ᐱᔪᓐᓇᕐᓂᕆᔭᐅᔪᑦ ᖃᐅᔨᓴᖅᑕᐅᕗᑦ ᑭᕙᓪᓕᖅᒥ ᐊᐅᔭᒃᑯᑦ ᐱᙳᐊᕕᒡᔪᐊᕐᓇᒥ

ᐊᐃᑉᐸᖓᓂ ᐅᓪᓗᕐᒥ ᐅᕙᓂ ᑭᕙᓪᓕᖅᒥ ᐊᐅᔭᒃᑯᑦ ᐱᙳᐊᕕᒡᔪᐊᕐᓇᒥ ᐃᒡᓗᓕᒑᕐᔪᒃᒥ ᖃᐅᔨᓴᕈᑎᐅᓚᐅᕐᑐᖅ ᐱᙳᐊᖅᑏᑦ ᖃᓄᐃᒻᒪᖔᑕ ᐊᒃᓱᕈᕐᓇᖅᑐᓂᒃ ᐱᙳᐊᑲᑕᒃᑎᓪᓗᒋᑦ ᓯᕙᑖᕐᕕᐅᑎᓪᓗᒍ.

ᐊᖏᕐᕋᖓᓂ ᐱᙳᐊᖅᑎ ᔭᐃᒥᓯ ᑕᐅᑐ ᓄᑭᖃᕈᓐᓃᕐᓯᒪᔪᖅ ᑕᖃᓗᐊᒧᑦ ᓵᓚᒃᓴᐅᓯᐊᕌᓪᓚᓚᐅᖅᖢᓂ ᑐᒃᑑ ᐊᒥᐊᓂ ᕿᒡᒋᖅᑕᕈᑎᖃᖅᑎᓪᓗᒋᑦ ᐊᐃᑉᐸᕆᓕᖅᑕᖓᓂ ᐅᓪᓗᕐᒥ ᐅᕙᓂ ᑭᕙᓪᓕᖅᒥ ᐊᐅᔭᒃᑯᑦ ᐱᙳᐊᕕᒡᔪᐊᕐᓇᒥ ᐃᒡᓗᓕᒑᕐᔪᒃᒥ ᓯᕙᑖᕐᕕᐅᑎᓪᓗᒍ. (ᐊᔾᔨᓕᐅᕆᔨ ᑎᐅᕋᓐ ᓕᐊᑦᔅ)

“ᓂᐅᒃᑲ ᐊᒻᒪ ᑕᓖᒃᑲ ᓴᖕᓂᕐᓯᒪᔫᐃᑦ,” ᐅᖃᕐᑐᖅ ᐃᒡᓗᓕᒑᕐᔪᒃᒥᐅᑕᖅ ᐱᙳᐊᖅᑎ ᔭᐃᒥᓯ ᑕᐅᑐ, ᓵᓚᒃᓴᐅᓯᐊᖅᑐᑦ ᑐᓂᐅᖃᖅᑕᐅᕌᓂᒃᑎᓪᓗᒋᑦ ᐱᙵᐊᖅᑏᑦ ᐱᒡᒍᓴᐅᑎᑲᑕᓚᐅᖅᑎᓪᓗᒋᑦ ᐃᑲᕐᕋᓂ 9-ᓂ.

“ᐊᖏᕐᕋᐅᓂᐊᓕᕋᒪ ᑕᖃᐃᕐᓯᕆᐊᕐᓗᖓ ᐊᒻᒪ ᖃᐅᒃᐸᒧᑦ ᐸᕐᓇᒃᓯᒪᓗᖓ.”

