ᑲᓲᕕᑎᕝᑯᑦ, ᐊᓐᑏᐲᑯᑦ ᐃᒡᓗᒃᓴᖅᑖᖅᑎᑦᑎᓂᐊᕐᓂᕋᐃᔪᑦ, ᐃᑭᐊᕿᕕᖃᕈᑎᒃᓴᓂᒃ

ᑲᓐᓲᕕᑎᕝᑯᑦ ᐊᒻᒪᓗ ᓂᐅ ᑎᒧᑯᕌᑎᒃ ᐹᑎᑯ ᖃᓄᐃᓕᐅᕐᓂᐊᕐᓂᕋᑲᑕᒃᑐᑦ ᒪᐅᓇ ᐃᒡᓗᓕᕆᓂᒃᑯᑦ ᐊᒻᒪᓗ ᐃᑭᐊᕿᕕᓕᕆᓂᒃᑯᑦ ᓂᕈᐊᕐᓇᐅᓂᐊᕐᑑᑉ ᑕᖅᑭᐅᓂᐊᖅᑐᒥᑦ ᓯᕗᓂᐊᒍᑦ.

ᑖᒃᑯᐊ ᓂᕈᐊᒐᒃᓴᐅᓇᓱᒃᑐᑦ ᓴᖅᑭᑎᑦᑎᕗᑦ ᖃᓄᐃᑦᑐᓂᒃ ᓂᕈᐊᖅᑕᐅᔾᔪᑎᒃᓴᖃᕐᓂᖏᓐᓂᒃ ᓯᑎᐱᕆ 20 ᓂᕈᐊᕐᓇᒧᑦ, ᐃᓚᖓᒍᑦ ᐊᔾᔨᒌᐸᓗᒃᖢᑎᒃ ᒪᑯᓄᖓ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ ᑲᓇᑕᒥ, ᓇᓕᐊᒃ ᐅᖃᙱᒃᑲᓗᐊᖅᖢᓂ ᖃᓄᖅ ᐊᓯᙳᖅᑎᑦᑎᓇᔭᕆᐊᒃᓴᖓᓂᒃ.

ᐸᕐᓇᐅᑎᒋᔭᐅᔪᑦ ᐊᔾᔨᒌᙱᑦᑐᒃᑰᖓᔪ ᐅᑯᐊ ᑲᓐᓲᕕᑎᕝᑯᑦ ᐅᖃᐅᓯᖃᕐᓂᕐᓴᐅᓪᓗᑎᒃ ᐃᑲᔪᕈᑎᖃᖅᑎᑦᑎᓂᐊᕐᓂᖏᓐᓂᒃ ᐱᓕᐊᓐᑖᓚᐅᑉ ᓇᑉᐸᖓᓂᒃ ᐊᑐᖅᑕᐅᓇᔭᖅᑐᒥ ᓄᓇᕗᒥ ᐊᑐᒃᑲᓐᓂᕈᓐᓇᖅᑐᓕᕆᓂᕐᒧᑦ ᒪᐅᖓ ᖃᐅᔨᓴᖅᐸᓪᓕᐊᓂᒃᑯᑦ, ᐅᑯᐊᓗ ᐊᓐᑏᐲᑯᑦ ᑲᓇᑕᒥᐅᓂᒃ ᑏᓱᒥ ᐊᑐᕈᓐᓃᖅᑎᑦᑎᔪᒪᓪᓗᑎᒃ ᒪᑯᓄᖓ ᐆᒻᒪᖁᑎᓕᕆᓂᕐᒧᑦ ᔭᓄᕇᑕᓂᒃ.

ᐅᑯᐊᓕ ᓄᓇᕗᒻᒥᐅᑕᑦ ᐃᓚᖏᑦ ᐅᑕᕿᔪᑦ ᐅᑯᐊ ᓕᐳᕈᒃᑯᑦ ᐊᒻᒪ ᒍᕇᓐ ᐹᑎᒃᑯ ᖃᓄᐃᓕᐅᕐᓂᐊᕐᓂᕋᕈᑎᖏᓐᓂᒃ.

