ᖃᕋᓴᐅᔭᒃᑯᑦ ᑎᑎᕋᖅᑕᐅᓯᒪᔪᑦ ᐅᑯᐊ ᐃᖃᓗᐃᑦ ᐃᒡᓗᓕᕆᔨᖓ ᐃᓱᒫᓘᑎᖃᕈᑎᖏᑦ ᖃᓄᐃᓕᐅᕐᓯᒪᓂᖏᓐᓂᒃ ᐃᖅᑲᓇᐃᔭᖅᑏᑦ ᓄᓇᖃᓂᖏᓐᓂᒃ ᓈᒻᒪᙱᓕᐅᕈᑎᖃᕐᓂᕐᒧᑦ

For English version, see Emails show Iqaluit Housing Authority concerned about image during strike

ᐃᖃᓗᐃᑦ ᐃᒡᓗᓕᕆᔨᒃᑯᑦ ᐃᓱᒫᓘᑎᖃᖅᑐᑦ ᐃᓱᒪᒋᔭᐅᔾᔪᑎᖏᓐᓂ ᖃᓄᖅ 13 ᐃᖅᑲᓇᐃᔭᖅᑎᖏᑦ ᑲᑐᔾᔨᖃᑎᒌᓄᑦ ᐃᓚᒋᔭᐅᔪᑦ ᑕᖅᑭᓕᒫᖅ ᐅᖓᑖᓄᑦ ᐃᖅᑲᓇᐃᔭᕈᓐᓃᕐᓂᖏᓐᓄᑦ, ᐅᖃᕐᓯᒪᔪᑦ ᖃᕋᓴᐅᔭᒃᑯᑦ ᑎᑎᕋᖅᑕᐅᔪᕕᓃᑦ ᓄᓇᑦᓯᐊᕐᒥ ᐱᕙᓪᓕᐊᔪᑦ ᐱᔪᓐᓇᖅᓯᓚᐅᖅᑕᖏᓐᓂᒃ.

ᖃᕋᓴᐅᔭᒃᑯᑦ ᑎᑎᕋᖅᑕᐅᓯᒪᔪᑦ, ᑖᒃᑯᐊᓗ ᑕᒪᐅᖓᒥᐊᖅ ᓴᖅᑭᑎᑕᐅᓇᓱᓯᒪᙱᖢᑎᒃ, ᐃᓚᖃᓚᐅᕐᒥᔪᑦ ᐃᒡᓗᓕᕆᔨᒃᑯᑦ ᐃᖅᑲᓇᐃᔭᖅᑎᓂᒃ ᐃᓇᖏᖅᑎᖃᕐᓂᕋᐃᔪᓂᒃ ᑕᐃᒪᐃᙱᓐᓂᕋᖅᑕᐅᓯᒪᓪᓗᓂ ᑖᒃᑯᓄᖓ ᐃᖅᑲᓇᐃᔭᖅᑎᓪᓚᕆᖏᑦ ᓄᖃᖓᓂᖏᓐᓂᒃ, ᐊᒻᒪᓗ ᑮᓇᐅᔭᓕᐅᕈᑎᓄᑦ ᐅᓄᕐᓯᕚᓪᓕᕈᑎᒃᓴᓂᒃ ᒪᓂᒪᔭᐅᔪᓂᒃ ᐃᒡᓗᓕᕆᔨᒃᑯᓐᓄᑦ.

ᖃᕋᓴᐅᔭᒃᑯᑦ ᑎᑎᕋᖅᑕᐅᓯᒪᔪᑦ ᐃᓚᖃᓚᐅᕐᒥᔪᖅ ᑎᑎᕋᖅᑕᐅᓂᑯᓂᒃ ᐃᖃᓗᐃᑦ ᐃᒡᓗᓕᕆᔨᒃᑯᑦ ᐊᐅᓚᑦᑎᔨᖓᓂ ᐃᑲᔪᖅᑎᖓᓂᒃ ᐊᒻᒪ ᐃᒡᓗᓕᕆᔨᒃᑯᑦ ᓗᐊᐃᔭᖓᓂ ᐅᕌᓱᓪ ᒪᒃᑯᕆᒪᓐ ᐊᒻᒪ ᐊᒫᓐᓇ ᕗᐃ, ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᐊᐅᓚᑦᑎᔨᖓ ᓄᓇᓕᖕᓂ ᐱᕙᓪᓕᐊᔪᓕᕆᓂᕐᒧᑦ.

