ᐃᓚᒌᑦ ᐸᓯᔭᒃᓴᐅᓂᕋᖅᑐᒥ ᐅᖃᐅᓯᖃᖅᑐᑦ ᐆᒥᖓ ᐃᓄᐃᑦ ᐱᕋᔭᒃᑕᐅᓂᖏᓐᓄᑦ ᐱᓕᕆᐊᒥᑦ

For English version, see ‘Justice has been served’: Family reacts to guilty plea in Inuit fraud case

ᓂᒡᓚᓱᒃᑎᓪᓗᒍ ᓯᕿᓐᓂᖅᖢᓂ ᕕᕝᕗᐊᕆ 9-ᒥ ᐃᖃᓗᖕᓂ, ᓄᐊ ᓄᐊ ᐊᓃᖅᑐᖅ ᓄᓇᕗᒥᑦ ᐃᖅᑲᖅᑐᐃᕕᐅᑉ ᓯᓚᑖᓂ ᖁᖓᔮᖅᖢᓂ.

ᓯᕗᓂᑦᑎᐊᑯᓗᐊᓂ, ᑯᕇᒪ ᒫᓐᔨ — ᑐᕌᓐᑐᒥᐅᑕᖅ ᐊᕐᓇᖅ ᒪᕐᕈᓕᐊᖏᓐᓂᒃ ᐊᑎᓕᐅᓚᐅᕐᓯᒪᓂᑯ ᓄᓇᕗᒥᐅᑕᐅᓂᕋᖅᖢᓂᒋᑦ ᓱᓕᙱᖢᓂ ᕿᑐᕐᖓᕆᔭᐅᓂᕋᖅᖢᓂᒋᑦ ᓄᐊ ᐊᓈᓇᒋᓚᐅᖅᑕᖓᓄᑦ, ᑭᑎ ᓄᐊᒧᑦ — ᐸᓯᔭᒃᓴᐅᓂᕋᖅᖢᓂ ᐱᕋᔭᒃᓯᒪᓂᕐᒧᑦ.

“ᒪᓕᒐᓕᕆᓂᖅ ᐊᑐᖅᐳᖅ ᐊᓈᓇᓐᓄᑦ,” ᓄᐊ ᓄᐊ ᐅᖃᖅᑐᖅ ᐊᓈᓇᖓᑕ ᒥᒃᓵᓄᑦ, ᑖᓐᓇᓕ ᐃᓅᔪᓐᓃᓚᐅᖅᖢᓂ ᔪᓚᐃᖑᑎᓪᓗᒍ. “ᖁᕕᐊᓱᒻᒪᕆᒐᔭᓚᐅᕐᑐᖅ ᖃᓄᐃᓕᔾᔪᑎᐅᔪᒥ.”

ᓯᑎᐱᕆᐅᓚᐅᕐᓯᒪᔪᖅ ᓄᓇᕗᒥᑦ ᐸᓖᓯᒃᑯᑦ ᐸᓯᔭᒃᓴᙳᖅᑎᑦᑎᓚᐅᕐᓯᒪᖕᒪᑕ ᒫᓐᔨᒥ ᐊᒻᒪ ᒪᕐᕈᓕᐊᖏᓐᓂᒃ ᐸᓂᖏᓐᓂᒃ, ᐊᒥᐅᕋ ᐊᒻᒪ ᓈᑎᐊ ᒋᐊᓪ, ᒪᕐᕈᖕᓄᑦ ᐱᕋᔭᒃᓯᒪᔾᔪᑎᓄᑦ.

ᐸᓯᔭᒃᓴᐅᔾᔪᑎ ᒪᕐᕈᓕᐊᓄᑦ ᐊᑐᖅᑎᑕᐅᔪᓐᓃᓚᐅᕐᑐᑦ ᐃᖅᑲᖅᑐᐃᔨ ᓴᐃᕋ ᕗᐊᐃᑦᒧᑦ ᐅᖃᓕᒫᖅᑐᖃᓚᐅᖅᖢᓂ ᐊᖏᕈᑎᓂᒃ ᐅᓂᒃᑳᓂ ᖃᓄᐃᓕᐅᕈᑎᕕᓂᕐᓂᒃ ᐃᖅᑲᖅᑐᐃᕕᒃᒥᑦ.