ᑲᓐᓲᕕᑎᕝᑯᑦ ᐸᕐᓇᐅᑎᖓ

ᑲᓐᓲᕕᑎᕝᑯᑦ ᐊᖓᔪᖅᑳᖓ ᐃᐅᕆᓐ ᐅ’ᑑᓪ ᓴᖅᑭᑎᑦᑎᓚᐅᕐᑐᖅ ᓂᕈᐊᖅᑕᐅᔾᔪᑎᒋᓇᓱᒃᑕᖓᓂᒃ ᐋᒐᓯ 16-ᖑᑎᓪᓗᒍ ᑮᓇᐅᔭᑲᓪᓛᓗᖕᓂ ᒫᓂ 1 ᒥᓕᐊᓐᓂ ᐃᒡᓗᓕᐅᕐᓂᐊᕐᓂᕋᖅᖢᓂ ᑖᒃᑯᐊ ᑎᐅᕆᑑᕆᐅᔪᑦ ᐊᒻᒪ ᐱᔭᕆᐊᖃᖅᑕᖏᓐᓂᒃ ᐱᑎᑕᐅᖕᒥᓗᑎᒃ ᑖᓐᓇᓗ ᐊᕕᒃᑐᖅᓯᒪᓂᒃᑯᑦ ᖃᔅᓯᐅᓇᔭᕐᓂᖏᑦ ᐅᖃᙱᖢᓂ.

ᓇᓗᓇᐃᖅᓯᓪᓚᕆᙱᖢᑎᒡᓕ, ᐅᑯᐊ ᑲᓐᓲᕕᑎᕝᕕ ᐅᖃᒪᐅᕐᑐᑦ “ᓄᖃᖅᑎᑦᑎᔪᒪᓂᕋᖅᖢᓂ ᒐᕙᒪᑐᖃᒃᑯᑦ ᐊᐅᓚᑦᑎᔨᒻᒪᕆᐅᓂᖏᓐᓂᒃ ᑭᓯᐊᓂᓕ ᐱᓕᕆᖃᑎᖃᕐᓗᑎᒃ ᓄᓇᖃᖅᑳᖅᑐᑦ ᓄᓇᓕᖏᓐᓂᒃ ᐊᒻᒪᓗ ᓄᓇᖃᖅᑳᖅᑐᓂᒃ ᐱᔪᓐᓇᐅᑎᖃᖅᑎᑦᑎᓕᕐᓗᓂ ᓇᖕᒥᓂᖅ ᐃᒡᓗᖃᕆᐊᖃᕐᓂᖏᓐᓂᒃ ᐊᐅᓚᑦᑎᔪᓐᓇᖅᓯᓂᐊᕐᒪᑕ.”

ᒪᐅᓇᓕ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓕᕆᓂᒃᑯᑦ, ᑖᒃᑯᐊ ᐅᖃᕐᓯᒪᔪᖅ ᐸᕐᓇᐅᓯᐅᖅᓯᒪᓂᖏᓐᓂᒃ ᑲᓇᑕᒥᐅᑕᓕᒫᓂᒃ ᓱᒃᑲᔪᒥᒃ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᖃᖅᑎᑦᑎᓕᓂᐊᕐᓂᕋᖅᑐᖅ 2025 ᑎᑭᓚᐅᕐᑎᓐᓇᒍ.