ᐅᑯᐊ 13 ᐃᖅᑲᓇᐃᔭᖅᑎᐅᔪᑦ, ᑭᒡᒐᖅᑐᖅᑕᐅᓪᓗᑎᒃ ᓄᓇᕗᑦᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᓄᑦ ᓄᖃᖓᓯᒪᖕᒪᑕ ᐃᖅᑲᓇᐃᔭᕐᕕᖓᓂ ᓈᒻᒪᒃᓴᙱᓐᓂᕐᒧ ᑕᐃᒪᙵ ᒫᔅᓯ 17ᒥ. ᐃᓯᖁᔭᐅᔪᓐᓃᓚᐅᕐᓯᒪᔪᑦ ᐃᒡᓗᓕᕆᔨᒃᑯᓐᓄᑦ ᒫᔅᓯ 19ᒥ.

ᐅᑯᐊ ᑲᑐᔾᔨᖃᑎᒌ ᑮᓇᐅᔭᓕᐊᖏᓐᓂᒃ ᐅᓄᕐᓯᕚᓪᓕᖁᒡᓯᒪᖕᒪᑕ, ᑮᓇᐅᔭᖅᑖᖃᑦᑕᕐᓗᑎᒃ ᐃᓄᒃᑎᑐᑦ ᐅᖃᕈᓐᓇᕐᓂᕐᒧᑦ ᐃᖅᑲᓇᐃᔭᖅᕕᖏᓐᓂᒃ ᐊᒻᒪᓗ ᐃᑲᔫᑎᓄᑦ ᓴᐳᔾᔭᐅᔾᔪᑎᒃᓴᓂᒃ ᓇᔾᔨᓂᕐᒧᑦ ᐅᕝᕙᓘᓐᓃᑦ ᑎᒍᐊᓵᕐᓂᑰᓂᕐᒧᑦ ᕿᑲᓚᐅᑲᖕᓂᐊᖅᑐᓂᒃ, ᐅᖃᓚᐅᕐᑐᖅ ᓄᓇᕗᑦᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ ᐊᖓᔪᖅᑳᖓ ᔭᐃᓴᓐ ᐅᕋᓵᓐ.

ᓄᖅᑲᖓᓂᖏᓐᓂᒃ ᐃᖅᑲᓇᐃᔮᖏᓐᓂᒃ ᐃᖅᑲᓇᐃᔭᖅᑎᖏᑦ ᐅᑯᐊ ᐃᒡᓗᓕᕆᔨᒃᑯᑦ ᓂᓪᓕᕈᑎᖃᕈᒪᓚᐅᙱᑦᑐᑦ ᐊᐱᕐᓱᖅᑕᐅᔪᒪᑎᓪᓗᒋᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᖃᕋᓴᐅᔭᒃᑯᑦ ᑎᑎᕋᖅᑕᐅᔪᑦ

 ᑭᓯᐊᓂᓕ, ᕗᐃ ᐅᖃᓚᐅᕐᑐᖅ ᐊᐃᕆᓕ 18ᒥ ᖃᕋᓴᐅᔭᒃᑯᑦ ᑎᑎᕋᖅᖢᓂ ᑕᒪᑐᒧᖓ ᐅᖃᐅᓯᖃᕐᓂᖅ “ᐱᐅᓇᔭᕐᓂᖓᓂᒃ.”

“ᑐᓴᑲᑕᒻᒥᒐᑦᑕ ᐊᓯᖏᓐᓂ ᓄᓇᓕᖕᓂ ᐃᒡᓗᓕᕆᔨᒃᑯᓐᓂ ᖃᓄᐃᒻᒪ ᐃᖃᓗᐃᑦ ᐃᒡᓗᓕᕆᔨᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐱᑦᑎᐊᙱᓗᐊᕆᐊᒃᓴᖏᓐᓂᒃ, ᐊᓯᖏᓐᓂᓪᓗ,” ᐅᖃᕐᑐᖅ.

