ᓱᖏᐅᓐᓇᖅᑐᓂ ᑮᓇᓂᒃ ᐅᑎᖅᐳᑦ ᑲᓇᑕᒥ ᒪᓕᒐᓕᐅᖅᑎᖏᓐᓄᑦ

For the English version of this story, please see Familiar faces return to Parliament after federal election.

ᓇᒡᒐᔾᔭᐅᒥ ᒐᕙᒪᑐᖃᒃᑯᑦ ᓂᕈᐊᕐᓂᐅᔪᒥ ᐊᒃᓱᕈᕐᓇᖅᑑᔪᒃᓴᐅᓚᐅᖅᐳᖅ, ᑭᓯᐊᓂ ᐅᑭᐅᖅᑕᖅᑐᕐᒥᐅᑦ ᓂᕆᐅᒍᓐᓇᖅᐳᑦ ᑕᑯᓂᕐᒥ ᐃᓚᖏᓐᓂ ᓱᖏᐅᓐᓇᖅᑐᓂ ᑮᓇᓂᑦ ᐅᑎᖅᑐᓂ ᑲᓇᑕᒥ ᒪᓕᒐᓕᐅᖅᑎᖏᓐᓄᑦ.

ᒋᐊᕆ ᐊᓇᓐᑕᓴᖓᕆ ᓵᓚᖃᓚᐅᖅᐳᖅ ᑐᕌᓐᑐᒥ-ᐃᓂᐅᔪᒥ ᓂᕈᐊᖅᑕᐅᕕᖓᓂ ᐊᕕᒃᑐᖅᓯᒪᓂᐅᔪᒥ ᔅᑳᐳᕉ—ᕉᔾ ᐹᒃᒥ. ᑭᖕᒧᑦ-ᓄᓇᖃᖅᑳᖅᓯᒪᔪᓄᑦ ᐱᓕᕆᓂᕐᓄᑦ ᐊᒻᒪ ᐅᑭᐅᖅᑕᖅᑐᒥ ᐱᓕᕆᓂᕐᒥ ᒥᓂᔅᑕᐅᓪᓗᓂ, ᐱᓕᕆᓂᖃᓚᐅᖅᐳᖅ ᐊᖏᔪᒥ ᐊᑐᕐᓂᖃᐅᑎᖓᓂ ᑭᒡᒐᖅᑐᐃᓪᓗᓂ ᒐᕙᒪᑐᖃᒃᑯᓐᓂ ᐅᑭᐅᖅᑕᖅᑐᒥ.

ᒫᔾᔨᒥ, ᐋᑐᕚᒦᓚᐅᖅᐳᖅ ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓᓂ ᔨᐊᕆᒥ ᑑᙶᓗᖕᒥ ᐊᒻᒪ ᓯᕗᓕᖅᑎ P.J. ᐊᕿᐊᕈᕐᒥ ᐊᑎᓕᐅᕆᓂᕐᒥ ᓄᑖᙳᕆᐊᖅᑎᑕᐅᓂᖓᓂ ᓄᓇᕗᒻᒥ ᐊᖏᕈᑎᒥᒃ.

ᐹᑎ ᕼᐊᑦᔪ, ᓕᐳᕈᒃᑯᑦ ᑲᓇᑕᒥ ᒪᓕᒐᓕᐅᖅᑎᖏᓐᓄᑦ ᐃᓚᒋᔭᐅᔪᖅ ᑕᓐᑐ ᐸᐃᒥ—ᓱᐱᐅᕆᐅᕐ ᐅᐊᖕᓇᒥ, ᐃᖏᕐᕋᓂᖃᑦᑎᐊᓚᐅᖅᐳᖅ ᓵᓚᒃᓴᕐᓂᕐᒥ. ᒥᓂᔅᑕᐅᓚᐅᖅᐳᖅ ᓄᓇᖃᖅᑳᖅᓯᒪᔪᓄᑦ ᐱᔨᑦᑎᕋᕐᓂᕐᒥ, ᐱᓕᕆᕝᕕᒃ ᑲᒪᒋᔭᖃᖅᑐᒥ ᐱᒻᒪᕆᐅᔪᒥ ᐱᓕᕆᐊᖑᔪᓂ ᓲᕐᓗ ᐃᓄᐃᑦ ᓱᕈᓰᑦ ᓯᕗᓪᓕᐅᔪᒥ ᐱᒋᐊᕈᑕᐅᔪᒥ ᐊᒻᒪ ᔪᐊᑕᓐ ᑐᙵᕕᖓᓂ.

