ᒐᕙᒪᑐᖃᒃᑯᑦ ᑐᓴᖅᑎᑦᑎᔪᑦ $40 ᒥᓕᐊᓐᑖᓚᓂᒃ ᐃᑲᔫᑎᑕᖃᕐᓂᕐᒥᒃ ᐃᑎᔪᒥ

$2 ᒥᓕᐊᓐ ᑖᓚᑲᓐᓂᕐᓂᒃ ᐋᖅᑭᒃᓯᓯᒪᔪᑦ ᖁᕕᖅᑕᖅᕕᓕᕆᓂᕐᒧᑦ ᐊᐅᓚᑦᑎᔾᔪᑎᓄᑦ, ᐅᖃᖅᑐᖅ ᒐᕙᒪᑐᖃᒃᑯᑦ ᒥᓂᔅᑕᖓ ᑲᑕᕆ ᒪᒃᑭᓇ

ᐱᖁᑎᒃᓴᓄᑦ ᐊᒻᒪ ᓄᓇᓕᖕᓄᑦ ᒥᓂᔅᑕ ᑲᑕᕆ ᒪᒃᑭᓇ ᑐᓴᖅᑎᑦᑎᓚᐅᕐᑐᖅ ᐋᒐᓯ 4-ᒥ ᐅᑯᐊ ᒐᕙᒪᑐᖃᒃᑯᑦ ᐃᑲᔪᕐᓂᐊᕐᓂᕋᖅᖢᑎᒃ $40 ᒥᓕᐊᓐ ᑖᓚᓂ ᒪᑯᓄᖓ ᐃᑎᔪᒥᒃ ᐃᒃᓴᖅᕕᒃᓴᐅᓂᐊᖅᑐᓄᑦ ᕿᑭᖅᑕᕐᔪᐊᑉ ᖃᓂᒋᔭᖓᓂᒃ. (ᐊᔾᔨᓕᐅᕆᔨ ᑕᐃᕕᑦ ᕕᐊᓐ)

By ᑕᐃᕕᑦ ᕕᐊᓐ ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

ᒐᕙᒪᑐᖃᒃᑯᑦ ᑐᓂᓯᓂᐊᕐᓂᕋᖅᓯᓚᔪᑦ $42 ᒥᓕᐊᓐ ᑖᓚᐃᑦ ᐅᖓᑖᓂᒃ ᐃᒪᓕᕆᓂᕐᒧᑦ ᐊᒻᒪ ᐃᖃᓗᓕᕆᓂᕐᒧᑦ ᓄᓇᕗᒥᑦ, ᑕᒪᓐᓇᓗ ᒪᓕᒐᓕᐅᕐᑎᒋᔭᐅᔪᓄᑦ ᓄᓇᕗᒥᑦ ᐊᐅᓚᑎᑦᑎᔪᓐᓇᕐᓂᖅᓴᐅᓂᐊᖅᖢᑎᒃ ᐃᖃᓗᓕᕆᓂᕐᒥᓐ.

ᒐᕙᒪᑐᖃᒃᑯᓐᓄ ᐱᖁᑎᒃᓴᓄᑦ ᐊᒻᒪ ᓄᓇᓕᖕᓄᑦ ᒥᓂᔅᑕ ᑲᑕᕆ ᒪᒃᑭᓇ ᑐᓴᖅᑎᑦᑎᓚᐅᕐᑐᖅ ᓄᓇᕗᑦ ᓯᓚᑦᑐᖅᓴᕐᕕᒃᒥᓐ ᐋᒐᓯ 4-ᖑᑎᓪᓗᒍ.

ᐃᑲᔫᑎᒃᓴᓂᒃ ᐅᓄᕐᓂᕐᓴᖅ — $40 ᒥᓕᐊᓐ ᑖᓚᐃᑦ — ᐋᖅᑭᒃᑕᐅᓯᒪᔪᖅ ᐃᑎᔪᒥᓐ ᐃᒃᓴᕐᕕᒃᓴᒧᑦ ᕿᑭᖅᑕᖅᔪᐊᖅᒥᓐ, ᑖᓐᓇᓗ ᐊᑯᓂᐊᓗᒃ ᐅᑕᖅᑭᔭᐅᓯᒪᓪᓗᓂ.

