ᐃᖃᓗᖕᓂ ᐃᑭᕕᓂᕐᒥ ᐃᒡᓗᖃᕐᓂᑯᑦ ᖁᔭᓕᔪᑦ ᓄᓇᓖᑦ ᐃᑲᔪᕐᓂᖏᓐᓂᒃ

For English version, see ‘For right now, we have everything we need’: Fire victim grateful for community help

ᐃᑲᕐᕋᑦ 48 ᑐᖔᓂ ᐊᖏᕐᕋᕆᔭᖏᑦ ᐃᑭᓚᐅᕐᑎᓪᓗᒋᑦ, ᐃᓚᖏᑦ ᐃᒡᓗᖃᓚᐅᕐᑐᑦ ᓅᐳᓪ ᐃᒡᓗᒥ ᐅᖃᓚᐅᕐᑐᑦ ᐃᑲᔪᖅᑕᐅᑲᑕᖕᓂᖏᓐᓂ ᐱᔭᕆᐊᖃᖅᑕᖏᓐᓂ — ᖁᔭᓐᓇᒦᑦ ᓄᓇᓖᑦ.

“ᖃᓄᐃᙱᑦᑐᐃᓐᓇᐃᑦ ᑕᒪᕐᒥᒃ,” ᐅᖃᕐᑐᖅ ᓵᑦ ᒥᐊᓐᑕᔅ, ᐃᓚᒌᑦ ᐃᒡᓗᖃᓚᐅᕐᑐᑦ ᐅᕙᓂ 1088 ᒥᕝᕕᒃ ᐊᑐᕆᐊᕐᒥᑦ, ᑖᓐᓇᓗ ᓄᖑᑦᑎᐊᓚᐅᖅᖢᓂ ᔭᓄᐊᕆ 8-ᒥ.

“ᓄᓇᓖᑦ ᑲᑎᖢᑎᒃ ᐱᓕᕆᓯᒪᖕᒪᑕ ᐊᒻᒪ ᒫᓐᓇ ᐱᔭᕆᐊᖃᖅᑕᑦᑎᓐᓂ ᐱᓯᒪᓕᕐᑐᒍᑦ.”

ᒥᐊᓐᑕᔅ ᖁᔭᓕᑦᑎᐊᓚᐅᕐᑐᖅ ᐃᖃᓗᖕᓄᑦ ᑲᑎᒪᔨᐅᖃᑕᐅᔪᒥᒃ ᐋᒻᐳ ᐊᒡᓘᒃᑲᖅ ᐊᒻᒪᓗ ᐃᑲᔪᑲᑕᒃᑐᖅ ᑰᕆ ᐱᐊᓪ, ᑲᑎᕐᓱᐃᓪᓗᑎᒃ ᓇᔾᔨᔪᕐᓯᐅᑎᓂ ᐱᖃᓐᓈᖓᕗᑦ ᐋᓇᐱᐅᓪ ᓚᐅᕋ ᓲᑐᒧᑦ ᐊᒻᒪ ᓱᕈᓯᖓᓄᑦ ᐊᕐᕌᒍᓕᒃᒥ ᐱᖓᓱᓂᒃ.

“ᐅᓇ ᖃᓄᐃᓕᐅᕐᓂᐅᔪᖅ ᐅᕙᑦᑎᓐᓄᑦ ᓈᒻᒪᒃᑐᒃᑯᑦ ᐃᑲᔪᕈᑎᒻᒪᕆᐅᓚᐅᕐᑐᖅ,” ᒥᐊᓐᑕᔅ ᐅᖃᕐᑐᖅ. “ᐅᕙᑦᑎᓐᓄᑦ ᖃᐅᔨᓇᓱᒃᖢᑎᒃ ᐊᒻᒪ ᐱᖁᑎᖃᖅᑎᑕᐅᓇᓱᒃᖢᑕ ᐱᔭᕆᐊᖃᖅᑕᑦᑎᓐᓂ.”