ᑲᓐᓲᕕᑎᕝᑯᑦ ᐸᕐᓇᐅᑎᖏ ᐱᒋᐊᕐᕕᖃᕐᒥᔪᖅ ᐊᓐᑏᐲᑯᑦ ᑐᕌᒐᓪᓗᐊᑕᕆᓇᓱᒃᑕᖓᓂᒃ ᐆᒥᖓ ᒍᕇᔅ ᐸᐃᒥ ᐊᖅᑯᑎᓕᐅᕐᓂᖅᒥᒃ ᐊᒻᒪᓗ ᑐᓚᒃᑕᖅᕕᒃᓴᓕᐅᕈᒪᓂᖅ. ᐅᓇ ᐊᑦᑕᑕᕈᑎᐅᔪᓐᓇᕋᔭᖅᑐᖅ ᑲᓇᑕᐅᑉ ᓂᒋᐊᓂ ᒪᑯᓄᖓ ᐅᔭᕋᒃᓯᐅᕐᕕᐅᔪᓐᓇᖅᑐᓄ ᓄᓇᑦᓯᐊᕐᒦᑦᑐᓂᒃ ᐊᒻᒪ ᓄᓇᕗᒥᑦ, ᐊᒻᒪᓗ ᐃᓚᖃᕋᔭᖅᖢᓂ 227 ᑭᓛᒥᑕᓂ ᖃᖓᓕᒫᖅ ᐊᖅᑯᑎᐅᔪᓐᓇᖅᑐᒥᓐ ᐊᒻᒪᓗ ᐃᑎᔪᒥ ᑐᓚᒃᑕᖅᕕᒃᓴᒥ ᒍᕇᔅ ᐸᐃᒥ, ᐅᓇ 150 ᑭᓛᒥᑕᓂ ᖁᒡᓗᖅᑑᑉ ᑲᓇᖕᓇᖓᓃᑦᑐᖅ.

ᐅᓇ ᐱᓕᕆᐊᒃᓴᖅ ᐊᑭᖃᕋᔭᕐᑐᖅ $500 ᒥᓕᐊᓐ ᑖᓚᐃᑦ ᑐᖏᑦᑎᐊᖓᓂ ᐅᕘᓇᓕ 2018-ᒥᑦ ᑎᑎᕋᖅᑕᐅᔪᕕᓂᕐᓂᒃ ᓄᓇᕗᒥᑦ ᒐᕙᒪᒃᑯᓐᓄᑦ ᐊᒻᒪ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᔭᒌᓄᑦ.

ᑲᓐᓲᕕᑎᕝᑯᑦ ᐱᓂᐊᕐᓂᕋᓚᐅᕐᒥᔪᖅ ᐃᑲᔫᑎᑖᖅᑎᑦᑎᓂᐊᕐᓗᑎᒃ ᑭᕙᓪᓕᖅᒥ ᐆᒧᖓ ᐆᒻᒪᖅᑯᑎᓕᕆᓂᕐᒥᒃ ᖃᕋᓴᐅᔭᕐᓄᑦ ᐊᑦᑕᑕᕈᓐᓇᐅᑎᒃᓴᒥ ᐊᒻᒪ ᐆᒻᒪᖅᑯᑎᖃᖅᑎᑦᑎᔾᔪᑎᒃᓴᒥᑦ ᑭᕙᓪᓕᐊᕐᒥᐅᓂᒃ ᐊᑦᑕᑕᖅᓯᒪᓂᕐᒧᑦ ᒫᓂᑑᐸᒥ. ᐅᓇ ᐱᓕᕆᐊᒃᓴᖅ ᐊᑭᖃᕋᔭᕋᓱᒋᔭᐅᔪᖅ ᒫᓂ $1.6 ᐱᓕᐊᓐ ᑖᓚᓂ, ᐅᕘᓇᓕ ᐱᓕᕆᐊᒧᑦ ᖃᕋᓴᐅᔭᒃᑯᑦ ᓴᖅᑭᔮᒐᕆᔭᐅᔪᑎᒍᑦ.

