ᓯᕗᓪᓕᕐᐹᖅ ᓄᓇᕗᑦ 3000 ᐃᒡᓗᓕᐊᕆᔭᐅᔪᖅ ᐱᐊᓂᒃᑕᐅᓂᐊᓕᕐᑐᖅ ᑕᒪᑐᒪᓂ ᐱᓇᓱᐊᕈᓯᕐᒥ

For the English version of this story, please see First Nunavut 3000 build set to be complete by next week.

ᐃᒡᓗᐃᑦ ᑲᑎᕐᖓᔪᑦ 18 ᐃᒡᓗᒃᓴᐃᑦ ᐱᐊᓂᒃᑕᐅᓂᐊᓕᕐᑐᑦ ᑕᒪᑐᒪᓂ ᐱᓇᓱᐊᕈᓯᕐᒥ ᐃᖃᓗᖕᓂ, ᑖᓐᓇᓗ ᓯᕗᓪᓕᖅᐹᖑᓪᓗᓂ ᓴᓇᔭᐅᔪᖅ ᐅᑯᓇᙵᑦ ᐃᓚᒋᔭᐅᔪᓂᒃ ᓄᓇᕗᑦ 3000.

ᑭᓕᐅᕋᓐᔅ ᓯᓈᑦ, ᐊᖓᔪᖅᑳᖅ ᐊᒻᒪ ᐊᐅᓚᑦᑎᔨ NCC ᑮᓇᐅᔭᓕᐅᕋᓱᖕᓂᕐᒧᑦ ᑎᒥᖓᓄᑦ, ᑐᓴᖅᑎᑦᑎᓚᐅᕐᑐᖅ ᓯᑎᐱᕆ 19-ᒥ ᐅᖃᓪᓚᑲᑕᒃᑎᓪᓗᒋ ᐱᓕᕆᐊᖑᔪᒥᒃ, ᑖᓐᓇᓗ ᓄᓇᕗᒥᑦ ᐃᒡᓗᑭᒃᓴᕐᓂᕐᒧᑦ ᐱᓕᕆᐊᖑᓪᓗᓂ ᐃᒡᓗᓕᐅᕐᓗᑎᒃ 3,000-ᓂ 2030 ᑎᑭᓚᐅᕐᑎᓐᓇᒍ.

ᓄᑖᖅ ᐃᒡᓗᐃᑦ ᑲᑎᕐᖓᔪᑦ ᐃᑲᔪᕐᓂᐊᖅᑐᖅ 36-ᓂ ᐃᓚᒌᓂ ᐃᖃᓗᖕᓂ, ᓯᓈᑦ ᐅᖃᕐᑐᖅ. ᐅᑯᐊ 18 ᐃᓚᒌᑦ ᓅᓐᓂᐊᖅᑐᑦ ᑖᒃᑯᓄᖓ ᓄᑖᓄᑦ ᐃᒡᓗᓄ ᕿᒪᐃᓂᐊᖅᑐᒃᓴᐅᔪᑦ ᐃᓄᒋᐊᓗᖏᖅᑐᓂᒃ ᐃᒡᓗᓂ, ᑖᒃᑯᐊᓗ ᐊᑐᐃᓐᓇᐅᓕᕐᓂᐊᖅᖢᑎᒃ ᐃᑲᔫᑎᐅᔪᓐᓇᕐᓯᓗᑎᒃ ᐊᓯᖏᓐᓂ ᐃᓚᒌᓂ ᓄᓇᓕᖕᓂ.