ᕌᓐᑕ ᕗᐊᐃᔅᒪᓐ ᐊᖏᕐᕋᖃᕈᓐᓃᓚᐅᕐᒥᖕᒪᑦ ᐃᑭᑦᑐᒧᑦ, ᑭᓯᐊᓂᓕ ᐅᖃᓚᐅᕐᑐᖅ ᐊᓯᐊᓂ ᐃᒡᓗᒥ ᓇᓂᓯᓚᐅᕐᓂᖓᓂ ᐊᒻᒪ ᓄᓇᓯᐅᑎᖃᕐᕕᖃᖅᖢᓂ.

ᔫᒥ ᐃᓕᓐᓂᐊᕐᕕᒃ ᐱᖁᑎᓄᑦ ᐊᐃᒃᖠᕐᕕᐅᑲᑕᒃᑐᖅ ᐃᓚᒌᓄᑦ ᐊᒃᑐᖅᑕᐅᓯᒪᔪᓄᑦ ᓅᐳᓪ ᐃᒡᓗ ᐃᑭᑎᓪᓗᒍ ᔭᓄᐊᕆ 8-ᒥᑦ. (ᐊᔾᔨᓕᐅᕆᔨ ᑎᐅᕋᓐ ᓚᑦᔅ)

ᐅᖃᖅᖢᓂ ᐊᖏᕐᕋᓚᐅᕐᓂᕋᖅᖢᓂ ᐱᓇᓱᐊᕈᓯᐅᓚᐅᕐᑐᒧᑦ ᐃᑭᓕᖅᑎᓪᓗᒍ, ᑕᒪᐅᓇᑦᑕᐃᓐᓇᐸᓗᒃ ᐅᖃᐅᓯᐅᑎᓪᓗᒍ ᐃᑭᑦᑐᖅ. ᐱᖁᑎᖏᓐᓂ ᐊᕝᕗᕈᓐᓇᓚᐅᕐᑐᖅ ᐊᓂᒋᐊᖃᙱᓐᓂᖓᓂᒃ.

“ᓄᓇᓯᐅᑎᖃᕐᕕᒃᒦᓚᐅᕐᑐᖓ ᐱᖁᑎᒐᓚᖕᓂ ᐱᓯᒪᓪᓗᖓ,” ᐅᖃᕐᑐᖅ, ᐅᖃᐅᓯᖃᖅᑎᓪᓗᒍ ᐃᒡᓗᒥ ᕿᒪᐃᔭᕆᐊᖃᕐᓂᖓᓂᒃ.

ᒫᓐᓇᓕ ᕗᐊᐃᔅᒪᓐ ᐃᒡᓗᖃᖃᑕᐅᔪᖅ ᔫᒥ ᐃᓕᓐᓂᐊᕐᕕᐅᑉ ᖃᓂᒋᔭᖏᓐᓃᑦᑐᓂᒃ. ᔭᓄᐊᕆ 10-ᖑᑎᓪᓗᒍ ᑖᓐᓇ ᔫᒥ ᐃᓕᓐᓂᐊᕐᕕᒃ ᐊᑐᖅᑕᐅᓕᓚᐅᕐᑐᖅ ᐱᖁᑎᓂ ᓄᑖᓂ ᐊᓐᓄᕌᓂᒃ, ᐃᒡᓗᓯᐅᑎᓂᒃ, ᑲᑎᑦᑎᕕᐅᓪᓗᓂ ᐊᐃᔭᐅᔪᓐᓇᖅᑐᓂᒃ ᐊᖏᕐᕋᖃᕈᓐᓃᖅᑐᓄᑦ ᐱᔭᐅᔭᕆᐊᖃᓪᓚᕆᒃᑐᓂᒃ ᐊᒻᒪ ᐊᓯᖏᓐᓂ ᐃᒡᓗᒥ ᐊᑐᕆᐊᓕᖕᓂ — ᐃᓚᖃᓚᐅᕐᑐᑦ 24-ᓂ ᐴᕐᓂ ᖁᐃᖏᓕᓴᕐᓂ — ᐃᑲᔫᑎᒋᔭᐅᔪᑦ ᐊᓯᖏᓐᓄᑦ ᐃᖃᓗᖕᒥᐅᑕᓄᑦ.