ᐅᓇᑦᑕᐅᖅ ᑲᓐᓲᕕᑎᕝᑯᓐᓄᑦ ᑮᓇᐅᔭᖃᓪᓚᖕᓂ ᐊᑐᕐᕕᒋᔭᑐᐊᕆᔾᔮᙱᑕᖓ ᑭᓯᐊᓂᓕ ᐸᕐᓇᒃᓯᒪᖕᒥᔪᑦ $1 ᐱᓕᐊᓐ ᑖᓚᓂ ᐊᕐᕌᒍᓄᑦ ᑕᓪᓕᒪᓂᒃ ᐋᖅᑭᒃᓯᓯᒪᓇᔭᕐᓂᖏᓐᓂᒃ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪᓗ ᐊᑐᓗᐊᕐᓂᖅᒧᑦ ᒪᒥᓴᕐᕕᐅᓇᔭᖅᑐᓄᑦ ᐋᖅᑭᒃᑕᐅᓯᒪᓗᑎᒃ ᓄᓇᖃᖅᑳᖅᑐᓄᑦ ᒪᐅᓇ ᓄᓇᒥ ᐱᓕᕆᔾᔪᑎᐅᓇᔭᕐᑐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ ᐊᑐᕐᓗᑎᒃ.

ᐊᓯᖏᑦ ᓄᓇᕗᒧᑦ ᐊᒃᑐᐊᔪᑦ ᐅᖃᐅᓯᐅᓚᐅᕐᒥᔪᑦ ᐃᓚᖃᖅᖢᑎᒃ ᐅᑯᓂᖓ ᑎᐅᕆᑑᕆᒦᑦᑐᑦ ᐋᖅᑭᒃᓯᔪᓐᓇᕐᓗᑎᒃ ᐃᓱᖃᕐᕕᒋᔪᓐᓇᖅᑕᖏᓐᓂᒃ ᐊᑐᖅᑐᐊᕈᓐᓇᖅᑎᑕᐅᓂᖏᓐᓄᑦ ᒐᕙᒪᑐᖃᒃᑯᓐᓂᒃ, ᑮᓇᐅᔭᖅᑖᕐᓗᑎᒃ ᐅᔭᕋᒃᓯᐅᕐᓂᖅᒥᒃ ᐊᔪᕈᓐᓃᖅᓴᐅᑎᒃᓴᓄᑦ, ᐱᓕᕆᖃᑎᖃᕐᓗᑎᒃ ᐅᑭᐅᕐᑕᖅᑐᕐᒥᐅᓂᒃ ᐱᕈᖅᑎᑦᑎᓇᓱᒡᓗᑎᒃ ᐳᓚᕋᖅᑐᓕᕆᓂᒃᑯᑦ ᑮᓇᐅᔭᓕᐅᕈᑎᐅᔪᓐᓇᖅᑐᓂᒃ ᐊᒻᒪᓗ ᓄᓇᓕᖕᓃᑦᑐᓂᒃ ᐃᖃᓗᓕᕆᕝᕕᒃᑖᖅᑎᑕᐅᓗᑎᒃ.

ᐊᓐᑏᐲᑯᑦ ᐊᑐᕐᓂᐊᕐᓂᕋᖅᑕᖏᑦ

ᐅᑯᐊ ᓂᐅ ᑎᒧᑯᕌᑎᒃ ᐹᑭᑯᑦ 500,000-ᓂ ᐊᑭᓕᒐᕐᓂᖅᑐᓂᒃ ᐃᒡᓗᒃᓴᖃᖅᑎᑦᑎᓂᐊᕐᓂᕋᖅᑐᑦ ᑲᓇᑕᓕᒫᒥᑦ ᐊᕐᕌᒍᑦ ᖁᓕᑦ ᐃᓗᐊᓂᒃ, ᓇᑉᐸᖏᑦ ᓴᓇᔭᐅᓂᐊᕐᓗᑎᒃ ᐊᕐᕌᒍᑦ ᑕᓪᓕᒪᑦ ᐃᓗᐊᓂ. ᐅᖃᐅᓯᐅᓚᐅᙱᑦᑐᖅ ᖃᔅᓯᐅᓂᐊᕐᒪᖔᑦ ᐃᒡᓗᒃᓴᐃᑦ ᐅᑭᐅᕐᑕᖅᑐᕐᒧᐊᖅᑕᐅᓂᐊᖅᑐᓂᒃ.