ᐱᙳᐊᕕᒡᔪᐊᖅᑐᑦ 24 ᐅᖓᑖᓂ ᐃᓐᓇᕐᓂ ᐊᒻᒪ ᐃᓅᓱᒃᑐᓂ ᑕᑯᖃᑦᑕᓚᐅᕐᑐᑦ ᐅᑯᓇᙶᖅᑐᓂᒃ ᐊᕐᕕᐊᓂᒃ, ᖃᒪᓂᑦᑐᐊᕐᒥ, ᑲᖏᖅᖠᓂᖅᒥ, ᑎᑭᕋᕐᔪᐊᖅᒥ ᐊᒻᒪ ᐃᒡᓗᓕᒑᕐᔪᒃᒥᙶᖅᑐᓂᒃ ᐱᒡᒍᓴᐅᑎᑎᓪᓗᒋ 14-ᓂ ᐅᑭᐅᕐᑕᖅᑐᕐᒥ ᐱᙳᐊᕈᓯᐅᕙᒃᑐᓂᒃ ᐅᓪᓗᕐᓂ ᐱᖓᓱᓂ. ᑕᐅᑐ ᓵᓚᒃᓴᐅᓯᐊᓚᐅᕐᑐᖅ ᒎᓗᒥ ᐆᒧᖓ ᑐᒃᑑ ᐊᒥᐊᓂ ᕿᒡᒋᖅᑕᐅᑎᖃᖅᑎᓪᓗᒋᑦ ᐅᓪᓘᓕᕐᑐᒃᑯᑦ.

ᐅᓇ ᐱᙳᐊᕈᓯᖅ ᐱᙳᐊᖅᑎᓂ ᕿᒡᒋᑲᑕᖕᓂᐅᔪᖅ ᐊᒃᖢᓈᒥ, ᐃᓱᖏᑦ ᑎᒍᒥᐊᖅᑕᐅᓪᓗᑎᒃ ᐱᙳᐊᕐᕕᓕᕆᔨᓄᑦ ᕋᓱᓪ ᒪᓕᓐᔅ ᐊᒻᒪ ᐊᖓᔪᖓᓗ/ᓄᑲᖓᓗ ᔭᐃᒥᓯ ᒪᓕᓐᔅ. ᑐᒃᑑ ᐊᒥᖓ ᓂᒥᕐᑕᐅᓯᒪᔪᖅ ᐊᒃᖢᓈᑉ ᕿᑎᐊᓂ ᕿᒡᒋᕐᓂᕐᓴᐅᓇᓱᒃᖢᑎᒃ ᐊᒻᒪᓗ ᒪᕐᕉᖕᓂ ᓈᔾᔪᑎᐅᓯᒪᓪᓗᓂ.

“ᐊᒃᓱᕈᕐᓇᖅᑐᖅ,” ᐅᖃᕐᑐᖅ ᑭᐊᕕᓐ ᕿᑎᕐᖠ, ᐱᙳᐊᓕᒪᓂᕐᓴᖅ ᑎᑭᕋᕐᔪᐊᖅᒥᐅᑕᖅ.

ᑭᐊᕕᓐ ᕿᑎᕐᖠᒃ ᑎᑭᕋᕐᔪᐊᖅᒥᐅᑕᖅ ᕿᒡᒋᖅᑐᖅ ᑐᒃᑑ ᐊᒥᖓᑕ ᖁᓛᒍᑦ ᐅᕙᓂ ᑐᒃᑑ ᐊᒥᖓᓄᑦ ᕿᒡᒋᖅᑕᑲᑕᒃᑎᓪᓗᒋᑦ ᑭᕙᓪᓕᖅᒥ ᐊᐅᔭᒃᑯᑦ ᐱᙳᐊᕕᒡᔪᐊᕐᓇᒥ ᐃᒡᓗᓕᒑᕐᔪᒃᒥᑦ ᓯᕙᑖᕐᕕᐅᑎᓪᓗᒍ. (ᐊᔾᔨᓕᐅᕆᔨ ᑎᐅᕋᓐ ᓕᐊᑦᔅ)

ᕿᑎᕐᖠ ᐃᓚᒋᔭᐅᓚᐅᕐᑐᖅ ᐊᒥᔪᓂ ᐱᒡᒍᓴᐅᑎᔪᓂ ᐱᙳᐊᖅᑕᖓᓂ ᒪᓂᖅᑲᒦᖢᓂ.