ᑖᓐᓇ ᐱᖁᑎᓂ ᐊᐃᒃᖠᕐᕕᒃᓴᖅ ᐅᓪᓗᙳᖅᑎᓪᓗᒍ ᑕᑕᓯᒪᓕᓚᐅᕐᑐᖅ ᐊᒻᒪᓗ ᐊᓐᓄᕌᓂ ᐱᔪᒪᔪᓐᓃᖅᖢᑎᒃ.

“ᐊᒃᓱᐊᓗᒃ ᖁᕕᐊᓇᕐᑐᖅ ᓄᓇᓕᖕᓂ ᐃᒃᐱᒍᓱᑦᑎᐊᖅᑐᓂᒃ ᐊᒻᒪ ᓇᒡᓕᖕᓂᖃᖅᖢᑎᒃ,” ᐅᖃᕐᑐᖅ ᐊᖏᕐᕋᖃᑕᐅᔪᖅ ᒥᐊᓐᑎ ᒪᓚᙵ, ᑕᑯᒋᐊᖅᖢᓂ ᐃᖃᐃᓕᓴᕐᕕᖕᒥ ᔭᓄᐊᕆ 10-ᖑᑎᓪᓗᒍ.

ᑲᐲᓗ ᒧᑯᐃᓇ, ᐊᖓᔪᖅᑳᕆᔭᐅᔪᖅ ᐋᕗᕆᑲ ᐊᒻᒪ ᑯᕇᐱᐊᓐ ᑲᑐᔾᔨᖃᑎᒌᓄᑦ ᓄᓇᕗᒥᑦ, ᐅᖃᓚᐅᕐᑐᖅ ᐃᑲᔪᑲᑕᒃᑐᑦ ᒫᓐᓇ ᑕᖃᐃᕐᓯᕐᓂᕋᖅᖢᓂᒋᑦ ᐃᒡᓗᒃᓴᖅᓯᐅᓚᐅᖅᖢᑎᒃ ᐃᓄᖕᓂ ᐃᑭᑦᑐᒧᑦ ᐊᒃᑐᖅᑕᐅᓂᑯᓂᒃ ᐃᖃᓗᖕᓂ. (ᐊᔾᔨᓕᙳᐊᖅ ᐅᕙᙵᑦ ᑲᐲᓗ ᒧᑯᐃᓇ)

“ᖃᓄᐃᑦᑐᖃᖅᑎᓪᓗᒍ ᒪᑭᑉᐹᓪᓕᕐᓇᖅᑐᖅ ᖃᐅᔨᒪᓪᓗᓂ ᓄᓇᓖᑦ ᐃᑲᔪᕈᓐᓇᕐᓂᐊᕐᒪᑕ ᑭᓇᐅᒐᓗᐊᖅᐸᑕ ᐅᕝᕙᓘᓐᓃᑦ ᖃᓄᖅ ᐃᓕᖅᑯᓯᖃᕋᓗᐊᖅᐸᑕ.”

ᐊᐃᒃᖠᕐᕕᐅᑲᑕᒃᑐᖅ ᐱᓇᓱᐊᕈᓯᐅᑉ ᓄᙳᐊᓂ ᒪᑐᐃᖓᐃᓐᓇᖅᑎᑕᐅᓚᐅᕐᑐᖅ ᐃᑭᑦᑐᖃᓚᐅᕐᑎᓪᓗᒍ.

