ᑐᒃᓯᕋᐅᑎᐅᔪᖅ ᑮᓇᐅᔭᖅᑐᔪᓄᑦ ᐊᑐᕈᑎᒃᓴᑦ ᑐᕌᒐᖃᓛᖑᔪᖅ ᐃᒡᓗᒃᓴᓕᕆᓂᕐᒥ

For English version, see Finance minister presents housing-heavy 2025-26 capital estimates

ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᐊᖏᓂᕐᐹᖓᓂ ᓄᓇᕗᒥᑦ ᒐᕙᒪᒃᑯᑦ 2025-26 ᑮᓇᐅᔭᖅᑐᔪᓄᑦ ᐊᑐᒐᒃᓴᓂ.

ᑮᓇᐅᔭᓕᕆᔨᒃᑯᑦ ᒥᓂᔅᑕᖓ ᖁᐊᓴ ᑯᓱᒐᖅ, ᒥᓂᔅᑕᐅᖕᒥᔪᖅ ᑲᒪᒋᔭᖃᖅᖢᓂ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᓐᓄᑦ, ᓴᖅᑭᑎᑦᑎᓚᐅᕐᑐᖅ ᑮᓇᐅᔭᖅᑐᔪᓄᑦ ᐊᑐᖅᑕᐅᓇᔭᖅᑐᓂ ᐅᑭᐊᒃᓵᖅ ᑲᑎᒪᒃᑲᓐᓂᓕᖅᑎᓪᓗᒋᑦ ᑲᑎᒪᕕᒡᔪᐊᒥ ᐅᒃᑑᐱᕆ 24-ᒥ.

“ᒫᓐᓇᐅᓕᕐᑐᖅ ᐃᒡᓗᓕᕆᓂᖅ ᐱᒻᒪᕆᐊᓗᒋᔭᐅᑲᑕᖕᒪᑦ. ᐅᓇ ᐊᖏᓂᖅᐹᖑᖕᒪᑦ ᐱᖁᑎᒋᔭᑦᑎᓐᓂ,” ᑯᓱᒐᖅ ᐅᖃᕐᑐᖅ ᐊᐱᕐᓱᖅᑕᐅᑎᓪᓗᒍ.

“ᐃᑲᔪᕐᑐᖅᑕᐅᓯᒪᑦᑎᐊᕐᒪᑦ ᐊᒻᒪᓗ ᐱᑕᖃᒃᑲᓐᓂᖁᔨᓪᓗᑎᒃ ᐃᒡᓗᒋᔭᐅᔪᒃᓴᓂᒃ.”

ᒐᕙᒪᒃᑯᑦ ᐃᓱᒪᔪᑦ ᐊᑐᕈᒪᓪᓗᑎᒃ $353.8 ᒥᓕᐊᓐᓂ ᑮᓇᐅᔭᖅᑐᔪᓄᑦ — ᐅᓇ ᒪᑯᓄᖓᐅᓇᔭᕐᑐᑦ ᓂᐅᕕᖅᑕᐅᔭᕆᐊᓕᖕᓄᑦ, ᓄᑖᙳᕆᐊᖅᑎᑦᑎᓂᕐᒧᑦ ᐊᒻᒪᓗ ᐃᒡᓗᓕᐅᕐᓂᕐᒧᑦ ᐱᓕᕆᐊᒃᓴᓄᑦ — ᐊᕐᕌᒎᓂᐊᖅᑐᒥ ᐱᒋᐊᕐᓯᒪᔪᒥ ᐊᐃᕆᓕ 1, 2025.

ᑮᓇᐅᔭᖅᑐᔪᓄᑦ ᐸᕐᓇᐅᑎ ᐊᓯᐊᒎᖓᔪᖅ ᐊᐅᓚᑦᑎᔾᔪᑎᒃᓴᓂ, ᑖᓐᓇᓕ ᐊᕐᕌᒍᑕᒫᓐ ᓴᖅᑭᑕᐅᖃᑦᑕᖅᑐᑦ ᐅᑭᐅᒃᑯᑦ ᑲᑎᒪᓕᕌᖓᑕ. ᐅᓇ ᐊᐅᓚᑦᑎᔾᔪᑎ ᒪᑯᓄᖓ ᖃᐅᑕᒫᑦ ᐊᐅᓚᑕᐅᔭᕆᐊᖃᖅᑐᓂᒃ, ᐃᓚᖃᖅᖢᑎᒃ ᑮᓇᐅᔭᓕᐊᕆᔭᐅᖃᑦᑕᖅᑐᓂᒃ, ᐊᒻᒪᓗ ᓴᖅᑭᑎᑦᑎᓯᒪᒋᓪᓗᓂ ᒐᕙᒪᒃᑯᑦ ᑮᓇᐅᔭᖅᑖᕆᕙᓪᓕᐊᒐᔭᖅᑕᖏᓐᓂᒃ.