ᐱᙳᐊᖅᑏᑦ ᕿᒡᒋᑐᐃᓐᓇᖃᑦᑕᓚᐅᙱᑦᑐᑦ. ᐊᓯᐊᓄᑦ ᓵᑦᑕᕆᐊᖃᖅᐸᒃᖢᑎᑦ ᕿᒡᒋᐊᓂᑐᐊᕌᖓᑕ. ᐊᖑᑏᑦ ᐊᒃᖢᓈᑉ ᐃᓱᖏᓐᓂ ᑎᒍᒥᐊᖅᑐᑦ ᐊᐅᓚᑲᑦᑖᖅᑎᑦᑎᑲᑕᒃᖢᑎᒃ ᐱᖓᓱᐃᖅᖢᑎᒃ, ᐊᒻᒪᓗ ᐱᙳᐊᖅᑎᐅᑉ ᖁᓛᒎᖅᑎᑕᐅᓪᓗᓂ ᑎᓴᒪᐃᖅᖢᑎᒃ ᐊᐅᓚᑲᑕᒃᑎᑦᑎᐊᓪᓚᓚᐅᖅᖢᑎᒃ ᑕᐃᒪᓐᓇᓗ ᖃᓄᐃᓂᐊᕆᐊᒃᓴᖅ ᐃᓱᒪᔭᕆᐊᖃᑲᑕᒃᖢᑎᒃ ᐱᙳᐊᖅᑏᑦ ᖃᓄᐃᓕᐅᕈᓯᐅᔪᖅ ᖃᐅᔨᔭᐅᕌᓂᓚᐅᖅᑎᓐᓇᒍ.

ᒧᕌᓐᑕ ᑐᓗᕆᐊᓕᒃ ᓵᓚᒃᓴᑲᑕᓚᐅᕐᑐᖅ. ᐃᒡᓗᓕᒑᕐᔪᒃᒥ ᐱᙳᐊᖅᑎᑦ ᓰᖅᑯᖏᓐᓂ ᕿᑎᐊᑕ ᖁᓛᓃᑎᑦᑎᓪᓗᒋ ᐊᒻᒪ ᕿᒡᒋᖅᖢᓂ ᐊᒃᖢᓇᐅᔭᐅᑉ ᐊᒥᐅᓪᓗ ᖁᓛᒍᑦ. ᖃᓄᐃᓕᐅᕐᓂᖓ ᐃᑲᔫᑎᖃᓚᐅᕐᑐᖅ ᐊᒻᒪᓗ ᐊᕐᓇᓂ ᓵᓚᖃᖅᖢᓂ ᒎᓗᑖᖅᖢᓂ.

ᐃᒡᓗᓕᒑᕐᔪᒃᒥ ᐱᙳᐊᖅᑏᓐ ᓯᐅᕋ ᑕᓄᔭ ᐊᒻᒪ ᐳᕋᐃᐊᓐ ᒪᓕᓐᔅ ᓵᓚᒃᓴᐅᓯᐊᓚᐅᕐᑑᒃ ᒎᓗᒥ ᓄᑲᖅᖠᕐᓂ ᐱᙳᐊᖅᑎᓂ. ᐳᕋᐃᐊᓐ ᓵᓚᒃᓴᓚᐅᕐᒥᔪᖅ ᐊᖑᑏᑦ ᕿᒡᒋᑲᑕᒃᑎᓪᓗᒋ ᐊᑕᐅᓯᕐᒥ ᓂᐅᖓᓂ ᓇᖏᕈᑎᖃᖅᑐᓂᒃ. ᑎᑭᐅᑎᓚᐅᕐᑐᖅ 6-ᕖᑦᓂ, 11 ᐃᓐᓯᔅᓂ ᑖᓐᓇᓗ ᕿᒡᒋᖅᓯᒪᔭᖓᓂ ᖁᑦᑎᖕᓂᕐᓴᐅᓪᓗᓂ 1 ᐃᓐᔅᒥᑦ.

