ᐃᒡᓗᕕᖓᕐᓂ ᖃᕋᓴᐅᔭᕐᓄᑦ ᐊᕐᕌᒍᓂ 60-ᓂ
ᐃᓐᓇᑐᖃᐃᑦ ᓴᖅᑭᒋᐊᖅᑎᑦᑎᓯᒪᕗᑦ ᒪᒥᒍᓐᓇᕐᓂᕐᒥ ᐊᒻᒪ ᐱᓇᓱᒍᓐᓇᑦᑎᐊᕐᓂᕐᒥ ᓄᓇᕐᔪᐊᕐᒥ ᐃᓄᐃᑦ ᐅᓪᓗᖓᓂ ᖁᕕᐊᓲᑎᖃᖅᑎᓪᓗᒋᑦ ᐋᑐᕚᒥ
ᑭᐅᕈᓕᓐ ᐃᖃᓗᒃ, ᓄᓇᕗᑦ ᓯᕗᓂᒃᓴᕗᑦᒥ ᐃᓕᓐᓂᐊᕐᓂ ᓴᓂᑭᓗᐊᕐᒥᐅᑕᕕᓂᖅ ᑐᓂᓯᓄᖅ ᓇᑦᑎᐅᑉ ᓂᕿᖓᓂ ᐃᓕᓐᓂᐊᖃᑎᒥᓄᑦ ᔭᓯᑲ ᐱᙳᐊᕐᑐᖅᒧᑦ ᓄᓇᖃᖅᑐᕐᓕ ᑭᖓᐃᑦ ᐊᒻᒪ ᐃᖃᓗᐃᑦ ᓄᓇᕐᔪᐊᕐᒥ ᐃᓄᐃᑦ ᐅᓪᓗᖓᓂ ᖁᕕᐊᓲᑎᖃᕐᑎᓪᓗᒋ ᓄᕕᐱᕆ 3-ᒥ. “ᐊᖏᕐᕋᖅᓯᒪᓐᓇᖅᑰᔨᔪᖅ,” ᐃᖃᓗᒃ ᐅᖃᕐᑐᖅ ᓂᕿᓂ ᑐᓂᔭᐅᓯᒪᔪᓂ ᐅᑯᓇᙵ ᕆᑲᓐᓯᐅᓪ ᐃᓄᒃᓯᐅᑎ (Reconseal Inuksiut) ᐃᓄᒃᓯᐅᑎᑐᕈᒪᔪᓄᑦ. (ᐊᔾᔨᓕᐅᕆᔨ ᑰᕆ ᒪᐅᕌᒃ)
For English version, see From igloo to internet – Inuit have come a long way in 60 years, says Piita Irniq
ᑲᓇᑕ ᐃᓄᖕᒥ ᒐᕙᓇ ᔭᓄᕈᖃᕈᓐᓇᕈᑕ ᑕᐃᒪᓂ ᐃᓄᖕᒥ ᐳᕋᐃᒻ ᒥᓂᔅᑕᖃᕈᓐᓇᖅᑐᒃᓴᐅᒋᕗᖅ
ᐲᑕ ᐃᕐᓂᖅ ᑖᔅᓱᒧᖓ ᑐᕌᒐᖃᖁᒡᓚᐅᕐᑐᖅ ᓄᓇᕗᑦ ᓯᕗᓂᒃᓴᕗᑦᒧᑦ ᐃᓕᓐᓂᐊᖅᑎᓂ ᖁᕕᐊᓲᑎᖃᖅᑐᓂ ᓄᓇᕐᔪᐊᕐᒥ ᐃᓄᐃᑦ ᐅᓪᓗᖓᓂ ᐋᑐᕚᒥ ᓄᕕᐱᕆ 3-ᖑᑎᓪᓗᒍ.
“ᑐᕌᒐᖃᕋᓱᒋᑦᑎ ᐳᕋᐃᒻ ᒥᓂᔅᑕᐅᓇᓱᖕᓂᕐᒥ ᑲᓇᑕᒧᑦ,” ᐅᖃᕐᑐᖅ ᐃᕐᓂᖅ, ᓄᓇᕗᒧᑦ ᑲᒥᓯᓇᐅᓚᐅᕐᓯᒪᔪᖅ.
