ᐊᕐᕕᐊᕐᒥᐅᑕᖅ ᐅᐊᓃᑕ ᑕᐃᓗ ᑐᓴᒐᒃᓴᓕᕆᔨᐅᓕᕐᑐᖅ ᑕ ᓈᓴᓄᓪᒧᑦᓰᐲᓰᒃᑯᓐᓄ ᑐᓴᒐᒃᓴᓕᐅᖅᑎ ᐊᑐᖅᑕᐅᕙᙱᑦᑐᒥ ᐊᑐᓚᐅᕐᑐᖅ ᓯᕗᓪᓕᖅᐹᖑᓪᓗᓂ ᐃᓄᒃ ᑐᓴᒐᒃᓴᓕᕆᔨᐅᓂᕐᒥᒃ

ᓰᐲᓰᒃᑯᓐᓄᑦ ᑐᓴᒐᒃᓴᓕᐅᕐᑎ ᐅᐊᓃᑕ ᑕᐃᓗ ᑐᓴᒐᒃᓴᓕᕆᓂᕐᒥ ᖁᕕᐊᒋᔭᖃᐃᓐᓇᐅᔭᕐᓯᒪᖕᒪᑦ.

“ᐊᓈᓇᒪ ᐅᖃᐅᑎᓚᐅᕐᓯᒪᔮᖓ ᐊᕐᕌᒍᖃᖅᖢᖓ 5ᓂ ᑐᓴᒐᒃᓴᓂ ᖁᙱᐊᖃᑦᑕᓕᓚᐅᕐᓂᓐᓂᒃ,” ᑕᐃᓗ ᐃᒡᓚᕐᖢᓂ ᐅᖃᕐᑐᖅ ᐅᖄᓚᐅᑎᒃᑯᑦ ᑐᕌᓐᑐᒥ.

ᐅᓇ ᖁᕕᐊᒋᔭᖓ ᐊᖏᕐᕋᖓᓂᙶᕈᑎᒋᔭᖓ ᐊᕐᕕᐊᓂᒃ ᒪᐅᖓ ᑲᓇᑕᒥ ᑕᐅᑐᒃᑕᐅᓛᖑᕙᒃᑐᒧᑦ ᑐᓴᒐᒃᓴᓕᕆᓂᕐᒧᑦ.

ᑕᖅᑭᒐᓴᐃᑦ ᓯᕗᓂᐊᓂᒃ ᓯᕗᓪᓕᖅᐹᖑᓪᓗᓂ ᐃᓄᒃ ᑐᓴᒐᒃᓴᓕᕆᔨ ᓵᓚᒃᓴᐅᓯᐊᓚᐅᕐᓯᒪᓪᓗᓂ ᐆᒥᖓ ‘ᐱᐅᓂᖅᐹᖅ ᑲᓇᑕᒥ ᑐᓴᒐᒃᓴᓕᐅᖅᑎ’ 2023ᒥ ᑲᓇᑕᒥ ᑕᑯᓐᓇᒐᒃᓴᓄᑦ ᐃᓕᓴᕆᔭᐅᔾᔪᑎᓂᒃ (Canadian Screen Awards), ᑕᐃᓗ ᐱᓇᓱᐊᕈᓯᐅᓚᐅᕐᑐᒥ ᓯᕗᓪᓕᖅᐹᖑᓪᓗᓂ ᑐᓴᒐᒃᓴᓕᐅᕐᑎᒧᑦ ᐱᖃᑎᒋᔭᐅᓚᐅᕐᑐᖅ ᓰᐲᓰᒃᑯᑦ ᑕ ᓈᓴᓄᓪᖓᓂ, ᑲᓇᑕᒥ ᑐᓴᒐᒃᓴᓕᕆᔨᒻᒪᕇᑦ ᐅᓐᓄᒃᑯᑦ.

ᐊᒻᒪᓗ ᑕᐃᒪᐃᓕᐅᓚᐅᕐᖢᓂ ᐊᑐᖅᖢᓂ ᐅᑭᐅᕐᑕᖅᑐᕐᒥ ᐱᒻᒪᕆᔭᖃᕐᓂᕐᒧᑦ ᓇᓗᓇᐃᒃᑯᑎᖓᓂ.