ᕗᐃ ᐅᖃᓚᐅᕐᒥᔪᖅ ᑲᑐᔾᔨᖃᑎᒌᑦ “ᐅᖃᑦᑎᐊᑲᑕᙱᖢᑎᒃ” ᐅᖃᓪᓚᓚᐅᕐᓂᖏᓐᓂᒃ ᐃᒡᓗᓕᕆᔨᒃᑯᑦ ᒥᒃᓵᓂ ᓈᓚᐅᑎᒃᑰᖅᖢᑎᒃ ᐊᒻᒪᓗ “ᓱᓕᙱᓗᐊᖅᑐᐊᓗᖕᓂ ᐅᖃᑲᑕᒃᖢᑎᒃ” ᐃᖅᑲᓇᐃᔭᖅᑏᑦ ᐃᖅᑲᓇᐃᔭᙱᓐᓂᖏᓐᓂᒃ ᓈᒻᒪᙱᓕᐅᕈᑎᖃᕐᓂᕐᒧᑦ.

ᐅᖃᓚᐅᕐᒥᔪᖅ ᑲᑐᔾᔨᖃᑎᒌᖑᔪᑦ ᐃᓚᖏᑦ ᐃᖅᑲᓇᐃᔭᖅᑏᑦ ᓄᖅᑲᖓᔪᑦ ᓈᓚᐅᑎᒃᑯᑦ ᐅᖃᑲᑕᖕᓂᖏᓐᓂᒃ ᐃᒡᓗᓕᕆᔨᒃᑯᑦ ᐊᔪᕈᓐᓃᖅᓴᖅᑎᑦᑎᔪᒪᙱᓐᓂᖏᓐᓂᒃ ᐊᒻᒪᓗ ᓇᔾᔨᔪᓂᒃ ᐃᑲᔫᑎᐅᕙᒃᑐᓂᒃ ᐊᑐᕈᓐᓃᖅᑎᑦᑎᓇᓱᒃᖢᑎᒃ.

ᑭᖕ ᑎᑎᕋᖅᑕᐅᔪᓂᒃ ᐊᖏᖃᑎᖃᑐᐃᓐᓇᕐᓂᕋᓚᐅᕐᑐᖅ.

“ᐃᓱᒪᔪᖓᓕ ᓱᓕᙱᓗᐊᖅᑐᑦ ᐅᖃᐅᓯᐅᑦᑎᐊᒻᒪᕆᒃᐸᑕ,” ᑎᑎᕋᓚᐅᕐᑐᖅ.

ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᑐᓴᒐᒃᓴᓕᐅᓚᐅᕐᓯᒪᔪᑦ ᐊᐃᕆᓕ 27ᒥ ᓇᓗᓇᐃᕐᓯᒃᑲᓐᓂᕋᓱᒃᖢᑎᒃ ᐋᔩᕐᑎᐅᔪᓐᓇᙱᓐᓂᖏᓐᓂᒃ ᐊᒻᒪᓗ “ᐊᓯᐊᒎᖓᓪᓗᑎᒃ ᐱᓕᕆᕝᕕᖕᒥ” ᐅᑯᓇᙵᑦ ᐃᖃᓗᐃᑦ ᐃᒡᓗᓕᕆᔨᒃᑯᓐᓂᒃ.

