ᐱᑕᖃᙱᓗᐊᕐᓂᖓᓂ ᐃᓴᒃᓯᒪᓂᐅᔪᒥ ᑐᕌᖅᑎᑦᑎᓚᐅᖅᐳᖅ ᓄᓇᕕᖕᒥ ᓂᕈᐊᕐᓂᕐᒥ ᐊᑲᐅᙱᓕᐅᕈᑕᐅᔪᓂ: ᐅᓂᒃᑳᓕᐊᖅ

For English version, see Elections Canada blames Nunavik voting problems on lack of planning, outreach

ᐱᑕᖃᙱᓗᐊᕐᓂᖓᓂ ᐸᕐᓇᐃᓂᕐᒥ ᐊᒻᒪ ᐱᑕᖃᙱᑲᓴᒃᑐᒥ ᓄᓇᓕᖕᓂ ᐃᓴᒃᓯᒪᓂᐅᔪᒥ ᕿᒪᐃᓚᐅᖅᐳᖅ ᐊᒥᓱᓂ ᓄᓇᕕᖕᒥ ᓂᕈᐊᖅᑎᐅᔪᓂ ᐱᕕᒃᓴᖃᑦᑎᐊᙱᓐᓂᖏᓐᓂ ᓂᕈᐊᕐᓂᕐᒧᑦ ᐅᐱᕐᙶᒥᒃ ᒐᕙᒪᑐᖃᒃᑯᑦ ᓂᕈᐊᕐᓂᕆᔭᖓᓂ, ᑲᓇᑕᒥ ᓂᕈᐊᖅᑐᓕᕆᔨᒃᑯᑦ ᐅᖃᖅᐳᖅ.

ᐊᐃᑉᕆᓕ 28−ᒥ, ᐊᒥᓱᑦ ᓂᕈᐊᖅᑎᐅᔪᑦ ᐅᓂᒃᑳᕆᓚᐅᖅᐳᑦ ᓂᕈᐊᕈᓐᓇᓚᐅᙱᓚᑦ ᓂᕈᐊᕐᕕᒃᓴᐃᑦ ᒪᑐᓵᓕᓚᐅᕐᒪᑕ ᐊᒻᒪ ᐊᓯᖏᑦ ᒪᑐᐃᓚᐅᙱᒻᒪᕆᒃᖢᑎᒃ.

ᑲᓇᑕᒥ ᓂᕈᐊᖅᑐᓕᕆᔨᒃᑯᑦ ᖃᐅᔨᓴᓚᐅᖅᐳᑦ ᖃᓄᖅ ᐱᓕᕆᑦᑎᐊᓚᐅᙱᓐᓂᖓᓂ.

ᐅᓂᒃᑳᓕᐊᒥ ᓴᖅᑭᑎᑕᐅᔪᒥ ᓄᕕᐱᕆ 27−ᒥ, ᐱᒡᒍᔾᔨᔨ ᐅᖃᓚᐅᖅᐳᖅ ᐱᓕᕆᓂᖃᙱᓗᐊᓚᐅᕐᓂᖏᓐᓂ ᐃᓚᐅᑎᑦᑎᓂᕐᒧᑦ ᓄᓇᓕᐅᔪᓂᑦ.

ᑲᓇᑕᐅᑉ ᓂᕈᐊᖅᑐᓕᕆᓂᕐᒧᑦ ᐊᖓᔪᖅᑳᖓ ᓯᑎᕚᓐ ᐱᕉᓪ, ᑕᑯᒃᓴᐅᔪᖅ ᑲᓇᑕᒥ ᓂᕈᐊᖅᑐᓕᕆᔨᒃᑯᑦ ᕙᐃᔅᐳᒃᑯᑦ ᒪᒃᐱᒐᖓᓐᓂ, ᒪᒥᐊᓚᐅᖅᐳᖅ ᓄᓇᕕᖕᒥᐅᑕᓄᑦ ᓯᑎᐱᕆᒥ ᐱᒡᒍᔾᔨᔨᖏᑦᑕ ᑲᒪᒋᓂᕆᔭᖓᓂ ᐊᐃᑉᕆᓕ 28−ᒥ ᒐᕙᒪᑐᖃᒃᑯᑦ ᓂᕈᐊᕐᓂᕆᔭᖓᓂ. (ᑲᓇᑕᒥ ᓂᕈᐊᖅᑐᓕᕆᔨᒃᑯᑦ ᐊᔾᔨᓕᐅᖅᑕᖓ/ᕙᐃᔅᐳᒃ)