ᑖᒥᓂᒃ ᓚᐸᓛᖕᒃ, ᓵᓚᖃᓚᐅᖅᐳᖅ 10−ᖓᓂ ᓂᕈᐊᕐᓂᐅᔪᒥ, ᐊᔪᕐᓇᙱᑦᑐᒥ ᐱᓪᓗᓂ ᐅᓄᕐᓂᖅᓴᐅᔪᒥ 60 ᐳᓴᓐᑎᒥ ᓂᕈᐊᕐᓂᐅᔪᒥ ᓂᕈᐊᖅᑕᐅᕕᖓᓂ ᐊᕕᒃᑐᖅᓯᒪᓂᐅᔪᒥ ᖁᓛᓄᐊᖅᑎᓪᓗᒍ ᐅᓐᓄᒃᑯᑦ. ᓚᐸᓛᖕᒃ ᐱᔨᑦᑎᕋᓚᐅᖅᐳᖅ ᓇᐃᑦᑐᓂ ᐱᓕᕆᓂᐅᔪᓂ ᑮᓇᐅᔭᓕᕆᓂᕐᒧᑦ ᒥᓂᔅᑕᐅᓪᓗᓂ ᐃᓱᐸᓗᐊᓂ ᔭᔅᑎᓐ ᑐᕉᑑ ᒐᕙᒪᖓᓐᓂ ᐊᒻᒪ ᒫᒃ ᑳᓂᐅᑉ ᓇᐃᑦᑐᒥ ᒐᕙᒪᒋᔭᖓᓂ, ᑐᕌᖅᐸᓪᓕᐊᔪᒥ ᓂᕈᐊᕐᓂᐅᔪᒧᑦ.

ᑎᒍᒥᐊᖅᓯᒪᕗᖅ 8−ᓂ ᒪᓕᒐᓕᐅᖅᑏᑦ ᑲᑎᒪᔨᖏᓐᓂ ᐃᓂᐅᔪᓂᑦ, ᑭᓯᐊᓂ ᓄᓇᕗᒻᒥᐅ ᐃᖅᑲᐅᒪᓛᖑᓇᔭᖅᑐᒃᓴᐅᕗᑦ ᐱᓕᕆᓂᖓᓂ ᒥᓂᔅᑕᐅᓪᓗᓂ ᐅᑭᐅᖅᑕᖅᑐᒥ ᐱᓕᕆᓂᐅᔪᒥ, ᑲᒪᒋᔭᖃᖅᑐᒥ ᐅᑭᐅᖅᑕᖅᑐᒥ ᐊᒻᒪ ᐱᓕᕆᐊᖑᓂᐅᔪᓂ ᓲᕐᓗ ᓂᕿᑦᑎᐊᕙᓕᕆᓂᕐᒥ ᐅᑭᐅᖅᑕᖅᑐᒥ.