ᐃᒡᓗᓕᕆᔨᕐᔪᐊᑦ ᓇᓗᓇᐃᕐᓯᓕᓚᐅᕐᑐᑦ ᖃᐅᒃᐸᙳᖅᑎᓪᓗᒍ ᖃᓄᐃᒻᒪᓐ ᕗᐃ, ᐊᐅᓚᑦᑎᔨ ᐃᒡᓗᓕᕆᔨᕐᔪᐊᓄᑦ, ᖃᕋᓴᐅᔭᒃᑯᑦ ᑎᑎᕋᕐᕕᐅᑲᑕᖕᒪᖔᑦ ᐅᖃᐅᔾᔨᑲᑕᒃᖢᓂ ᐃᖃᓗᐃᑦ ᐃᒡᓗᓕᕆᔨᒃᑯᑦ ᐊᐅᓚᑦᑎᔨᖏᓐᓂᒃ ᖃᓄᖅ ᑐᓴᒐᒃᓴᓕᐅᖅᑎᓄᑦ ᑭᐅᑲᑕᖕᓂᐊᕐᒪᖔᑕ.

“ᐅᑯᐊ ᓄᓇᓕᖕᓂ ᐃᒡᓗᓕᕆᔨᒃᑯᑦ ᐃᖅᑲᓇᐃᔭᖅᑎᖃᙱᓗᐊᕐᓂᖏᓐᓄᑦ ᐊᒻᒪᓗ ᐱᓕᕆᐊᒃᓴᓕᕆᓂᕐᒧᑦ ᐊᔪᕈᓐᓃᕐᓯᒪᔪᓂᒃ, ᐅᑯᐊ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᑎᑎᕋᕐᕕᖏᑦ ᐃᑲᔪᖅᑕᐅᔪᒪᔪᓂᒃ ᐃᑲᔪᖃᑦᑕᕐᒪᑕ,” ᐅᖃᕐᑐᖅ ᐋᓕᒃᔅ ᐅᕉᓴᓐ, ᐃᒡᓗᓕᕆᔨᕐᔪᐊᒃᑯᑦ ᑐᑭᒧᐊᖅᑎᑦᑎᔨᖓ ᐊᑐᐊᒐᕐᓄᑦ ᐊᒻᒪ ᐸᕐᓇᐅᓯᐅᕋᓱᖕᓂᕐᒧᑦ, ᖃᕋᓴᐅᔭᒃᑯᑦ ᑎᑎᕋᖅᖢᓂ.

“ᐃᖃᓗᐃᑦ ᐃᒡᓗᓕᕆᔨᒃᑯᑦ ᑕᒪᑐᒧᖓ ᐃᓱᒪᓕᐅᕆᔨᐅᕙᒃᒪᑕ.”

ᐃᖅᑲᓇᐃᔭᖅᑎᓂᒃ ᐃᓇᖏᕐᓯᓯᒪᔪᑦ 

ᐅᓇ ᐅᖃᐅᓯᐅᓂᑯ ᐃᖅᑲᓇᐃᔭᖅᑎᓂᒃ ᐃᓇᖏᕐᓯᓯᒪᓂ ᐊᒻᒪ ᑎᑎᕋᐅᓯᐅᓚᐅᕐᒥᔪᖅ ᖃᕋᓴᐅᔭᒃᑯᑦ.

ᐅᕉᓴᓐ, ᐊᒻᒪᓗ ᐃᓚᒋᔭᐅᔪᑦ ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᔨᒃᑯᑦ ᑲᓇᑕᒥ (PSAC), ᐅᖃᓚᐅᕐᑐᑦ ᑕᖅᑭᖅ ᐱᒋᐊᓕᓵᖅᑎᓪᓗᒍ ᐅᑯᐊ ᐃᒡᓗᓕᕆᔨᒃᑯᑦ ᐊᑐᓚᐅᕐᓂᖏᓐᓂᒃ $100,000ᓂ ᐃᓇᖏᖅᑎᒋᔭᐅᔪᓄᑦ ᐃᖅᑲᓇᐃᔭᖅᑎᓄᑦ ᖃᓪᓗᓈᓂᙶᖅᑐᓂᒃ ᓄᖃᖓᑎᓪᓗᒋᑦ ᐃᖅᑲᓇᐃᔭᖅᑏᑦ ᓈᒻᒪᙱᓕᐅᕈᑎᖃᕐᓂᕐᒧᑦ.