ᐊᓐᓄᕌᖅᓯᒪᓚᐅᕐᑐᖅ ᐊᑐᖅᑐᐊᖅᑕᖏᓐᓂᒃ ᐊᓐᓄᕌᓂᒃ ᐅᑭᐅᕐᑕᖅᑐᕐᒥ ᓴᓇᐅᒐᓕᐅᖅᑎᓂᒃ ᐊᒻᒪᓗ ᐱᖃᓐᓇᖏᓐᓂᒃ, ᑕᐃᓗ ᐊᑐᓚᐅᕐᑐᖅ ᒪᑯᓂᖓ ᒨᔅ ᐊᒥᖓᓂᒃ ᐅᓕᒥᑦ ᔭᐃᑲᐅᓪᓗᓂ ᓴᓇᔭᐅᓂᑯ ᑲᐃᓕᓐ ᐸᐃᑯᒧᑦ, ᐊᒻᒪ ᓄᓇᕋᙳᐊᓕᖕᒥ ᔭᐃᑲᒃᒥ ᖁᒡᓗᖅᑑᖅᒥᐅᑕᐅᑉ ᐹᐳᕋ ᐅᐊᓴᓐ ᓴᓇᔭᖓᓂᒃ ᐊᒻᒪᓗ ᖁᖓᓯᒥᐅᑕᒥᒃ ᔫᑳᓐᒥᐅᑕᒧᑦ ᓴᓇᔭᐅᔪᖅ ᕚᔅᑎ ᐃᐊᑦᓱᓪᒧ, ᐊᓯᖏᓐᓂᒡᓗ.

“ᐅᑭᐅᕐᑕᖅᑐᕐᒥᐅᑕᕐᓂ ᑭᒡᒐᖅᑐᐃᓇᓱᒃᑲᒪ ᐊᑐᖅᑕᒃᑯᑦ,” ᐅᖃᕐᑐᖅ ᑕᐃᓗ, ᔭᓗᓇᐃᒥ ᑐᓴᒐᒃᓴᓕᐅᖅᑎ ᑕ ᓈᓴᓄᓪᒧᑦ.

ᕿᓯᖕᒥ ᓴᓇᓯᒪᔪᖅ ᐊᐃᖃᙱᑦᑐᖅ ᐊᑐᕐᑕᖓ ᔪᓚᐃ 24 ᑖᔅᓱᒧᖓ ᐱᒻᒪᕆᒋᔭᐅᓚᐅᕐᑐᖅ.

“ᐸᓂᖓ, ᒥᕐᓱᖅᑎᐅᖕᒪᑦ, ᑖᔅᓱᒥᖓ ᓴᓇᓚᐅᕐᒪᑦ ᐅᕙᓐᓄᑦ ᑕᑯᒃᓴᐅᔭᕆᐅᕐᓂᐊᖅᑎᓪᓗᒍ ᑐᓴᒐᒃᓴᓕᕆᓗᑕ ᑕᐃᒪᓕ ᑖᓐᓇ ᐱᒻᒪᕆᐊᓗᒃ ᐅᕙᓐᓄᑦ,” ᑕᐃᓗ ᐅᖃᕐᑐᖅ.

“ᐃᓱᒪᒍᕕᑦ ᑖᒃᑯᓂᖓ ᓴᖅᑭᔮᖃᑦᑕᖅᑐᓂᒃ, ᐅᓇ ᑕ ᓈᓴᓄᓪ ᓴᖅᑭᔮᖅᑎᑦᑎᓚᐅᕐᓯᒪᙱᒻᒪᑦ ᓇᑦᑎᐅᑉ ᕿᓯᖓᓂ, ᒨᔅ ᐊᒥᖓᓂᒃ ᐅᕝᕙᓘᓐᓃᑦ ᑐᒃᑑ ᐊᒥᖓᓂ ᑕᐃᒪᓕ ᑕᑯᔭᕆᐅᓚᐅᕐᑐᓯ ᑕᒪᐃᓐᓂ ᐱᖓᓱᓂ ᐊᑕᐅᑦᑎᒃᑯᑦ,” ᐃᒡᓚᖅᖢᓂ ᐅᖃᕐᑐᖅ.

“ᐃᓱᒪᔪᖓᓗ ᑖᓐᓇ ᐅᐊᑲᓪᓚᕈᓘᓂᖓᓂᒃ.”

ᐊᒻᒪᑦᑕᐅᖅ ᑕᐃᓗᒧᑦ ᐱᒻᒪᕆᐅᓚᐅᕐᒥᔪᖅ ᑕᐃᔅᓱᒪᓂ ᑕᑯᑎᑦᑎᑲᑕᓚᐅᕐᓂᖓ ᐅᑭᐅᕐᑕᖅᑐᕐᒧᑦ ᑐᕌᖓᓗᐊᖅᑐᓂᒃ ᐅᓂᒃᑳᓕᐅᕆᔭᐅᔪᓂᒃ ᑖᔅᓱᒧᖓ ᑕᑯᔭᐅᑎᑕᐅᔪᓐᓇᖅᑐᓂᒃ.

