ᐊᕐᕕᐊᓂ ᐊᖑᓇᓱᒃᑎ ᓈᒻᒪᒃᓴᙱᔾᔪᑎᒥᓂ ᐅᖃᐅᓯᖃᖅᐳᖅ ᓇᓐᓄᒐᒃᓴᐃᑦ ᐅᓄᙱᓗᐊᕐᓂᖏᓐᓂ

For English version, see ‘Enough is enough’: Arviat hunter decries low polar bear hunt quota

ᓇᓄᕐᓂ ᐱᔪᓐᓇᕈᑎᐅᔪᑦ ᓈᒻᒪᙱᓕᐅᕈᑎᐅᕗᖅ ᓂᕿᖃᕐᓂᕐᒧᑦ ᐊᒻᒪᓗ ᓄᓇᓕᐅᔪᑦ ᐅᓗᕆᐊᓇᖅᑐᒦᓐᓂᕐᓴᐅᓕᖅᖢᑎᒃ, ᐅᖃᕐᑐᖅ ᐃᒃᓯᕙᐅᑕᕆᔭᐅᖅ ᐊᕐᕕᐊᓂ ᐊᖑᓇᓱᒃᑐᓕᕆᔨᒃᑯᓐᓄᑦ.

ᐋᓕᒃᔅ ᐄᓴᓗᒃ ᓈᒻᒪᒃᓴᙱᔾᔪᑎᖏᓐᓂ ᐅᖃᐅᓯᖃᓚᐅᕐᑐᖅ ᓄᓇᕗᒥᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᐅᒃᑑᐱᕆ 31-ᒥ ᑲᑎᒪᑎᓪᓗᒋᑦ ᐊᕐᕕᐊᓂ.

ᐄᓴᓗᒃ ᐃᒃᓯᕙᐅᑕᐅᑉ ᑐᒡᓕᕆᔭᖓ ᑭᕙᓪᓕᖅᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ.

“ᐅᓄᒻᒪᕆᖕᒪᑕ ᓇᓄᕐᓂ ᑕᑯᑲᑕᒃᓯᒪᔪᐃᑦ — ᓱᕋᐃᕙᒃᖢᑎᒃ ᐃᒡᓗᕋᓛᕆᔭᐅᔪᓂᒃ, ᐃᓄᖕᓂ ᖃᓂᓗᐊᓕᖅᐸᒃᖢᑎᒃ, ᐃᓄᐃᑦᓗ ᒪᓕᒃᑕᐅᕙᒃᖢᑎᒃ ᓇᓄᕐᓄᑦ ᐅᕙᓂ ᓄᓇᓕᖕᓂ,” ᐅᖃᕐᑐᖅ. “ᐃᓱᒫᓘᑎᒋᔭᕗᑦ ᐱᕙᓪᓕᐊᑐᐃᓐᓇᓕᕐᒪᑕ.”

ᐅᖃᓚᐅᕐᒥᔪᖅ ᓄᓇᓕᖕᓂ ᐃᓅᔪᓐᓃᖅᑐᖃᓚᐅᕐᓯᒪᓂᖓᓂ ᓇᓄᕐᒧᑦ ᐅᒋᐊᖅᑕᐅᓪᓗᓂ ᔪᓚᐃ 2018-ᖑᑎᓪᓗᒍ ᓄᓇᖃᖅᑐᓪᓗ ᓱᓕ ᑖᔅᓱᒥᖓ ᐃᖅᑲᐅᒪᓪᓗᑎᒃ. ᐃᐅᕋᓐ ᒋᐸᓐᔅ ᐃᓅᔪᓐᓃᓚᐅᕐᓯᒪᖕᒪᓐ ᕿᑐᕐᖓᖏᓐᓂ ᓴᐳᔾᔨᓯᒪᓇᓱᒃᖢᓂ ᓇᓄᕐᒥ ᒪᓐᓂᒃᑕᕆᐊᖅᓯᒪᑎᓪᓗᒋᑦ.

ᐅᒥᐊᖅᑐᖃᑦᑕᕐᑐᑦ ᑕᑯᖃᑕᖅᑐᑦ ᓇᓄᕐᓂ ᓇᖅᑐᕋᓕᖕᓂ ᓄᕗᐊᕐᔪᓕᖕᓂ ᐊᒻᒪ ᑲᖏᖅᖢᒐᓚᖕᓂ, ᐊᒻᒪᓗ ᓇᓄᐃᑦ ᐊᒃᑕᕐᕕᖕᒦᓐᓂᕐᓴᐅᖃᑦᑕᓕᖅᖢᑎᒃ, ᐄᓴᓗᒃ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᓱᕈᓰᑦ ᑕᓯᕐᓂ ᓯᐊᕐᕆᔮᑲᑕᒃᑎᓪᓗᒋ ᓇᓄᕐᓂ ᖃᓂᒋᔭᖏᑦᑎᒍ ᐊᖅᑯᓵᖅᑐᖃᖅᐸᒃᖢᓂ.