ᐃᓄᐃᑦ ᐱᔭᕆᐊᖃᖅᑕᖏᓐᓂ ᐱᓇᓱᒍᓐᓇᕐᒪᑕ, ᐊᔪᙱᖢᑎᒡᓗ ᐊᒻᒪ ᓴᓇᕈᓘᔭᕈᓐᓇᖅᖢᑎᒃ, ᐃᕐᓂᖅ ᐅᖃᕐᑐᖅ, ᐅᖃᐅᓯᖃᖅᖢᓂ ᓯᕗᓕᐅᖅᑎᑦ ᖃᓄᐃᓕᐅᕈᓯᖏᓐᓂ ᐅᑯᑎᑐᓇᖅ ᒐᕙᓇ ᔭᓄᕈᓪ, ᓯᕗᓕᐅᖅᑎᑦ, ᐊᒻᒪ ᓄᓇᕗᒧᑦ ᑲᒥᓯᓇᐅᓂᕐᒥ ᑕᒪᒃᑯᐊᓗ ᐃᓄᖕᓄᑦ ᐱᓕᕆᐊᖑᓯᒪᓪᓗᑎᒃ.
ᐃᕐᓂᖅ, ᐃᓅᓂᑯ ᐃᒡᓗᕕᒐᕐᒥ, ᐅᖃᓚᐅᕐᑐᖅ ᐃᓄᐃᑦ ᐊᕐᕌᒍᓖᑦ ᓇᓕᒧᖏᓐᓂ ᐃᒡᓗᓂᙶᕐᓂᕋᖅᖢᓂᖏᑦ ᒪᑯᓄᖓ ᒪᐃᑯᕈᕗᐃᕝᓄᑦ ᐊᕐᕌᒍᑦ 60 ᑐᖔᓂ, ᐊᒻᒪᓗ ᓄᑲᖅᖠᐅᓂᕐᓴᑦ ᐃᒡᓗᕕᒐᕐᓂᙶᖅᖢᑎᒃ ᖃᕋᓴᐅᔭᕐᓄᑦ ᑕᒪᐅᓇᑦᑕᐃᓐᓇᖅ ᐊᕐᕌᒍᓂ.
ᐃᓐᓇᐅᙱᓐᓂᕐᓴᐃᑦ ᐃᓄᐃᑦ ᓄᓇᕗᑦ ᓯᕗᓂᒃᓴᕗᑦᒦᑦᑐᑎᑐᑦ, ᐅᕙᓂ ᐋᑐᕚᒥ ᓯᓚᑦᑐᖅᓴᕐᕕᒃ ᐃᓄᖕᓄᑦ ᐃᓕᓐᓂᐊᖅᑐᓄᑦ ᓄᓇᕗᒥᑦ, ᓯᕗᓕᐅᖅᑎᒃᓴᐅᔪᑦ ᐱᔭᒃᓴᖃᖅᖢᑎᒃ “ᐊᖏᔪᒥᒃ ᐱᓕᕆᐊᒃᓴᒥ” ᓄᓇᕐᔪᐊᕐᒥᐅᓂ ᑐᓴᐅᒪᑎᑦᑎᔭᕆᐊᖃᕐᓂᕐᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᐊᒻᒪᓗ ᓄᓇᕐᔪᐊᖅ ᐅᖅᑰᓯᕙᓪᓕᐊᓂᖓᓂ ᓲᖃᐃᒻᒪ ᐃᓄᐃᑦ ᓯᕗᓪᓕᐅᓪᓗᑎᒃ ᑕᒪᑐᒥᖓ ᖃᐅᔨᓯᒪᖕᒪᑕ.