ᖁᙱᐊᖅᑐᑦ ᐱᙳᐊᖅᑎᓂ ᐱᙳᐊᕐᕕᖕᒥ ᓂᓪᓕᑳᓪᓚᒍᑎᖃᓚᐅᕐᑐᑦ ᕿᒡᒋᑲᑕᓚᐅᖅᑎᓪᓗᒍ.

ᐃᕙᓗ ᓚᐃᔅᒪᓐ-ᐳᕌᑯᓪᐹᖕᒃ ᐃᒡᓗᓕᒑᕐᔪᒃᒥᐅᑕᖅ ᐱᒡᒍᓴᐅᑎᖃᑕᐅᔪᖅ ᐊᕐᓇᐃᑦ ᑕᓕᕐᒥᓂ ᓇᖏᖅᖢᑎᒃ ᖃᖓᑕᔪᒥ ᐊᒃᑐᖅᓯᓇᓱᑲᑕᒃᑎᓪᓗᒋᑦ ᐅᓇ ᓕᐅᕆ ᑕᐅᑐ ᐱᓕᕆᔨᒻᒪᕆᐅᖃᑕᑕᐅᔪᖅ ᑕᐅᑐᒃᑎᓪᓗᒍ ᐅᕙᓂ ᑭᕙᓪᓕᖅᒥ ᐊᐅᔭᒃᑯᑦ ᐱᙳᐊᕕᒡᔪᐊᕐᓇᒥ ᓯᕙᑖᕐᕕᐅᑎᓪᓗᒍ. ᓴᐃᔅᒪᓐ-ᐳᕌᑯᓪᐹᖕᒃ ᐃᑲᔪᖃᑦᑕᓚᐅᕐᑐᖅ ᐊᔪᕈᓐᓃᖅᓴᖅᑎᑦᑎᔨᐅᖃᑕᐅᓪᓗᓂ ᐱᙳᐊᑦᖅᑎᓂ ᑭᖑᓂᐊᒍᑦ ᐱᒋᐊᕐᓯᒪᓂᑯᓂᒃ. (ᐊᔾᔨᓕᐅᕆᔨ ᑎᐅᕋᓐ ᓕᐊᑦᔅ)

ᑕᐅᑐ ᓵᓚᒃᓴᓚᐅᕐᑐᖅ ᐊᖑᑏᑦ ᕿᒡᒋᑲᑕᒃᑐᓂ ᐃᒡᓗᐃᓐᓇᕐᒧᑦ ᖁᑦᑎᖕᓂᖃᖅᖢᓂ 6-ᕖᑦ ᐊᒻᒪ 2 ᐃᓐᓯᔅ.

ᐃᕙᓗ ᓚᐃᔅᒪᓐ-ᐳᕌᑯᓪᐹᖕᒃ ᖃᓄᖅ ᓵᓚᒃᓴᕈᑎᖃᓚᐅᕐᒪᖔᑦ ᐅᖃᖑᐅᓯᖃᕐᑐᖅ ᐊᕐᓇᐃᑦ ᑕᓕᖓ ᐃᒡᓗᐊ ᓇᖏᕈᑎᒋᓪᓗᓂᐅᒃ ᐃᒡᓗᐊᓕ ᓂᕕᖓᔪᒥ ᐊᒃᑐᕐᓯᓇᓱᒃᖢᓂ, ᐊᒡᒐᖓ ᓇᑎᕐᒦᖢᓂ, ᐃᒡᓗᐊᓕ ᐊᒃᑐᕐᓯᓇᓱᒃᖢᓂ ᕿᓯᖕᒥ ᓴᓇᓯᒪᔪᒥ ᐊᕐᓴᙳᐊᒥ. ᐅᓄᙱᑦᑐᑦ ᑕᐃᒪᐃᓕᐅᕈᓐᓇᓚᐅᕐᑐᑦ.