ᐅᖃᓪᓚᒃᖢᓂ ᑭᖑᓪᓕᖅᐹᖓᓂ ᐅᓪᓗᕐᒥ ᓄᓇᕗᒥᑦ ᐱᓕᕆᐊᓄᑦ ᓴᖅᑭᔮᒐᖃᕐᕕᒃᒥ, ᓯᓈᑦ ᓴᖅᑭᑦᑐᖅ ᐅᖃᓪᓚᑲᑕᒃᑐᓂ ᔪᐊᓂ ᐳᓪᓚᐅᑉ ᓴᓂᑦᑎᐊᖓᓂ, ᐊᖓᔪᖅᑳᖅ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᓐᓄᑦ, ᐊᒻᒪ ᓂᒃ ᑲᓛᒃ, ᑐᑭᒧᐊᖅᑎᑦᑎᔨ ᓱᕋᒃᓯᒪᔪᓕᕆᓂᕐᒥ ᐃᒡᓗᓕᕆᔨᒃᑯᓐᓂ. 50 ᖃᓂᒋᔮᓃᑦᑐᑦ ᐃᓄᐃᑦ ᑕᐅᑐᓚᐅᕐᑐᑦ ᐅᖃᓪᓚᑲᑕᖕᓂᐅᔪᒥᒃ ᐅᕙᓂ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥ ᐊᓐᓂᑭᒃᑐᕐᕕᒃᒥᑦ.

ᓄᓇᕗᒥᑦ ᒐᕙᒪᒃᑯᑦ ᐊᒻᒪ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᑐᓴᖅᑎᑦᑎᓚᐅᕐᓯᓚᔪᑦ ᓄᓇᕗᑦ 3000-ᒥ 2022-ᖑᑎᓪᓗᒍ. ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᐊᒻᒪ NCC ᐱᕙᓪᓕᐊᔪᓕᕆᔨᑦ ᓕᒥᑎᑦᑯᑦ ᑲᒪᒋᔭᖃᖅᑎᐅᔪᑦ ᓴᓇᔭᐅᓂᖏᓐᓂ ᓇᑉᐸᓪᓗᐊᖏᑦ ᐃᒡᓗᓕᐊᕆᔭᐅᔪᒪᔪᑦ, ᑖᒃᑯᓇᙵᓪᓗ 1,400 ᐃᒡᓗᓕᕆᔨᒃᑯᑦ ᐃᒡᓗᖁᑎᒋᓕᕐᓂᐊᖅᖢᓂᔾᔪᑦ.

ᒫᓂ 900 ᐃᒡᓗᒃᓴᐃᑦ ᑮᓇᐅᔭᑎᒍᑦ ᐱᓕᕆᐊᖑᓂᐊᕐᑐᑦ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᓐᓄᑦ ᐊᒻᒪ ᐱᓕᕆᖃᑎᖏᑦ ᒪᑯᐊ ᐃᓄᐃᑦ ᑲᑐᔾᔨᖃᑎᒌᖏᑦ, ᑮᓇᐅᔭᓕᐅᕋᓱᒐᑎ ᐱᓕᕆᐊᓖᑦ, ᓄᓇᓕᖕᓂ ᑲᑐᔾᔨᖃᑎᒌᓂ ᐊᒻᒪ ᐃᒻᒥᒃᑯᑦ ᐱᓕᕆᕝᕕᐅᔪᓂᒃ ᑲᒻᐸᓂᐅᔪᓂ.

ᑕᒪᕐᒥ ᐱᓕᕆᐊᒃᓴᐃᑦ ᐃᓱᒪᒋᔭᐅᔪᑦ ᐊᑭᖃᕐᓂᐊᕆᐊᒃᓴᖏᓐᓂᒃ $2.6 ᐱᓕᐊᓐᓂ, $900 ᒥᓕᐊᓐ ᐃᒻᒥᒃᑯᑦ ᐱᓕᕆᕝᕕᐅᔪᓂᑦ ᐊᒻᒪ ᐃᓚᖓ ᒐᕙᒪᓄᑦ ᐊᒻᒪ ᐃᓄᐃᑦ ᑲᑐᔾᔨᖃᑎᒌᓄᑦ ᐊᑭᓕᖅᑕᐅᓂᐊᖅᖢᑎᒃ.