“ᕿᑭᖅᑕᖅᔪᐊᖅᒥ ᐃᒃᓴᕐᕕᒃᓴᖅ ᑐᒃᓯᕋᐅᑎᒋᓯᒪᒐᑦᑎᒍᑦ ᐊᒻᒪ ᐱᓇᓱᖃᑦᑕᐃᓐᓇᖅᖢᑎᒍᑦ,” ᐅᖃᖅᑐᖅ ᓄᓇᕗᑦ ᓯᕗᓕᐅᖅᑎᖓᑕ ᑐᒡᓕᖓ ᑕᐃᕕᑦ ᐊᕿᐊᕈᒃ. “ᐊᓱᐃᓛᒃ ᖃᐅᒪᔪᒥ ᐃᓱᐊᓂ ᑕᐅᑐᒍᓐᓇᖅᓯᑕᐃᓐᓇᖅᐳᒍᑦ ᐃᖃᓗᓕᕆᓂᒃᑯᑦ ᓄᓇᕗᒥᑦ.”

ᐃᑲᔪᕈᑎᒃᓴᖃᕐᒥᔪᖅ ᒪᐅᓇ ᐃᖃᓗᒐᓱᒃᑎᐅᔪᑦ ᐅᓯᖐᖅᓯᔭᖅᑐᕈᓐᓇᕋᔭᕐᑐᑦ ᒪᑯᓂᖓ ᑭᖑᒃᐸᖕᓂᒃ ᐊᒻᒪᓗ ᐃᖃᓗᒃᑕᐅᕙᒃᑐᓂᒃ ᓄᓇᓕᖕᓂ, ᐅᑯᓄᙵᐅᙱᖔᕐᓗᑎᒃ ᓂᐅᕙᐅᓐᓛᓐ ᐊᒻᒪ ᓛᐸᑐᐊᒧᑦ; ᐃᑲᔪᕈᑎᐅᓗᓂ ᐱᖏᖕᓇᖅᑐᓕᕆᔨᒃᑯᓐᓂᒃ ᐊᒻᒪᓗ ᐃᖃᓗᓕᕆᓂᒃᑯᑦ ᐱᓕᕆᕝᕕᒃᓴᖃᓕᕐᓗᑎᒃ ᐊᒻᒪ ᐃᖅᑲᓇᐃᔮᒃᓴᖅᑕᖃᐅᓕᕐᓗᓂ, ᐅᖃᓚᐅᕐᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓ ᐸᐅᓗᓯ ᐊᕿᐊᕈᒃ.

“ᖃᒡᓕᕚᓕᒻᒪᕆᒃᐳᒍ ᓄᓇᕗᒥᑦ ᑕᐅᑐᙳᐊᖅᑕᐅᓯᒪᔪᒥᒃ ᐊᑐᒃᑲᓐᓂᕈᓐᓇᖅᑐᓕᕆᓂᒃᑯᑦ, ᑐᖑᔪᖅᑐᒥ ᑮᓇᐅᔭᓕᐅᕈᑎᒥᓐ,” ᐅᖃᖅᑐᖅ.

ᑖᓐᓇ ᐃᒃᓴᕐᕕᒃᓴᖅ ᐅᑕᖅᑭᔭᐅᓂᐊᖅᑐᒃᓴᐅᔪᖅ ᐊᕐᕌᒍᓂᒃ 6-ᓂᒃ ᓴᓇᔭᐅᓚᐅᙱᓐᓂᖓᓂᒃ ᐅᖃᖅᑐᖅ ᑕᐃᕕᑦ ᐊᕿᐊᕈᒃ, ᓲᖃᐃᒻᒪ ᐊᕐᕌᒎᓕᖅᐸᑦ ᑭᓯᐊᓂ ᑮᓇᐅᔭᐃᑦ ᓄᓇᕗᑦ ᑮᓇᐅᔭᒃᑯᕕᖓᓄᐊᕐᑕᐅᑕᐃᓐᓇᕐᓂᐊᕐᒪᓐ ᐊᒻᒪᓗ ᐊᕐᕌᒍᓂᒃ ᑕᓪᓕᒪᑦ ᐃᓗᐊᓂ ᑖᓐᓇ ᓴᓇᔭᐅᓇᔭᖅᖢᓂ.

