ᒪᕐᕉᒃ ᐱᒋᐊᖅᑎᑦᑎᕗᑦ ᑐᑭᓕᐊᕆᔭᐅᓂᖓᓂ ᐱᓕᕆᐊᒃᓴᐅᔪᒥ ᑕᐃᔅᓱᒪᓂᑐᖃᖅ ᑎᑎᖅᑲᖁᑕᐅᔪᓂ

ᑎᑎᕋᖃᑦᑕᕐᓂᐅᔪᑦ 1960−ᖏᓐᓂ ᐊᒻᒪ ‘70−ᖏᓐᓂ ᐅᖃᐅᓯᖃᖅᐳᖅ ᐃᓄᐃᑦ ᐃᓄᑐᖃᑦ ᐅᒃᐱᕈᓱᖕᓂᖏᓐᓂ ᐱᓕᕆᔭᕆᐊᖃᕐᓂᖏᓐᓂ ᐸᐸᑦᑏᓐᓇᕐᓂᕐᒧᑦ ᐃᓄᐃᑦ ᐃᓕᖅᑯᓯᖓᓐᓂ

ᐃᓅᓪᓗᓂ ᐃᓅᖃᑎᒌᖑᔪᓄᑦ ᐊᓯᔾᔨᖅᓯᓇᓱᒃᑐᖅ ᐊᒻᒪ ᑲᑎᒪᔨᕐᔪᐊᖑᔪᖅ ᑕᒑᖅ ᑰᓕ, ᓴᐅᒥᖕᒥ, ᐊᒻᒪ ᐃᓕᓴᐃᔨᒧᑦ ᐃᑲᔪᖅᑎᖓ ᓖᑎᐊ ᓲᐱᓄᕐ ᐱᓕᕆᕗᑦ ᑐᑭᓕᐅᕆᓂᕐᒥ ᑲᑎᙵᓂᐅᔪᓂ ᑎᑎᖅᑲᓂ ᑎᑎᕋᖅᑕᐅᓯᒪᔪᓂ ᓄᑕᐅᙱᓐᓂᖅᓴᐅᔪᒥ ᐃᓄᒃᑎᑑᖅᓯᒪᓂᐅᔪᒥ. ᑎᑎᖅᑲᓂ, ᐃᓄᑐᖃᐃᑦ ᐅᖃᐅᓯᖃᖅᐳᑦ ᖃᓄᐃᓕᐅᕆᐊᖃᕐᓂᖓᓂ ᐃᑲᔪᕐᓂᕐᒧᑦ ᐃᓄᐃᑦ ᐅᖃᐅᓯᖓᓐᓂ, ᑭᓇᐅᓂᖏᓐᓂ ᐊᒻᒪ ᐃᓕᖅᑯᓯᖓᓐᓂ ᐆᒪᐃᓐᓇᕈᓐᓇᕐᓂᖓᓂ. (ᐊᔾᔨᓕᐅᖅᑕᐅᔪᑦ ᑕᒑᖅ ᑰᓕᒧᑦ, ᒫᑦ ᑲᓱᐊᕐ/ᓯᓚᑦᑐᖅᓴᕐᕕᒡᔪᐊᖅ Notre Dame)

By ᒫᑕᓕᓐ ᕼᐊᐅᕕᑦ

For English version, see ‘Puzzle piece of Inuit history’: Duo launches translation project of historic letters

ᑕᒑᖅ ᑰᓕ ᐅᖃᓕᒫᖅᑎᓪᓗᒍ ᐊᒥᓱᐊᓗᖕᓂ ᑎᑎᖅᑲᐅᔪᓂ ᐃᓄᖕᓂ ᐃᓄᑐᖃᕐᓂ ᐃᒻᒥᓄᑦ ᑎᑎᕋᓚᐅᖅᑕᖏᓐᓂ 1960−ᖏᓐᓂ ᐊᒻᒪ ’70−ᖏᓐᓂ, ᐊᒃᑐᖅᑕᐅᓂᖃᖅᐳᖅ ᖃᐅᔨᒪᓂᕐᔪᐊᕌᓗᖕᓂ ᐃᓗᓕᖃᕐᓂᖏᓐᓂ.

