᖑᓚᐅᖅᓯᒪᔪᒥ Waterloo, Ont−ᒥ. ᓇᓂᓯᓚᐅᖅᐳᖅ ᑐᐊᕕᕐᓇᖅᑐᖅᓯᐅᑎ4NU, ᐱᓕᕆᖃᑎᖃᓲᒥᒃ ᑭᒡᒐᖅᑐᐃᔨᐅᔪᓂ ᓄᓇᕗᒻᒥ ᒐᕙᒪᒃᑯᑦ ᓄᓇᓕᖕᓂ ᒐᕙᒪᒃᑯᓐᓂᓪᓗᐱᔨᑦᑎᕋᖅᑎᒃᑯᓐᓂ ᐱᓂᕐᒥ ᐊᑐᕈᓐᓃᖅᑎᑕᐅᔪᓂ ᑐᐊᕕᕐᓇᖅᑐᖅᓯᐅᑎᓂ ᓇᒃᓯᐅᔾᔭᐅᓂᖏᓐᓂ ᓄᓇᕗᒻᒧᑦ.

ᐳᕐᓄ ᐱᓕᕆᓲᖑᕗᖅ ᖃᐅᔨᒪᖃᑎᒌᖕᓂᐅᓪᓗᓂ ᕼᐋᒻᓚᐅᔪᓂ ᓂᒋᕐᒥ ᐋᓐᑎᐊᕆᐅᒥ ᓄᖅᑲᖅᑎᑦᑎᔪᓂ ᑐᐊᕕᕐᓇᖅᑐᖅᓯᐅᑎᖏᓐᓂ ᐊᒻᒪ ᑐᓐᓂᖅᑯᓯᐊᖑᑎᑦᑎᔪᒪᔪᓂ ᐅᖓᓯᒃᑐᒧᑦ ᓄᓇᓕᐅᔪᓄᑦ.

“ᐊᑐᓂ ᕼᐋᒻᓚᒃᑯᑦ ᐊᔾᔨᒌᙱᑦᑐᓂ ᐅᑎᖅᑕᕐᓂᕐᒧᑦ ᐱᓕᖅᑭᒃᑕᕐᓂᖃᖅᐳᑦ ᐃᓇᖏᖅᓯᓂᖏᓐᓂ ᓄᓇᓯᐅᑎᖏᓐᓂ,” ᐅᖃᓚᐅᖅᐳᖅ.

ᑐᐊᕕᕐᓇᖅᑐᖅᓯᐅᑎ ᖃᓪᓗᓈᑦ ᓄᓇᖓᓐᓂ ᑲᓇᑕᒥ ᐃᖏᕐᕋᓂᖃᕈᓐᓇᖅᐳᑦ 250,000 ᑭᓛᒥᑐᓂ ᐅᖓᑖᓄᓪᓘᓐᓃᑦ ᐃᓇᖏᖅᑕᐅᓚᐅᖅᑳᕐᓇᑎᒃ, ᑭᓯᐊᓂ ᑐᐊᕕᕐᓇᖅᑐᖅᓯᐅᑎᑦ ᑐᓐᓂᖅᑯᑕᐅᔪᑦ ᓱᓕ ᐃᖏᕐᕋᑦᑎᐊᒃᑳᓘᕗᑦ, ᐳᕐᓄ ᐅᓂᒃᑳᕆᓚᐅᖅᐳᖅ.

“ᐅᓪᓗᕐᒥ ᓯᕗᓂᐊᓂ ᐱᓕᕆᓪᓗᑎᒃ ᓄᓇᓯᐅᑎᐅᕗᑦ ᐱᓕᕆᓪᓗᑎᒃ 20−ᓂ ᑐᐊᕕᕐᓇᖅᑐᓂ ᐅᓪᓗᕐᒥ ᐊᒻᒪ ᖃᐅᑎᓪᓗᒍ ᓄᖅᑲᖅᑎᑕᐅᕗᑦ ᑕᐃᒫᒃ ᐃᒪᓐᓇᐅᙱᓚᖅ ᓱᒃᑯᑦᑎᐊᖅᖢᑎᒃ ᑭᓱᖃᕈᓐᓃᖅᖢᑎᒃ ᐊᒻᒪ ᐊᓱᐃᓛᒃ ᑐᓂᓪᓗᒍ  [ᓄᓇᕗᒻᒧᑦ],”ᐅᖃᓚᐅᖅᐳᖅ.

“ᐱᕗᑎᑦ ᑐᐊᕕᕐᓇᖅᑐᖅᓯᐅᑎᒥ ᐃᖏᕐᕋᔪᒥ 50,000 ᑭᓛᒥᑐᓂ ᐊᕐᕌᒍᑕᒫᒥ ᖃᓪᓗᓈᑦ ᓄᓇᖓᓐᓂ ᑲᓇᑕᒥ, ᐊᒻᒪ ᓄᓇᕗᒻᒧᐊᕈᓂ ᐃᖏᕐᕋᓇᔭᖅᑐᒃᓴᐅᕗᖅ 200 ᑭᓛᒥᑐᓂ ᐊᕐᕌᒍᑕᒫᒥ. ᐊᖅᑯᑎᒥ ᐃᖏᕐᕋᓂᖃᓗᐊᙱᓚᖅ ᓄᓇᓕᐅᔪᓂ.”

ᐳᕐᓄ ᐅᖃᓚᐅᖅᐳᖅ “ᐱᐅᔪᐊᓗᖕᒥ ᐃᒃᐱᒍᓱᖕᓇᕐᓂᐅᕗᖅ” ᑕᑯᒑᖓᒥ ᓇᓗᓇᐃᖅᑕᐅᓯᒪᔪᒥ ᐊᓯᐊᒎᖅᑐᒥ ᑐᐊᕕᕐᓇᖅᑐᖅᓯᐅᑎᒥᒃ ᐊᑐᖅᑕᐅᖏᓐᓇᕐᓂᖓᓂ ᐊᕕᒃᑐᖅᓯᒪᓂᐅᔪᒥ ᐱᔭᕆᐊᓕᖕᒥ ᐱᔨᑦᑎᕋᕐᓂᐅᔪᒥ.

“ᐊᑭᖃᕐᓂᖃᔮᙱᓚᖅ ᑭᓇᑐᐃᓐᓇᒧᑦ. ᐱᔪᓐᓇᖅᐳᒍᑦ [ᑐᐊᕕᕐᓇᖅᑐᖅᓯᐅᑎᒥᒃ] ᐅᕙᙵᑦ ᖃᓪᓗᓈᑦ ᓄᓇᖓᓐᓂ ᑲᓇᑕᒥ, ᓱᓪᓗᓕᕆᔨᐅᑉ ᓄᓇᓯᐅᑎᒋᙱᖔᕐᓗᓂᐅᒃ ᐅᕝᕙᓘᓐᓃᑦ ᐸᑏᑎᓂ ᑎᖅᑎᑕᖅᑎᐅᔪᒥ ᓄᓇᓯᐅᑎᐅᓂᕐᒥ ᐊᓯᐊᓂᖔᖅ,” ᐅᖃᓚᐅᖅᐳᖅ.

“ᐱᓚᕆᓪᓚᕆᒃᐳᖅ ᑐᐊᕕᕐᓇᖅᑐᖅᓯᐅᑎᒥ ᐱᓕᕆᓂᐅᔪᒥ.”