ᐃᑲᔪᖅᑎᐅᔪᑦ ᐅᑯᓇᓂ ᐋᕗᕆᑲ ᐊᒻᒪ ᑯᕆᐱᐊᓐ ᑲᑐᔾᔨᖃᑎᒌᓄᑦ ᓄᓇᕗᒥᑦ ᒫᓐᓇ ᑕᖃᐃᕐᓯᖅᑐᑦ ᐱᓕᕆᕈᓘᔭᓕᓚᐅᕐᑐᑦ ᐅᓪᓛᒃᑯᑦ ᐃᑭᓚᐅᕐᑎᓪᓗᒍ ᐃᒡᓗᖃᕈᓐᓃᖅᑐᑦ ᐃᓂᒃᓴᖅᓯᐅᖅᑕᐅᓪᓗᑎᒃ, ᐅᖃᕐᑐᖅ ᐊᖓᔪᖅᑳᕆᔭᐅᔪᖅ ᑲᐲᓗ ᒧᑯᐃᓇ.

ᒧᑯᐃᓇ ᐃᖃᓘᖕᓃᓚᐅᙱᑦᑐᖅ ᐃᑭᑎᓪᓗᒍ ᑭᓯᐊᓂᓕ ᐱᓕᕆᑲᑕᓚᐅᕐᑐᖅ ᐅᖄᓚᐅᑎᒃᑯ ᐅᓇᓗ ᐅᒪᓄᓚ ᔭᓛᒡ, ᑖᓐᓇ ᐃᑲᔪᖅᑎᒃᓴᓂ ᑐᑭᒧᐊᖅᑎᐅᕙᓪᓕᐊᓪᓗᓂ.

ᑕᓪᓕᒪᑦ ᐃᓚᒋᔭᐅᔪᑦ ᑲᑐᔾᔨᖃᑎᒌᓄᑦ ᔭᓄᐊᕆ 9 ᐅᓪᓛᖓᓂ ᕿᓂᑲᑕᓕᓚᐅᕐᑐᑦ ᐃᑭᑦᑐᒧᑦ ᐃᓂᖃᕈᓐᓃᖅᑐᓄᑦ. ᐊᖅᓴᕐᓃᑦ ᑐᔪᕐᒥᕕᒃ ᐱᓕᕆᕝᕕᐅᑲᑕᓚᐅᕐᑐᖅ ᑕᒪᑐᒥᖓ, ᒧᑯᐃᓇ ᐅᖃᕐᑐᖅ.

“ᐅᓇ ᐅᓐᓄᖓᓂ ᐱᓕᕆᐊᖑᓚᐅᕐᑐᖅ ᓱᓕ ᖃᒥᑕᐅᓚᐅᙱᑎᓪᓗᒍ,” ᒧᑯᐃᓇ ᐅᖃᕐᑐᖅ. “ᑲᔪᓯᓂᐊᕐᑐᒍ ᐃᑲᔪᕆᐊᓖᑦ ᐃᑲᔪᑲᑕᒡᓗᒋᑦ ᒫᓐᓇ.”

ᔭᓄᐊᕆ 10-ᒥᑦᑕᐅᖅ ᓄᓇᓕᐸᐅᔭᐃᑦ ᐃᖃᓗᖕᓂ ᑐᓴᖅᑎᑦᑎᓚᐅᕐᑐᑦ ᐅᓇᑕᖅᑐᒃᓴᙳᐊᓄᑦ ᐃᒡᓗ ᒪᑐᐃᖓᓂᐊᕐᓂᕋᖅᖢᒍ ᐱᓇᓱᐊᕈᓯᐅᑦ ᓄᙳᐊᓂᓕᒫᖅ ᐅᖅᑰᓯᖅᑎᕝᕕᐅᑲᑕᖕᓂᐊᕐᒪᑦ ᐃᓂᖃᕈᓐᓃᖅᑐᓄᑦ. ᓂᖀᑦ, ᑕᒧᓗᒐᒃᓴᐃᓪᓗ, ᐅᐊᓴᕈᑎᒐᓚᐅᓪᓗ ᐊᒻᒪ ᐊᓯᖏᑦ ᐃᑲᔫᑎᒋᔭᐅᔪᑦ ᐱᑕᖃᓚᐅᕐᒥᔪᑦ ᐊᑐᐃᓐᓇᐅᓪᓗᑎᒃ.