ᓄᓇᑦᓯᐊᒥ ᐱᕙᓪᓕᐊᔪᓄᑦ ᐅᓇ ᑭᖕ ᐅᖃᓚᐅᕐᑐᖅ ᐃᒡᓗᓕᕆᔨᒃᑯᑦ ᐃᖅᑲᓇᐃᔭᖅᑎᑖᕐᓯᒪᓂᖏᓐᓂᒃ ᑎᑭᑎᑦᑎᓂᖏᓪᓘᓐᓃᑦ ᐃᖅᑲᓇᐃᔭᖅᑎᓂᒃ ᓱᓕᙱᓗᐊᕐᓂᖓᓂᒃ.

ᑕᒪᐃᓐᓂ ᒪᒃᑯᕆᒪᓐ ᐊᒻᒪ ᕗᐃ ᑎᑎᕋᕐᓯᒪᓚᐅᕐᑐᑦ ᖃᕋᓴᐅᔭᒃᑯᑦ ᐅᑯᐊ ᐃᒡᓗᓕᕆᔨᒃᑯᑦ ᐊᑐᖃᑦᑕᕐᓂᖏᓐᓂᒃ ᓄᓇᓕᖕᓂ ᑳᓐᑐᕌᒃᑎᐅᕙᒃᑐᓂᒃ ᐃᒡᓗᐃᑦ ᐃᖏᕐᕋᑎᑕᐅᖏᓐᓇᕋᓱᒃᖢᑎᒃ ᐊᒻᒪᓗ ᓄᖃᖓᓂᖏᓐᓂᒃ ᐃᖅᑲᓇᐃᔭᖅᑎᖏᓐᓂᒃ ᓈᒻᒪᙱᓕᐅᕈᑎᖃᕐᓂᕐᒧᑦ.

ᒪᒃᑯᕆᒪᓐ ᐅᖃᒃᑲᓐᓂᖅᖢᓂ, “ᐅᓇ ᐅᖃᐅᓯᐅᔪᖅ ᐊᔾᔨᒌᒃᑎᑦᑎᕙᙱᓐᓂᕐᒥ ᑕᐃᒪᓐᓇᓗ ᐃᖅᑲᓇᐃᔭᖅᑎᓂᒃ ᖃᓪᓗᓈᓂᙶᖅᑐᓂᒃ ᓈᒻᒪᙱᓗᐊᕋᔭᕐᒪᑦ ᐊᒻᒪᓗ ᓱᓕᙱᖢᓂ.”

ᑕᑭᔪᕈᓗᖕᒥ ᖃᕋᓴᐅᔭᒃᑯᑦ ᑭᐅᔾᔪᑎᐅᔪᓂ ᐊᐱᖅᑯᑎᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ, ᐅᕋᓱᓐ ᑕᒪᓐᓇ ᑕᐃᒪᐃᙱᓐᓂᕋᐃᓂᖅ ᓱᓕᙱᓐᓂᕋᖅᖢᓂᐅᒃ ᐃᓇᖏᖅᑎᖃᑲᑕᖏᓂᖏᓐᓂᒃ ᐊᓯᖏᓐᓂᒃ ᐃᖅᑲᓇᐃᔭᖅᑎᓂ ᐅᖃᖅᖢᓂ ᖃᔅᓰᑲᓪᓚᒃᖢᑎᒃ ᐃᖅᑲᓇᐃᔭᖅᑎᐅᔪᑦ ᓄᖃᖓᔪᑦ ᑕᑯᑲᑕᖕᓂᕋᖅᐸᒃᖢᑎᒃ ᓄᓇᓕᖕᓂ ᑲᒻᐸᓂᓂᒃ ᐊᒻᒪ ᖃᓪᓗᓈᓂᙶᖅᑐᓂ ᐃᖅᑲᓇᐃᔭᖅᑎᑕᐅᔪᓂᒃ.