ᒪᒃᑭᓇ ᐅᖃᓚᐅᕐᒥᔪᖅ ᒐᕙᒪᑐᖃᒃᑯ ᐊᑐᕐᓂᐊᕐᓂᖏᓐᓂᒃ $1.8 ᒥᓕᐊᓐ ᑖᓚᓂᒃ ᐃᒥᖅᑕᖅᕕᓕᕆᕐᒧᑦ ᐃᒃᐱᐊᕐᔪᒃᒥᓐ, ᐊᐅᓱᐃᑦᑐᕐᒥ, ᒥᑦᑎᒪᑕᓕᒃᒥ ᐊᒻᒪ ᓴᓂᑭᓗᐊᕐᒥ ᐊᒻᒪᓗ $225,000 ᓄᑖᙳᕆᐊᖅᑎᑦᑎᓂᕐᒧᑦ ᑲᖏᖅᖠᓂᖅᒥᓐ ᐃᒥᖅᑕᖅᕕᖓᓂᒃ.

“ᐅᑯᐊ ᐊᖏᕈᑎᐅᔪ ᐅᔾᔨᕈᓱᒃᓯᒪᓂᕐᒥᒃ ᐃᓄᐃᑦ ᓯᕗᓕᐅᕐᑎᖏᓐᓂᒃ ᖁᑦᑎᒃᑐᕐᒥᐅᓂᒃ — ᓴᐳᑎᓯᒪᓇᓱᒃᖢᒍ ᐃᒪᖏᑦ ᐊᒻᒪᓗ ᑕᕆᐅᕐᒥᐅᑕᐃ ᑕᓪᓗᕈᑎᐅᑉ ᐃᒪᖓᓂᒃ,” ᐸᐅᓗᓯ ᐊᕿᐊᕈᒃ ᐅᖃᖅᑐᖅ.

ᐅᓇ ᑐᓴᖅᑎᑦᑎᔾᔪᑎ ᐅᖃᐅᓯᐅᓚᐅᕐᑐᖅ ᑐᓴᕈᓘᔭᖅᐸᓪᓕᐊᑎᓪᓗᒋᑦ ᒐᕙᒪᑐᖃᒃᑯᑦ ᓂᕈᐊᖅᑎᑦᑎᓛᕐᓂᖏᓐᓂᒃ.

ᒪᒃᑭᓇ ᐅᖃᕋᓗᐊᕐᑎᓪᓗᒍ ᑖᒃᑯᐊ ᑮᓇᐅᔭᐃᑦ ᐊᒻᒪ ᐱᖓᓱᓄᑦ ᒥᓂᔅᑕᓄᑦ ᐳᓛᖅᑐᖃᕐᓂᖓ ᓄᓇᕗᑦ ᐊᖓᔪᖅᑳᖃᕐᕕᐊᓄᑦ ᖃᖓᑦᑎᐊᓵᖑᓚᐅᕐᑐᖅ ᒪᑐᒧᖓᐅᙱᓐᓂᕋᖅᖢᓂᐅᒃ ᒐᕙᒪᑐᖃᒃᑯᑦ ᓂᕈᐊᕐᓂᓕᕆᓛᕐᓂᖏᓐᓄᑦ. ᓇᓕᐊᓪᓘᓐᓃᑦ ᐊᕕᒃᓯᒪᓂᒃᑰᖓᔪ ᐃᓚᒋᔭᐅᓪᓗᑎᒃ ᓕᐳᕈᒃᑯᑦ ᑐᓴᖅᑎᑦᑎᓚᐅᙱᒻᒪᑕ ᓱᓕ ᓂᕈᐊᒐᒃᓴᐅᓂᐊᖅᑐᓂᒃ ᑭᖑᓪᓕᕐᒥᓐ ᓂᕈᐊᕐᓇᐅᓛᖅᑐᒥᓐ.

