ᒫᓐᓇ ᐊᑕᓂᐊᓘᑉ ᑭᒃᒐᑐᕐᑎᒋᓕᕐᑕᖓ ᑲᓇᑕᒥ, ᓭᒪᓐ ᐊᑯᓂᒻᒪᕆᒃ ᑭᓇᒃᑯᓕᒫᓂᒃ ᐱᒍᑦᔨᓂᕐᒥᒃ ᐱᓇᓱᐊᕐᓯᒪᔪᖅ

ᑲᓇᑕᐅᑉ ᓯᕗᓪᓕᐸᐅᑦᓱᓂ ᓄᓇᖃᕐᖄᓯᒪᔫᑦᓱᓂ ᐊᑕᓂᐊᓗᒻᒥᒃ ᑭᒃᒐᑐᕐᑎᖓ, ᓲᓱᒋᓇᕐᑐᖅ ᒥᐊᔨ ᓭᒪᓐ, ᐃᓅᓕᕐᑐᕕᓂᖅ ᑲᖏᕐᓱᐊᓗᑦᔪᐊᒥ 1947-ᒥ. ᐱᓂᐊᕐᓂᓕᕆᔨᐅᓂᖓ ᓴᐳᒻᒥᔨᐅᑦᓱᓂ ᓄᓇᕕᒻᒥᒃ, ᐃᓄᑐᐃᓐᓇᓂᒃ, ᐊᒻᒪᓗ ᐅᑭᐅᕐᑕᑐᒥᒃ ᑎᑭᑦᑐᖅ 50 ᐅᖓᑖᓄᑦ ᐅᑭᐅᓄᑦ.

ᒥᐊᔨ ᓭᒪᓐ ᐱᓇᓱᑦᑎᐅᓂᖓ ᐱᒋᐊᕐᓯᒪᔪᖅ ᐅᑭᐅᖃᕐᑎᓗᒍ 22-ᓂᒃ ᖃᓂᖕᖒᑎᐅᑉ ᓯᕗᕌᓂ ᓰᐲᓰᒃᑯᓂ ᓈᓚᐅᑎᓕᕆᔨᐅᑦᓱᓂ ᐅᑭᐅᕐᑕᑐᒥ ᐱᒍᑦᔨᓂᖓᓄᑦ, ᐃᓚᖃᓚᐅᕐᓯᒪᔪᒥᒃ ᐃᓄᑦᑎᑐᑦ ᓈᓚᐅᑎᒃᑰᓂᕐᒥᒃ ᑕᓚᕖᓴᒃᑯᓗ.

ᓭᒪᓐ ᐱᒻᒪᕆᓐᓂᒃ ᐃᓂᖃᖃᑦᑕᓯᒪᔪᖅ ᑯᐯᒃ ᑕᕐᕋᖓᓂ ᐃᓄᐃᑦ ᑲᑐᑦᔨᖃᑎᒌᓐᓂᖓᓂ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ, ᐱᓇᓱᐊᕐᓱᓂ ᐊᖏᖃᑎᒌᒐᓱᐊᕈᑎᖃᕐᓂᒥᒃ ᓯᕗᓪᓕᐹᒥᒃ ᓄᓇᑖᕐᓂᒧᑦ ᐊᖏᖃᑎᒌᒍᑎᒥᒃ ᑲᓇᑕᒥ, ᐊᒻᒪᓗ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓᓂᒃ. ᐊᖓᔪᕐᖄᕆᔭᐅᑦᓱᓂ ᒪᑭᕝᕕᒧᑦ, ᐃᓚᐅᓯᒪᔪᖅ ᐊᑐᓕᕐᑎᓯᓂᕐᒥᒃ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓᓂᒃ, ᐊᒻᒪᓗᑦᑕᐅᖅ ᓴᐳᒻᒥᔭᐅᓂᖏᓐᓂᒃ ᐊᒻᒪᓗ ᑫᓪᓗᑐᕐᑕᐅᓂᖏᓐᓂᒃ ᐃᓄᑐᐃᓐᓀᑦ ᐱᔪᓐᓇᐅᑎᖏᑦᑕ.

