ᒐᕙᒪᑐᖃᒃᑯᑦ ᐊᒻᒪ ᐃᓄᐃᑦ ᓯᕗᓕᐅᖅᑎᖏᑦ ᐅᖃᐅᓯᖃᖅᐳᑦ ᐃᒡᓗᓕᕆᓂᕐᒥᒃ, ᐃᓕᓐᓂᐊᖅᑐᓕᕆᓂᕐᒥᒃ

For English version, see Federal and Inuit leaders meet to discuss housing, education

ᐃᒡᓗᓕᕆᓂᖅ, ᐋᓐᓂᐊᖃᖅᑕᐃᓕᓂᖅ ᐊᒻᒪ ᐅᖃᐅᓯᓕᕆᓂᕐᒥᒃ ᐊᑐᓕᖅᑎᑦᑎᒃᑲᓐᓂᕋᓱᖕᓂ ᑲᑎᒪᔾᔪᑎᒃᓴᓂ ᐃᓚᒋᔭᐅᓚᐅᕐᑐᑦ ᐅᑯᐊ ᒐᕙᒪᑐᖃᒃᑯᑦ ᐊᒻᒪ ᐃᓄᐃᑦ ᓯᕗᓕᐅᖅᑎᖏᑦ ᑭᖑᓪᓕᖅᐹᒥ ᑲᑎᒪᓕᖅᑎᓪᓗᒋ ᐅᑯᐊ ᐃᓄᐃᑦ-ᒐᕙᒪᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᕋᓛᑦ ᒪᐃ 9-ᖑᑎᓪᓗᒍ.

ᑲᓇᑕᒥ ᐊᖓᔪᖅᑳᖅ ᔭᔅᑎᓐ ᑐᕉᑑ ᐊᒻᒪ ᓇᐃᑕᓐ ᐅᐱᐊᑦ, ᐊᖓᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ, ᐱᒋᐊᖅᑎᑦᑎᓚᐅᖅᐴᒃ ᑲᑎᒪᓂᕐᒥᒃ ᐋᑐᕚᒥ ᐅᖃᐅᓯᖃᕈᓘᔭᖅᖢᑎᒃ ᖃᓄᖅ ᒪᕐᕉᒃ ᑲᑎᓚᐅᕐᓯᒪᓂᖏᓐᓂᒃ ᐊᑕᐅᓯᕐᓂ ᐃᓱᒪᒋᔭᖃᖅᖢᑎᒃ.

“ᐱᓕᕆᐊᖃᕋᓗᐊᕈᑦᑕ ᐅᑭᐅᕐᑕᖅᑐᕐᒥ ᓴᐳᓐᓂᐊᖅᓯᒪᓂᕐᒥᒃ ᐅᕝᕙᓘᓐᓃᑦ ᐱᓕᕆᐊᖃᖅᖢᑕ ᓄᓇᖃᖅᑎᐅᓂᕐᒥᒃ ᐅᕝᕙᓘᓐᓃᑦ ᓴᐳᓐᓂᐊᖅᑐᓕᕆᓂᕐᒥᒃ, ᐅᑯᐊ ᐱᐅᔪᐃᓐᓇᐃᑦ ᐃᓄᐃᑦ ᖁᕝᕙᖅᐹᓪᓕᕈᑎᒋᔪᓐᓇᖅᑕᖏᑦ ᐊᒻᒪ ᐊᑐᓕᖅᑎᑦᑎᓗᑎᒃ ᐱᔪᓐᓇᐅᑎᒋᔭᖏᓐᓂᒃ ᐊᒻᒪᓗ ᑕᐃᒪᓐᓇ ᑲᓇᑕᒥ ᓴᙱᒃᑎᑉᐹᓪᓕᖅᑎᑦᑎᓇᔭᖅᖢᑎᒃ,” ᐅᖃᕐᑐᖅ ᐅᐱᐊᑦ, ᐊᖓᔪᖅᑳᕆᔭᐅᔪᖅ ᑲᓇᑕᒥ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.

ᑲᑎᒪᔩᑦ ᐋᖅᑭᒃᓯᓚᐅᕐᒥᔪᑦ ᐅᖃᐅᓯᖃᕈᒪᓪᓗᑎᒃ ᐃᓕᓐᓂᐊᖅᑐᓕᕆᓂᕐᒧᑦ ᖃᓄᐃᓕᐅᕈᑎᐅᔪᓐᓇᖅᑐᓂᒃ, ᓲᕐᓗ ᑐᒃᓯᕋᐅᑎᐅᓯᒪᔪᑐᖃᖅ ᐃᓄᐃᑦ ᓄᓇᖓᓂ ᓯᓚᑦᑐᖅᓴᕐᕕᐊᓗᒃᓴᒥᑦ. ᐊᕐᕌᒎᓕᕐᑐᑦ 6 ᐊᓂᒍᖅᑐᓂᒃ 2016-ᒥ, ᐃᓄᐃᑦ ᑕᐱᕇᑦ ᑲᓇᑕᒥ ᑐᓴᖅᑎᑦᑎᓚᐅᕐᓯᒪᖕᒪᑕ ᐱᓕᕆᔨᐅᓂᐊᖅᑐᓂᒃ ᐊᕐᕌᒍᓂ ᑕᓪᓕᒪᓂ ᓯᓚᑦᑐᖅᓴᕐᕕᐊᓗᖕᒥ ᓴᓇᔪᒪᔪᓂᒃ ᑲᓇᑕᒥ ᐃᓄᐃᑦ ᓄᓇᖓᓂ.