ᐊᒻᒪᓗ ᑐᒃᑐᐃᑦ, ᐊᒻᒪ ᑐᒃᑐᕕᓃᑦ ᕿᖕᓂᐅᓂᑯᑦ ᐊᒻᒪᓗ ᒪᒃᑖᑦ ᐃᒍᓇᙳᖅᑎᓯᒪᔪᑦ ᓂᕿᒋᔭᐅᕙᖕᒪᑕ ᑭᕙᓪᓕᕐᒥᐅᓄᑦ, ᑭᓯᐊᓂᓕ ᑕᒪᒃᑯᓄᖓ ᓂᕿᓄᑦ ᐅᐸᒋᐊᒃᓴᖅ ᐊᔪᕐᓇᕐᓯᕙᒃᖢᓂ ᓇᓄᕐᑕᖃᐃᓐᓇᔭᓐᓂᖓᓄᑦ, ᐄᓴᓗᒃ ᐅᖃᕐᑐᖅ.

“ᐅᓇ ᑎᑭᐅᑎᓕᕐᒪᑦ ᒪᓕᒍᒪᔪᓐᓃᓛᕐᓂᑦᑎᓐᓄᑦ (ᐅᓄᕈᓐᓃᖅᑎᑕᐅᓯᒪᓂᖏᑦ ᐱᕙᐅᔪᓐᓇᖅᑐᑦ). ᐅᓇ ᓄᖅᑲᕆᐊᖃᓕᕐᑐᖅ,” ᐄᓴᓗᒃ ᐅᖃᕐᑐᖅ. “ᒪᒥᐊᑉᐳᖓ ᒫᓐᓇ ᐅᖃᑦᑎᕈᓐᓇᙱᓐᓂᕐᓄᑦ ᒫᓐᓇ ᑭᓯᐊᓂᓕ ᑕᒪᐃᓐᐸᓗᒃ ᓄᓇᖃᖅᑐᑦ ᑕᐃᒪᓐᓇ ᐃᓱᒪᖕᒥᖕᒪᑕ.”

ᐅᑯᐊ ᑭᕙᓪᓕᖅᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏ 14-ᓂ ᓇᓐᓄᒍᓐᓇᖅᑎᑦᑎᓚᐅᕐᒪᑕ ᐊᕐᕕᐊᓂ ᑕᒪᑐᒪᓂ ᐊᕐᕌᒍᒥ. ᐄᓴᓗᒃ ᑭᕙᓪᓕᕐᒥ 2007 ᑐᖔᓂ ᓇᓐᓄᒃᑕᐅᔪᓐᓇᖅᑐᓂ 20-ᓂ ᓂᕕᙵᑕᖅᑎᒍᑦ ᐅᑎᖅᑎᑕᐅᖁᔨᔪᖅ.

“ᓄᓇᓕᖕᓂ ᐊᓯᖏᓐᓂ ᐱᓂᕐᓴᐅᑲᑕᒐᓱᒻᒪᕆᓕᕋᑦᑕ ᓇᓐᓄᒃᑕᐅᔪᓐᓇᖅᑐᓄᑦ,” ᐅᖃᕐᑐᖅ. “ᐅᑎᖅᑎᑕᐅᓚᐅᕐᓕ ᓇᓐᓄᒃᑕᐅᔪᓐᓇᖅᑐᑦ ᐅᓄᕐᓂᕆᓚᐅᕐᑕᖏᑦ ᑕᐃᒪᓐᓇ ᓄᓇᓕᖕᓂ ᐊᓯᑦᑎᓐᓃᑦᑐᓂ ᖃᓄᐃᓕᐅᖃᑎᖃᔾᔮᙱᓐᓇᑦᑕ.”

ᑲᓇᑕᒥ ᓇᓄᐃᑦ ᐅᓄᕐᓂᖏᑦ ᐊᕕᒃᑐᖅᑕᐅᕙᖕᒪᑕ 13-ᓄᑦ ᐃᓄᒋᐊᖕᓂᒃᑯᑦ ᐊᕕᒃᑐᖅᑕᐅᓪᓗᑎᒃ. ᐊᕐᕕᐊᑦᒥᐅᑦ ᐊᖑᓇᓱᒃᐸᖕᒪᑕ ᑕᓯᐅᔭᕐᔪᐊᑉ ᐱᖓᖕᓇᖅᐸᓯᐊᓃᑦᑐᓂᒃ.