ᑲᓇᑕᒥ ᓂᕈᐊᖅᑐᓕᕆᔨᒃᑯᑦ ᐊᖏᖅᓯᓚᐅᖅᐳᑦ ᐸᕐᓇᐅᑎᒥᒃ ᐅᖃᖅᖢᑎᒃ “ᓴᖑᓚᐅᖅᑐᒥ” ᓇᖕᒥᓂᖅ ᓂᕆᐅᒋᔭᖏᓐᓂᑦ ᐊᑐᕐᓂᖃᕐᓂᕐᒥ ᓴᓇᔨᐅᔪᓂ ᐊᕕᒃᑐᖅᓯᒪᓂᐅᔫᑉ ᓯᓚᑖᓂ, ᐅᓂᒃᑳᓕᐊᖅ ᐅᖃᓚᐅᖅᐳᖅ.

ᓯᓚᑦᑎᐊᕙᐅᙱᓐᓂᐅᔪᒥ ᓴᖅᑭᓚᐅᖅᐳᖅ ᐅᕝᕙᓘᓐᓃᑦ ᓄᖅᑲᖅᑎᑦᑎᓪᓗᓂ ᖃᖓᑕᓂᐅᔪᓂ ᖃᔅᓯᒐᓚᖕᓂ ᓄᓇᓕᐅᔪᓂ, ᐊᒻᒪ ᓄᓇᓕᖕᓂ ᐋᖅᑭᒃᓱᖅᓯᒪᓂᖃᓚᐅᙱᓚᑦ ᐃᓗᓪᓕᖅᓯᓂᕐᒥ ᐃᓚᑰᓂᐅᔪᓂ.

“ᐅᑯᐊ ᐸᒡᕕᓵᕆᓂᐅᔪᑦ ᒥᒃᖠᒋᐊᖅᑎᑕᐅᔪᓐᓇᕋᔭᓚᐅᖅᐳᑦ ᐱᓕᕆᖃᑎᒌᖕᓂᐅᔪᓂ ᓄᓇᓕᖕᓂ ᑭᒡᒐᖅᑐᐃᔨᐅᔪᓂ ᓴᖅᑭᑎᑕᐅᔪᖃᕐᓂᖅᐸᑦ,” ᐅᓂᒃᑳᓕᐊᖅ ᐅᖃᓚᐅᖅᐳᖅ.

ᐊᑲᐅᙱᓕᐅᕈᑎᖃᓚᐅᖅᐳᖅ ᓯᕗᕐᙵᒍᑦ ᓂᕈᐊᕐᓂᐅᔪᒥ 13−ᓂ 14−ᖑᔪᓂ ᓄᓇᕕᖕᒥ ᓄᓇᓕᐅᔪᓂ ᐊᒻᒪᓗᑦᑕᐅᖅ, 6−ᖑᔪᓂ ᐱᙱᖦᖢᑎᒃ ᐱᕕᒃᓴᖃᕐᓂᐅᔪᒥ ᓯᕗᕐᙵᒐᑦ ᓂᕈᐊᕐᓂᐅᔪᒥ ᐊᒻᒪ 7−ᖑᔪᓂ ᑕᑯᓪᓗᑎᒃ ᑕᒪᓐᓇ ᐱᕕᒃᓴᖃᕐᓂᐅᔪᖅ ᒥᒃᖠᒋᐊᖅᑕᐅᓂᖓᓂ. ᑰᔾᔪᐊᑐᐊᖅ ᓯᕗᕐᙵᒍᑦ ᓂᕈᐊᕐᓂᖃᑦᑎᐊᕈᓐᓇᓚᐅᖅᐳᑦ.