ᐅᓇ ᐃᓚᖃᓚᐅᕐᑐᖅ ᐅᓂᒃᑳᓕᐊᕆᔭᐅᔪᓂᒃ ᓯᕗᓪᓕᖅᐹᒥᑦ ᐃᓄᐃᑦ ᐳᕙᒡᓗᖕᓂᑯᐃᑦ ᑕᑯᔭᐅᔭᖅᑐᖅᖢᑎᒃ ᐳᕙᒡᓗᒃᑐᑯᕝᕕᖕᒥ ᕼᐋᒪᑕᓐ, ᐋᓐᑎᐅᕆᐅᒥᑦ ᑕᐃᑯᙵᓚᐅᕐᓯᒪᓪᓗᑎᒃ ᓱᕈᓯᐅᑎᓪᓗᒋᑦ — ᑕᐅᕙᓂᓗᑦ ᐃᓄᑑᓐᓇᖅᑐᖅᓯᐅᖅᐸᓚᐅᖅᖢᑎᒃ ᐃᓚᖏᓐᓂᒃ ᕿᒪᐃᓯᒪᓂᕐᒧᑦ.

“ᐱᓇᓱᐊᕈᓯᓐᓂ ᐱᒻᒪᕆᐅᓛᖑᓚᐅᕐᑐᖅ ᐅᓇ ᓴᓗᒥ ᐊᕙ ᐅᖃᓪᓚᖃᑎᖃᖅᑎᓪᓗᒍ ᐃᓐᓇᐅᓕᖅᑐᓄᑦ ᐃᓐᓇᕐᓂ ᐳᓛᖅᖢᓂ,” ᑕᐃᓗ ᐅᖃᓚᐅᕐᑐᖅ ᓰᐲᓰᒃᑯᑦ ᑐᓴᒐᒃᓴᓕᐅᖃᑎᒥᓂᒃ.

ᑖᒃᑯᐊ ᐃᓄᒃᑎᑐᑦ ᐅᖃᓪᓚᖃᑎᒌᓚᐅᑲᓚᐅᕐᑑᑦ ᐊᐱᕐᓱᙱᓐᓂᖓᓂᒃ.

“ᐃᓱᒪᓚᐅᕋᒪ ᐅᖃᓪᓚᖃᑎᖃᕆᐊᖃᕐᓂᓐᓂᒃ ᐊᕙᒥ ᐅᕘᓇ ᑕ ᓈᓴᓄᓪᑯᑦ, ᐃᓄᒧᑦ ᐃᓄᒃᒥ, ᐆᒥᒪ ᐃᓄᐃᑦ ᖃᓄᐃᑉᐸᓪᓕᐊᓯᒪᓂᖏᓐᓄᑦ ᐃᓚᒋᔭᐅᓯᒪᓪᓚᕆᒃᑐᒥᒃ.”

ᑐᓴᒐᒃᓴᖃᓚᐅᕐᒥᔪᑦ ᓇᐹᑐᓂᒃ ᐃᑭᑦᑐᐊᓗᖕᓂ ᔭᓗᓇᐃ ᖃᓂᒋᔭᖓᓂᒃ, ᐅᓂᒃᑳᖅ ᑐᓴᐅᒪᔭᐅᔭᕆᐊᖃᕆᔭᖓ ᑕᐃᓘ ᐅᔾᔨᕆᔭᐅᓯᒪᓂᐊᕐᒪᑦ.

“ᓄᓇᖃᖅᑳᖅᑐᓂᒃ ᑐᓴᒐᒃᓴᓕᐅᖅᑎᑕᖃᕆᐊᖃᕐᒪᑦ ᓄᓇᖃᖅᑳᖅᑐᓄᑦ ᐅᓂᒃᑳᓂᒃ ᐊᒻᒪᓗ ᑭᒃᓇᑐᐃᓐᓇ ᐅᓂᒃᑳᓕᐅᖃᑦᑕᕈᒪᔪᖅ ᑐᓴᒐᒃᓴᓕᕆᓂᕐᒥᒃ ᐱᓇᓱᖁᓪᓗᑎᒍᑦ,” ᐅᖃᕐᑐᖅ.