“ᐅᖃᙱᓗᐊᕐᓂᐅᕗᖅ ᐅᖃᕐᓂᕐᒧᑦ, ᖃᓄᑎᒋ ᐅᕙᓐᓄᑦ ᐱᒻᒪᕆᐅᓂᖏᓐᓂ,” ᐅᖃᓚᐅᖅᐳᖅ ᖃᐅᔨᒪᔭᐅᕐᔪᐊᖅᑐᒥ ᑲᑎᒪᔨᒃᔪᐊᖑᔪᖅ ᐊᒻᒪ ᐃᓅᖃᑎᒌᖑᔪᓄᑦ ᐊᓯᔾᔨᖅᓯᓇᓱᒃᑐᖅ, ᓄᓇᖃᖅᑐᒥ ᑲᖏᖅᖠᓂᕐᒥ.

ᑰᓕ 20−ᖏᓐᓂ ᐅᑭᐅᖃᖅᑎᓪᓗᒍ, ᖁᓚᓚᐅᖅᐳᖅ ᐃᓄᐃᑦ ᐊᓯᐅᔨᕙᓪᓕᐊᓂᖏᓐᓂ ᑭᓇᐅᓂᖏᓐᓂ ᐊᒻᒪ ᐅᖃᐅᓯᖓᓐᓂ ᐱᖅᑯᓯᕆᙱᑕᓄᑦ ᐱᐅᓯᖃᓕᖅᑎᑕᐅᓂᕐᒧᑦ, ᐅᖃᓚᐅᖅᐳᖅ.

ᑕᐃᒫᒃ ᐊᐅᓪᓚᓚᐅᖅᐳᖅ ᓄᓇᕗᓕᒫᒥ ᐊᒻᒪ ᐊᐱᕆᓪᓗᓂ ᐃᓄᖕᓂ ᐃᓄᑐᖃᕐᓂ ᐃᒻᒥᓄᑦ ᑎᑎᕋᖁᓪᓗᓂᒋᑦ ᖃᓄᖅ ᐃᓄᐃᑦ ᐃᓕᖅᑯᓯᖓ ᐆᒪᐃᓐᓇᕈᓐᓇᕐᓂᖓᓂ “ᑕᒪᑐᒪᓂ ᐱᐅᓯᖃᑎᒌᖑᔪᓂ ᐃᓕᖅᑯᓯᒥᒃ ᐊᖅᓵᖅᑕᐅᓂᕐᒥ ᐊᔾᔨᒌᓕᖅᑎᑕᐅᓇᓱᐊᕐᓂᖓᓂ,” ᐅᖃᓚᐅᖅᐳᖅ.

“ᑎᑭᐅᑎᓕᓚᐅᖅᐳᒍᑦ ᓇᖕᒥᓂᖅ ᐃᓱᒪᒋᔭᓐᓂ ᖃᓄᐃᓕᐅᙱᒃᑯᑦᑕ ᑐᖁᓂᐊᖅᑐᒍᑦ, ᐃᓕᖅᑯᓯᖓᑦ ᐃᓄᖕᓄᑦ ᓯᕗᕚᑦᑕ ᐊᑐᖅᓯᒪᔭᖏᓐᓂ ᐊᒻᒪ ᐃᓅᓯᕆᓪᓗᓂᔾᔪᒃ ᑕᐅᓴᓐ−ᒐᓛᓗᖕᓂ ᐊᕐᕌᒍᓄᑦ, ᐃᓱᓕᓐᓂᐊᓕᖅᐳᖅ.”