“ᑕᓯᐅᔭᕐᔪᐊᑉ ᐱᖓᖕᓇᖅᐸᓯᐊᑕ ᐅᓄᕐᓂᖏᑦ ᓈᒻᒪᖕᒪᑕ ᐊᒻᒪᓗ ᐃᓲᒫᓘᑎᑕᖃᙱᖢᓂ ᒫᓐᓇ ᐊᖑᓇᓱᒃᑕᐅᔪᓐᓇᖅᑐᓂᒃ,” ᐅᖃᕐᑐᖅ ᔭᐃᓚᓐ ᑕᒍᕐᓈᖅ, ᐊᐅᓚᑦᑎᔨ ᑐᓴᐅᒪᔾᔪᑎᓕᕆᓂᕐᒥᑦ ᓄᓇᕗᒥᑦ ᐊᕙᑎᓕᕆᔨᒃᑯᓐᓄᑦ, ᑎᑎᕋᓚᐅᕐᑐᖅ ᖃᕋᓴᐅᔭᒃᑯᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᑭᖑᓪᓕᖅᐹᓪᓕ ᐊᖑᓇᓱᒃᓂᕐᒧᑦ ᓇᐃᓴᖅᑕᐅᓯᒪᔪᑦ ᐅᕙᙵᑦ 2020/21-ᒥ, ᑎᑎᕋᑦ ᑎᑎᕋᐅᓯᖃᕐᓯᒪᔪᖅ ᑲᓇᑕᒥ 475-ᓂ ᓇᓐᓄᒐᓱᒍᓐᓇᖅᖢᑎᒃ ᐊᒻᒪᓗ ᑲᓇᑕᐅᑉ ᓯᓚᑖᓂ 100-ᓂ ᒫᓃᑦᑐᓂᒃ ᑲᓇᑕᐅᓪᓗ ᑲᓛᖡᓪᓗ ᓄᓇᖓᓂ ᐊᑐᕈᓐᓇᖅᑕᖏᓐᓂᒃ ᐊᒻᒪᓗ ᐊᒥᐊᓕᑲᒥᐅᑦ.

ᐊᖑᓇᓱᒃᑕᐅᔪᓐᓇᖅᑐᑦ ᓴᖅᑭᑎᑦᑎᓯᒪᔪᑦ ᒫᓂ 3 ᐳᓴᓐᑎᖏᑦ ᓇᓄᐃᑦ ᐅᓄᕐᓂᖏᑦᑕ ᒫᓂ 17,000 ᐱᔭᐅᔪᓐᓇᕐᑐᑦ 13-ᓂ ᓇᓄᖃᕐᕕᐅᕙᒃᑐᓂᑦ ᑲᓇᑕᒥ. ᑲᓇᑕᒥ ᓇᓄᐃᑦ ᐅᓄᓛᐅᕙᒃᑐᑦ ᐃᒪᓐᓇ ᐱᖓᓱᓂ ᒪᕐᕉᒃ ᑲᓇᑕᒦᖢᑎᒃ.

ᐊᕐᕌᒎᓕᕐᑐᓂ ᐊᕙᑎᓂᒃ (20), ᓇᓄᐃᑦ ᐅᓄᕐᓂᖏᑦ ᐊᐅᓚᑕᐅᓂᕐᓴᐅᕙᖕᒪᑕ ᑐᕌᒐᖃᕋᓱᒃᖢᑎᒃ ᐅᓄᕐᓂᕆᔭᐅᔪᓂᒃ ᓱᖁᓯᖅᑎᑦᑎᑦᑕᐃᓕᒪᓂᕐᒥ.

ᒫᓐᓇᓵᕐᓕ ᓯᑯ ᓄᖑᑉᐸᓪᓕᐊᓂᖓᓄᑦ ᓇᓄᐃᑦ ᓇᓃᖃᑦᑕᕐᓂᖏᑦ ᐊᓯᙳᖅᐸᓪᓕᐊᓯᒪᕗᑦ, ᓂᕆᕝᕕᒋᖃᑦᑕᖅᑕᖏᓪᓗ ᐊᒻᒪᓗ ᓇᑦᑎᕋᓱᒍᓯᕆᕙᒃᑕᖏᑦ ᐱᓗᐊᖅᑐᓂ ᓂᒋᖅᐸᓯᐊᓃᑦᑐᓂ ᐅᐸᖃᑦᑕᖅᑕᖏᑦᑕ.