“ᐅᑯᐊ ᐃᖅᑲᓇᐃᔭᖅᑐᑦ ᐃᖅᑲᓇᐃᔭᕈᓐᓃᕐᑐᑦ ᑕᑯᓯᒪᖕᒪᑕ ᐃᖅᑲᓇᐃᔭᖅᑎᓂ ᐱᓕᕆᔭᖅᑐᖅᑐᓂᒃ ᐃᖅᑲᓇᐃᔭᕐᕕᖏᑦᑕ ᓄᓇᓯᐅᑎᖏᓐᓂᒃ ᐊᑐᖅᖢᑎᒃ, ᖃᐅᔨᒪᒐᑦᑕ ᒪᕐᕉᖕᓂ ᑲᒻᐸᓂᐅᔫᖕᓂ ᐱᓕᕆᓯᒪᔪᓂᒃ ᐃᒡᓘ ᓯᓚᑖᓂ ᓄᓇᓯᐅᑎᖏ ᓄᖃᖓᔪᐃᑦ, ᐊᒻᒪᓗ ᐊᓯᖏᑦ ᑲᒻᐸᓂᐅᔪᑦ ᑖᒃᑯᓄᖓ ᐅᐸᒃᖢᓂ ᐅᖃᖅᖢᓂ, ‘ᒪᒥᐊᓐᓂᕋᖅᖢᓂ ᑭᓯᐊᓂ ᓴᓇᓂᐊᕐᓂᕋᖅᖢᓂ ᓱᕈᓯᖅᑕᖃᖅᐸᑦ ᐃᒡᓗ,” ᐅᕌᓱᓐ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ.

“ᒪᕐᕉᒃ ᖃᓪᓗᓈᓂᙶᖅᑑᒃ ᓴᓇᔩᒃ ᓄᓇᓕᖕᓃᒻᒪᑎᒃ ᑕᐃᒪᙵ ᐱᓇᓱᐊᕈᓯᕐᒥ ᐃᖅᑲᓇᐃᔭᖁᔭᐅᔪᓐᓃᓚᐅᕐᒪᑕ ᐱᓕᕆᔭᖅᑐᖅᖢᑎᒃ. ᐊᐱᕆᔭᐅᓕᕋᒥᒃ ᐅᖃᓚᐅᖅᑐᑦ ᓴᓇᑐᐃᓐᓇᕐᓂᖏᓐᓂᒃ ᒥᑦᑎᒪᑕᓕᓕᐊᖅᐸᓪᓕᐊᓂᖏᓐᓂᒃ. ᐅᓪᓗᐃᑦ 40 ᐊᓂᒍᕋᓗᐊᕐᒪᑕ ᐅᓪᓗᐃᑦ ᓱᓕ ᐃᖃᓗᖕᓃᑦᑐᑦ ᓴᓇᑲᑕᒃᖢᑎᒃ.”

ᑭᓲᖕᒪᑕ ᑮᓇᐅᔭᓕᐅᕈᑎᑦᑎᐊᕙᐅᓇᔭᖅᑐᑦ ᑕᒪᐃᓐᓄ?

ᓄᖅᑲᖓᓕᓵᖅᑎᓪᓗᒋᑦ ᐅᑯᐊ ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᔨᒃᑯᑦ ᑲᓇᑕᒥ (PSAC) ᐅᑭᐅᕐᑕᖅᑐᕐᒧᑦ ᐊᐅᓚᑦᑎᔨ ᐊᖓᔪᖅᑳᒧᑦ ᑐᒡᓕᕆᔭᐅᔪᖅ ᓗᕇᓐ ᐅᕉᓲ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᑯᐊ ᐃᒡᓗᓕᕆᔨᒃᑯᑦ ᒪᓂᒻᒪᐃᓚᐅᕐᓂᕋᖅᖢᓂᒋᑦ ᐊᕐᕌᒍᒥ ᑮᓇᐅᔭᓕᐊᖏᑦ ᐊᖏᒡᓕᒋᐊᖃᑦᑕᕐᓂᐊᕐᓂᖏᓐᓂᒃ 1.25 ᐳᓴᓐᑎᒥ ᐊᒻᒪ 1.5 ᐳᓴᓐᑎᒥ, ᑭᓯᐊᓂᓕ ᑲᑐᔾᔨᖃᑎᒌᓄᑦ ᓱᖁᑎᒋᔭᐅᓚᐅᙱᑦᑐᖅ.