ᐅᖃᐅᓯᕆᓯᒪᔭᖏᑦ ᓄᐃᑕᔪᑦ ᑕᕐᕋᓕᐅᑉ ᕿᒥᕐᕈᐊᒐᖏᓐᓂ 1976-ᓂᑕᕐᓂ, ᐊᖏᖃᑎᒌᒐᓱᐊᕐᓃᑦ ᖃᓄᐃᓕᖓᓕᕐᒪᖔᑕ ᑐᓴᕐᑎᓯᑦᓱᓂ ᓯᕗᕕᐊᓪᒥ ᐊᑯᓐᓂᖓᓂ ᓇᔅᑳᐲᑦ, ᐃᓄᑐᐃᓐᓀᑦ, ᐊᒻᒪᓗ ᐊᓪᓓᑦ ᓄᓇᑖᕋᓱᐊᕐᓂᖅ ᐱᑦᔪᑎᒋᑦᓱᒍ. ᐃᑲᔪᕐᓂᒥᔪᖅ ᓇᔅᑳᐱᒃᑯᑦ ᐊᖏᖃᑎᒌᒐᓱᐊᕈᑎᖃᕐᑎᓗᒋᑦ ᐊᖏᖃᑎᒌᖃᑎᖃᕈᑎᒥᓂᒃ ᑲᕙᒪᒃᑯᓂᒃ, ᓄᐃᑦᓯᓚᕿᒍᑎᐅᓯᒪᔪᒥᒃ ᑯᐯᒃ ᑕᕐᕋᖓᑕ ᑲᓇᓐᓇᖓᓂ ᐊᖏᖃᑎᒌᓐᓂᒥᒃ 1978-ᒥ.

ᑭᖑᓂᐊᐱᖓᒍᑦ ᐊᖏᖃᑎᒌᓐᓂᐅᑉ ᐊᑎᓕᐅᕐᑕᐅᓂᖓᑕ, ᐃᓚᒋᔭᐅᓯᓚᐅᕐᓯᒪᔪᖅ ᓯᕗᓪᓕᐹᓄᑦ ᓄᓇᕕᒻᒥᐅᓄᑦ ᓯᕗᓕᕐᑎᐅᔪᓄᑦ ᒪᑭᕝᕕᒥ, ᐱᒋᐊᕈᑎᖃᕐᓱᓂ ᐊᓪᓚᑎᒻᒪᕆᒃ-ᑮᓇᐅᔭᓕᕆᔨᐅᓂᕐᒥᒃ 1975-ᒥ ᐊᒻᒪᓗ ᐊᖓᔪᕐᖄᒧᑦ ᑐᖓᓕᓕᕐᕿᕆᔭᐅᓂᕐᒥᒃ 1978-ᒥ. ᐊᓱᐃᓛ ᐱᓇᓱᒐᕐᑖᓕᓚᐅᕐᓯᒪᒻᒥᔪᖅ ᐸᐸᑦᓯᔨᐅᓂᕐᒥᒃ ᑲᑎᕕᒃ ᐃᓕᓴᕐᓂᓕᕆᓂᕐᒥ, ᐊᒻᒪᓗ 1982-ᒥ, ᓯᕗᓪᓕᐸᐅᑦᓱᓂ ᐊᒻᒪᓗ ᑌᒣᓯᒪᔪᑑᑦᓱᓂ ᐅᓪᓗᒥᒧᑦ ᐊᕐᓇᐅᓱᓂ ᐊᖓᔪᕐᖄᕈᕐᓱᓂ ᒪᑭᕝᕕᒥ.

ᑌᑦᓱᒪᓂ, ᓂᕈᐊᕐᑕᐅᑎᒐᓱᐊᓚᐅᕐᓯᒪᔪᖅ ᑐᖕᖓᕕᖃᕐᓱᓂ ᐊᓯᑦᔨᓂᕐᒥᒃ. ᐅᖃᓚᐅᕐᓯᒪᔪᖅ ᓂᕈᐊᕐᑕᐅᑎᒐᓱᓐᓂᒥᓄᑦ ᐅᖄᑦᓱᓂ ᒪᑭᕝᕕᒃ ᑮᓇᐅᔦᕐᓯᓯᒪᒋᐊᖓ $10.4 ᒥᓕᐊᓐ ᑖᓚᓂᒃ ᐊᕐᕌᒍᓂ ᓯᑕᒪᓂ. ᐅᖃᓚᐅᕐᓯᒪᒻᒥᔪᖅ ᐊᖏᓕᒋᐊᕆᒍᒪᓂᕐᒥᓂᒃ ᐱᑐᑦᓯᒪᐅᑎᓂᖏᓐᓂᒃ ᐊᒻᒪᓗ ᐃᓚᐅᓂᖏᓐᓂᒃ ᓄᓇᕕᒻᒥ ᓄᓇᓖᑦ ᒪᑭᕝᕕᒥ.

1984-ᒥ, ᓵᖕᖓᓯᓚᐅᕐᓯᒪᔪᖅ ᑲᓇᑕᐅᑉ ᐊᖓᔪᕐᖄᕆᓯᒪᔭᖓᓂᒃ ᐱᐊᕐ ᐃᓕᐊᑦ ᑐᕈᑑᒥᒃ ᑕᑯᓐᓇᑕᐅᔪᒻᒪᕆᒻᒥ ᐊᑑᑎᔪᒥ ᓴᐳᒻᒥᓱᓂ ᓄᓇᖃᕐᖄᓯᒪᔪᑦ ᐱᔪᓐᓇᐅᑎᖏᑦᑕ ᐃᓚᐅᔪᑦᓴᐅᓂᖏᓐᓂᒃ ᐅᑎᕐᑎᑕᐅᓂᖓᓂ ᑲᓇᑕᐅᑉ ᐱᖁᔭᕐᔪᐊᖓᑕ, ᓯᕗᓪᓕᒥ ᐊᓪᓚᑕᐅᓯᒪᓚᐅᕐᓯᒪᔪᒥ ᐱᔭᕆᐊᑐᔪᒻᒪᕆᒻᒥ ᐊᓯᑦᔨᑐᕆᐊᖓ ᐱᔪᓐᓇᐅᑎᖏᓐᓄᑦ ᓄᓇᖃᕐᖄᓯᒪᔪᑦ.