“ᓂᕈᐊᕐᓇᓕᕆᓂᐅᙱᑦᑐᖅ, ᐅᓇ ᐃᓄᐃᑦ ᐃᓅᓯᖏᓐᓂᒃ ᐱᐅᓯᕚᓪᓕᕈᑎᒃᓴᖅ,” ᐅᖃᖅᑐᖅ, ᐅᖃᒃᑲᓐᓂᖅᖢᓂ ᓕᐳᕈᒃᑯᑦ ᒐᕙᒪᖓᑕ ᓯᕗᓪᓕᖅ ᐃᑲᔫᑎᒃᓴᐅᓂᕋᓚᐅᕐᑕᖓ ᐱᓇᓱᐊᕈᓯᐅᓚᕐᑐᒥ ᐅᓇ $10 ᒥᓕᐊᓐ ᑖᓚᐃ ᐅᑯᓄᖓ ᐊᑭᓕᖅᓱᒐᕐᓂᖅᑐᓄᑦ ᐃᒡᓗᒃᓴᓅᖓᓚᐅᕐᓂᖓᓂᒃ.

2021-ᒥ ᐊᐅᓚᔾᔪᑎᒃᓴᓕᕆᑎᓪᓗᒋᑦ ᒐᕙᒪᑐᖃᒃᑯᑦ, ᓕᐳᕈᒃᑯᑦ ᓴᓂᕐᕙᐃᓚᐅᕐᓯᒪᖕᒪᑕ $4.3 ᐱᓕᐊᓐ ᑖᓚᓂᒃ ᐊᕐᕌᒍᓄᑦ ᑎᓴᒪᓄᑦ ᓄᓇᖃᖅᑳᖅᑐᑦ ᓄᓇᓕᖏᓐᓄᑦ ᐱᖁᑎᑖᕈᑎᒃᓴᐅᓗᑎᒃ, ᐊᑐᐃᓐᓇᐅᓗᑎᒃ ᓄᓇᖃᖅᑳᖅᑐᑦ ᐊᓪᓚᓄᑦ, ᐃᓄᖕᓄᑦ ᐊᒻᒪ ᐊᓪᓚᒐᔪᑦ ᓄᓇᓕᖏᓐᓄ.

ᐱᑕᖃᒃᑲᓐᓂᕐᒥᖕᒪᓐ $1.7 ᐱᓕᐊᓐ ᑖᓚᒃᑲᓐᓂᕐᓂᒃ ᐊᑐᐃᓐᓇᐅᑎᑕᐅᔪᓂᒃ ᐊᕐᕌᒍᓄᑦ ᑕᓪᓕᒪᓄᑦ ᐊᑐᖅᑕᐅᓇᔭᖅᖢᑎᒃ ᓱᕋᒃᓯᒪᔪᓕᕆᓂᕐᒧᑦ ᐊᒻᒪ ᐊᐅᓚᑦᑎᓂᕐᒧᑦ ᐊᑭᓕᐅᑎᒃᓴᓂᒃ ᑕᒪᒃᑯᓄᖓ ᓴᓇᔭᐅᕙᓪᓕᐊᓂᐊᖅᑐᓄᑦ.

ᐊᐱᕆᔭᐅᑎᓪᓗᒍ ᑮᓇᐅᔭᓂᒃ ᑐᓴᖅᑎᑦᑎᔾᔪᑎᐅᔪᓂᒃ, ᒪᒃᑭᓇ ᐅᖃᓚᐅᕐᑐᖅ “ᐃᓱᒪᔪᖓᓕ ᑕᒪᒃᑯᐊ ᓄᑖᓄᑦ ᑮᓇᐅᔭᐃᑦ ᐋᖅᑭᒃᑕᐅᔪᑦ.”

Share This Story

(0) Comments

Join the Conversation

Your email address will not be published. Required fields are marked *

*