ᕌᓯ ᓇᓴᓕᒃ, ᓯᕗᓪᓕᖅᐸᐅᔪᒥ ᑐᙵᓱᒃᑎᑦᑎᔨ CBC−ᑯᑦ ᐃᒐᓛᖅ ᑐᓴᒐᒃᓴᓕᐊᖑᔪᒥ ᐱᓕᕆᐊᖑᔪᒥ, ᐊᑕᐅᓯᐅᓪᓗᓂ 80−ᓂ ᓄᑖᖑᔪᓂ ᑲᓇᑕᒥ ᐃᑲᔪᕐᓂᕐᒧᑦ ᐃᓕᓴᕆᔭᐅᓂᖅ ᑎᒃᑯᐊᖅᑕᐅᓂᐅᔪᓂ, ᐊᑦᑎᖅᑕᐅᔪᖅ ᑭᖕ ᑭᒡᒐᖅᑐᖅᑎᖓ ᑲᓇᑕᒥ ᒥᐊᕆ ᓴᐃᒪᓐ. (ᐱᓕᕆᕝᕕᒃ ᐅᑭᐅᖅᑕᖅᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᖃᐅᔨᓴᕐᓂᕐᒥ ᐊᔾᔨᖁᑎᖓ)
CBC−ᑯᓐᓂ ‘ᐃᒐᓛᖅ’ ᑐᙵᓱᒃᑎᑦᑎᔨᐅᓚᐅᖅᓯᒪᔪᖅ ᐊᑦᑎᖅᑕᐅᕗᖅ ᑲᓇᑕᒥ ᐃᑲᔪᕐᓂᕐᒧᑦ ᐃᓕᓴᕆᔭᐅᓂᕐᒧᑦ
ᕌᓯ ᓇᓴᓕᒃ ᐃᓇᒋᔭᐅᓪᓗᓂ 80−ᓂ ᑎᒃᑯᐊᖅᑕᐅᓂᐅᔪᓂ ᐅᖃᐅᓯᐅᓚᐅᖅᐳᖅ ᑎᓯᐱᕆ 31−ᒥ
For English version, see Former CBC ‘Igalaaq’ host named to Order of Canada
ᕌᓯ ᓇᓴᓕᒃ, ᓯᕗᓪᓕᖅᐸᐅᓪᓗᓂ ᑐᙵᓱᒃᑎᑦᑎᔨᐅᓚᐅᖅᑐᖅ CBC−ᑯᑦ ᐃᒐᓛᖅ ᐃᓄᒃᑎᑐᑦ ᑕᓚᕖᓴᖓᓂ ᑐᓴᒐᑦᓴᓕᐊᓄᑦ ᐱᓕᕆᐊᖑᔪᒥ, ᐃᓚᒋᔭᐅᓕᖅᐳᖅ ᑲᓇᑕᒥ ᐃᑲᔪᕐᓂᕐᒧᑦ ᐃᓕᓴᕆᔭᐅᓂᕐᒥ.
ᑭᖕ ᑭᒡᒐᖅᑐᖅᑎᖓ ᑲᓇᑕᒥ ᒥᐊᕆ ᓴᐃᒪᓐ ᐅᖃᐅᓯᖃᓚᐅᖅᐳᖅ ᑎᓯᐱᕆ 31−ᒥ ᓇᓴᓕᒃ ᐊᑕᐅᓯᐅᓪᓗᓂ 80−ᓂ ᑎᒃᑯᐊᖅᑕᐅᓂᐅᔪᓂ ᐃᓕᓴᕆᔭᐅᓂᐅᔪᒥ, ᑲᓇᑕᐅᑉ ᖁᑦᑎᓛᖑᔪᒥ ᐃᓄᑐᐃᓐᓇᕐᓄᑦ ᐅᐱᒋᔭᐅᓂᐅᔪᓄᑦ.
ᑐᓴᒐᒃᓴᓕᐊᖑᔪᒥ ᓴᐃᒪᓐ ᑎᑎᕋᕐᕕᖓᓂ ᐅᓂᒃᑳᕆᓚᐅᖅᐳᖅ ᓇᓴᓕᖕᒥ “ᐅᒃᐱᕆᔭᐅᔪᒥ ᓂᐱᐅᔪᒥ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ.”
“ᐱᓐᓇᕆᔭᐅᓪᓗᓂ ᐃᑲᔪᖅᓱᐃᔨᐅᕗᖅ ᐸᐊᑦᑏᓐᓇᕐᓂᕐᒥ ᐃᓄᐃᑦ ᐅᖃᐅᓯᖓᓐᓂ ᐊᒻᒪ ᐃᓕᖅᑯᓯᖓᓂ, ᐊᒻᒪ ᐱᔪᒪᔭᐅᕐᔪᐊᖅᖢᓂ ᐃᓄᑐᖃᐅᕗᖅ ᐊᒻᒪ ᓄᓇᓕᖕᓂ ᐅᖃᐅᔾᔨᐅᓗᓂ,” ᑐᓴᒐᒃᓴᓕᐊᖅ ᐅᖃᓚᐅᖅᐳᖅ.