ᐹᐳᕋ ᐅᓗᕐᓯ ᑎᑭᕋᕐᔪᐊᖅᒥᐅᑕᖅ ᓵᓚᒃᓴᓚᐅᕐᑐᖅ ᐃᒡᓗᐊᒍᑦ ᑕᓕᖏᓐᑦ ᖃᖓᑕᔪᒥ ᐊᒃᑐᕐᓯᑲᑕᒐᓱᒃᑎᓪᓗᒋᑦ ᓂᕕᐊᕐᓵᑦ.

ᑐᑭᕐᓯᑲᑕᒐᓱᒃᑎᓪᓗᒋᑦ – ᑖᒃᑯᐊ ᐱᒡᒍᓴᐅᑎᔪᑦ ᓂᐅᖏᓐᓂ ᓂᐊᖁᖏᓐᓂᓪᓗ ᕿᓗᐊᕐᓯᓯᒪᓪᓗᑎᒃ ᑎᒥᖏᓐᓂ V-ᖑᕐᑎᑦᑎᓪᓗᑎᒃ – ᑖᒃᑯᐊ ᐱᒡᒍᓴᐅᑎᔪᑦ ᐊᒡᒐᖕᒥᓄᑦ ᒪᑭᑕᓇᓱᒃᖢᑎᒃ ᑐᐃᖏᓐᓂᒡᓗ ᐊᐅᓚᔾᔭᒃᑎᑦᑎᓪᓗᖏ ᕿᓯᖕᒥ ᓴᓇᓯᒪᔪᒥ ᐊᕐᓴᖑᐊᕐᒥ ᐳᑐᒍᖏᓐᓄᑦ ᐊᒃᑐᕐᓯᓇᓱᒃᖢᑎᒃ.

ᐳᕋᐃᐊᓐ ᒪᓕᓐᔅ ᐊᒻᒪ ᑕᓄᔭ ᓵᓚᒃᓴᓚᐅᕐᑑᒃ ᓄᑲᕐᖠᐅᓂᕐᓴᓂ ᐱᒡᒍᓴᐅᑎᖃᑎᒋᔭᖏᓐᓂᒃ ᐊᒻᒪ ᑕᐅᑐ ᐊᒻᒪ ᕗᓘᕋᓐᔅ ᓇᒍᒐᓕᒃ ᖃᒪᓂᕐᑐᐊᕐᒥᐅᑖᑦ ᐊᖓᔪᒃᖠᕐᓂ ᓵᓚᖃᖅᖢᑎᒃ.

ᓛᓐᔅ ᑭᒍᓯᐅᒃᓇᒃ ᐊᕐᕕᐊᓂ ᓄᓇᓕᒃ ᓵᓚᒃᓴᓚᐅᕐᑐᖅ ᐊᖑᑎᑦ ᓯᑦᑐᖅᓴᖅᑎᓪᓗᒋᑦ, ᑖᒃᑯᐊ ᐱᙳᐊᖅᑐᑦ ᐊᖁᕕᖢᑎᒃ ᑐᑭᑲᑕᒃᓗᑎᒃ, ᓲᕐᓗ ᔫᑯᕇᓂᐊᒥ ᒧᒥᐅᓯᕆᔭᐅᔪᑎᑐᑦ. ᑮᒐᓐ ᖃᑦᔪᒃ ᐃᒡᓗᓕᒑᕐᔪᒃᒥᐅᑕᖅ ᓵᓚᒃᓴᓚᐅᕐᑐᖅ ᓄᑲᖅᖠᕐᓂ ᐊᖑᑎᓂᒃ.

