ᓇᐹᕐᑐᐃᑦ ᐃᑭᒃᑐᑦ ᐳᔪᖏᑦ ᐃᓄᐃᑦ ᖃᖓᑕᓱᑦ ᐱᔨᑦᑎᕋᐅᑎᖏᓐᓂ ᑭᖑᕙᕈᑎᐅᕗᖅ
ᖃᖓᑕᓲᑉ ᐱᖁᑎᓂ ᐅᓯᓕᕐᓱᕐᕕᖏᑦ ᐊᒃᑐᖅᑕᐅᔪᑦ, ᑕᐃᒪᓐᓇᓗ ᖃᖓᑕᔪᒪᔪᑦ ᐊᒻᒪ ᐱᖁᑎ ᖃᖓᑕᓲᒃᑰᕐᑐᒃᓴᑦ ᑭᖑᕙᕆᐊᕐᑐᑦ ᓄᓇᕕᒃ ᓄᓇᓕᖏᓐᓂᒃ
ᐅᓄᒻᒪᕆᒃᑐᑦ ᐃᓄᐃᑦ ᖃᖓᑕᓲᖏᓐᓂ ᖃᖓᑕᓂᐅᓂᐊᖅᑐᑦ, ᐃᓚᐅᓪᓗᑎᒃ ᐱᖁᑎᓂᒃ ᐅᓯᕙᒃᑐᑦ, ᓄᖅᑲᖅᑎᑕᐅᓚᐅᕐᑐᑦ ᔪᓚᐃ ᕿᑎᐊᓂ ᐅᑯᐊ ᓇᐹᕐᑐᐃᑦ ᐃᑭᑦᑐᑦ ᓚ ᒍᕌᓐᒧ ᐅᐸᒍᓐᓇᐃᓪᓕᑎᑕᐅᑎᓪᓗᒋᑦ. ᖃᖓᑕᓲᖅ ᐱᓕᕆᐊᖃᕈᓐᓇᕐᓯᔪᖅ ᐊᒻᒪᓗ ᔪᓚᐃ 23ᒥ ᑕᕝᕗᖓ ᐅᐸᒍᓐᓇᕐᓯᓂᐊᖅᖢᑎᒃ, ᐅᖃᓚᐅᕐᑐᖅ ᐃᓄᐃᑦ ᖃᖓᑕᓲᖓᓄᑦ ᐊᖓᔪᖅᑳᖅ ᑯᕆᔅᑎᐊᓐ ᐳᔅ. (ᐊᔾᔨᓕᐅᕆᔨ ᓯᑐᕆᒃ ᒑᓚᓐᑦ)
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ
ᓇᐹᕐᑐᐃᑦ ᐃᑭᓐᓂᖏᑦ ᐱᒃᑲᖅᑎᔾᔪᑎᐅᔪᑦ ᐃᓄᐃᑦ ᖃᖓᑕᓲᖏ ᓄᓇᕕᐅᑉ ᓯᒡᔭᖏᓐᓃᑦᑐᓄᑦ ᓄᖅᑲᖅᑎᑕᐅᓚᐅᕐᓂᖏᓐᓄᑦ ᔪᓚᐃ 10 ᐱᓇᓱᐊᕈᓯᐊᓂᒃ ᐱᔾᔪᑎᖃᖅᖢᑎᒃ ᐳᔪᕐᒧ ᑕᑯᔪᓐᓇᑦᑎᐊᙱᓐᓂᕐᒧᑦ ᑕᐃᒪᓐᓇᓗ ᐊᒃᑐᐃᓂᖃᓚᐅᕐᖢᓂ ᖃᖓᑕᓲᒃᑰᖅᐸᒃᑐᓂᒃ ᐊᒻᒪ ᐱᖁᑎᓄᑦ ᐅᓯᑲᖅᑕᕐᓂᕐᒧᑦ.
ᖃᖓᑕᓲᑉ ᐊᐅᓚᑕᐅᓂᖓ ᐊᒃᑐᖅᑕᐅᓯᒪᐃᓐᓇᕐᑐᖅ ᐳᔪᕐᒧᑦ ᐱᓇᓱᐊᕈᓯᐅᓚᐅᕐᑐᒥ.