“ᐊᓱᐃᓛᑕᐃᓐᓇᖅ ᑕᐃᒪᓐᓇ ᓯᕗᒧᑦ ᐱᕙᓪᓕᐊᓂᕐᑕᖃᓕᕐᐳᖅ,” ᓯᓈᑦ ᐅᖃᕐᑐᖅ.

ᐃᒡᓗᓂ ᓈᒻᒪᙱᓕᐅᕈᑎᖃᖃᑦᑕᕐᓂᖅ ᐊᑐᖅᑕᐅᓯᒪᔪᖅ ᑲᓇᑕᓕᒫᒥᑦ, ᓯᓈᑦ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᓄᓇᕗᒻᒥᐅᑦ “ᓈᒻᒪᙱᓕᐅᕈᑎᖃᖅᓯᒪᖕᒪᑕ ᐊᑯᓂᒻᒪᕆᐊᓗᒃ.”

ᐅᓇ ᓇᓗᓇᐃᒃᑯᑎᒋᓗᒍ ᐃᒡᓗᖃᒃᑲᓐᓂᕆᐊᖃᕐᓂᖏᓐᓂ ᓄᓇᕗᒥᑦ, 35 ᐳᓴᓐᑎ ᓄᓇᕗᒥᑦ ᐊᖏᕐᕋᕆᔭᐅᔪᑦ ᐃᒡᓗᕈᓯᖏ ᐅᓄᙱᓗᐊᕐᒪᑕ ᐃᒡᓗᖃᖃᑕᐅᔪᓄᑦ, ᑕᐅᑐᒃᖢᒍᓗ ᑲᓇᑕᒥ 5 ᐳᓴᓐᑎᐅᑎᓪᓗᒍ, ᐅᑯᐊ 2020-ᒥ ᓄᓇᕗᑦ ᑐᙵᕕᒃᑯᑦ ᐅᓂᒃᑳᖏ ᐅᖃᕐᓯᒪᓚᐅᕐᑐᑦ.

ᐃᓚᒋᔭᐅᓪᓗᓂ ᓄᓇᕗᑦ 3000, ᓄᓇᖃᖅᑐᑦ ᐊᔪᕈᓐᓃᖅᓴᖅᑎᑕᐅᓇᔭᕐᑐᑦ ᐃᖅᑲᓇᐃᔮᓂᒃ ᐊᒻᒪ. ᐃᒡᓗᓕᐅᕐᓂᕐᒥ, ᑖᔅᓱᒪᓗ ᓯᓈᑦ ᐅᖃᐅᓯᕆᓚᐅᖅᖢᓂᐅᒃ ᖁᕕᐊᓇᕐᓂᖅᐹᖑᓂᖏᓐᓂᒃ ᐱᓕᕆᐊᒧᑦ.

ᐊᔪᕈᓐᓃᖅᓴᑲᑕᒃᑎᓪᓗᒋᑦ ᓄᓇᕗᒥᑦ, 30 ᓄᓇᖃᖅᑐᑦ ᐊᔪᕈᓐᓃᖅᓴᖅᑎᑕᐅᓚᐅᕐᓯᒪᔪᑦ ᐊᒻᒪ ᐃᖅᑲᓇᐃᔭᓕᖅᖢᑎᒃ NCC-ᑯᓐᓄᑦ ᐊᒻᒪᓗ ᒫᓐᓇᒧᑦ ᐃᖅᑲᓇᐃᔭᖅᖢᑎᒃ ᑖᒃᑯᓄᖓ, ᐳᑦᓚᒃ ᐅᖃᓚᐅᕐᑐᖅ.

ᐊᔪᕈᓐᓃᖅᓴᖅᑎᑦᑎᓂᖅ ᐋᖅᑭᒃᓱᖅᑕᐅᓚᐅᕐᓯᒪᔪᖅ “ᐃᓄᐃᑦ ᐅᓪᓗᒥ ᓯᕗᓂᒃᓴᒧᑦ,” ᓯᓈᑦ ᐅᖃᕐᑐᖅ.