ᑖᒃᑯᓄᖓ ᐊᖓᔪᖅᑳᕆᔭᐅᔪᖅ ᔭᒡᒦᑦ ᓯᖕ ᓴᖅᑭᑎᑦᑎᓚᐅᕐᑐᖅ ᐊᓐᑏᐲᑯᑦ ᐱᓕᕆᔾᔪᑎᒋᔭᖏᓐᓂᒃ ᐱᓇᓱᐊᕈᓯᕐᒥᒃ ᓯᕗᓂᐊᓂᒃ ᓂᕈᐊᕐᓇᐅᓛᖅᑐᖅ ᐅᖃᐅᓯᐅᓚᐅᖅᑎᓐᓇᒍᓘᓐᓃᑦ. ᒪᑯᓄᖓᓕ ᐃᑭᐊᕿᕕᓕᕆᓂᒃᑯᑦ, ᐊᓐᑏᐲᑯ ᐆᒥᖓ ᐃᑭᐊᕿᕕᖃᕆᐊᖃᕐᓂᖅ ᐱᒻᒪᕆᐊᓘᓂᖓᓂᒃ ᐱᔨᑦᑎᕋᐅᑎᑎᒍᑦ ᐊᒻᒪᓗ ᑲᓇᑕᒥᐅᑕᑦ ᐊᑐᐃᓐᓇᖃᕈᓐᓇᕐᓗᑎᒃ ᐊᑭᓕᒐᕐᓂᖅᑐᒥᒃ ᖃᕋᓴᐅᔭᕐᓄᑦ ᐊᑦᑕᑕᕈᓐᓇᐅᑎᓂᒃ ᐊᕐᕌᒍ ᑎᓴᒪᑦ ᐃᓗᐊᒍᑦ.

ᐋᓐᑏᐲᑯᑦ ᐸᕐᓇᐅᑎᖏᑦ ᐅᑯᓇᙶᖅᖢᑎᒃ ᑲᓐᓲᕕᑎᕝᑯᑦ ᐊᑐᕐᓂᐊᕐᓂᕋᖅᑕᖓᓂ ᐃᑲᔫᑎᖃᖅᑎᑦᓂᕐᒥᒃ ᓄᓇᓕᖕᓂ ᒪᓕᒐᓕᕆᓂᕐᒥᒃ ᐱᓕᕆᐊᒃᓴᓄᑦ ᑐᕌᒐᖃᖅᑐᓂᒃ ᒪᒥᓴᖅᐸᓪᓕᐊᓂᕐᒧᑦ ᐊᒻᒪ ᐋᖅᑭᒋᐊᕈᑎᖃᕈᓐᓇᖅᑐᓂᒃ ᒪᓕᒐᓕᕆᓂᕐᒥᒃ.

“ᐅᑯᐊ ᓂᐅ ᑎᒧᑯᕌᑎᒃᑯᑦ ᐅᒃᐱᕈᓱᖕᒥᖕᒪᑕ ᐊᐅᓚᑦᑎᔭᕆᐊᖃᕐᓂᖏᓐᓂᒃ ᐊᑐᐊᒐᓕᕆᓂᕐᒥᒃ ᓄᓇᖏᓐᓄᑦ, ᐊᒻᒪᓗ ᐃᓄᐃᑦ ᑲᒪᔨᒋᑎᑕᐅᓗᑎᒃ ᐸᓖᓯᓕᕆᓂᕐᒥᒃ ᓄᓇᕗᒥᑦ,” ᐸᕐᓇᐅᑎᑦ ᐅᖃᕐᓯᒪᔪᑦ.