ᑭᓯᐊᓂᓕ ᑎᑎᕋᖃᑦᑕᐅᑎᔾᔪᑎᓂ ᖃᕋᓴᐅᔭᒃᑯᑦ, ᑭᖕ ᐅᖃᓚᐅᕐᑐᖅ ᐃᒡᓗᓕᕆᔨᒃᑯᑦ “ᑮᓇᐅᔭᓕᐊᒃᓴᓂᒃ ᖁᕝᕙᕆᐊᖅᑎᑦᑎᓚᐅᕐᓂᖏᓐᓂᒃ 5.5 ᐳᓴᓐᑎᓂᒃ, ᐊᒻᒪᓗ ᐃᖅᑲᓇᐃᔭᖅᑎᐅᔪᑦ ᐊᑐᕆᐊᓕᖕᓂᒃ ᐊᒻᒪ ᒪᓕᒋᐊᓕᖕᓂ ᐊᖏᓚᐅᙱᖢᑎᒃ.”

ᑭᖕ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ “ᑭᒃᑯᓕᒫᓂᒃ ᐊᔾᔨᒌᒃᑎᑦᑎᓂᒃᑰᖓᓚᐅᕐᓂᖓ ᐊᒻᒪ ᓈᒻᒪᓈᕐᓯᒪᔪᓂᒃ” ᖃᓄᐃᓕᐅᕈᑎᒃᓴᓂᒃ ᐃᖅᑲᓇᐃᔭᖅᑎᓄᑦ ᒪᓂᒻᒪᐃᓚᐅᕐᓂᕋᖅᖢᓂᒋᑦ.

ᐅᑯᐊᒡᓕ ᐅᕌᓱᓐ ᐅᕉᓲᓘᓐᓂ ᐅᖃᐅᓯᖃᓕᑕᐃᓐᓇᓚᐅᕐᑐᑦ 5.5 ᐳᓴᓐᑎᒥ ᒪᓂᒪᑎᑦᑎᓚᐅᕐᓂᖏᓐᓂᒃ ᐅᖃᐅᓯᐅᓚᕐᑐᒥ ᑭᖕᒧᑦ ᐊᒻᒪᓗ ᑲᑐᔾᔨᖃᑎᒌᑦ ᐅᖃᐅᓯᖃᓚᐅᙱᑦᑐᑦ ᖃᓄᐃᑦᑐᓂᒃ ᐊᖏᒡᓕᒋᐊᕈᑎᒃᓴᓂ ᕿᓂᕐᒪᖔᑕ.

ᒫᓐᓇᓕ ᐅᕌᓱᓐ ᐅᖃᓚᐅᕐᑐᖅ ᐃᒡᓗᓕᕆᔨᒃᑯᑦ 5.5 ᐳᓴᓐᑎᒥ ᐅᓄᕐᓯᕚᓪᓕᖅᑎᑦᑎᓇᓱᓚᐅᕐᒪᑕ ᐊᕐᕌᒍ ᑎᓴᒪᓄᑦ ᐅᖃᖅᖢᓂ 1.38 ᐳᓴᓐᑎᓪᓗᐊᒥ ᐊᕐᕌᒍᒧᑦ ᐅᓄᕐᓯᕚᓪᓕᖃᑦᑕᕋᔭᖅᖢᑎᒃ.

ᐅᖃᓚᐅᕐᑐᖅ ᑲᑐᔾᔨᖃᑎᒌᒃᑐᑦ ᕿᓂᕐᓂᕋᖅᖢᓂᒋᑦ 10.3 ᐳᓴᓐᑎᒥ ᐊᑭᑦᑐᕆᐊᕈᑎᓂ ᐊᕐᕌᒍᓄᑦ ᑕᓪᓕᒪᓄᑦ, ᐊᒻᒪᓗ ᑮᓇᐅᔭᓕᐊᕆᔭᐅᕙᒃᑐᑦ ᒪᑯᓄᖓ ᐃᖅᑲᓇᐃᔭᖅᑎᓪᓚᕆᖕᓂ ᐃᑲᔪᖅᑎᐅᔪᓄᑦ, ᓱᓪᓗᓕᕆᔨᑦ ᐊᒻᒪᓗ ᐊᒥᐊᕆᔩᑦ ᑮᓇᐅᔭᓕᐊᕆᕙᒃᑕᖏ ᐋᖅᑭᒋᐊᖅᑕᐅᓗᑎᒃ.

