ᑎᓴᒪᑦ ᐸᓯᔭᒃᓴᙳᖅᑎᑕᐅᔪᑦ ᐋᓐᓂᓱᐃᕆᓚᐅᖅᖢᑎᒃ ᐃᖃᓗᒃᑑᑦᑎᐊᕐᓂ

For the English version of this story, please see Four men charged after violent assault in Cambridge Bay.

ᐸᓖᓯᒃᑯᑦ ᐃᖃᓗᒃᑑᑦᑎᐊᕐᓂ ᐸᓯᔭᒃᓴᙳᖅᑎᑦᑎᓚᐅᕐᑐᑦ ᑎᓴᒪᓂ ᐊᖑᑎᓂ ᐋᓐᓂᕐᓱᐃᕆᕕᒡᔪᐊᓚᐅᖅᑎᓪᓗᒋ ᓄᓇᓕᖕᓂ ᒪᕐᕉᖕᓂ ᐊᖑᑏᖕᓂ ᐋᓐᓂᐊᕐᕕᒧᐊᖅᑕᐅᑎᑦᑎᓪᓗᑎᒃ ᐊᑦᒪᓐᑕᓐᒥ, ᐱᓇᓱᐊᕈᓯᕐᒥ ᓯᕗᓂᐊᒍᑦ ᓄᓇᖃᖅᑐᑦ ᓈᒻᒪᙱᓕᐅᕈᑎᖃᕈᓘᔭᓚᐅᖅᖢᑎᒃ ᓱᐴᕐᑐᒐᓕᕆᔨᐅᓂᕋᖅᑕᐅᔪᓂᒃ.

ᐸᓖᓯᒃᑯᑦ ᑐᓴᖅᑎᑦᑎᓚᐅᕐᑐᑦ ᐸᓯᔭᒃᓴᙳᖅᑎᑦᑎᓚᐅᕐᓂᖏᓐᓂ ᔪᓚᐃ 11-ᒥ ᑐᓴᒐᒃᓴᑎᒍᑦ, ᓇᓗᓇᐃᖅᖢᑎᒃ ᑎᒍᔭᐅᔪᑦ ᐊᒃᑐᐊᓂᖃᓚᐅᕐᓂᖏᓐᓂᒃ ᖃᓄᐃᓕᐅᕈᑎᕕᓂᕐᒥ ᔪᓚᐃ 8-ᖑᑎᓪᓗᒍ. ᐸᓖᓯᒃᑯᑦ ᐅᖄᓚᕝᕕᐅᒻᒪᑕ ᐅᐸᓕᓚᐅᕐᓯᒪᔪᑦ 4:00-ᒥ ᐅᓪᓛᒃᑯᑦ ᐅᖃᐅᔾᔭᐅᓪᓗᑎᒃ ᒪᕐᕉᒃ ᐊᖑᑏᒃ ᐋᓐᓂᕐᓱᖅᑕᐅᓚᐅᕐᓂᖏᓐᓂᒃ ᐊᒻᒪᓗ ᐋᓐᓂᐊᕕᖕᒥ ᑲᒪᒋᔭᐅᓕᕐᓂᖏᓐᓂᒃ.

ᐃᓚᒋᔭᐅᔪᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᖃᓚᐅᕐᑐᑦ ᐅᑯᐊ ᓇᐃᑕᓐ ᐊᖑᓛᓕᒃ, 28, ᐊᒻᒪ ᐋᓐᒐᔅ ᑲᐅᓱᓐᓂ,     20-ᖏᓐᓂ ᐅᑭᐅᓕᒃ, ᕿᓚᒃᓱᖅᑕᐅᓪᓗᑎᒃ ᐋᓐᓂᕐᓱᖅᑕᐅᔪᕕᓂᐅᓪᓗᑎ ᐊᒻᒪ ᐆᑎᑕᐅᓪᓗᑎ ᖃᓛᖅᓯᒪᔪᒧᑦ ᐃᒪᕐᒧᑦ. ᐊᖑᓛᓕᐅᑉ ᐊᓈᓇᖓ ᐅᖃᓚᐅᕐᑐᖅ ᑖᒃᑯᓂᖓ ᑎᓴᒪᓂᒃ ᐋᓐᓂᕐᓱᐃᔪᓂᒃ ᓱᐴᕐᑐᒐᓕᕆᔨᐅᓂᕋᐃᓪᓗᓂ. ᐅᖃᓚᐅᕐᑐᖅ ᑕᐃᒪᐃᓕᐅᓚᐅᕐᓂᖏᓐᓂᒃ 2:00 ᐅᓪᓛᒃᑯᑦ, ᐅᖃᕐᑐᖅ. ᑖᒃᑯᐊᓕ ᐊᖑᑏᒃ ᖃᖓᑕᓲᒃᑯᑦ ᐋᓐᓂᐊᕐᕕᓕᐊᖅᑎᑕᐅᓕᓚᐅᕐᑐᑦ ᐋᓐᓂᕐᓱᖅᑕᐅᔾᔪᑎᖏᓐᓄᑦ, ᐃᓚᒋᔭᐅᔪᑦ ᐅᖃᕐᑐᑦ.