“ᐱᒋᐊᖅᑳᕐᓂᑰᖕᒪᑦ ᐅᑭᐅᕐᑕᖅᑐᕐᒥ, ᑭᖑᓂᐊᒍᓪᓗ ᓄᓇᕐᔪᐊᓕᒫᒥ ᐊᒃᑐᐃᓪᓗᓂ.”
ᐃᕐᓂᖅ ᐃᓕᓐᓂᐊᕆᐊᖅᑎᑕᐅᓚᐅᕐᓯᒪᔪᖅ ᐅᖃᖅᖢᓂ “ᑎᒡᓕᒃᑕᐅᓚᐅᕐᓯᒪᓂᕐᒥᓂ” ᐊᒻᒪᓗ ᐊᐅᓪᓚᖅᑎᑕᐅᓪᓗᓂ ᓲ ᔫᓴᕝ ᐴᓂᐄ ᐅᓪᓗᒃᑯᑦ ᐃᓕᓐᓂᐊᕐᕕᒃᒧᑦ ᐃᒡᓗᓕᒑᕐᔪᒃᒥ.
“ᐊᒃᓱᐊᓗᒃ ᐋᓐᓂᕐᓱᖅᑕᐅᓚᐅᕐᓯᒪᒐᑦᑕ ᑐᒃᓯᐊᕐᕕᒃᒧᑦ ᐊᒻᒪᓗ ᒐᕙᒪᒃᑯᓐᓄᑦ ᐃᓄᒃᑎᑐᑦ ᐅᖃᓪᓚᖃᑦᑕᕐᓂᑦᑎᓐᓄᑦ,” ᐅᖃᕐᑐᖅ ᐅᖃᓪᓚᒃᑎᓪᓗᒍ ᐃᓄᒋᐊᓄᑦ ᖃᓪᓗᓈᑎᑑᓕᖅᐸᒃᖢᓂ ᐊᒻᒪ ᐃᓄᒃᑎᑐᑦ. “ᓲᓕ ᒫᓐᓇ ᐃᓄᒃᑎᑐᑦ ᐅᖃᕈᓐᓇᑦᑎᐊᖅᑐᖓ.”
“ᐅᖃᐅᔾᔭᐅᓚᐅᕐᓯᒪᒐᑦᑕ ᑭᓱᙳᓚᐅᕐᓯᒪᔾᔮᙱᓐᓂᑦᑎᓐᓂ. ᑕᑭᒋᑦᑎ! ᐅᕝᕙᐅᕗᒍᑦ,” ᐅᖃᕐᑐᖅ ᐃᓄᒋᐊᓄᑦ ᑭᓯᐊᓂᓕ ᓄᖃᕆᐊᖃᓚᐅᑲᒃᖢᓂ ᐃᓕᓐᓂᐊᖅᑏᑦ ᐸᑦᑕᒃᑐᓕᕐᓂᖏᓐᓄᑦ.
ᒪᓃᑦᑐᖅ ᑖᒻᓴᓐ, ᓄᓇᕗᒥᑦ ᓯᕗᓪᓕᖅᐹᖑᓚᐅᕐᓯᒪᔪᖅ ᓄᓇᕗᒥᑦ ᑲᑎᒪᔨᕐᔪᐊᓂ ᒥᓂᔅᑕᐅᓚᐅᕐᓯᒪᔪᖅ ᐊᕐᓇᐅᓪᓗᓂ, ᐃᕐᓂᐅᑉ ᐅᖃᖅᑕᖓᓂ ᐅᑲᒃᑲᓐᓂᖅᑐᖅ ᐃᓄᐃᑦ ᓴᙱᓂᖏᓐᓂᒃ.
“ᐃᓄᖕᓂᙶᕋᑦᑕ ᒪᑭᑕᓯᒪᔪᓂᒃ ᐱᖓᓱᓂ ᐱᖁᑎᖃᖅᖢᑎᒃ. ᒪᑯᓂᖓ ᐊᐳᑎᒥ, ᓴᐅᓂᕐᒥ ᐊᒻᒪ ᐅᔭᕋᖕᒥ. ᑭᓲᓗᐊᙱᑦᑐᑦ,” ᑖᒻᓴᓐ ᐅᖃᕐᑐᖅ.