ᐅᓇ $353.8 ᒥᓕᐊᓐ ᒐᕙᒪᒃᑯᑦ ᐊᑐᕐᓂᐊᕋᓱᒋᔭᖓᑦ ᑮᓇᐅᔭᖅᑐᔪᓂ 2025-26-ᒧ ᐅᓄᙱᓐᓂᕐᓴᐅᔪᖅ ᐆᒪᙵᑦ $589.8 ᒥᓕᐊᓐᓂ ᐋᖅᑭᒋᐊᖅᑕᐅᒃᑲᓐᓂᕐᓯᒪᔪᓂᒃ ᑮᓇᐅᔭᖅᑐᔪᓄᑦ ᐊᑐᖅᑕᐅᓂᐊᕋᓱᒋᔭᐅᓯᒪᔪᓄᑦ 2024-25-ᒥ.

ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᐱᓇᔭᖅᑕᖓ ᒫᓃᓐᓇᔭᕐᑐᖅ $109.7 ᒥᓕᐊᓐ. ᐃᓚᖏᑦ ᐱᓕᕆᐊᒃᓴᐃᑦ ᐋᖅᑭᒃᑕᐅᓯᒪᔪᑦ ᐃᓚᖃᕐᑐᑦ ᓄᑖᓂ ᐃᖅᑲᓇᐃᔭᖅᑎᓄᑦ ᐊᒻᒪ ᐃᒡᓗᓕᕆᔨᒃᑯᓐᓄᑦ ᐃᒡᓗᒃᓴᓄᑦ, ᐃᑭᑦᑐᕕᓃᓪᓗ ᐃᓂᖏᓐᓂ ᓴᓇᔭᐅᔪᒃᓴᓄᑦ, ᐊᒻᒪᓗ ᐅᖁᒃᓯᒪᔪᓂ ᖃᐅᔨᓴᖃᑦᑕᕐᓂᕐᒧᑦ ᐊᒻᒪ ᐋᖅᑭᒃᓱᐃᔾᔪᑎᖏᓐᓄᑦ.

ᓄᓇᓕᖕᓂ ᐊᒻᒪ ᒐᕙᒪᒃᑯᓐᓂ ᐱᔨᑦᑎᕋᖅᑎᒃᑯᑦ ᑐᒡᓕᕆᔭᐅᔪᑦ ᑮᓇᐅᔭᖅᑖᕈᑎᓂ ᐃᒪᓐᓇ $102.2 ᒥᓕᐊᓐᓂ ᐊᑐᕐᓂᐊᕐᓗᑎᒃ. ᐱᓕᕆᕝᕕᒃ ᐱᓕᕆᐊᖃᕐᓂᐊᖅᑐᑦ ᓄᑖᒥ ᖃᑦᑎᕆᔨᒃᑯᑦ ᐃᒡᓗᖁᑎᖃᓕᕐᓗᑎᒃ ᐊᕐᕕᐊᓂᒃ ᐊᒻᒪ ᑎᑭᕋᕐᔪᐊᖅᒥ, ᐊᒻᒪᓗ ᐃᒥᕐᑕᕐᕕᖕᓂ ᓄᑖᙳᕆᐊᖅᑎᕆᓗᑎᒃ ᐃᒃᐱᐊᕐᔪᒃᒥ, ᑭᖓᐃᑦ, ᖁᒡᓗᖅᑑᖅ, ᒥᑦᑎᒪᑕᓕᒃ, ᑲᖏᖅᖠᓂᖅ ᐊᒻᒪ ᓴᓂᑭᓗᐊᖅᒥ.