ᓯᕗᓪᓕᒃᒥ ᑲᐅᔨᓴᖅᑕᐅᓕᖅᑎᓪᓗᒋᑦ ᐸᓖᓯᓄᑦ ᐱᓇᓱᐊᕈᓯᐅᓚᐅᕐᑐᒥ ᖃᐅᔨᓕᓚᐅᕐᑐᑦ ᒪᕐᕉᒃ ᐊᖑᑏᑦ ᐋᓐᓂᕐᓱᖅᑕᐅᓚᐅᕐᓂᖏᓐᓂᒃ ᒪᕐᕉᖕᓄᑦ ᐊᖑᑏᖕᓄᑦ ᐸᓯᔭᒃᓴᐅᑎᑕᐅᔫᖕᓄᑦ, ᑖᒃᑯᐊᓕ ᐃᒻᒥᖕᓂ ᖃᐅᔨᒪᖃᑦᑕᐅᑎᓪᓗᑎ. ᐸᓯᔭᒃᓴᐅᔪᑦ ᓱᒋᐅᑎᖃᓚᐅᕐᓯᒪᒻᒪᑕ ᒫᓂ ᑐᒃᑐ ᐊᖅᑯᑎᒥ, ᑐᓴᒐᒃᓴᓕᐊᕆᔭᐅᔪᖅ ᐅᖃᕐᓯᒪᓚᐅᕐᑐᖅ.

ᐸᓖᓯᒃᑯᑦ ᐅᖃᓚᐅᙱᑦᑐᑦ ᖃᓄᐃᑦᑐᒥ ᓱᒋᐅᑎᖃᓚᐅᕐᒪᖔᑕ, ᑭᓯᐊᓂᓕ ᐊᖑᓛᓕᐅᑉ ᐊᓈᓇᖓ ᐅᖃᓚᐅᕐᑐᖅ ᕙᐃᔅᐳᒃᑯᑦ ᑲᐅᑕᐅᔭᕐᓂᒃ, ᐳᐊᕐᕆᓯᓂ ᐊᒻᒪ ᕿᔾᔮᖅᓯᓯᓂ ᐊᑐᓚᐅᕐᓂᖏᓐᓂ ᐃᕐᓂᖓᓄᑦ.

ᐱᓇᓱᐊᕈᓯᕐᓕ ᐱᒋᐊᓕᓵᕐᑎᓪᓗᒍ ᐅᓇ ᖃᑦᑎᕆᔨᐅᖃᑕᐅᔪᖅ ᐊᒻᒪ ᒪᐃᔭᐅᓂᑯ ᑎᐅᕆᒃ ᐃᓚᐃᐊᔅ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓄᓇᖃᕐᑐᑦ ᐃᓱᒪᓚᐅᕐᓂᖏᓐᓂ ᑖᒃᑯᐊ ᐸᓯᔭᒃᓴᐅᑎᑕᐅᔪᑦ ᐃᒡᓗᕋᓛᕐᒦᑲᑕᖕᓂᕋᖅᑕᐅᓪᓗᑎ ᓄᓇᓖᑦ ᖃᓂᒋᔭᖓᓂ. ᐸᓖᓯᒃᑯᑦ ᓇᓗᓇᕿᕐᓯᓕᓚᐅᕐᑐᑦ ᐊᒻᒪ ᑎᒍᓯᓪᓗᑎᒃ ᑎᓴᒪᓂᒃ ᐸᓯᔭᒃᓴᓂ ᔪᓚᐃ 10-ᖑᑎᓪᓗᒍ, ᐃᑲᔪᖅᑕᐅᓪᓗᑎᒃ ᖃᐅᔨᓴᖅᑎᒻᒪᕆᖕᓂ ᐃᖃᓗᖕᓂ, ᑐᓴᒐᒃᓴᕆᔭᐅᔪᑦ ᐅᖃᕐᓯᒪᓚᐅᕐᑐᑦ.