ᑰᓕ ᐸᐸᑦᑎᓯᒪᕗᖅ ᑎᑎᖅᑲᓂ ᐊᕐᕌᒍᓄᑦ 50−ᓄᑦ, ᐊᒻᒪ ᒫᓐᓇ, ᑐᑭᓕᐊᕆᕙᓪᓕᐊᕙᖏᑦ ᖃᓪᓗᓈᑎᑐᑦ ᑕᐅᑐᒃᑕᑐᐊᖃᑲᐃᓐᓇᕐᓂᐅᕗᖅ ᓄᑖᖑᔪᒥ ᖃᐅᔨᓴᖅᑕᐅᓂᐅᔪᒥ Menno Simons ᓯᓚᑦᑐᖅᓴᕐᕕᖓᓂ ᑲᓇᑕᒥ ᒥᓄᓇᐃᑦ ᓯᓚᑦᑐᖅᓴᕐᕕᒡᔪᐊᖓᓂ ᐅᐃᓂᐱᐊᒡᒥ.

ᑐᕌᖅᑎᑦᑎᕗᖅ ᐱᓕᕆᐊᒃᓴᐅᔪᒥ ᓴᓂᓕᖃᖅᖢᓂ ᓖᑎᐊ ᓲᑉᓄᕐ, ᐃᓕᓐᓂᐊᖅᑎᑦᑎᓲᖑᔪᒥ Menno Simons−ᒥ.

ᐱᓕᕆᐊᒃᓴᐅᔪᖅ, ᑕᐃᔭᐅᔪᒥ “ᐅᑉᐱᓇᖅ–ᑎᑎᖅᑲᓂ ᓄᓇᕗᒻᒥ: ᐃᓄᐃᑦ ᐃᓕᖅᑯᓯᖓᓐᓂ ᐊᓯᐅᔨᓂᐅᔪᒥ ᐊᒻᒪ ᐆᒪᑎᑦᑏᓐᓇᕋᓱᐊᕐᓂᕐᒥ 1960−ᖏᓐᓂ ᐊᒻᒪ 1970−ᖏᓐᓂ,” ᐃᓚᖃᕐᓂᐊᖅᐳᖅ ᑐᑭᓕᐊᖑᓂᖏᓐᓂ ᐅᓄᕐᓂᖅᓴᐅᔪᓂ 30−ᓂ ᑎᑎᖅᑲᓂ ᐊᒡᒐᒧᑦ ᑎᑎᕋᖅᓯᒪᔪᓂ ᓄᑕᐅᙱᓐᓂᖅᓴᐅᔪᒥ ᐃᓄᒃᑎᑑᒻᒥ ᑕᐃᔅᓱᒪᙵᑦ ᐋᔾᔨᒌᓕᖅᑎᓐᓇᓱᖕᓂᕐᒥ ᑎᑎᕋᐅᓯᕐᓂᑦ ᑕᒪᒃᑭᒐᓚᑦ ᐅᖃᖅᑎᐅᔪᑦ ᒫᓐᓇᐅᔪᒥ ᐊᑐᖅᐸᒃᑐᓂ.

ᐃᓗᓕᖏᑦ ᐅᑯᓇᓂ ᑎᑎᖅᑲᐅᔪᓂ ᐱᓕᕆᐊᒃᓴᐅᔪᖅ ᐸᐸᑦᑏᓐᓇᕋᓱᐊᕐᓂᖓᓂ ᐊᒻᒪ ᐊᑐᐃᓐᓇᙳᖅᑎᑦᑎᓇᓱᐊᕐᓂᕐᒥ ᓯᕗᓂᒃᓴᒧᑦ ᐱᐅᓯᖃᑎᒌᖑᔪᓄᑦ, ᐅᖃᓚᐅᖅᐳᖅ ᓲᑉᓄᕐ, ᐃᓕᓴᕆᔭᐅᓯᒪᓂᖓᓂ ᐃᓕᓐᓂᐊᕐᓂᖓᓂ ᑎᑎᕋᓚᐅᖅᑕᖓᓂ ᑕᐅᑐᒃᑕᑐᐊᖃᑲᐃᓐᓇᖅᑐᒥ ᐱᓕᕆᓂᐅᔪᒥ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᒃᑯᓐᓄᑦ ᐊᒻᒪ ᐃᑲᔪᓚᐅᖅᐸᖓ ᑲᑎᖃᑎᖃᕐᓂᖓᓂ ᐃᓄᖕᓄᑦ ᓯᕗᓕᐅᖅᑎᐅᔪᓄᑦ ᑰᓕᑎᑐᑦ.