ᐱᕈᖅᓴᔭᐅᓪᓗᓂ ᐱᖅᑯᓯᑐᖃᖅᑎᒍᑦ ᓄᓇᒥ ᕿᑭᖅᑖᓗᖕᒥ, ᓇᓴᓕᒃ ᑐᙵᓱᒃᑎᑦᑎᔨᙳᓚᐅᖅᐳᖅ ᐃᒐᓛᕐᒥ ᓯᕗᓪᓕᖅᐹᒥ ᓴᖅᑭᑎᑕᐅᑎᓪᓗᒍ 1995−ᒥ. ᑕᐃᑲᓃᖏᓐᓇᓚᐅᖅᐳᖅ ᑭᓯᐊᓂ ᐃᓐᓇᐅᓕᕐᓂᕐᒧᑦ ᓄᖅᑲᕐᓂᖓᓂ 2014−ᒥ.
ᑕᐃᒪᙵᓂ ᕿᒪᐃᓂᖓᓂ ᑕᐃᔅᓱᒥᖓ ᐊᑐᕐᓂᖃᐅᑎᖓᓂ, ᓇᓴᓕᒃ ᑎᒍᒥᐊᖅᓯᒪᕗᖅ ᐃᓂᐅᔪᓂ ᐃᓄᑐᖃᕐᒥ ᐅᖃᐅᔾᔨᔨᐅᓪᓗᓂ ᐱᓕᕆᕝᕕᒃ ᐅᑭᐅᖅᑕᖅᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᖃᐅᔨᓴᕐᓂᕐᒥ ᔭᓗᓇᐃᕝᒥ ᐊᒻᒪ ᓯᓚᑦᑐᖅᓴᕐᕕᒡᔪᐊᖅ ᐋᓪᐴᑕᒥ.
2021−ᒥ, ᐃᓚᒋᔭᐅᓕᓚᐅᖅᐳᖅ CBC−ᑯᑦ ᑐᓴᒐᒃᓴᓕᐊᓄᑦ ᓱᓪᓗᖓᓂ ᖃᐅᔨᒪᔭᐅᕐᔪᐊᖅᑐᓂ.
ᑕᐃᒪᐃᒐᔪᒃᐳᖅ ᑭᖕ ᑭᒡᒐᖅᑐᖅᑎᖓ ᑲᓇᑕᒥ ᐅᖃᐅᓯᖃᕐᓂᕐᒥ ᓄᑖᖑᔪᓂ ᑲᓇᑕᒥ ᐃᑲᔪᕐᓂᕐᒧᑦ ᐃᓕᓴᕆᔭᐅᓂᖅ ᑎᒃᑯᐊᖅᑕᐅᓂᐅᔪᓂ ᑕᐅᕙᓂᒐᓚᒃ ᓴᖑᓂᖓᓂ ᓄᑖᖑᔪᒥ ᐊᕐᕌᒎᔪᒥ. ᓴᐃᒪᓐ ᑎᑎᕋᖅᓯᒪᓂᖓᓂ ᐃᓚᖃᕆᕗᖅ ᐱᙳᐊᕕᒡᔪᐊᕐᓂᐅᔪᓂ ᒎᓗᒥ ᐅᔭᒥᒃᑖᕐᓂᑯᒥ ᐅᓪᓚᒃᑎᒥᑦ ᐋᓐᑐᕋᐃ ᑎ ᒍᕌᔅ, ᑲᓐᑐᕆᒥ ᐃᙱᖅᑎᒥᒃ ᑎᐊᕆ ᑲᓛᒃ ᐊᒻᒪ ᐊᐱᖅᓱᖅᑎᐅᔪᖅ ᓇᐅᑦᐅᐊᕐ ᐃᓄᒃ ᐃᒡᒍᑎ.
“ᐊᑐᓂ ᑎᒃᑯᐊᖅᑕᐅᓂᐅᔪᓂ ᖁᕕᐊᓱᒍᑎᖃᖅᐳᖅ ᐱᔪᓐᓇᕐᓂᑐᐊᖑᙱᑦᑐᒥ, ᖃᐅᔨᒪᓂᕐᔪᐊᖏᓐᓂ ᐊᒻᒪ ᑐᕌᖓᓂᖓᓂ ᐃᓄᑐᐃᓐᓇᕐᓂ, ᑭᓯᐊᓂ ᐊᒥᓱᒻᒪᕆᐊᓗᖕᓂ ᐃᓅᓯᐅᔪᓂ ᐊᒃᑐᖅᓯᒪᔭᖏᓐᓂ ᐱᓕᕆᓂᖏᑎᒍᑦ, ᑕᐅᑐᙳᐊᖅᑕᖏᓐᓂ ᐊᒻᒪ ᐃᑲᔪᖅᓱᐃᓂᖏᓐᓂ,” ᐅᖃᓚᐅᖅᐳᖅ ᓴᐃᒪᓐ.
(0) Comments