ᐃᖃᓗᖕᓂ ᕿᓂᖅᐳᑦ ᑮᓇᐅᔭᓂ ᐃᓄᑐᖃᕐᓄᑦ, ᒪᒃᑯᒃᑐᒃᑯᕕᖕᒧᑦ ᓄᑖᙳᕆᐊᖅᑎᑕᐅᓂᖏᓐᓄᑦ

ᐃᖃᓗᐃᑦ ᕿᓂᖅᐳᑦ $203,000−ᓂ ᓄᓇᕗᒻᒥ ᐃᓕᖅᑯᓯᓕᕆᔨᒃᑯᓐᓂ ᐊᒻᒪ ᐃᑦᑕᕐᓂᓴᓕᕆᔨᓂᑦ ᓄᑖᙳᕆᐊᖅᑎᑦᑎᓂᕐᒥ ᐃᒡᓗᖁᑎᖏᓐᓂ ᐊᑐᖅᑕᐅᕙᒃᑐᓂ ᒪᒃᑯᒃᑐᓂ ᐊᒻᒪ ᐃᓄᑐᖃᕐᓂ ᐊᒻᒪ ᐱᐅᓯᒋᐊᖅᑎᑦᑎᓂᕐᒧᑦ ᓄᓇᓕᐸᐅᔭᐅᑉ ᐅᐃᕖᑎᑐᑦ ᑐᑭᓕᐊᖑᓂᖏᓐᓂ ᐱᔪᓐᓇᕐᓂᐅᔪᓂ.

ᐅᓂᒃᑳᓕᐊᖑᔪᒥ ᓄᓇᓕᐸᐅᔭᒥ ᑲᑎᓴᔨᐅᔪᓄᑦ ᐱᓇᓱᐊᕈᓯᐅᓚᐅᖅᑐᒥ ᐅᖃᖅᓯᒪᕗᖅ ᑐᒃᓯᕋᕐᓂᓕᐅᓚᐅᖅᐳᑦ $118,000−ᒥ ᓄᑖᙳᕆᐊᖅᑎᑦᑎᓂᕐᒥ ᑕᒪᒃᑭᓂ ᐃᓄᑐᖃᐃᑦ ᖃᒻᒪᖓᓂ — ᐃᓂᐅᔪᒥ ᐃᓄᑐᖃᐃᑦ ᑲᑎᑉᐸᖕᓂᖏᓐᓂ ᓂᕿᓄᑦ, ᐱᙳᐊᕐᓂᕐᓄᑦ ᐊᒻᒪ ᐊᓯᖏᓐᓂ ᐃᓅᖃᑎᒌᖑᔪᓄᑦ ᖃᓄᐃᓕᐅᕈᑕᐅᔪᓂ — ᐊᒻᒪ ᒪᒃᑯᒃᑐᒃᖁᕕᒃ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᕐᒥ ᐊᓐᓂᑭᑕᕐᕕᖓᓂ.

“ᐅᑯᐊ ᒪᕐᕉᒃ ᐃᓂᐅᔪᑦ ᐱᔨᑦᑎᕋᓲᖑᕗᑦ ᐱᓪᓚᕆᐅᓪᓗᑎᒃ ᐃᓂᐅᓪᓗᑎᒃ ᒪᒃᑯᒃᑐᓄᑦ ᐊᒻᒪ ᐃᓄᑐᖃᕐᓄᑦ ᓄᓇᓕᖕᓂ, ᐊᒻᒪ ᐸᖅᑭᔭᕆᐊᖃᕐᓂᖏᑦ ᐱᓪᓚᕆᐅᕗᖅ ᑲᒪᒋᔭᖃᕐᓂᕐᒥ ᓯᕗᓂᑦᑎᓐᓂ ᒫᓐᓇᒧᑦ ᑲᔪᓯᔪᓄᑦ ᐃᓚᐅᑎᑦᑎᓂᕐᒥ, ᐃᓕᖅᑯᓯᒥᒃ ᑲᔪᓯᑎᑦᑎᓂᕐᒥ, ᐊᒻᒪ ᓄᓇᓕᖕᓂ ᖃᓄᐃᙱᑦᑎᐊᕐᓂᐅᔪᒧᑦ,” ᐅᓂᒃᑳᓕᐊᖅ ᐅᖃᓚᐅᖅᐳᖅ.

ᓄᑖᙳᕆᐊᖅᑎᑕᐅᓂᐅᔪᓂ ᐃᓚᖃᖅᐳᖅ ᓄᑖᙳᕆᐊᖅᑎᑕᐅᔪᓂ ᐊᓇᕐᕕᓂᑦ ᐊᒻᒪ ᓇᑎᖏᓐᓂ, ᐊᒻᒪ ᓄᑖᖑᔪᒥ ᐊᒥᐊᕆᔭᐅᓂᖏᓐᓂ ᐊᒻᒪ ᐃᒡᓗᒧᑦ ᐱᖁᑎᓄᑦ.

ᐅᐃᕖᑎᑐᑦ ᐅᖃᐅᓯᕐᒥ ᐱᔨᑦᑎᕋᕐᓂᕐᒧᑦ, ᓄᓇᓕᐸᐅᔭᖅ ᕿᓂᖅᐳᑦ $50,000−ᒥ ᐃᑲᔪᖅᓱᐃᓂᕐᒥ ᐱᔪᓐᓇᕐᓂᖓᓂ ᓴᖅᑭᑎᑦᑎᓂᕐᒥ ᐅᐃᕖᑎᑐᑦ ᑐᓴᒐᒃᓴᓕᐊᖑᔪᓂ, ᒪᓂᓴᐅᑎᓂᑦ ᐊᒻᒪ ᐊᓯᖏᓐᓂ ᐋᔩᖃᑎᒌᖕᓂᕐᒧᑦ ᓱᓇᒃᑯᑖᓄᑦ.

ᓄᓇᓕᐸᐅᔭᖅ ᕿᓂᕆᕗᑦ $35,000−ᒥ ᐊᑭᓖᓂᕐᒧᑦ ᐱᓕᕆᐊᖑᔪᒧᑦ ᑐᓂᓯᔪᒥ ᐃᓄᑐᖃᕐᓂ ᓂᕿᓪᓚᑦᑖᓂ ᐊᒻᒪ ᓴᓇᐅᒐᓕᕆᓂᕐᒧᑦ ᓱᓇᒃᑯᑖᓂ ᒥᖅᓱᕐᓂᕐᒧᑦ ᐊᒻᒪ ᓴᓇᙳᐊᕐᓂᕐᒧᑦ.

ᔪᓚᐃ 8−ᒥ ᑲᑎᒪᓂᖓᓂ, ᑲᑎᒪᔨᐅᔪᑦ ᓂᕈᐊᓚᐅᖅᐳᑦ ᐃᖅᑲᓇᐃᔭᖅᑎᖏᓐᓂ ᕿᓂᕐᓂᖏᓐᓂ ᑮᓇᐅᔭᖃᖅᑎᑕᐅᓂᐅᔪᒥ ᓄᓇᕗᒻᒥ ᒐᕙᒪᒃᑯᓐᓂ.