“ᒫᓐᓇ ᐅᓄᕈᓘᔭᕐᒪᑕ ᖃᓄᐃᓕᐅᕈᑎᐅᔪᓐᓇᖅᑐᑦ ᓄᓇᖃᖅᑳᖅᑐᑦ ᐃᓅᓱᒃᑐᐃᑦ ᐃᓱᒪᒋᔭᖃᖁᓪᓗᒋ ᑕᒪᑐᒥᖓ ᐱᓕᕆᐊᖃᕈᓐᓇᕐᒥᖕᒪᑕ,” ᐅᖃᕐᑐᖅ.

ᔪᓚᐃ 28ᒥ ᑕᐃᓗ ᑭᖑᓪᓕᖅᐹᖃᓚᐅᕐᑐᖅ ᑕ ᓈᓴᓄᓪᒥ. ᑭᖑᓪᓕᕐᒥᓪᓕ ᐅᖃᓪᓚᒃᑎᐅᓚᐅᕐᑐᖅ ᓄᓇᕐᔪᐊᖅᒥ ᐅᓂᒃᑳᓕᕆᓂᕐᒧᑦ ᓰᐲᓰ ᓈᓚᐅᑎᒃᑯᑦ ᐱᓇᓱᐊᕈᓯᕐᒥ ᑕᒪᑐᒪᓂᒃ ᐅᑎᓚᐅᙱᓐᓂᖓᓂᒃ ᐊᖏᕐᕋᖓᓄᑦ ᔭᓗᓇᐃᒧᑦ ᑕᐃᑲᓂᓗ ᐃᓱᒪᓪᓗᓂ “ᓯᓂᑐᐃᓐᓇᓛᕈᒪᓂᕐᒥᒃ,” ᐃᒡᓚᖅᖢᓂ ᐅᖃᕐᑐᖅ.

ᑕᐃᓗ ᐅᖃᓚᐅᕐᑐᖅ ᐊᖅᑯᑎᖓ ᑐᓴᒐᒃᓴᓕᕆᓂᕐᒧᑦ “ᐊᑯᓂᐊᓘᓚᐅᕐᑐᖅ ᒪᓂᕋᐅᓇᓂᓗ.”

ᕿᑐᕐᖓᖃᓕᖅᑎᓪᓗᒍ ᐊᒻᒪ ᐃᖅᑲᓇᐃᔮᖃᖅᓯᒪᓪᓗᓂ ᐊᔾᔨᒌᙱᑦᑑᑎᓂᒃ ᐃᓄᐃᑦ ᐊᒻᒪ ᒐᕙᒪᒃᑯᑦ ᑲᑐᔾᔨᖃᑎᒌᖏᓐᓂ ᐊᕐᕌᒍᖃᖅᑎᓪᓗᒍ 20ᖏᓐᓂᒃ, ᑕᐃᓗ ᐊᕐᕌᒍᖃᓕᖅᖢᓂ 30ᓂ ᐃᓕᓐᓂᐊᕆᐊᓕᓚᐅᕐᓯᒪᔪᖅ ᑐᓴᒐᒃᓴᓕᕆᓂᕐᒥᒃ ᐅᕙᓂ ᐃᓕᓐᓂᐊᕐᕕᐊᓗᒃ ᑐᓴᒐᒃᓴᓕᕆᓂᕐᒧᑦ ᑯᐊᐳᕇᓴᓐᒥ ᐅᐃᓂᐱᒡᒥᑦ.

ᐃᖅᑲᓇᐃᔮᖃᓕᓚᐅᕐᓯᒪᔪᖅ ᐊᐲᑏᐊᓐᑯᓐᓂᒃ (APTN) ᐊᒻᒪ ᐅᑭᐅᕐᑕᖅᑐᕐᒧᑦ ᐅᑎᖅᖢᓂ ᐅᖃᓪᓚᒃᑎᐅᔭᖅᑐᖅᖢᓂ ᓰᐲᓰᒃᑯᑦ ᓄᐊᑦᐲᑦᖓᓂᒃ (CBC’s Northbeat) ᐃᓱᒪᒋᓯᒪᓂᑯᖓᓂᒃ ᐃᓅᓱᒃᑑᓂᖓᓂᒃ.

“ᐅᓇ ᐊᔪᙱᓕᕈᑎᒋᓚᐅᕐᑕᕋ,” ᐅᖃᕐᑐᖅ.