ᑖᒃᑯᐊᒃ ᒪᕐᕈᓕᐊᒃ ᐊᑐᖅᖢᑎᒃ ᓄᓇᕗᑦ ᑐᙵᕕᒃᑯᓐᓄᑦ ᓄᓇᖃᕐᓂᕐᒧᑦ ᓇᓗᓇᐃᒃᑯᑎᖏᓐᓂᒃ ᑮᓇᐅᔭᖅᑖᓚᐅᕐᓯᒪᖕᒪᑕ ᑲᑭᕙᒃᑯᓐᓂᒃ, ᑲᑐᔾᔨᖃᑎᒌᑦ ᐃᓕᓐᓂᐊᕈᑎᒃᓴᓂᒃ ᐊᒻᒪ ᐃᑲᔫᑎᒃᓴᓂ ᑐᓂᓯᕙᒃᑐᓂᒃ ᕿᑭᖅᑖᓗᒃᒥ ᐃᓄᖕᓄᑦ.

ᑐᓂᔭᐅᓯᒪᓕᓚᐅᕐᑐᑦ $158,254.05-ᓂᒃ ᓯᑎᐱᕆ 2020 ᐊᒻᒪ ᒫᔅᓯ 2023 ᐊᑯᓐᓂᖓᓂᒃ, ᐅᖃᖅᓯᒪᓚᐅᕐᑐᖅ ᐊᖏᕈᑎᑎᒍ ᖃᓄᐃᓕᐅᕈᑎᕕᓂᕐᓄᑦ.

ᐃᓚᒃᑲᓐᓂᖓ $64,413 ᓄᖃᖓᑎᑕᐅᓚᐅᕐᑐᖅ ᐊᒥᐅᕋ ᒋᐊᓪᒧᑦ 2023 ᐅᐱᕐᖔᖓᓂᒃ, ᐊᒻᒪᓗ ᑐᓂᔭᐅᙲᓐᓇᖅᖢᓂ. ᕗᐊᐃᑦ ᐅᖃᓚᐅᕐᑐᖅ ᐃᖅᑲᖅᑐᐃᕕᒃᒥ ᒪᕐᕈᓕᐊᒃ “ᖃᐅᔨᒪᓚᐅᙱᒻᒪᑕ (ᓄᓇᑖᕈᑎᓄᑦ) ᓇᓗᓇᐃᒃᑯᑎᖏᑦ ᓱᓕᓚᐅᙱᓐᓂᖏᓐᓂᒃ.”

ᒫᓐᔨ ᐅᖃᓚᐅᕐᑐᖅ ᐊᖏᖃᑎᒌᖕᓂᕐᒧᑦ ᐅᖃᐅᓯᒃᓴᐃᑦ ᓱᓕᓂᕐᒧᑦ ᐱᕋᔭᖕᓂᒃᑯᑦ ᑐᓂᓯᓚᐅᕐᓯᒪᓂᖓᓂᒃ ᕕᕗᐊᕆ 2016-ᒥ ᓄᓇᕗᑦ ᑐᙵᕕᒃᑯᓐᓄᑦ ᐸᓂᖏᑦ ᐃᓄᐃᑦ ᐃᑲᔫᑎᖏᓐᓂᒃ ᐱᔪᓐᓇᓕᖁᓪᓗᓂᒋᑦ.

ᑖᒃᑯᓇᓂ ᐱᓇᓱᒍᑎᓂ ᑎᑎᕋᕐᓯᒪᓚᐅᕐᒪᑦ ᑖᒃᑯᐊᒃ ᒪᕐᕈᓕᐊᒃ ᐃᓅᓂᕋᖅᖢᓂᒋᑦ ᕿᑐᕐᖓᕆᔭᐅᓂᕋᖅᖢᓂᒋᓪᓗ ᑭᑎ ᓄᐊᒧᑦ.