ᑕᓄᔭ ᒎᓗᒥ ᓵᓚᒃᓴᐅᓯᐊᓚᐅᕐᑐᖅ ᐊᕐᓇᐃᑦ ᓂᐅᖁᕐᒥᖕᓄᑦ ᓄᑦᑐᒃᓴᐅᑎᓪᓗᒋᑦ, ᑖᒃᑯᐊ ᐱᙳᐊᖅᑏᑦ ᓂᐊᖁᖏᓐᓂ ᕿᓗᐊᕐᓯᓪᓗᑎᒃ ᐱᖃᑖᓂ ᕿᓗᐊᕐᓯᒪᔭᖓᓂ ᐲᖅᑎᑦᑎᓇᓱᒃᖢᑎᒃ. ᑐᓗᕆᐊᓕᒃ ᓵᓚᒃᓴᓚᐅᕐᑐᖅ ᒎᓗᒥ ᐊᕐᓇᓂ.

ᑐᓗᕆᐊᓕᒃ ᓵᓚᒃᓴᓚᐅᕐᑐᖅ ᐊᕐᓇᐃᑦ 2 ᕘᑦ ᖁᑦᑎᖕᓂᓕᖕᒥ ᕿᒡᒋᑲᑕᒃᑎᓪᓗᒋᑦ ᑕᒪᕐᒥ ᐃᓯᒐᖏᑦ ᐊᒃᑐᐊᑎᖢᓂᒋᑦ ᐊᒻᒪ ᑐᑭᕆᐊᖅᐸᒃᖢᑎᒃ ᕿᓯᖕᒥ ᓴᓇᓯᒪᔪᒥᒃ ᐊᕐᓴᙳᐊᕐᒥ ᓂᕕᖓᔪᖅ ᐊᒃᖢᓈᒧᑦ. ᓚᐃᔅᒪᓐ-ᐳᕌᑯᓪᐹᖕᒃ ᓵᓚᒃᓴᓚᐅᕐᑐᖅ ᒎᓗᒥ ᓂᕕᐊᕐᓵᑦ ᐱᙳᐊᖅᑎᓪᓗᒋᑦ.

ᑕᐅᑐ ᓵᓚᒃᓴᐅᓯᐊᓚᐅᕐᑐᖅ ᒎᓗᒥ ᐊᖑᑏᑦ ᓰᖅᑯᖓᓪᓗᑎᒃ ᕿᒡᒋᑲᑕᒃᑐᓂ, ᑖᒃᑯᐊᓕ ᐱᙳᐊᖅᑎᑦ ᓰᖁᖏᓐᓄᐊᖅᖢᑎᒃ ᖁᒻᒪ ᕿᒡᒋᒋᐊᖅᐸᒃᖢᑎᒃ. ᐅᖓᓯᓛᒧᑦ ᕿᒡᒋᖅᑐᖅ ᓵᓚᒃᓴᕋᔭᖅᖢᓂ.

ᑲᑦᔪᒃ ᓵᓚᒃᓴᓚᐅᕐᑐᖅ ᐊᖑᑏᑦ ᓰᖁᕐᓯᒪᓪᓗᑎᒃ ᕿᒡᒋᑲᑕᒃᑐᓂᒃ ᐊᒻᒪᓗ ᐊᒡᒐᖏᑦᑎᒍ ᓄᑦᑐᒃᓴᐅᑎᔪᓂᒃ ᐊᐃᑉᐸᖓᓂ ᑎᒍᒥᐊᕈᓐᓃᖅᑎᑦᑎᓇᓱᒃᖢᑎᒃ.

ᑐᕈᐊᐃ ᐃᓄᒃᓱᒃ ᑲᖏᖅᖠᓂᖅᒥᐅᑕᖅ ᓵᓚᒃᓴᐅᓯᐊᓚᐅᕐᑐᖅ ᒎᓗᒥ ᐊᖑᑏᑦ ᓄᑦᑐᒃᓴᐅᑎᑎᓪᓗᒋᑦ.

ᐱᙳᐊᓚᐅᕐᑐᑦ ᑎᑭᖢᒍ ᐋᒐᓯ 16.