ᑭᓯᐊᓂᓕ, “ᐊᔪᕐᓇᖅᑰᔨᙱᑎᑕᕋ, ᑭᓯᐊᓂᓕ ᐊᔪᕐᓇᕈᓘᔭᕐᑐᖅ,” ᑕᐃᓗ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᐱᖓᓱᐃᖅᖢᓂ ᓰᐲᓰᒃᑯᓐᓄᑦ ᐱᓇᓱᒃᓯᒪᓪᓗᓂ ᐃᓚᐅᓕᑕᐃᓐᓇᓚᐅᕐᓯᒪᔪᖅ ᑖᒃᑯᓄᖓ.

ᐃᓕᓐᓂᐊᒃᑲᓐᓂᓕᖅᖢᓂ ᓄᑕᕋᖃᖅᖢᓂ ᒥᑭᑦᑐᓂᒃ ᐊᑯᓂᐅᒍᑎᐅᓚᐅᕐᒪᑦ ᐊᒻᒪ ᐊᒃᓱᕈᕐᓇᖅᖢᓂ ᐊᒻᒪᓗ ᐃᑲᔪᖅᑕᐅᑦᑎᐊᖅᖢᓂ ᐊᐃᑉᐸᖓᓄᑦ ᐊᒻᒪ ᐊᓈᓇᖓᓄᑦ.

“ᑭᓱᑐᐃᓐᓇᐃᑦ ᐊᑐᐃᓐᓇᐅᕙᙱᒻᒪᑕ ᑭᓯᐊᓂᓕ ᐱᓕᕆᕈᓘᔭᕐᓇᖅᖢᓂ ᐊᒻᒪ ᕿᓄᐃᓵᕆᐊᖃᕐᓇᖅᖢᓂ,” ᐅᖃᕐᑐᖅ.

“ᐃᓱᒪᓚᐅᕐᓯᒪᙱᑦᑐᖓ ᑕ ᓈᓴᓄᓪᒥ ᑐᓴᒐᒃᓴᓕᕆᔨᐅᓂᐊᕆᐊᒃᓴᖅ. ᐅᓇ ᐃᓱᒪᒋᕙᒃᑕᒪ ᐅᖓᑖᓅᒻᒪᕆᓚᐅᕐᑐᖅ ᐊᑐᖅᑕᐅᔪᓐᓇᖅᑐᓂᒃ.”

ᑭᓯᐊᓂᓕ, ᐅᓇ ᐅᖃᓪᓚᒃᑎᐅᓂᖓ ᐃᒻᒥᓅᑐᐃᓐᓇᐅᖁᙱᑕᖓ.

“ᑐᓴᐅᒪᖁᒐᒃᑭᑦ ᐃᓄᐃᑦ ᐅᑭᐅᕐᑕᖅᑐᕐᒥ ᐱᓕᕆᐊᖃᕐᓂᓐᓂᑦ ᑖᔅᓱᒥᖓ ᑖᒃᑯᓄᖓ ᑕᐃᒪᓐᓇ ᐊᓂᒍᐃᔪᓐᓇᕐᓂᖏᓐᓂᒃ ᖃᐅᔨᒪᓕᕐᓂᐊᕐᒪᑕ,” ᑕᐃᓗ ᐅᖃᕐᑐᖅ.

“ᐃᓄᐃᑦ ᑐᓴᒐᒃᓴᓕᐅᕆᐅᖃᓚᐅᕐᓯᒪᔪᑦ ᑕ ᓈᓴᓄᓪᒥ ᖃᖓᑲᓪᓚᕈᓗᒃ. ᐅᓄᕐᒪᑕ ᑐᓴᒐᒃᓴᓕᐅᕐᑎᑦ, ᐱᓕᕆᐊᖃᒃᑳᓗᐃᑦ ᓯᕗᓂᙶᓐᓂᒃ ᐊᔪᕋᔭᓚᐅᙱᑦᑐᑦ ᑖᔅᓱᒥᖓ ᐱᓕᕆᐊᖃᕆᐊᒃᓴᕐᒥ.

“ᖃᐅᔨᒪᙱᑦᑐᖓ ᒫᓐᓇ ᑕᐃᒪᐃᔾᔪᑎᖃᕐᓂᖓᓂᒃ ᑭᓯᐊᓂᓕ ᑕᐃᒪᐃᓕᕐᑐᖅ ᐊᒻᒪᓗ ᐊᑐᑐᐃᓐᓇᕈᒪᙱᖢᒍ,” ᐅᖃᕐᑐᖅ.