ᐃᓄᐃᑦ ᐃᕗᔨᕕᖕᒥ, ᐃᓄᒋᐊᖕᓂᖓ 412, ᓂᕈᐊᕈᓐᓇᙱᓛᖑᓚᐅᖅᐳᑦ ᓯᕗᕐᙵᒍᑦ ᓂᕈᐊᕐᓂᖃᓚᐅᙱᒻᒪᑕ ᐊᒻᒪ ᓂᕈᐊᕐᕖᑦ ᑕᐃᑲᓂ ᒪᑐᐃᓚᐅᙱᒻᒪᕆᒃᖢᑎᒃ ᓂᕈᐊᕐᓂᕐᒥ ᐅᓪᓗᖓᓂ.

ᐊᑯᓕᕕᖕᒥ, ᐊᓯᖓᓐᓂ ᓄᓇᓕᐅᔪᒥ ᓂᕈᐊᕐᕕᒃᓴᐃᑦ ᒪᑐᐃᓚᐅᙱᓐᓂᖏᓐᓂ ᓂᕈᐊᕐᓇᒥ ᐅᓪᓗᖓᓂ, ᓯᕗᕐᙵᒍᑦ ᓂᕈᐊᕐᓂᕐᒧᑦ ᐃᑲᕐᕋᖏᑦ ᒥᒃᖠᒋᐊᖅᑕᐅᓪᓗᑎᒃ.

7−ᑲᓐᓂᕐᓂ ᐊᓯᖏᓐᓂ ᓄᓇᕕᖕᒥ ᓄᓇᓕᐅᔪᓂ ᒥᒃᖠᒋᐊᖅᓯᒪᔪᓂ ᓂᕈᐊᕐᕕᖕᒥᑦ ᐃᑲᕐᕋᓂᑦ ᓂᕈᐊᕐᓂᐅᔪᒥ ᐅᓪᓗᖓᓂ. ᑕᓪᓕᒪᐃᑦ ᑕᑯᓚᐅᖅᐳᑦ ᑕᐃᒪᓐᓇᓪᓚᕆᒃ ᐊᐅᓚᑕᐅᓂᖏᓐᓂ ᐃᑲᕐᕋᐅᔪᓂ ᐊᐃᑉᕆᓕ 28−ᒥ.

ᐅᓂᒃᑳᓕᐊᖅ ᓇᓂᓯᓚᐅᖅᐳᖅ ᐃᓴᒃᓯᒪᓂᕐᒧᑦ ᐱᓕᕆᐊᒃᓴᐃᑦ ᐋᖅᑭᒃᓱᖅᑕᐅᓯᒪᓚᐅᖅᐳᑦ ᐱᒋᐊᕐᓂᐊᕐᓂᖓᓐᓂ ᐅᑭᐊᒃᓵᒥ 2023−ᒥ ᓇᓗᓇᐃᖅᓯᓂᕐᒥ ᓂᕈᐊᕐᓂᕐᒥ ᐱᔨᑦᑎᕋᕐᓃᑦ ᑐᓂᔭᐅᑦᑎᐊᕋᔭᕐᓂᖏᓐᓂ ᓄᓇᕕᖕᒥ ᓄᓇᓕᐅᔪᓂ. ᑕᒪᒃᑭᒐᓚᐃᑦ ᐱᓕᕆᐊᖑᓚᐅᙱᓚᑦ, ᐅᕝᕙᓘᓐᓃᑦ ᐃᓚᐃᓐᓇᖓᓂ ᐱᓕᕆᐊᖑᓪᓗᑎᒃ.