ᑭᓯᐊᓂᓕ ᐃᓄᐃᑦ “ᐱᓕᕆᔨᑦᑎᐊᕚᖑᔪᑦ ᐃᓂᒋᔭᖏᓐᓂ,” ᐅᖃᕐᑐᖅ. ᐃᒡᓗᕕᒐᓕᐅᓚᐅᕐᓯᒪᖕᒪᑕ, ᐅᓈᓕᐅᖅᖢᑎᒃ, ᐅᓗᓂ ᐊᒻᒪᓗ ᖃᔭᕐᒥ.
“ᖃᔭᖃᕋᑦᑕ,” ᑖᒻᓴᓐ ᐅᖃᕐᑐᖅ, ᐃᓄᒃᑎᑐᑦ ᐅᖃᓪᓚᕆᒃᖢᓂᐅᒃ.
“ᑲᔮᒃᙳᙱᒻᒪᑦ,” ᐅᖃᕐᑐᖅ, ᑎᔅᓯᒃᑕᖅᑐᖃᐅᖢᓂ ᐅᖃᕐᓂᖓᓂ ᐅᖃᐅᓯᕆᔭᐅᕙᒃᑐᑎᑐᑦ.
ᓄᓇᕐᔪᐊᕐᒥ ᐃᓄᐃᑦ ᐅᓪᓗᖓ ᓄᕕᐱᕆ 7-ᒦᑦᑐᖅ, ᓇᓪᓕᐅᑎᕝᕕᖓᓂ ᐄᐸᓐ ᕼᐋᑉᓴᓐ, ᑖᓐᓇ ᐱᒋᐊᖅᑎᑦᑎᓚᐅᕐᓯᒪᔪᖅ ᐃᓄᐃᑦ ᐅᑭᐅᕐᑕᖅᑐᕐᒥᐅᑕᓄᑦ ᑲᑎᒪᔨᕐᔪᐊᓂᒃ, ᓂᐱᒋᔭᐅᔪᑦ ᐃᓄᖕᓄᑦ ᓄᓇᕐᔪᐊᓕᒫᒥ.
ᐃᓄᐃᑦ ᐋᑐᕚᒥ ᖁᕕᐊᓲᑎᖃᖃᑦᑕᕐᒪᑕ ᓈᑦᑏᖑᔭᒃᑯᑦ ᓯᕗᓂᐊᒍᑦ ᑕᐃᒪᙵ 2021-ᒥ ᐋᓂ ᐳᑐᒍᒃ ᒥᕐᖑᐃᕐᓯᕕ ᐊᑦᑎᖅᑕᐅᓚᐅᕐᓯᒪᑎᓪᓗᒍ ᑎᑎᕋᐅᔭᖅᑎᐅᓚᐅᕐᓯᒪᔪᒧᑦ.
“ᐅᓇ ᒥᕐᖑᐃᕐᓯᕕᒃ ᐃᓕᔅᓯᓐᓅᖓᔪᖅ,” ᐋᑐᕚᒥ ᑲᑎᒪᔨ ᓯᑕᕙᓂ ᐸᓛᓐᑦ, ᑲᒪᒋᔭᓕ ᕇᑑ-ᕚᓂᐃᒥ ᐃᓚᖃᖅᖢᓂ ᒥᕐᖑᐃᕐᓯᕕᒃᒥ ᐅᖃᐅᔾᔨᓚᐅᕐᑐᖅ 200-ᖏᓐᓃᑦᑐᓄᑦ ᐃᓄᖕᓄᑦ.
“ᐅᓇ ᖁᕕᐊᓲᑎᖃᕐᕕᒋᔪᓐᓇᖅᑕᔅᓯ ᐃᓕᖅᑯᓯᑦᑎᐊᕚᓗᒃᓯᓐᓄᑦ, ᐅᖃᐅᓯᓯᓐᓄᓪᓗ.”
(0) Comments