ᑎᑎᖅᑲᑦ ᐊᑕᐅᓯᐅᓪᓗᓂ ᐱᔾᔪᑕᐅᓚᐅᕆᕗᑦ ᑐᕌᖅᑎᑦᑎᓚᐅᖅᑐᓂ ᐋᖅᑭᒃᓯᓂᐅᔪᒥ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ ᑲᓇᑕᒥ ᑲᑐᔾᔨᖃᑎᒌᖑᔪᒥ ᐱᓕᕆᔪᓂ ᓴᐳᔾᔨᓯᒪᓂᕐᒧᑦ ᐊᒻᒪ ᐃᑲᔪᖅᓱᐃᓂᕐᒥ ᐱᔪᓐᓇᕐᓂᕆᔭᐅᔪᓄᑦ ᐊᒻᒪ ᐱᔪᒪᔭᐅᔪᓄᑦ ᐃᓄᖕᓂ ᑲᓇᑕᒥ ᑰᓕ ᐃᒻᒥᓂᒃ ᐃᑲᔪᓚᐅᕐᓂᖓᓂ ᓇᓂᓯᓂᖓᓂ, ᓲᑉᓄᕐ ᐅᓂᒃᑳᓚᐅᖅᐳᖅ.

“ᐅᑯᐊ ᑎᑎᖅᑲᐃᑦ ᓄᓇᓕᖕᓂ ᐱᓕᕆᐊᒃᓴᐅᓚᐅᖅᐳᑦ ᐱᔭᕆᐊᖃᓚᐅᖅᑐᓂ ᐃᓄᖕᓂ ᓯᕗᓕᐅᖅᑎᓂ ᓴᖅᑭᑎᑦᑎᓂᖏᓐᓂ ᑲᑐᔾᔨᖃᑎᒌᖑᔪᓂ. ᐊᓯᖏᓐᓂ ᑐᓴᖅᖢᓂ, ᖃᐅᔨᒪᓪᓗᓂ ᐱᓪᓚᕆᐅᓂᖓᓂ ᖃᓄᐃᓐᓂᐅᔪᒥ ᐊᒻᒪ ᐄ, ᑲᑐᔾᔨᖃᑎᖃᕆᐊᖃᖅᐳᒍᑦ ᐊᒻᒪ ᐄ, ᑲᑐᔾᔭᐅᔪᒥ ᓂᐱᖃᕆᐊᖃᖅᐳᒍᑦ,” ᐅᖃᓚᐅᖅᐳᖅ.

“ᑕᐃᒫᒃ ᑎᑎᖅᑲᐃᑦ ᐱᒻᒪᕆᕐᔪᐊᖑᕗᑦ, ᐋᖅᑭᒃᓱᒐᕐᒥ ᐃᓚᒋᔭᐅᖕᒪᑕ ᑲᓇᑕᐅᑉ ᐊᑐᖅᐸᓚᐅᖅᑕᖏᓐᓂ, ᐋᖅᑭᒃᓱᒐᕐᒥ ᐃᓚᒋᔭᐅᔪᒥ ᓄᓇᖃᖅᑳᖅᓯᒪᔪᓄᑦ ᑲᓇᑕᒥ ᐊᑐᖅᐸᓚᐅᖅᑕᖏᓐᓂ ᐊᒻᒪ ᐋᖅᑭᒃᓱᒐᕐᒥ ᐃᓚᒋᔭᐅᓪᓗᓂ ᐃᓄᐃᑦ ᐊᑐᖅᐸᓚᐅᖅᑕᖏᓐᓂ.”