ᐃᑭᑦᑐᐃᑦ ᓈᒻᒪᙱᔾᔪᑎᐅᓕᓚᐅᕐᑐᑦ ᐃᓄᐃᑦ ᖃᖓᑕᓲᖏᓐᓄᑦ ᐊᐅᓚᑕᖏᓐᓄᑦ ᐅᕙᓂ ᓚ ᒍᕌᓐᒥ, ᒫᓃᑦᑐᖅ ᑲᓇᖕᓇᖅᐸᓯᐊᓂ ᔭᐃᒻᔅ ᐸᐃ ᓯᒡᔭᖏᓐᓂ, ᓱᒃᑲᐃᒡᓕᖅᐹᓪᓕᖅᖢᑎᒃ ᐅᓯᑲᖅᑕᕈᑎᖏᑦ, ᐅᖃᓚᐅᕐᑐᖅ ᐊᖓᔪᖅᑳᖅ ᑖᒃᑯᓄᖓ ᑯᕆᔅᑎᐊᓐ ᐳᔅ.
ᖃᕋᓴᐅᔭᒃᑯᑦ ᑎᑎᕋᖅᑕᖏᓐᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ, ᐅᖃᓚᐅᕐᑐᖅ ᖃᖓᑕᓲᖅ ᐊᓯᖏᓐᓂ ᐃᓂᒃᓴᓕᐅᖅᖢᑎ ᖃᖓᑕᓲᒃᑯᕕᖕᓂ ᐊᒻᒪ ᓯᕐᓗᐊᕆᔭᐅᔪᓂᒃ ᓄᓇᕕᒃᒥ ᐊᒻᒪ ᕚᓪ ᑐᐊᒥ ᐅᓇ ᐱᓕᕆᕝᕕᓪᓚᕆ ᓚ ᒍᕌᓐᒥ ᐅᐸᒐᒃᓴᐅᙱᑎᓪᓗᒍ.
ᑭᓯᐊᓂᓕ, “ᐃᓱᒪᔪᒍᑦ ᐊᐅᓚᑕᐅᔪᑦ ᐱᓕᕆᐊᖑᓕᕐᓂᐊᕐᓗᑎᒃ ᓚ ᒍᕌᓐᒥ ᔪᓚᐃ 23 ᑎᑭᑉᐸᑦ ᑕᒪᓐᓇ ᐅᓗᕆᐊᓇᕈᓐᓃᕐᓯᒪᒃᐸᑦ ᐊᒻᒪᓗ ᐊᐅᓚᑦᑎᔨᒻᒪᕇᑦ ᑕᐃᒪᐃᖁᔨᓕᕐᐸᑕ,” ᐅᖃᕐᑐᖅ.
ᐅᑯᑎᒎᓇᕐᓕ SOPFEU, ᑯᐸᐃᒃᒥ ᓇᐹᕐᑐᓕᖕᓂ ᐃᑭᑦᑐᓂ ᐱᓕᕆᔨᑦ, ᑕᒪᐃᓐᓂ ᐃᑭᑦᑐᕕᓃᑦ ᑲᒪᒋᔭᐅᔪᓐᓇᕐᓯᓯᒪᓂᕋᖅᖢᓂᒋᑦ ᔭᐃᒻᔅ ᐸᐃ ᒥᒃᓵᓂ ᑖᓐᓇᓗ ᓚ ᒍᕌᓐ ᑕᒫᓃᖢᓂ.
ᐃᓱᒪᒋᔭᐅᓪᓗᓂ ᖃᖓᑕᓲᓂ ᑭᖑᕙᖅᑎᑦᑎᒃᑲᓐᓂᕋᔭᕆᐊᒃᓴᖏᓐᓂᒃ, ᐳᔅ ᐅᖃᓚᐅᕐᑐᖅ ᐃᓄᐃᑦ ᖃᖓᑕᓲᖓ ᐊᐅᓚᑕᖏᓐᓂᒃ ᐋᖅᑭᒋᐊᕐᓯᔪᓐᓇᕐᓂᕋᖅᖢᓂᒋᑦ ᐊᒻᒪᓗ ᖃᓄᐃᓕᐅᕈᑎᖃᕈᓐᓇᕋᔭᖅᖢᑎᒃ ᐅᑭᐅᒃᑯ ᐱᕐᓯᓕᕌᖓᑦ ᐊᑐᖅᑕᐅᕙᒃᑐᓂᒃ.
(0) Comments