“ᐅᓂᒃᑲᐅᑎᒍᓐᓇᖃᒋᑦ ᑭᑦᓴᓇᕐᑐᒪᕆᒻᒥᒃ ᐊᓈᓇᒻᒪ ᒥᑦᓵᓄᑦ, ᓱᕐᕋᑕᐅᓯᒪᓚᐅᕐᓯᒪᔫᑉ ᐊᓪᓚᓄᐊᖓᔪᓄᑦ ᐱᖁᔭᕐᓄᑦ, ᐊᑦᔨᒌᖕᖏᑎᑕᐅᓚᐅᕐᓯᒪᔫᑉ,” ᓭᒪᓐ ᐅᖃᓚᐅᕐᓯᒪᔪᖅ, ᑕᑯᓐᓇᓱᓂ ᑐᕃᓐᓇᑐᒥᒃ ᑐᕈᑑᒥᒃ ᓂᐱᓕᐅᕐᓯᒪᔪᒥ ᑲᑎᖕᖓᓂᕕᓂᖏᓐᓂ ᑌᑦᓱᒪᓂᑕᖁᑎᖏᓐᓄᑦ ᓰᐲᓰᒃᑯᑦ ᐃᓚᒋᔭᐅᔪᒥ. “ᐊᒻᒪᓗ ᓇᑯᕐᒪᑦ, ᐱᑦᔪᑎᒋᑦᓱᒍ [ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓ], ᐃᓄᑐᐃᓐᓇᐅᓂᕋᓂᒃ ᐅᑎᕐᑎᓯᓯᒪᕗᖓ.”

ᒥᐊᔨ ᓭᒪᓐ ᑌᒪᖕᖓᓕᒫᖅ ᐃᓚᒋᔭᐅᓪᓚᕆᖃᑦᑕᓯᒪᔪᖅ ᐅᑭᐅᕐᑕᑐᒥ ᐱᓂᐊᕐᓂᓕᕆᓂᕐᓄᑦ, ᐃᓄᐃᑦ ᐅᑭᐅᕐᑕᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᑲᓇᑕᒥ ᐊᖓᔪᕐᖃᕆᔭᐅᑦᓱᓂ 1986-ᒥ, ᒪᓕᒐᕐᓂᒃ ᑐᑭᒧᐊᑦᑎᓯᔨᐅᖃᑕᐅᑦᓱᓂ ᑲᓇᑕᐅᑉ ᐃᓱᒫᓘᑎᐅᔪᓅᓕᖓᔪᓄᑦ ᑲᑎᖕᖓᔨᖏᓐᓄᑦ ᓄᓇᖃᕐᖄᓯᒪᔪᑦ ᐱᑦᔪᑎᒋᓗᒋᑦ 1993-ᒥ, ᐅᑭᐅᕐᑕᑐᓕᒫᒥᒃ ᓄᓇᕐᔪᐊᒥ ᑭᒃᒐᑐᕐᑎᐅᓱᓂ ᑲᓇᑕᒧᑦ 1995-ᒥ, ᑲᓇᑕᒧᑦ ᑭᒃᒐᑐᕐᑎᒋᔭᐅᑦᓱᓂ ᑎᐊᓐᒫᒃᒧᑦ 1999-ᒥ, ᓂᕈᐊᕐᑕᐅᓂᕐᒧᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᕐᖄᖓᓄᑦ 2006-ᒥ.

ᒫᓐᓇ, ᓯᑕᒪᒋᓕᕐᑕᖓ ᐊᕐᕌᒍᐃᑦ ᑲᓇᑕᒧᑦ 30-ᐅᒍᑎᐅᑦᓱᓂ ᑭᒃᒐᑐᕐᑎᒋᔭᐅᑦᓱᓂ ᐊᑕᓂᐊᓗᒻᒧᑦ, ᑲᔪᓯᑦᓱᓂ ᑫᓪᓗᑐᐃᓂᕐᒥᒃ ᐃᓄᑐᐃᓐᓀᑦ ᐱᔪᓐᓇᐅᑎᖏᓐᓂᒃ ᐅᑉᐱᕆᔭᖏᓐᓂᓗ.

This project has been made possible in part by the Government of Canada.