ᒫᓐᔨ ᐃᒻᒥᓂᑦᑕᐅᖅ ᐃᓅᓂᕋᖅᖢᓂ ᐊᑎᓕᐅᓚᐅᕐᓯᒪᔪᖅ 2018-ᒥ ᑭᓯᐊᓂᓕ ᓄᓇᕗᑦ ᑐᙵᕕᒃᑯᑦ ᐱᓇᓱᒍᑎᖓᓂ ᐊᖏᓚᐅᕐᓯᒪᙱᑦᑐᑦ.

ᑖᓐᓇ ᐸᓂᖏᓪᓗ ᐃᖅᑲᖅᑐᐃᔨ ᒥᐊ ᒪᓈᓯᐅ ᓵᑦᑎᐊᖓᓃᓚᐅᕐᑐᑦ ᐊᔾᔨᓕᐅᕈᑎᑎᒍᑦ ᓴᖅᑭᔮᑲᐅᑎᒋᓐᓇᖅᑐᒃᑯᑦ.

ᒪᕐᕈᓕᐊᒃ ᐊᔾᔨᓕᐅᖅᑕᐅᕙᓪᓕᐊᔾᔪᑎᖓ ᖃᒥᑎᑕᐅᓯᒪᓚᐅᕐᑐᖅ ᐃᖅᑲᖅᑐᐃᕕᒃᑰᖅᑎᓪᓗᒋ ᑭᓯᐊᓂᓕ ᒫᓐᔨ ᑮᓇᖓ ᓴᖅᑭᔮᓚᐅᕐᑐᖅ ᐊᒻᒪᓗ ᐅᔾᔨᕈᓱᑦᑎᐊᖅᑰᔨᓪᓗᓂ.

“ᒥᔅ ᒫᓐᔨ ᑕᒪᐃᓐᓄᓕᒫᖅ ᐸᓯᔭᒃᓴᐅᓂᕋᖅᑐᖅ,” ᓯᑳᑦ ᑲᐅᐊᓐ, ᓗᐊᐃᔭᖓ ᐅᖃᓚᐅᕐᑐᖅ ᐃᖅᑲᖅᑐᐃᕕᒃᒥ.

ᒫᔅᓯ 2023-ᒥ, ᒪᕐᕈᓕᐊᒃ ᓈᒻᒪᙱᓕᐅᕈᑎᒋᔭᐅᓕᓚᐅᕐᓯᒪᔫᒃ ᑎᑎᕋᐅᓯᐅᑲᑕᓕᖅᑎᓪᓗᒋᑦ ᑐᓴᒐᒃᓴᓕᐅᕈᑎᑎᒍᑦ ᐃᓅᔭᕆᐊᒃᓴᖏᓐᓂᒃ, ᐊᒻᒪᓗ ᓇᖕᒥᓂᖅ ᐊᐅᓚᑕᖓᑦ ᐱᓕᕆᐊᖓ ᐊᑎᖃᖅᑐᖅ Kanata Trade Co. ᑖᓐᓇᓗ ᑲᒻᐸᓂ – ᓇᓗᓇᐃᖅᑕᐅᓯᒪᓪᓗᓂ ᑲᓇᑕᒥ ᑲᑎᒪᔨᓄᑦ ᓄᓇᖃᖅᑳᖅᑐᑦ ᓇᖕᒥᓂᖏᓐᓄᑦ – ᓂᐅᕐᕈᑎᖃᖅᐸᒃᖢᑎᒃ ᑮᓇᑉᐸᖕᓂᒃ ᐊᒻᒪ ᐊᓯᖏᓐᓂᒃ ᐊᓐᓄᕌᓂᒃ ᓄᓇᖃᖅᑳᖅᑐᑦ ᓴᓇᓯᒪᔭᖏᓐᓂᒃ ᐃᓚᖃᖅᑐᓂᒃ. ᐅᖃᕐᓯᒪᓪᓗᑎᒃ ᑮᓇᐅᔭᓕᐊᕆᔭᐅᔪᑦ ᐅᕗᖓ ᑐᓂᔭᐅᖃᑦᑕᕐᓂᖓᓂᒃ ᐃᓐᓯᐸᐃᔪᒧᑦ (Indspire), ᑲᑐᔾᔨᖃᑎᒌᑦ ᐃᑲᔫᑎᖃᖅᑎᑦᑎᕙᒃᑐᑦ ᓄᓇᖃᖅᑳᖅᑐᓄᑦ ᐃᓕᓐᓂᐊᖅᑐᓄᑦ.