“ᐊᖏᔪᒥᒃ ᓄᑖᙳᕆᐊᖅᑎᑦᑎᓂᖅ” ᐆᒥᖓ ᓴᒃᑯ ᐃᓕᓐᓂᐊᕐᕕᒃᒥ ᓴᓪᓕᓂ ᐊᒻᒪᓗ ᓄᑖᒥ ᐃᓕᓐᓂᐊᕐᕕᐊᓗᒃᒥ ᑕᓗᕐᔪᐊᕐᒥ ᓇᓗᓇᐃᕐᑕᐅᓯᒪᔪᑦ ᐃᓚᒋᔭᐅᓂᐊᕐᓗᑎᒃ ᐅᕙᙵᑦ $56 ᒥᓕᐊᓐᓂ ᐋᖅᑭᒃᑕᐅᓯᒪᔪᓂᒃ ᐃᓕᓐᓂᐊᕐᓂᓕᕆᔨᒃᑯᓐᓄᑦ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓂᕆᐅᒃᑐᑦ ᐊᑐᕐᓂᐊᕋᓱᒋᓪᓗᑎ $35 ᒥᓕᐊᓐᓂ ᐊᔾᔨᒌᙱᑦᑑᑎᓄᑦ ᐱᓕᕆᐊᒃᓴᓄᑦ, ᐃᓚᖃᖅᖢᓂ ᐊᑯᓂᕈᓗᒃ ᑲᒪᒋᔭᖃᕐᕕᒃᓴᓂ ᐃᖃᓗᒃᑑᑦᑎᐊᕐᒥ ᐊᒻᒪ ᐃᖃᓗᖕᓂ, ᕿᑭᖅᑕᖅᔪᐊᖅ ᐊᓯᐊᓂ ᐋᓐᓂᐊᕕᒃᑖᕐᓗᓂ, ᐊᒻᒪᓗ ᓄᓇᕗᒥᑦ ᒪᒥᓴᕐᕕᒃᒧᑦ ᑖᓐᓇᓗ ᒫᓐᓇ ᓴᓇᔭᐅᕙᓪᓕᐊᓪᓗᓂ ᐃᖃᓗᖕᓂ.

ᖃᖓᑕᓲᒃᑯᕕᖕᓂ ᓄᑖᙳᕆᐊᖅᑎᑦᑎᓂᕐᒥ ᐅᓄᕐᑐᓂ ᓄᓇᕗᒥᑦ ᓄᓇᓕᖕᓂ ᐋᖅᑭᒃᓯᓯᒪᔪᑦ ᐊᑭᖃᕋᔭᖅᖢᑎᒃ $29 ᒥᓕᐊᓐᓂ ᐅᕘᓇ ᐱᕙᓪᓕᐊᔪᓕᕆᔨᒃᑯᑦ ᐊᒻᒪ ᐃᖏᕐᕋᔾᔪᑎᓕᕆᔨᒃᑯᑦ ᐊᑐᕐᓂᐊᕋᓱᒋᔭᖏᓐᓄᑦ.

“ᐱᓇᓱᒍᒪᓪᓚᕆᒃᑲᑦᑕ ᐃᒡᓗᓕᕆᓂᕐᒧᑦ ᑮᓇᐅᔭᖃᖅᑎᑦᑎᓇᓱᒻᒪᕆᒡᓗᑕ ᐊᒻᒪᓗ ᑖᓐᓇ ᑮᓇᐅᔭᖅ ᐊᑐᕈᓐᓇᖅᑕᓕᒫᖓᓄᑦ ᐊᑐᕋᓱᒡᓗᑎᒍᑦ,” ᑯᓱᒐᖅ ᐅᖃᕐᑐᖅ.

ᑮᓇᐅᔭᖅᑐᔪᓄᑦ ᐸᕐᓇᐅᑎ ᐃᓚᒋᔭᐅᔪᖅ ᒪᓕᒐᓕᕆᔨᒃᑯᓐᓄᑦ ᐅᖃᐅᓯᐅᑲᑕᖕᓂᐊᖅᑐᓂᒃ ᐅᑭᐊᒃᓵᒥ ᑲᑎᒪᓂᕐᒥ, ᑖᓐᓇᓗ ᐋᖅᑭᒃᑕᐅᓯᒪᓪᓗᓂ ᑲᑎᒪᑲᑕᖕᓂᐊᕐᓗᑎ ᑎᑭᓪᓗᒍ ᓄᕕᐱᕆ 7.