ᐅᑉᐱᓇᖅ–ᑎᑎᖅᑲᑦ ᑮᓇᐅᔭᖃᖅᑎᑕᐅᓚᐅᖅᐳᑦ $10,000 ᑐᓂᕐᕈᑎᒥᒃ ᓄᓇᕘᑉ ᐃᓕᖅᑯᓯᓕᕆᔨᒃᑯᓐᓂ ᐃᑦᑕᕐᓂᓴᓕᕆᔨᒃᑯᓐᓂᓪᓗ ᐱᓕᕆᕝᕕᖓᓂ. ᐃᑲᔪᖅᓱᐃᓪᓗᓂ ᐱᓕᕆᐊᒃᓴᐅᔪᒥ ᐃᓕᓐᓂᐊᖅᑎᐅᕗᖅ ᔅᑕᐃᓯ ᐸᓂᔪᒃ ᓄᓇᖃᖅᑳᖅᓯᒪᔪᓄᑦ ᐊᐅᔭᒃᑯᑦ ᐃᓕᓐᓂᐊᖅᑎᐅᔪᓂ ᐱᓕᕆᐊᖑᔪᒥ ᓯᓚᑦᑐᖅᓴᕐᕕᒡᔪᐊᕐᒥ ᐅᐃᓂᐱᐊᒡᒥ ᐊᒻᒪ ᐱᕐᓇᑎ ᑏᓐ, ᑐᕌᖅᑎᑦᑎᓪᓗᓂ ᑐᑭᓕᐊᖑᓂᖏᓐᓂ ᑎᑎᖅᑲᓂ.

ᑐᕌᖓᓂᖃᕐᔪᐊᖅᐳᖅ ᐊᒻᒪ ᐅᖃᐅᓯᖃᖅᐳᖅ ᐊᒻᒪ ᐱᔪᓐᓇᕐᓂᐅᔪᒥ ᑐᑭᓯᐅᒪᓂᕐᒥ ᐊᔾᔨᒌᙱᑦᑐᓂ ᐅᖃᓪᓚᐅᓯᓂ ᐊᔾᔨᒌᙱᑦᑐᓂ ᐊᕕᒃᑐᖅᓯᒪᓂᐅᔪᓂ,” ᑰᓕ ᐅᖃᓚᐅᖅᐳᖅ ᑏᓐᒥ.

ᑐᑭᓕᐊᖑᔪᑦ ᓂᕆᐅᒋᔭᐅᕗᑦ ᑕᖅᑭᒐᓚᖕᓂ 6−ᓂ ᐱᓕᕆᔭᐅᓂᐊᕋᓱᒋᔭᐅᕗᑦ, ᐊᒻᒪ ᐱᔭᕇᖅᑕᐅᒃᐸᑕ, ᑲᑎᙵᓂᐅᔪᑦ ᓂᕆᐅᒃᐳᑦ ᐋᖅᑭᒃᓱᐃᓂᕐᒥ, ᓇᓗᓇᐃᖅᑕᐅᓗᑎᒃ, ᐊᒻᒪ ᐃᒻᒪᖄ ᐅᖃᓕᒫᒐᓕᐊᖑᓗᑎᒃ.

ᓲᑉᓄᕐ ᐅᖃᓚᐅᖅᐳᖅ ᐊᑐᕐᓂᖓᓂ ᐅᖃᓕᒫᕐᓂᕐᒥ ᑎᑎᖅᑲᓂ ᐊᒃᑐᖅᓯᓐᓇᖅᑑᕗᖅ.