ᓄᓇᓕᖕᓂ ᓯᕗᓕᐅᖅᑎᐅᔪᑦ ᐅᖃᐅᔾᔭᐅᓚᐅᙱᓚᑦ ᓂᕈᐊᕐᓂᕐᒥ ᐱᔨᑦᑎᕋᕐᓂᕐᓂ ᐊᑐᐃᓐᓇᐅᑎᑕᐅᓂᐊᕐᓂᖏᓐᓂ ᓯᕗᕐᙵᒍᑦ ᓂᕈᐊᕐᓂᕐᒥ ᐅᓪᓗᖏᓐᓂ ᐊᓐᒪ ᓂᕈᐊᕐᓂᕐᒥ ᐅᓪᓗᖓᓂ, ᐱᔭᕆᐊᖃᖅᑎᑕᐅᔪᒥ ᐅᑯᓇᓂ ᐃᓴᒃᓯᒪᓂᕐᒧᑦ ᐱᓕᕆᐊᒃᓴᐅᔪᓂ.

ᐃᓴᒃᓯᒪᓂᕐᒧᑦ ᐱᓕᕆᔨᐅᔪᓂ ᐃᓚᐅᑎᑦᑎᔭᕆᐊᖃᓚᐅᖅᑐᓂ ᓄᓇᓕᖕᓂ ᐃᖅᑲᓇᐃᔭᖅᑎᑖᓪᓚᕆᓚᐅᙱᓚᑦ.

ᐅᑯᐊ ᐱᓕᕆᐊᒃᓴᐃᑦ ᑲᒪᒋᔭᐅᔭᕆᐊᖃᓚᐅᖅᐳᑦ ᐊᕕᒃᑐᖅᓯᒪᓂᐅᔪᒥ ᓂᕈᐊᖅᑐᓕᕆᔨᒧᑦ, ᐅᓂᒃᑳᓕᐊᖅ ᑭᓇᐅᓂᖓᓂ ᓇᓗᓇᐃᖅᓯᙱᓚᖅ. ᓯᑎᕚᓐ ᐱᕉᓪ, ᓂᕈᐊᖅᑐᓕᕆᓂᕐᓄᑦ ᐊᖓᔪᖅᑳᖑᔪᖅ ᑲᓇᑕᒥ, ᐅᖃᖅᓯᒪᕗᖅ ᓂᕈᐊᖅᑐᓕᕆᔨ ᓄᖅᑲᓚᐅᖅᐳᖅ ᓂᕈᐊᕐᓂᖅ ᐱᔭᕇᖅᑎᓪᓗᒍ ᐊᒻᒪ ᑲᓇᑕᒥ ᓂᕈᐊᖅᑐᓕᕆᔨᒃᑯᑦ ᐃᖅᑲᓇᐃᔮᖅᑖᕐᓂᐊᕐᓂᕋᖅᐳᑦ ᓄᑖᖑᔪᒥ.

“ᓂᕈᐊᖅᑐᓕᕆᔨ ᑐᕌᖅᑎᑦᑎᓚᐅᖅᐳᖅ ᐃᖅᑲᓇᐃᔭᖅᑎᓂ ᐊᖓᔪᖅᑳᖃᕐᕕᖕᒥ ᐅᒃᐱᕈᓱᒃᑎᑦᑎᓂᕐᒥ ᓇᓗᓇᐃᖅᑕᐅᓯᒪᔪᖅ ᐃᓴᒃᓯᒪᓂᐅᔪᓄᑦ ᐃᖅᑲᓇᐃᔭᖅᑎᓂᑦ ᐱᓯᒪᓂᖏᓐᓂ,” ᐅᓂᒃᑳᓕᐊᖅ ᐅᖃᓚᐅᖅᐳᖅ.

ᐱᕉᓪ ᒪᒥᐊᓚᐅᖅᐳᑦ ᓯᑎᐱᕆᒥ ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᒃᑯᓐᓄᑦ ᑲᑎᒪᔨᖏᓐᓄᑦ ᑰᔾᔪᐊᕐᒥ ᐊᑲᐅᙱᓕᐅᕈᑕᐅᔪᓄᑦ ᓂᕈᐊᖅᑏᑦ ᓵᙵᓚᐅᕐᓂᖏᓐᓂ.