ᐅᖃᖅᖢᑎᒃ ᑖᒃᑯᐊ ᐹᑎᐅᔪᑦ ᐃᓄᖕᓂᒃ ᐱᓕᕆᖃᑎᖃᕋᔭᕐᒪᑕ ᐋᖅᑭᒃᓱᐃᕙᓪᓕᐊᑎᓪᓗᒋᑦ ᐊᑯᓂᕈᓗᒃ ᐊᑐᖅᑕᐅᓇᔭᖅᑐᓂ ᖃᓄᐃᓕᐅᕈᑎᒃᓴᓂᒃ ᒪᑯᐊ ᐃᓄᐃᑦ ᓄᓇᓕᖕᓂ ᐱᕐᕈᓗᐊᕿᑎᑦᑎᑦᑕᐃᓕᓂᕐᒧᑦ ᖃᓄᐃᓕᐅᕈᑎᒃᓴᓂᒃ.

ᐊᓐᑏᐲᑯᑦᑕᐅᖅ ᐱᓕᕆᐊᖃᕈᒪᔪᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᑐᕌᒐᖃᕐᓗᑎᒃ ᐅᐊᔭᒥ ᐊᑐᙱᓐᓂᕐᓴᐅᑎᑦᑎᓂᕐᒥᒃ 2030 ᑎᑭᑉᐸᑦ.

ᑕᒪᓐᓇ ᐊᑐᓕᕐᑎᓐᓂᐊᕐᓗᒍ, ᑖᒃᑯᐊ ᐹᑎᐅᔪᑦ ᐃᑲᔪᕋᔭᕐᓂᖏᓐᓂᒃ ᓄᓇᓕᖕᓂ ᓇᖕᒥᓂᖅ ᐆᒻᒪᖅᑯᑎᖃᕈᓐᓇᕐᓯᓗᑎᒃ ᑏᓱᓪ ᐅᖅᓱᐊᓗᒃᒥ ᐊᑐᕈᓐᓃᖅᑎᑦᑎᓗᑎᒃ.

ᐊᓯᖏᑦ ᓄᓇᕗᒧᑦ ᑐᕌᖓᔪᑦ ᓯᕗᓪᓕᐅᑎᑕᐅᔪᒪᔪᑦ ᐊᓐᑏᐲᑯᓐᓂ ᐃᓚᖃᒪᐅᕐᑐᑦ ᐃᓄᒃᑎᑐᑦ ᐊᒻᒪ ᐃᓄᐃᓐᓇᖅᑐᓐ ᐅᖃᐅᓰᑦ ᐃᓚᐅᕙᒡᓗᑎᒃ ᒐᕙᒪᑐᖃᒃᑯᑦ ᓂᕈᐊᕈᑎᒃᓴᖏᓐᓂᒃ – ᐅᓇ ᓄᓇᕗᒧᑦ ᒪᓕᒐᓕᐅᕐᑎᐅᓚᐅᕐᑐᖅ, ᒪᒥᓛᖅ ᖃᖅᑲᖅ ᐃᑲᔪᕈᑎᒋᓇᓱᓚᐅᕐᑕᖓ ᐊᒻᒪᓗ ᐋᖅᑭᒃᓱᐃᓗᑎᒃ ᐅᑭᐅᕐᑕᖅᑐᕐᒥ ᐃᑲᔫᑎᒃᓴᓂᒃ “ᐱᓕᕆᑲᐅᕐᑐᕈᓐᓇᕐᓗᑎᒃ” ᐱᓕᕆᐊᒃᓴᓂᒃ. ᐅᓇ ᐸᕐᓇᐅᑎ ᓇᓗᓇᐃᖅᓯᒪᓪᓚᕆᙱᑦᑐᖅ ᖃᓄᐃᑦᑐᓂᒃ ᐱᓕᕆᐊᒃᓴᓂᒃ ᐊᑐᖅᑎᑦᑎᓇᔭᕐᒪᖔᑕ.