“ᐊᔾᔨᒋᙱᑕᒻᒪᕆᐊᓗᐊ ᑕᑯᓪᓗᒋᑦ ᑎᑎᖅᑲᐃᑦ ᐊᒻᒪᓗ ᐅᖃᓕᒫᕐᓂᕐᒧᑦ ᐅᑯᐊ ᓇᖕᒥᓂᕆᔭᐅᔪᓂ ᐅᖃᐅᓯᒃᓴᓕᐊᖑᔪᓂ ᐊᒻᒪᓗ ᑕᑯᓂᕐᒥ ᐊᒡᒐᒧᑦ ᑎᑎᕋᖅᓯᒪᓪᓚᕆᒃᑐᓂ ᐊᑐᖅᑕᐅᕙᓚᐅᖅᑐᓂ ᐅᑭᐅᖅᑕᖅᑐᒥ ᐃᓕᓐᓂᐊᕐᓂᕐᒧᑦ ᐱᓕᕆᓂᐅᓪᓗᓂ ᐊᕕᓯᒪᓂᖃᒐᔪᒃᑐᒥ ᐊᒻᒪ ᑲᑎᙵᕐᔪᐊᖅᓯᒪᔪᓂ ᐊᒻᒪ ᑕᒪᐃᑎᒎᖅᓯᒪᔪᓂ,” ᐅᖃᓚᐅᖅᐳᖅ.

“ᐅᑯᐊ ᓲᕐᓗ ᓇᖕᒥᓂᖅ ᐊᑐᖅᑕᐅᓂᑯᓂ ᐃᓄᖕᓂ ᑕᐃᔅᓱᒥᖓ ᐊᑐᖅᓯᒪᔪᓄᑦ.”

ᑰᓕᒧᑦ, ᑎᑎᖅᑲᑦ ᑭᒡᒐᖅᑐᐃᕗᑦ ᑕᖃᔪᐃᑦᑐᓂ ᐱᓕᕆᓂᐅᔪᓂ ᐃᓄᐃᑦ ᐃᓄᑐᖃᐃᑦ ᐊᒻᒪ ᐃᓅᖃᑎᒌᖑᔪᓄᑦ ᐊᓯᔾᔨᖅᓯᓇᓱᒃᑐᑦ ᐃᓕᖅᑯᓯᒥᓂᒃ ᐆᒪᑎᑦᑏᓐᓇᕋᓱᐊᖅᑐᓂ.

“ᐅᓇᑕᕐᔪᐊᕆᐊᖃᓚᐅᖅᐳᒍᑦ ᓴᖅᑭᑎᑦᑎᓂᕐᒥ ᑭᓇᐅᓂᑦᑎᓐᓂ ᐊᒻᒪ ᐱᔪᓐᓇᕐᓂᕆᔭᑦᑎᓐᓂ ᐊᒻᒪ ᐱᒐᓛᒃᓯᒪᕗᒍᑦ ᐃᓚᖓᒍᑦ, ᐃᓱᒪᕗᖓ, ᑎᑭᐅᑎᓯᒪᕙᕗᑦ,” ᑰᓕ ᐅᖃᓚᐅᖅᐳᖅ.

“ᐊᑕᐅᑦᑎᒃᑯᑦ ᐱᓕᕆᔪᓐᓇᓚᐅᙱᑉᐸᕗᑦ ᑲᑎᔾᔨᓗᑕ, ᑭᓯᐊᓂ ᑕᐃᒫᒃ ᐅᑯᐊ ᑎᑎᖅᑲᐃᑦ ᐱᒻᒪᕆᕐᔪᐊᖑᕗᑦ. ᑐᓴᕆᐊᖃᖅᐳᒍᑦ ᑲᑎᙵᓂᐅᔪᒥ ᐃᓄᑐᖃᑦᑎᓐᓂ, ᓯᓚᑐᔪᓂ ᐃᓄᖕᓂ.”

Share This Story

(0) Comments