ᕼᐋᑎ ᐋᓪᕼᐊᓯᔅ, 19, ᓯᓕᕗᐊᒃ, ᐳᕆᑎᔅ ᑲᓚᒻᐱᐊᒥᐅᑕᖅ; ᓚᐃ ᒌᐳᕆᐊᓪ ᒐᓖᑐ, ᐊᑦᒪᓐᑕᓐ, ᐋᐴᑕᒥ, ᐊᒻᒪ ᐊᔮᓐ ᑲᒻᕋᓐ ᕗᐊᓯ, 18, ᐊᑦᒪᓐᑕᓐᒥᐅᑕᖅᑕᐅᖅ ᐸᓯᔭᒃᓴᙳᖅᑎᑕᐅᓚᐅᕐᑐᑦ ᐊᔾᔨᒌᙱᑦᑑᑎᓄᑦ ᐸᓯᔭᒃᓴᐅᔾᔪᑎᓄᑦ, ᐃᓚᖃᖅᖢᓂ ᐋᓐᓂᕐᓱᐃᕆᕕᒡᔪᐊᕐᓂᕐᒥᒃ, ᑎᒍᓯᓯᒪᓂᕐᒥ, ᑎᒡᓕᒃᓯᒪᓂᕐᒥ ᖁᑭᐅᑎᒥᓐ ᐊᒻᒪᓗ ᓂᐅᕕᐊᒃᓴᖃᕐᓂᖅ ᐋᖓᔮᕐᓇᖅᑐᓂᒃ.

ᑕᒪᕐᒥ ᐱᖓᓱᑦ ᑎᒍᔭᐅᓯᒪᔪᑦ ᐊᒻᒪᓗ ᐃᖅᑲᖅᑐᐃᕕᒃᒥ ᐱᓕᕆᐊᖑᓛᖅᖢᑎᒃ ᐃᖃᓗᖕᓂ ᔪᓚᐃ 29-ᒥ.

ᑎᓴᒪᒋᔭᐅᔪᖅ ᐊᖓᑎ, 19-ᓂ ᐅᑭᐅᓕᒃ ᔮᓱᐊ ᒪᒃᕘᓴᓐ ᐃᖃᓗᒃᑑᑦᑎᐊᕐᒥᐅᑕᖅ ᐸᓯᔭᒃᓴᙳᖅᑎᑕᐅᓚᐅᕐᑐᖅ ᒪᕐᕉᖕᓂ ᐋᓐᓂᕐᓱᐅᕆᓂᕐᒥ. ᐊᓂᑎᑕᐅᓚᐅᕐᑐᓪᓗ ᐊᒻᒪ ᐃᖅᑲᖅᑐᐃᕕᒃᒧᑦ ᐅᐸᒍᑎᔭᕆᐊᖃᖅᖢᓂ ᐃᖃᓗᒃᑑᑦᑎᐊᕐᓂ ᓯᑎᐱᕆ 8-ᖑᓕᕐᐸᑦ. ᒫᓐᓇᓗ ᓱᓕ ᖃᐅᔨᓴᖅᑐᐃᑦ ᐸᓖᓯᑦ ᐅᖃᕐᓯᒪᓚᐅᕐᑐᖅ ᑐᓴᒐᒃᓴᐃᑦ.

ᐸᓖᓯᒃᑯᑦ ᑕᒪᑐᒥᖓ ᖃᐅᔨᒪᔪᓂᒃ ᐃᖃᓗᒃᑑᑦᑎᐊᕐᒥ ᐸᓖᓯᒃᑯᓐᓄᑦ ᐅᖄᓚᖁᔨᔪᑦ ᐅᕗᖓ 867-983-0123. ᖃᐅᔨᒪᔭᐅᔪᒪᙱᒃᑯᕕᑦ ᐅᖄᓚᔪᓐᓇᖅᑐᑎᑦ ᐱᕋᔭᒃᑐᓂᑦ ᓄᖅᑲᖅᑎᑦᑎᔨᓄᑦ (Crime Stoppers) ᐅᕗᖓ 1-800-222-8477.