ᓄᓇᕗᑦ ᑐᙵᕕᒃᑯᑦ ᒪᕐᕈᓕᐊᑦ ᐊᑎᖏᑦ ᐲᖅᑕᐅᑎᓕᓚᐅᕐᓯᒪᔭᖓ ᐊᐃᕆᓕ 2023-ᒥ ᑕᒪᓐᓇ ᖃᐅᔨᓴᖅᑕᐅᓚᐅᖅᑎᓪᓗᒍ.

ᐊᕐᕌᓂ ᓄᐊ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᖃᓚᐅᕐᓯᒪᔪᖅ ᐃᓚᖏᑦ ᒫᓐᔨᒥ ᖃᐅᔨᒪᓚᐅᕐᓯᒪᓂᖏᓐᓂᒃ ᕿᓚᒥᕈᓗᒃ ᐃᖃᓗᖕᓂ ᓄᓇᖃᖅᑎᓪᓗᒍ ᐊᒻᒪᓗ ᐊᑖᑕᖓᓂ ᐱᖃᑎᖃᖅᐸᒃᖢᓂ 1990-ᖏᓐᓂᒃ.

ᑭᓯᐊᓂᓕ, ᐅᖃᓚᐅᕐᓯᒪᔪᖅ ᐃᒻᒥᓂᒃ ᐃᓚᖏᓪᓗ ᖃᐅᔨᒪᓚᐅᙱᓐᓂᖏᓐᓂᒃ ᒋᐊᓪ ᒪᕐᕈᓕᐊᖃᕐᓂᖓᓂᒃ ᐊᒻᒪᓗ ᖃᓄᖅ ᓄᓇᕗᑦ ᑐᙵᕕᒃᑯᑦ ᐊᑎᖃᖃᑕᐅᓯᒪᓕᖕᓂᖏᓐᓂᒃ.

ᒫᓐᓇᓕ ᐅᖃᕐᑐᖅ ᖁᕕᐊᓱᑐᐃᓐᓇᕐᓂᖓᓂ ᑖᓐᓇ ᐊᕐᓇᖅ ᐸᓯᔭᒃᓴᐅᓂᕋᕐᒪᑦ.

“ᐅᓇ ᑕᐃᒪᐃᓚᐅᕐᑐᖅ ᕿᓚᒥᕈᓗᒃ ᐃᓱᒪᒋᓪᓗᒍ ᖃᓄᑎᒋ ᓱᒃᑲᐃᑎᒋᓂᐊᕐᒪᖔ ᒪᓕᒐᓕᕆᓂᒃᑯᑦ, ᑕᐃᒪᓕ ᖃᓄᐃᓕᔭᐅᔾᔪᑎᖓ ᖁᕕᐊᒋᑐᐃᓐᓇᖅᑕᕋ ᐊᒻᒪᓗ ᐊᕐᕌᒍᒐᓴᖕᓂ ᐱᓕᕆᐊᖑᙱᖢᓂ,” ᓄᐊ ᓄᐊ ᐅᖃᕐᑐᖅ.

“ᒫᓐᔨ ᐊᓈᓇᐅᓪᓗᓂ ᐊᒃᓱᒃ ᓈᒻᒪᒃᑐᒥ ᐊᑐᕐᒪ, ᐄᖃᐃ.”

ᑲᑭᕙᒃᑯᑦ ᐅᖃᓪᓚᒃᑎᖓ ᒥᐅᕆᐋᓇ ᐹᓂ ᑕᒪᑐᒧᖓ ᓂᓪᓕᕈᒪᓚᐅᙱᑦᑐᖅ.