ᐱᐅᓪ ᐱᓕᐊᕐ, ᒥᓂᔅᑕ ᑲᓇᑕᒥ ᓴᐳᔾᔨᓯᒪᓂᕐᒥ, ᓵᓚᖃᓚᐅᖅᐳᖅ ᐊᔪᕐᓇᙱᑦᑐᒥ ᓵᓚᖃᕐᓂᐅᔪᒥ ᑐᕌᓐᑐᒥ ᓂᕈᐊᖅᑕᐅᕕᖓᓂ ᐊᕕᒃᑐᖅᓯᒪᓂᐅᔪᒥ ᔅᑳᐳᕈ ᓂᒋᕐᒥ ᐱᓇᖕᓇᖓᓂ. ᒥᓂᔅᑕᐅᓪᓗᓂ, ᖃᓂᑦᑐᒥ ᐱᓕᕆᖃᑎᖃᖅᓯᒪᕗᖅ ᓄᓇᕗᒻᒥ ᒐᕙᒪᒃᑯᓐᓂ ᐃᓱᒫᓘᑕᐅᔪᒥ ᐅᑭᐅᖅᑕᖅᑐᒥ ᐱᔪᓐᓇᕐᓂᖃᕐᔪᐊᕐᓂᐅᔪᒥ ᐱᕈᖅᐸᓪᓕᐊᑎᓪᓗᒍ ᖄᖏᖅᓯᒪᔪᓂ ᖃᔅᓯᐊᕐᔪᖕᓂ ᐊᕐᕌᒎᔪᓂ. ᒫᔾᔨᒥ ᐱᓕᐊᕐ ᐃᖃᓗᖕᓃᓚᐅᖅᐳᖅ ᐊᒻᒪ ᐅᖃᐅᓯᖃᓚᐅᖅᐳᖅ ᓕᐳᕈᒃᑯᑦ ᒐᕙᒪᖓᓐᓂ ᐸᕐᓇᐅᑎᖓᓂ ᓴᓇᓂᕐᒥ ᐱᖓᓱᓂ ᐅᓇᑕᖅᑐᒃᓴᓂ ᐃᑲᔪᖅᓱᐃᓂᕐᒥ ᐱᓕᕆᕝᕕᓂ ᑲᓇᑕᐅᑉ ᐅᑭᐅᖅᑕᖅᑐᒥ, ᐃᓚᖃᖅᑐᒥ ᐊᑕᐅᓯᕐᒥ ᐃᖃᓗᖕᓂ.

ᐃᒡᓗᓕᕆᔨᕐᔪᐊᒃᑯᓐᓄᑦ ᒥᓂᔅᑕᐅᓚᐅᖅᓯᒪᔪᖅ ᐊᒻᒪ ᓕᐳᕈᒃᑯᑦ ᕿᑎᖅᐸᓯᐊᓂ ᓅᕙ ᑲᓇᑕᒥ ᒪᓕᒐᓕᐅᖅᑎᖏᓐᓄᑦ ᐃᓚᒋᔭᐅᔪᖅ ᓵᓐ ᕗᕋᐃᓱᕐ ᓵᓚᐅᓕᒑᓚᐅᖅᐳᖅ ᐱᒋᐊᓕᓵᕐᓂᖓᓂ ᐅᓐᓄᖓᓂ, ᑭᓯᐊᓂ ᐅᓐᓄᒃᐸᓪᓕᐊᑎᓪᓗᒍ, ᒪᑐᓯᓚᐅᖅᐳᖅ ᐃᓚᑰᓂᐅᔪᒥ ᐊᒻᒪ ᐱᕋᔮᓚᐅᖅᐳᖅ ᓂᕈᐊᖅᑕᐅᕕᖓᓂ ᐊᕕᒃᑐᖅᓯᒪᓂᐅᔪᒥ.

ᐹᑉ ᓯᒧᕐ, ᑲᓐᓲᕕᑎᒃᑯᑦ ᑲᓇᑕᒥ ᒪᓕᒐᓕᐅᖅᑎᖏᓐᓄᑦ ᐃᓚᒋᔭᐅᔪᖅ ᐳᕆᓐᔅ ᔪᐊᔾ–ᐲᔅ ᕆᓄᕐ–ᐅᐊᖕᓇᒥ ᕌᑭᔅᓂ ᐊᒻᒪ ᐅᑭᐅᖅᑕᖅᑐᒥ ᐱᓕᕆᓂᕐᒥ ᐱᐅᒃᓴᙱᓐᓂᕐᒥ, ᖄᖅᑯᑦᑎᓚᐅᖅᐳᖅ ᓂᕈᐊᒐᒃᓴᐅᖃᑎᖏᓐᓂ ᐱᓪᓗᓂ 75 ᐳᓴᓐᑎᑲᓴᖕᒥ ᓂᕈᐊᕐᓂᐅᔪᒥ ᖁᓛᓂ ᐅᓐᓄᒃᑯᑦ.