ᑲᓇᑕᒥ ᓂᕈᐊᖅᑐᓕᕆᔨᒃᑯᑦ ᐱᓕᕆᔨᒻᒪᕇᑦ ᐳᓚᕋᓚᐅᕆᕗᑦ ᑭᓴᒪᓂ ᓄᓇᕕᖕᒥ ᓄᓇᓕᐅᔪᓄᑦ — ᐳᕕᕐᓂᑦᑐᖅ, ᑰᔾᔪᐊᕌᐱᒃ, ᑰᔾᔪᐊᖅ ᐊᒻᒪ ᓴᓪᓗᐃᑦ — ᐊᒻᒪ ᑐᓴᓚᐅᖅᐳᑦ ᓄᓇᓕᖕᓂ ᓯᕗᓕᐅᖅᑎᐅᔪᓂ ᐃᓄᐃᑦ ᐊᑲᖅᓴᙱᓐᓂᖏᓐᓂ.

ᐅᓂᒃᑳᓕᐊᖅ ᓇᓂᓯᓚᐅᖅᐳᖅ ᓄᓇᕕᒃ ᓈᒻᒪᒃᑐᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᐃᑲᔪᖅᓱᐃᓂᕐᒥ ᓂᕈᐊᕐᓂᐅᔪᓂ. ᓈᒻᒪᒃᑐᓂ ᓂᕈᐊᕐᕕᒃᓴᖅᑕᖃᖅᐳᖅ, ᓄᓇᓕᖕᓂ ᐃᖅᑲᓇᐃᔭᖅᑎᓂ ᐊᒻᒪ ᐅᓯᑲᑦᑕᕐᓂᐅᔪᓂ ᐊᑐᐃᓐᓇᐅᔪᓂ. ᑎᑎᕋᖅᓯᒪᓂᖃᖅᐳᖅ ᖃᔅᓯᒐᓚᖕᓂ ᐊᑐᓕᖁᔭᐅᔪᓂ, ᐃᓚᖃᖅᑐᒥ ᓂᕈᐊᖅᑐᓕᕆᔨ ᑐᑭᓯᐅᒪᓂᖓᓐᓂ ᐊᒻᒪ ᐃᓚᐅᑎᑦᑎᓂᕐᒥ ᐅᐊᖕᓇᒥ ᓄᓇᓕᐅᔪᓂᑦ.

ᐃᒪᐃᖁᔨᓇᔭᕆᕗᖅ ᑐᑭᓯᓇᑦᑎᐊᖅᑐᒥ ᐱᓕᕆᓂᐅᔪᒥ ᐃᓕᔭᐅᓂᖓᓂ ᑭᐅᓂᕐᒧᑦ ᐃᓱᒫᓘᑕᐅᔪᓂ ᐊᒻᒪ ᐊᐅᓚᑦᑎᔨᓂ ᐊᖓᔪᖅᑳᖑᔪᓂ ᐅᖃᐅᔾᔪᖅᑕᐅᓯᒪᓂᖏᓐᓂ, ᐃᒻᒪᓗᑦᑕᐅᖅ ᑐᕌᖓᓂᖃᖅᑐᒥ ᑲᑎᙵᓂᐅᔪᓂ ᑐᑭᓯᐅᒪᔪᓂ ᐅᐊᖕᓇᒥ ᐊᒻᒪ ᓄᓇᖃᖅᑳᖅᓯᒪᔪᓄᑦ ᓄᓇᓕᐅᔪᓂ ᐃᑲᔪᖅᓱᐃᓂᕐᒧᑦ ᓂᕈᐊᖅᑐᓕᕆᔨᐅᔪᒥᑦ.

ᑲᓇᑕᒥ ᓂᕈᐊᖅᑐᓕᕆᔨᒃᑯᑦ ᐅᖃᓚᐅᖅᐳᖅ ᐊᑐᓕᖅᑎᑦᑎᓂᐊᕐᓂᖓᓂ ᐊᑐᓕᕈᔭᐅᔪᓂ ᐅᐱᕐᙶᖅ 2026−ᒥ.