ᓄᓇᑦᓯᐊᕐᒥ ᐱᕙᓪᓕᐊᔪᑦ ᑐᓴᒐᒃᓴᓂ ᑐᓂᔭᐅᓚᐅᕐᑐᑦ ᐃᖃᓗᐃᑦ ᐃᒡᓗᓕᕆᔨᖏᓐᓂᒃ ᐊᐃᕆᓕ 28ᒥ ᑎᑎᕋᖅᑕᐅᔪᕕᓂᕐᓂ ᐃᓚᖏᓐᓂᒃ ᑲᒪᒋᔭᖃᙱᓐᓂᕋᖅᖢᑎᒃ ᑭᓯᐊᓂᓕ ᓇᓗᓇᐃᔭᖅᖢᑎᒃ ᑮᓇᐅᔭᓕᐊᒃᓴᓄᑦ ᐋᖅᑭᒋᐊᕈᑎ ᐃᓚᖃᓚᐅᕐᓂᖓᓂ 7 ᐳᓴᓐᑎᒥ ᐅᓄᕐᓯᕚᓪᓕᕈᑎᐅᓇᔭᖅᑐᓂ ᐊᕐᕌᒍᓄᑦ ᑕᓪᓕᒪᓄᑦ.

ᖃᕋᓴᐅᔭᒃᑯᑦ ᑎᑎᕋᕐᓯᒪᔪᓂᒃ ᒪᒃᑯᕆᒪᓐ ᐅᖃᓚᐅᕐᑐᖅ ᑲᑐᔾᔨᖃᑎᒌᑦ “ᐅᖃᕐᓯᒪᓚᐅᙱᑦᑐᑦ ᐅᖃᖃᑎᖃᒃᑲᓐᓂᕐᓂᐊᕐᓂᕐᒥᒃ ᐊᒻᒪᓗ ᐊᐱᕆᔭᐅᒐᓗᐊᕋᒥᒃ ᓱᓕ ᑐᒃᓯᕋᐅᓯᐅᓚᐅᙱᑦᑐᑦ ᐃᖅᑲᓇᐃᔭᖅᑎᑦᑎᔨᓄᑦ ᓄᖃᖅᑎᑕᐅᓚᐅᖅᑎᓪᓗᒋᑦ.”

ᖃᕋᓴᐅᔭᒃᑯᑦ ᓄᓇᑦᓯᐊᒧᑦ ᐱᕙᓪᓕᐊᔪᓄᑦ ᐊᐃᕆᓕ 28ᒥ, ᐅᕌᓱᓐ ᐅᖃᓚᐅᕐᑐᖅ ᑲᑐᔾᔨᖃᑎᒌ ᐋᔩᖃᑎᖃᒃᑲᓐᓂᕈᓐᓇᕐᓂᖏᓐᓂᒃ.

“ᑭᓯᐊᓂᓕ ᓱᓕ ᐅᑕᖅᑭᒐᑦᑕ ᐃᖃᓗᐃᑦ ᐃᒡᓗᓕᕆᔨᒃᑯᓐᓂ,” ᐅᖃᕐᑐᖅ. “ᓴᖅᑭᑦᑎᓚᐅᙱᒻᒪᑕ ᓈᒻᒪᒐᔭᖅᑐᓂᒃ ᑭᒃᑯᓕᒫᓄᑦ.”

ᐅᑯᐊ ᐃᖅᑲᓇᐃᔭᖅᑏᑦ ᐱᓇᓱᐊᕈᓯᕐᓂ 8ᓂ ᓈᑦᑏᖑᔭᓛᕐᓂᐊᕐᒥ ᓄᖃᖓᓂᐊᓕᕐᑐᑦ.