ᑭᖑᓂᐊᒍᓪᓕ ᐅᖃᓪᓚᒃᑎᓪᓗᒋᑦ ᓄᓇᕗᑦ ᑐᙵᕕᒃᑯᑦ ᒫᓐᔨᐅᑉ ᐸᓯᔭᒃᓴᐅᓂᕋᕐᓂᖓ ᑐᙵᓱᒃᑎᑕᐅᑐᐃᓐᓇᓚᐅᕐᑐᖅ.

ᑭᓯᐊᓂᓕ, ᐊᖓᔪᖅᑳᖅ ᐊᓗᑭ ᑰᑦᑎᖅ ᑕᒪᓐᓇ “ᓈᒻᒪᙱᑦᑐᖅ” ᐸᓯᔭᒃᓴᐅᔾᔪᑎᒃ ᒋᐊᓪ ᒪᕐᕈᓕᐊᖏᓐᓄᑦ ᐃᓚᐅᔪᓐᓃᖅᑎᑕᐅᓯᒪᓂᖏᓐᓂᒃ, ᐅᖃᖅᖢᓂ ᑮᓇᐅᔭᖅᑖᖅᑎᑕᐅᓯᒪᓂᖏᓐᓂᒃ ᐃᓕᓐᓂᐊᕈᑎᖏᓐᓂᒃ ᐅᒃᐱᕆᔭᐅᓂᕐᒧᑦ ᐃᓅᓂᖏᓐᓂᒃ.

“ᓄᓇᖃᓕᕐᓂᖅ ᐊᑐᖅᑕᐅᓗᐊᓚᐅᕐᑐᖅ ᓄᓇᕗᑦ ᑎᒡᓕᒃᑕᐅᑎᓪᓗᒋᑦ ᐊᒻᒪᓗ ᑮᓇᐅᔭᓕᐅᕈᑎᐅᔪᓐᓇᖅᑐᑦ, ᐊᒻᒪᓗ ᑕᐃᒪᓐᓇ ᑮᓇᐅᓂᕐᒧᑦ ᑎᒍᓯᑐᐃᓐᓇᕋᓱᖕᓂᖅ ᓴᖅᑭᑎᑦᑎᓯᒪᕗᖅ ᑕᐃᔅᓱᒪᓂ ᓄᓇᑖᕋᓱᖕᓂᕐᒧᑦ ᐊᑐᖅᑕᐅᕙᓚᐅᖅᑐᓂᒃ,” ᑰᑦᑎᖅ ᐅᖃᕐᑐᖅ.

ᐅᓇ ᒫᓐᔨᐅᑉ ᓯᕗᓪᓕᖅᐹᕆᙱᑕᖓ ᓱᓕᙱᑦᑐᒧᑦ ᐸᓯᔭᒃᓴᐅᓂᖓ.

2017-ᐅᑎᓪᓗᒍ ᐃᖅᑲᖅᑐᐃᕕᒃᑯᑦ ᐱᓕᕆᐊᖑᓪᓗᓂ ᐊᕐᕌᒎᖕᓂ ᒪᕐᕉᖕᓂ ᑎᒍᔭᐅᓯᒪᓪᓗᓂ ᐊᒻᒪ ᐊᕐᕌᒍᒥ ᐱᕋᔭᒃᑕᐃᓕᔭᕆᐊᖃᖅᖢᓂ ᐊᓯᐊᓄᑦ ᖃᓄᐃᓕᐅᕈᑎᖓᓄᑦ, ᐅᖃᕐᓯᒪᓚᐅᕐᑐᖅ ᐊᖏᖃᑎᒌᒍᑎᐅᔪᖅ ᖃᓄᐃᓕᐅᕈᑎᓄᑦ.

ᒫᓐᔨ ᔫᓂ 24-ᒥ ᐃᖅᑲᖅᑐᐃᕕᒃᑯᑦ ᐱᓕᕆᐊᖑᓛᖅᑐᖅ ᖃᓄᐃᑕᐅᓂᐊᕐᓂᕐᒥᓄᑦ.