ᑕᒪᓐᓇ ᖃᓄᐃᓕᕆᐊᒃᓴᖓ ᓱᖅᑯᐃᓇᓗᐊᙱᖢᓂ, ᑐᕉᑑ ᐅᖃᓚᐅᕐᑐᖅ ᐱᒋᐊᕈᑎᖏᓐᓂᒃ ᐅᖃᐅᓯᕐᓂ, ᐅᖃᖅᖢᓂ ᑐᙵᕕᖃᕋᔭᕐᓂᖓᓂᒃ ᐅᖃᐅᓯᕐᓄᑦ ᐊᒻᒪ ᐃᓕᖅᑯᓯᕐᓄᑦ.

ᑲᑎᒪᔨᕋᓛᑦ ᐃᓱᒪᓚᐅᕐᑐᑦ ᐅᖃᐅᓯᖃᕈᒪᓪᓗᑎᒃ ᐊᖏᖃᑎᒌᒍᑎᓂ ᐊᑐᓕᖅᑎᑦᑎᓂᐊᕐᓂᕐᒥ, ᐊᒻᒪᓗ ᖃᓄᖅ ᑖᓐᓇ ᑐᑭᖃᕐᒪᖔᑦ ᐃᓄᖕᓄᑦ.

ᒐᕙᒪᑐᖃᒃᑯᑦ ᖃᖓᑦᑎᐊᓵᖅ ᑐᓴᖅᑎᑦᑎᓚᐅᕐᓯᒪᖕᒪᑕ ᓄᑖᒥ ᒐᕙᒪᑐᖃᒃᑯᑦ ᑲᒥᓯᓇᒋᓕᖅᑕᖓᓂ ᑖᒃᑯᐊ ᒐᕙᒪᑐᖃᒃᑯᑦ ᓄᓇᖃᖅᑳᖅᑐᑦ ᓄᓇᖏᓐᓄᑦ ᐊᖏᕈᑎᓂ ᐱᓕᕆᐊᖃᖅᑎᑦᑎᕙᒡᓗᓂ.

“ᐱᓕᕆᓂᖅ ᐅᑭᐅᕐᑕᖅᑐᕐᒥ ᐊᒃᓱᕈᕐᓇᖅᑐᑦ ᐱᓂᕐᓴᐅᖕᒪᑕ ᐊᓯᐊᓃᑦᑐᓂᒃ ᓄᓇᕐᔪᐊᕐᒥᑦ,” ᑐᕉᑑ ᐅᖃᕐᑐᖅ.

“ᓯᓚᐅᑉ ᒥᒃᓵᓅᕋᓗᐊᖅᐸᑦ, ᒐᕙᒪᓕᕆᓂᖅ ᐊᓯᙳᓕᕋᓗᐊᖅᐸᑦ … ᐃᓄᐃᑦ ᕿᑎᐊᓃᑦᑕᕆᐊᓖᑦ ᑲᓇᑕᒥ ᐱᓕᕆᐊᖃᖅᑎᓪᓗᒋᑦ ᐅᑭᐅᕐᑕᖅᑑᑉ ᒥᒃᓵᓂ.”

ᒐᕙᒪᑐᖃᒃᑯᑦ ᐃᓄᐃᑦ ᓄᓇᖓᓂ ᐃᓕᓴᖅᓯᓯᒪᖕᒪᑕ ᐊᔾᔨᐅᙱᓐᓂᖓᒍᑦ 2022-ᖑᑎᓪᓗᒍ. ᐅᓇ ᐃᓄᐃᑦ-ᒐᕙᒪᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᕋᓛᑦ ᐱᒋᐊᖅᑕᐅᓚᐅᕐᓯᒪᔪᖅ 2017-ᒥ.

ᑲᑎᒪᔨᕋᓛᓄᑦ ᐊᖓᔪᖅᑳᕆᔭᐅᔪᑦ ᑲᑎᒪᖃᑦᑕᖅᑐᑦ ᐊᕐᕌᒍ ᐱᖓᓱᐃᖅᖢᒍ.