ᓕᐊ ᒑᓴᓐ, ᓂᕈᐊᒐᒃᓴᖅ NDP ᐅᐃᓂᐱᐊᒡ ᕿᑎᖅᐸᓯᐊᓂ, ᑎᒍᒥᐊᒐᓛᓚᐅᖅᐳᖅ ᓵᓚᖃᕐᓂᕐᒧᑦ. ᒑᓴᓐ ᐊᒻᒪ ᓄᓇᕗᒻᒥ ᑲᓇᑕᒥ ᒪᓕᒐᓕᐅᖅᑎᖏᓐᓄᑦ ᐃᓚᒋᔭᐅᔪᖅ ᓗᐊᕆ ᐃᓪᓚᐅᑦ ᐃᑲᔪᖃᑎᒌᓚᐅᖅᐳᑦ ᓄᓇᖃᖅᑳᖅᓯᒪᔪᓄᑦ ᐊᑲᐅᙱᓕᐅᕈᑕᐅᔪᓂ ᑲᓇᑕᒥ ᒪᓕᒐᓕᐅᖅᑎᖏᓐᓂᑦ.

ᐃᓚᖏᓐᓂ ᓄᑖᖑᔪᓂ ᑮᓇᕐᓂ ᑭᒡᒐᖅᑐᐃᔪᒥ ᑲᓇᑕᐅᑉ ᐅᑭᐅᖅᑕᖅᑐᖓᓂ ᓂᕈᐊᖅᑕᐅᓚᐅᕆᕗᑦᑕᐅᖅ.

ᐳᕋᓐᑕᓐ ᕼᐊᓐᓕ, ᓕᐳᕈᒃᑯᑦ ᓂᕈᐊᒐᒃᓴᐅᔪᖅ ᔫᑳᓐᒧᑦ, ᑐᕌᖅᑎᑦᑎᓂᖃᓚᐅᖅᐳᖅ 50 ᐳᓴᓐᑎᒥ ᓂᕈᐊᕐᓂᐅᔪᒥ ᖁᓛᓂ ᐅᓐᓄᐊᒃᑯᑦ; ᕇᐱᑲ ᐋᓪᑎ, ᓕᐳᕈᒃᑯᓐᓄᖅᑕᐅᖅ, ᓵᓚᖃᓚᐅᖅᐳᖅ ᓄᓇᑦᓯᐊᕐᓂ; ᐊᒻᒪ ᕕᓕᑉ ᐆᕈᓪ ᓵᓚᖃᓚᐅᖅᐳᖅ ᓛᐸᑐᐊᒥ ᑭᖑᓂᑦᑎᐊᖓᒍᑦ ᓕᐳᕈᒃᑯᑦ ᑲᓇᑕᒥ ᒪᓕᒐᓕᐅᖅᑎᖏᓐᓄᑦ ᐃᓚᒋᔭᐅᔪᒥ ᐃᕚᓐ ᔫᓐᔅᒥ, ᑲᓇᑕᒥ ᒪᓕᒐᓕᐅᖅᑎᖏᑦᑕ ᑎᑎᕋᖅᑎᒋᓚᐅᖅᑕᖓᓂ ᒥᓂᔅᑕᒧᑦ ᐅᑭᐅᖅᑕᖅᑐᒥ ᐱᓕᕆᓂᕐᒥ, ᓂᕈᐊᒐᒃᓴᙳᒃᑲᓐᓂᕈᒪᓚᐅᙱᑦᑐᒥ ᓂᕈᐊᕐᓂᐅᔪᒥ.